الفصل الثالث عشر

الفصل الثالث عشر فلة شدت ما بكت في السرير لمن نامت(احلى نومة...النومة بتاعت بعد الدقة) فتحت عيونها كانت الساعة 10 كانت جعانه شديد...المهم قامت من السرير وطلعت بره اتلفتت يمين وشمال ماف زول وجري على المطبخ...فتح الثلاجة ملت صحنا ولزتو للمايكرويف...شالتو وادبت براحة على الاوضة قعدت في البلكونة اكلت وجات راجعة السرير...رقدتها في السرير جاتها عمتها.

سوزي: فلة ما اكلتي شي من قبيل...اخت ليك تاكلي. فلة: ماعايزة(

سوزي: انتي زعلانه من ابوك دي حاجة براها...لكن ما معناها ما تاكلي...حتموتي كدا من الجوع.

فلة: خليني اموت وارتاح زاتو(احم احم..(امشي البلكونه يا سوزي حتلقي دلايل للجريمة) سوزي وهي بتقعد جمبها: والله بيني وبينك حبيت اللوك الجديد...بس هم ما حيفهمو ليك كدا...هسه ماما قالت يودوها لي ست الكوفير تضربها بي عكازها.(سوبر ماما زينب) فلة: هو شعري انا في النهاية) سوزي: خلاص معليش...يلا قومي اعمل ليك شي تاكليهو. فلة: والله ما عندي نفس(عيني يا عيني)(.

سوزي: طيب اجيب ليك شي تشربيهو. فلة: في شنو(

سوزي: قونقوليز.

فلة: طيب ممكن.(

سوزي: يلا ثواني واجيبو ليك.

استنتها طلعت وقفت على حيلها ورقصت بي استهبال... وجرت على البلكونه...سمعت صوت ضحكات اخواتها ومارين...عاينت تحت...لقتهم قاعدين مع مراد بيلعبو معاه بي مسدسات الموية.

كانو بيضحكو وبيتجارو...لي اول مرة تشوف مراد بيضحك...كان شايل نرجس وبيرش لي ياسمين الموية في وشها(انا عايزة العب هيه.) سوزي جاتها وهي شايلة الكباية: هاك. فلة: شكرا.

وقفو سوا وبقو بعاينو ليهم. سوزي: كيوت صح؟

فلة: منو

سوزي: مراد ومارين.

فلة: مارين اي...مراد لا. سوزي: انتي بتكرهيهو كدا لي؟ فلة: ما عارفة والله. سوزي: ما تكرهيهو... مسكين هو لا ام لا اب بس هو واختو. فلة: ما بيدي.

عند هزاع

كان قاعد بيشخبت في طرف الكتاب بتاعو...وبيفكر في فلة.

في بعض المتابعين طلبو اني اوصف شكلو اكثر...هزاع طويل يعني ما عمود... لا طول حلو... عيونو طويلة...حواجبو مقوسة وطويلة...لونو اصفراني كدا نضيف...شعرو دايما بيرفعو فوق...زي ما بتقول حبوبة منقا قاجي لي فوق...ونفس الشكل همام...بس زي ما قلنا همام بلبس تقويم. عروة ضربو بي المخدة: هي انت انت. هزاع: شنو؟

عروة: شنو سرحان كدا ليك ساعة كاملة. هزاع: اها وبعدين.

عروة شوف مذاكرتك احسن...امي اليوم كلو بتسأل منكم...قلت ليها بيذاكروا. هزاع: انا نعست زاتو بعد دا النوم.

عروة: همام وين هزاع: في البلكونه.

عروة: بيعمل في شنو؟

هزاع: حيكون بيقرا يعني؟ ما بيخلط كرهنا زاتو. عروة: اها دي الكم؟

هزاع وهو بينفض سريرو: الراااابعة.

عروة: بسم الله ماشاء الله...مطبق الشرع يعني. هزاع: بالضبط كدا.

كروزو كان بيتكلم مع ايهم. ايهم: دي واحدة متخلفة بس كروزو: لا يا ايهم بالجد انا غلطان.

ايهم: يعني عايز تفهمني انو دي اول مرة بالنسبة ليها.

كروزو: ايهم قلت ليك فلة ما زي باقي البنات انا عارفها كويس...ياخ دي زي الاطفال بريئة شديد. ايهم: دا تمثيل منها والله... بعدين انتو بتحبو بعض على شنو لازم يحصل كدا.

كروزو: يا حمار يا بجم قلت ليك مليار دلشيون مرة علاقتي معاها ما زي الفاتو...فلة ما النوع الشمال افهم ياخ. ايهم بي ضحكة: وقت ما شمال عايز بيها شنو كروزو: ها ها ها.

ايهم: ياخ اقطعوا معاها وخلاص. كروزو: والله شكلو هي الحتقطعو معاي.

ايهم: وقت انت ندمان كدا متهور مالك. كروزو: انا زاتو ماعارف عملت كدا لي...غصبا عني. ايهم: خلاص اعتذر ليها.

كروزو: تفتكر حتقبل الاعتذار؟

ايهم: لو ما قبلتو في ستين تمشي باتا تجي جزمة بي رباطه. كروزو: لمن تتكلم عن فلة تتكلم بي ادب مفهوم ايهم: يا ماااان اهدا ياخ انا عايز اهديك(احيييي انا.) كروزو: خلاص عاين مع السلامة انا زهجت منك. ايهم: تعال نطلع ياخ اقسم بدين الله ملل لا يطااااق. كروزو: نمشي وين؟

ايهم: ماعارف والله...نمشي وين؟ كروزو: انت يا ود غبي ولا بتستغبى. ايهم: بالع ياخ.

كروزو: ايواااا...خلاص نمشي مونشيز. ايهم: منشن؟

كروزو: شوف لو انت هسه ساطل انا مااااا فاضي ليك. ايهم: خلاص خلاص معليش...خليني اضرب لي جمال وبقية الشلة. كروزو غير هدومو بسرعة ونزل.

ملكة: تعال هنا ماشي وين كروزو: طالع مع اصحابي.

ملكة: استاذ الرياضيات جاك...قال من قبيل لافي في الحصص والكورسات. كروزو: لكن انا طالع.

ملكة: قاعد في الصالون مستنيك كروزو وهو بيطلع بي سرعة: قولي ليهو مات.

المهم كروزو مشا على المحل...اول ما وصل اخد ليهو فحيطة كدا نظام انا وصلت.

جوه شلتو كانو قاعدين في القعدة المحشورة لي جوه ديك. جمال: وحاااات اسم الله دا كروزو...فحيطتو دي بعرفة. واحدة من البنات القاعدة معاهم: كروزو جا... جمال: مرتبط البنت: ما سألتك. كروزو جاهم نازل وهو بيلعب بي مفاتيحو.

وظهرت الابتسامات في وش البنات الكانو قاعدين معاهم. ايهم: ما بدري لكن كروزو: من عمرك. شوية كدا طلبو حاجاتهم...وبدو يتونسو ويضحكو وياكلو ويرقصو مع الموسيقى الشغالة.

كروزو كان قاعد في الركب ونازل شوية لي تحت...كان ماسك التلفون وفاتح رقم فلة...كان متردد يضرب ولا لا. اتوكل وضرب...التلفون طوالي فتح لمن هو اتخلع.

كروزو: فلة

جاهو صوت نرجس: انا ما فلة انا نرجس. كروزو: اها...ازيك يا نرجس نرجس: ما تقول لي نرجس قول لي نونو. كروزو: طيب ازيك يا نونو نرجس: الحمد لله...انت منو؟ كروزو: احم انا محمد نرجس: ولد ماما ملكة؟

كروزو: ايوااا شاطرة...اديني فلة عليك الله. نرجس: فلة بتذاكر تحت في الصالون. كروزو: ممكن تودي ليها التلفون؟

نرجس: لا حتشاكلني لاني كنت بلعب بيهو...وهي اصلا الليلة زعلانه كروزو: زعلانه لي؟

نرجس: بابا قرصها في اضانها عشان صبغت شعرها رمادي...وبكت وابت تاكل ومشت نامت...وهسه يادوب صحت...وعشان ابت تاكل عمتو سوزي ودت ليها عصير وهسه هي بتذاكر...هسه انت برضو قاعد تذاكر؟(طفلة فضيحة ما تخلو اخوانكم الصغار يردو على التلفونات)

كروزو: اي قاعد اذاكر...طيب خلاص لو ما بتقدري تودي ليها التلفون. نرجس: هييييئ فلة جات.

فلة: بتتكلمي مع منو؟

نرجس: دا محمد ولد ماما ملكة. فلة: رادة على التلفون اصلا لي؟ نرجس: كنت بلعب بيهو فلة: هاتيو طبعا الكلام دا كلو كروزو سامعو. فلة: لو سمحت تاني ما تضرب لي. كروزو: فلة...فلة دقيقة عليك الله تيت تيت تيت تيت الخط قطع.

رما التلفون بغيظ في التربيزة.

ايهم الكان قاعد جمبو: انساها الليلة وخلينا نمبسط شوية. قعد وهو بيحك بي طرف سبابتو في حنكو.

واحدة من البنات القاعدين معاهم: كروزو اها كيف مع سنه...3 قالو شايل هندسية بالجد يا حليلك. كروزو شال مفتاحو وقام: يلا مع السلامة يا شباب اشوفكم بكره.

(والله كل الاقدر اقولو جووووووووووول في نص الشبكة) فتح محفظتو ورما مبلغ يكفي الفاتورة بتاعتهم ويزيد.

ركب عربيتو ورجع البيت. بس فتحتو للباب لقا ابوهو.

حسن: مش قلت ما اشوفك في البيت دا تاني؟

قنوان جاتهم جارية: بابا عليك الله خليهو انا ما صدقت انو رضا يرجع.

كروزو: انا عادي ممكن اطلع...لكن اقسم بدين الله العظيم...لو طلعت من البيت دا تاني لو شنو داك ما حرجع. حسن: قايل نفسك بتهددني يعني كروزو: ...

حسن مسكو من ياقة قميصو بي قسوة: بتكلم معاك رد.

قنوان: بابا عليك الله اهدا.

لزاها منو بي قوة لحدي ما وقعت في الارض.

كروزو بقا بعاين ليها من دون ما تظهر اي تعابير في وشو. ملكة جات نازلة بي سرعة على الصوت: في شنو مالكم؟

حسن: تعالي شوفي تربيتك يا سجم النسوان...عامل نفسو بيهددني الوسخ دا. ملكة: قلت ليهو شنو يا ولد؟

قنوان وهي بتقيف على حيلها: ماما محمد ما قال حاجة...بس قال ليهو ما حيرجع البيت لو هو طلع منو.

حسن ساب محمد ومشا عليها...وقطع في وشها كف بي قوة: يعني انا الغلطان هو ما غلطان صح؟ حتى انتي البقول عليك كويسة...كلكم سجم وردماد.

ملكة: معليش يا حسن اهدا عليك الله. حسن: كلو بي سببك انتي يا رمدااااانه.

قنوان وهي بتبكي وخاتا يدها محل الكف: ياخ حرام عليك احنا عملنا ليك شنو؟ لي عايزنا نكره انك ابونا. حسن: الله الله.

جراها من شعرها وبقا بيضرب فيها.

ما حسا الا كروزو جاريهو منها ولازيهو بعيد: لا... قنوان لا.

حسن بي انفعال طلع فوق سرعة وهو بكورك بي صوت عالي: والله الا اربيكم. جا نازل وهو شايل ليهو عكاز.

ملكة: حسن لا عليك الله اهدا...ديل اولادك.

كروزو جر منو العكاز ورماهو في الارض: واقسم بدين الله العظيم لا اخليك تلمسني ولا تلمسها والعايز تعملو اعملو...انت ما ابوي...من الليلة انا ما اسمي محمد حسن...انا ابوي ميت...ياخ كرهتنا العيشة...كرهتنا اليوم الاتولدنا فيهو...عيشتنا معاك كلها ضرب وشتم وكلام فارغ...نفسو يكون عندي ابو زي باقي الاولاد.

حسن رفع يدو عشان يديه كف...لكن كروزو مسك ليهو يدي بي قوة...قال ليهو بعصبية: انا حلفت ملكة ضربتو بيدينها الاتنين في ضهرو: امشي يا وسخ يا قليل الادب.

لزت قنوان وهي بتصرخ فيهم: طيرو على اوضكم الطيارة التاخدكم من دون رجعة. قنوان ضغطت على يد اخوها.

حسن كان ساكت وبعاين ليهم بعيونو وهم طالعين على اوضهم.

كروزو لي قنوان قبل ما يدخل اوضتو: دي العيشة الرجعتيني ليها تاني؟

قفل الباب بي جوه...حك طرف انفو بي صباعو...مشا شوية واقرب مراية ليهو ضربها بيدو لحدي ما اتكسرت...ضرب كرسي المكتب بتاعو برجلو...ورما حاجات المكتب كلها في الارض حتى اللابتوب...صرخ بغيظ قبل ما يقعد في الارض ودموعو جارية.

بقا بيردد بي الم: حسبي الله ونعم الوكييييل. ضرب لي فله كثير...وماردت عليه...

كان صوتو مبحوح وهو بيقول: فلة عليك الله ردي علي...انا محتاج ليك والله. فلة كان كل ما التلفون يضرب بتقفلو بسرعة...لمن زهجت شديد ردت ليهو: ياخ انت عايز مني شنو...قلت ليك ما تضرب لي تااااني.

كروزو: فلة عليك الله ما تخليني انتي برضو انا ما ناقص. فلة بي خلعة: في شنو مالك... ابوك تاني؟

كانت سامعة صوتو مخنوق وهو بيحاول يتكلم معاها. فلة: هشششش خلاص...معليش.

كانت بتحاول تهدي فيهو وهي ماعارفة اصلا تقول ليهو شنو...ما عارفة شنو الكلمات الحتواسيهو من البلاوي الزرقا المهببه ليهو ابوهو.

فلة: عاين امشي اغسى وشك وحاول تنوم بكره نتلاقى في المدرسة. كروزو بي صوت مبحوح: ان شاء الله.

قفل منها غسل الدم الفي يدو وغسل وشو...ورقد في السرير وماهي الا ثواني ونام.

صباح اليوم التالي في المدرسة.

كان قاعد مع البلاك شيرتز في مدرجات في ساحة المدرسة. جمال: شوفو شوفو الماشة دي اخت مراد ايهم: قول والله. جمال: والله العظيم.

ايهم وجمال مشو ليها وبقو بضايقو فيها.

كروزو: هي مالا اليوم كلو لابسة الطاقية دي في راسها؟ ايهم وهو بيجر طاقيتها: كدي ورينا شعرك؟

علت ضحكات كروزو مع اصحابو.

كروزو: شعرك وينو؟ اقسم بدين الله انا الولد شعري احسن من شعرك مليااار مره ايهم: ممعوطة. كروزو: قلتو لي اتراك؟

كانو بيتمسخرو عليها بوقاحة وهم ماشايفين الزول الواقف بعاين ليهم بي غضب.

عشر

مارين ردة فعلها كانت عكس ردة الفعل الاتوقعوها البلاك شيرتز...شالت طاقيتها لبستها وابتسمت: بالمناسبة انا مصابة بسرطان الدم...وبتعالج بالكيماوي عبارة عن نار بتسري في عروقك...عارفين احنا مرضى السرطان مرضنا قوي...وكمان العلاج البناخدو قوي ومن الحاجات البتحصل ليك لونك بيبقى شاحب...وشعرك كلو بيتساقط...ممكن عادي نتعالج ونشفى منو...لكن انتو...انتو مرضى النفوس حتتعالجوا بشنو؟

كانو كلهم ساكتين وبيستمعوا لي كلماتها.

مشت يدها في طاقيتها: ربنا يشفيني ويشفيكم. تابعت طريقها لي فصلها.

قبلو كلهم ورا بي سرعة لمن سمعوا صوت فلة وهي بتصفق: يا سلاااام عليكم لالالالا...وصلتوا للدرجة دي من الوقاحة وقلة الادب.

مشت على جهة كروزو.

فلة: انت بالذات انا بعد ما ضربت لي امبارح قررت اني حانسى كل الحصل وابدا معاك صفحة جديدة...لكن خليتني افكر تاني... وصلتو لي درجة تتمسخرو على خلق الله؟

كروزو: فلة دقيقة عليك الله.

فلة: ولاااااا ثانية...بعد الشفتو دا اعتبر البينا انتهى. ايهم: يااا زين ما سويتي.

كروزو بي عصبية: انت اتلهي.

فلة طنشت ايهم: اسمعني كويس مش معناها عندك مشاكل في حياتك انك تتعامل مع الناس كدا...كلنا عندنا مشاكل وكللللنا بنعاني من جوه...بس دا ما مبرر اننا نتعامل مع الناس كدا... كان نفسي اساعدك واقيف معاك واخليك تتجاوز الانت فيهو...لكن للأسف انت مشتحيل اصلا تتغير.

كروزو بي انكسار: فلة انا ...

فلة: ولا كلمة...الشفتو خلاني اكرررهك ... البينا انتهى مع السلامه. مشت بي سرعة بي غيظ...خلتو واقف وهو بعاين ليها بحسرة.

كانت ماشا في بي سرعة...اتعترت ووقعت في السلم... دموعها ملت عينها...همست: كلاب ما بتراعوا مشاعر الناس.

جاها صوت هزاع: يا ساتر.

قامت على حيلها وبدت تتنفض هدومها...بلعت ريقها وهي بتعاين ليهو.

هزاع: جارية كدا مالك؟ فلة: لا لا ماف شي.

هزاع وهو بيأشر على جهة عيونو: لي بتبكي؟ فلة: لا انا ما ببكي...عندي حساسية في عيوني.

هزاع: ايوااا...طيب...لو عايزة ممكن نمشي نقعد في المدرجات. فلة: المقصف. هزاع: طيب ارح.

مشو على جهة المقصف كان في قعدات كثيرة خالنها للطلبة. هزاع: عايزة حاجة؟

فلة: لا لا شكرا ليك.

دنقرت شوية وهي بترسم في التربيزة بي طرف سبابتها.

هزاع كان في ابتسامة صغيرة مرسومة في وشو وهو بعاين ليها.

كان عارفها حتحكي ليهو براها...وماهي الا ثواني وانفعلت: اتخيييييل كروزو...وشلتو اتمسخروا على مارين. هزاع: اخت مراد؟

فلة: اي...جرو منها طاقيتها وضحكو على شعرها.

هزاع ظهرت ملامح الغيظ في وشو: دا اخر ما اتوصلو ليهو...انا حكلم مراد ونمشي ليهم اصلا عايز لي موضوع معاهم.

فلة: لا لا... ما توري مراد لانو لو عرف حتحصل مشكلة كبيرة شديد. هزاع: هو كروزو دا مالو؟

فلة: والله انا زاتي حيرني...هو مرات بكون طيب شديييييد...ومعظم الوقت شرير. هزاع: اسف على التطفل...بس انتو بيناتكم حاجة يعني؟

فلة: كان

هزاع في اللحظة دي قرب يزغرت.111 كروزو جا داخل المقصف ومعاهو جماعتو. جمال: كروزو...شوف...شوف زولتك. وقف يعاين ليهم لي ثواني...مشا عليهم وفي ابتسامة مخيفة في وشو. فلة لاحظت للابتسامة الساخرة في وش هزاع...قبلت بي بطئ وراها.

كروزو: حلو والله.

فلة: انت عايز شنو؟

كروزو: مقعدك معاهو شنو؟ فلة: وانت مالك اساسا؟

كروزو: شكلو علاقتي معاك نستك انا منو؟

فلة: للأسف والله...يلا ما حصل لي الشرف انت منو؟ كروزو: عايني ما تستفزيني عشان ما تندمي.

فلة: انا عايزة اندم...اعمممل العايز تعملو ما عندي ليك شي...والبيني بينك خلاص ببح اوكي؟ فاااا شنو خلي عندك كرامة وابعد من طريقي.

كروزو حرك راسو بي استنكار: انتي الخسرانه. فلة: اوكي مبروك.

وقف على حيلها: هزاع نمشي بعد دا؟ هزاع: يلا.

عاينت ليهو من فوق لي تحت ومشت مع هزاع...وخلتو وهو بيغلي من الغييييظ.

ايهم بي ابتسامة وهو بيحك حنكو بي طرف سبابتو: قلت ليك اخير ليك هزار...حب البتحبك ما تحب البتحبها(حد فاهم حاجة.) كروزو وهو ضاغط على قبضتو بقوة: كويس يا فلة...كويييس. الجرس بتاع الحصص ضرب والناس خشت فصولها.

كروزو ما كان فاهم اي شي للحصة...كان كل تفكيرو في انو هو كرووووووزو كيف فلة تتكلم معاهو كدا...ولا كمان مصاحبة عدوه اللدود.

الحصة انتهت.

كروزو: ايهم لازم تفكر لي في حاجة انا لازم اشيل حقي. ايهم: قلت ليك ابعد منها.

كروزو: خليك من ابعد منها...هسه عايزك تفكر لي في شي ليهم الاتنين.

ايهم: مبدئيا كدا حتمشي لي هزار...وتبقى هي مكان فلة...والباقي دا خليهو علي انا. المهم مرت حصة ورا التانية لحدي ما جات الثالثة وانتهت.

مهاب جاهم داخل في الفصل: محمد الحسن وايهم عبد الكريم اسماعيل. رفعوا يديتهم.

مهاب: محمد انا اديتك عقاب انك تكتب تعريفات الواحدة الاولى في الكيمياء وتوزعها لي زملائك...نفذت القلتو ليك. كروزو: انا؟

مهاب: اي

كروزو: ما متذكر والله

مهاب: معناها تعال لي انت وصحبك فوق.

هزاع غمز ليهو وهو بيأشر ليهو بيدو باي باي.M كروزو وايهم شمو ليك شمه...مشو الادارة فوق...لقو مي برضو واقفة.

مهاب: ايهم ومي حتمشو معاي تحت عقابكم الاتي...حتمشو الملعب بتاع كورة السلة وتنضفو الكراسي بتاعتو كلها. مي: كلها كثيرة شديد يا مستر مهاب: دا زاتو الانا عايزو.

عاين لي كروزو: اما انت حتقعد هسه وتكتب تعريفات الوحدة الاولى والثانية وما حتطلع الا تكملهم...مفهوم؟ كروزو بي ملل: مفهوم.

مي وايهم لقو مجهزين ليهم جرادل تحت وفوط عشان ينضفوا كراسي الملعب كللللو. بي هناك كروزو قعد بي ضجر وهو بيلخص...كلفته ساي من فوق فوق.

كروزو: ياخ الله ينعل الكيمياء لابو الكيمياء لابو اليوم العرفنا فيهو كيمياء...مادة وجع قلب بس. مهاب كان قاعد تحت وهو مراقب ايهم ومي...خلاهم نضفوا الملعب دا خلوهو يلمممممع...لمن انتهوا قعدوا في الارض وهم هلكانين والعرق دا شاري موية منهم.

مهاب: يلا دا كان عقاب صغيروني كدا ليكم المرة الجاية ما حيحصل خير مفهوم؟ مي: مفهوم) مهاب: وانت ايهم ببرود: مفهوم. كروزو ختا الورق وطلع.

مشا قعد في المحل البيقعدو فيه دايما. شوية كدا انضم ليهم ايهم.

جمال: باين كدا انو هيبتنا حتروح في المدرسة دي.

باسل: احنا البلاااك شيرتز ما حاجة هينة وما حنستسلم...بس يا ايهم افتح مخك دا شوية وادينا واحدة من خططك الشيطاااانه. ايهم: بس الصبر. كروزو: لازم انتقم منهم لاااازم.

ايهم: قلت ليكم خلوها علي

جمال: عاينو جاتكم حاجة لحدي عندكم اتلفتوا كلهم لي ورد الطالعة في السلم وهي بتفتش بعيونها على واحد من اخوانها.

جمال من دون اي مقدمات مشا على جهتها وعمل نفسو ما قاصد وطقشها بقوة خلاها تقع في السلم على كتفها وتصرخ بي الم.

في اللحظة دي مراد كان برضو طالع السلم...اول ماشافها وقف يعاين ليها بي انصدام. جمال وهو بيحاول يرفعها: قومي قومي ما قصدتك.

علت صرختها تاني

مراد بي نهرة: زح منها يدها مكسورة. ورد كانت بتبكي بي الم.

مراد قعد جمبها في الارض وبقا بيحاول يهدي فيها...المدرسة كلها اتلمت...مهاب جا يشوف الحاصل...عرف انو يدها اتكسرت ضربو للاسعاف...شوية كدا والاسعاف جات...التوأم من صراخ وبكاء اختهم المتألم ما فهمو اي حاجة ولاعرفو يتضرفو مع الرماها...كانو مصدومين شديد...ضربو لي عروة...كان في محاضرة...استأذن من المحاضرة وطلع بي سرعة على المستشفى اسسسسفة عارفة اتأخرت عليكم وقصير. اتوقعوا فصول الاسبوع دا كلها تكون قصيرة.

تكملة الحلقة الثالثة عشر عروة وصل المستشفى ومعاهو سمسم...كان مخلوع شديد... هزاع كان واقف جمب ورد البتصرخ بي الم في الطوارئ...اما همام كان قاعد بره في الارضية ومغطي وشو بيدينو من صراخ ورد...كان حاسي بي الم لانو ما قادر يساعدها ويخفف ليها وجعها. نزلت دموعو لمن حس بي انو عاجز...عروة مسك يدها التانية وباسها ليها...مسح دموعها المنهمره...وبقا بيحاول يهدي فيها ... اما هزاع كان ساكت بس... ما عارف حتى يقول ليها شنو...يواسيها كيف؟ ويخلي المها يخف... كانت بتبكي بي صوت عالي...وشها بقا احممممر...شوية كدا جاهم الدكتور...دخلوها غرفة العمليات.

عروة لي هزاع: حصل شنو؟ هزاع: والله ماعارف. مهاب جا وسلم على عروة...وفهمو الحصل

عروة: لكن يا استاذ ما معقولة البيحصل دا...انا حافتح بلاغ...لانو دي نهائي حاجة ما مقبولة...كيف يلزوها في السلم. مهاب: الطالب قال ما قاصد.

عروة: وصدقتو؟

مهاب: خلي الموضوع دا علي انا...ماف داعي للشرطه...ولو الولد طلع بالجد قاصد انا حاعرف اربيه عروة سكت شوية: طيب خليتها عليك.

هزاع قعد في واحد من الكراسي...شد شعرو وهو بعاين في الارض وبحرك رجلو بتوتر. عروة مشا لي همام: همام قوم من الارض.

همام بي صوت ضعيف: امي عرفت؟ عروة: لا ما وريتها.

قام من الارض وهو بينفض في هدومو...واتكل على الحيطه...عم الهدوء بينهم غير اصوات المرضى ومرافقينهم. بعد مسافة ورد طلعوها وهي مجبصين ليها يدها... كتبو ليها مسكنات...وطوالي رجعو بيها البيت.

كانو الثلاثة معاهم سمسم محيرين ماعارفين يسو شنو...امهم مافيشة وماعندهم اخت كبيره...مهاب وصلها معاهم وحمد ليهم السلامه...وبعدها رجع للمدرسة.

مهاب استدعى البلاك شيرتز كلهم...كان مكتف يدينو على جهة صدرو: اللزا البت منو فيكم؟ جمال: والله يا استاذ ما كنت قاصد ارميها.

مهاب: معليش اعتبرني غبي واشرح لي رميتها كيف؟

جمال: كنت جاري في السلم بي سرعة وهي طالعة قمت طقشتها ووقعت.

مهاب: ممممممم... طيب ارجعو فصلكم وعموما بكره حاشوف هي كلامها شنو ولو ثبت بالجد انكم الرميتوها يا ويلكم كلكم.

طلعو على جهة فصلهم...لمن بعدو شوية.

جمال: هوي يا جماعة البت دي لو اعترفت علي اعمل شنو؟ ايهم: احنا كلنا شاهدين معاك.

واحد من الاولاد: اي كلام ايهم صح. ايهم لي كروزو: قول حاجة.

كروزو: حاجة

ومشا على الفصل...بينو وبين نفسو الحصل دا نهائي ما عجبو...وحسا بالذنب على ورد ويدها. المهم شلة التوأم كانو مستنيين الدوام بس يخلص.

اول ما خلص...مراد ضرب لي احمد جاهم ومشو ليهم في بيتهم.

عبدالله: والله جمال الكلب دا قاصد يرميها. مراد: ما قادر اصدق انهم حصلو الدرجة دي. انس: اي والله كثروها شديد.

همام وهو ضاغط على يدو: مشينا ليهم كثير...لكن والله بعد ما الموضوع دخلو فيه ورد ما حنرحمهم. انس: كلنا معاك يا همام.

عاينو لي هزاع...كان ساكت وبعاين ليهم بس.

عبدالله: ورد اختنا كلنا...والبيأذيها اذانا(العوقة هسه لو جوك بتجري.) عروة جا طالع من الاوضة سلم عليهم ورجع لي اختو. مراد تلفونو ضرب طلع بره البلكونه.

كانت دي امل.

امل: مراد ازيك؟ شنو قطعت كدا مننا؟ مراد: معليش بس منو معاي؟

امل: انا امل.

مراد: ايوا معليش ما عرفتك...

امل: عليك الله تجوني انت ومارين انا زهجانه...تعالو اقعدو معانا كم يوم كدا. مراد: ان شاء الله.

امل: يلا باي مراد: باي.

كان خاتي يديني في درابزين البلكونه وهو بعاين للشارع...وما شايف الكحلو منو(شافو.) رجع لي اصحابو جوه...قعد جمب هزاع الفضل ساكت.

دنقر راسو شوية وهو بعاين لي هزاع قبل ما بضربو بي كتفو: ما تزعل ما حنخليهم. هزاع بي صوت منخفض وهو عاضس على اسنانو: بكره انا حاقتل واحد فيهم.

مراد: كلهم ما واحد بس. شوية كدا الجرس ضرب.

عبدالله مشا فتح اتخيلو طلعت منو...الجاره العزيزة حميدة...اتحصنو سريع منها. حميدة وهي بتطقطق في لبانتها: والله كنت ماره قلت اجي اشوفكم كيف... مالكم قال كثار كدا الليلة في شنو. همام: اختي كسرت يدها...

حميدة وهي بتخت يدها في صدرها وبتف بالجنبات: يا ساتر يا ساتر...كر علي يا يمه كسرها ليها شنو؟ همام: وقعت في المدرسة حميدة: سلامتها يايمه...صاحية هسه؟ همام: لا...نايمة.

حميدة: خلاص بمشي اعمل ليها اكل وبجيبو ليها...سلامتها ان شاء الله همام: الله يسلمك.

حميدة: الا عايزة اسألك...شفتى لي وليدا كدا ابيضاني طويل شعرو يا يمة الهوا بيحرك فيهو زي الشرارة(مراد...) ضحكت ضحكة عاليه وهي متابعة: قلت الا اكان بحلم مسحت عويناتي لقيتو لسا واقف...قلت بس اجي اعرف دا منو. همام وهو بيعاين لي جوه وبيبلع ريقو: اي دا صاحبنا. حميدة: ايواااا لا اكان كدي خلاس...يلا عن اذنكم. عبدالله: زي الشرارة دي جابتها من وين؟

همام: الله يستر عليك يا مراد. المهم قعد طوييييل كدا معاهم وبعدها رجعو بيوتهم... اول ما مراد دخل البيت جاتو ياسمينة جارية وفلة واقفة بعيد بتعاين.

ياسمينة: اهااا البت حصل ليها شنو؟ مراد وهو بيقرص خدها: كسرت يدها.

ياسمينة: بالجد؟ وااااي يا حليلها... ماعرفو منو الرماها؟

مراد: واحد من البلاك شيرتز.

ياسمينه لي فله: شفتي شلة حبيبيك شريرين كيف؟ مراد عاين لي فله الواقفة بعيد.

اتغيرت ملامح وشها وهي بتقول: خليييييتو شوفي ليك موضوع تاني. ودخلت الاوضة بسرعة.

مراد مشا على جهة اوضتو.

ياسمينه: عاين مارين ماشا تاخد جرعتها حتمشي معاها؟ مراد: ماشا هسه؟

ياسمينة: نص ساعة كدا

مراد: طيب بمشي معاها.

بعد ما فتح باب اوضتو...قبل على ورا ونزل...على المطبخ.

قعد في الصفره وهو خاتي كباية الموية قدامو...تلفونو اتهز...فتحو لقا ممنشننو في قروب المدرسة على فيديو مكتوب _SS فيها فتح الفيديو...كان مظبط بي طريقة حلوة...كانو كلهم واقفين جمب مسبح كبير وفيهو سلة بتاعت كورة سلة مائية...لابسين كلهم شورتات سوداء وكروزو لابس تشيرت اسود...ايهم كان ماسك الكورة...اتشقلب في المويه بي طريقة مذهلة وهو بيرمي الكورة لي جمال..نفس الحركة عملها جمال...المهم انو اي واحد بيعمل حركة وبيرمي الكورة للجنبو...وفي النهاية الكورة وقعت عند كروزو النطا بي مهارة في الموية وهو بيرمي الكورة في السلة...الفيديو كان تحفه مع الموسيقى التصويرية.

في اللحظات دي...فلة جات ماره جمب اوضة مراد المنشنه عليها...لقت الباب مفتوح...دخلت بي فضول...شهقت بي ذهول لمن شافتها مفروشة كيف: ماما زينب... اشمعنا يعني. فتحت الدولاب كان منظم شديد...فلة: الدولاب منظم اكثر من حياتي...بعدين دي كلها هدوم؟ نزلت راسها وهي بتعاين للاسبورتات المختوته تحت.

فجأة حست بي صوت مراد وهو داخل الاوضة. بي سرعة انحشرت في الدولاب وهي خاته يدها في خشمها...كانت بتعاين ليهو بي الفتحة البين ضلفتين الدولاب.

مراد قفل الباب وقف قدام سريرو وبدا يفتح في زراير قميصو...طلع القميص والفنله الداخلية وشاتهم بي رجلو في الارض...فتح السسته بتاعت البنطلون...فله غمضت عيونها. جا على جهة الدولاب.

فلة خلاص قربت تسيح...بعد ما فتح ضلفة الدولاب رجع لي تلفونو البيضرب. مراد: الو ... اي يا هزاع؟ مالا؟ بتبكي شديد؟

دخل بالتلفون جوه الحمام...فلة جرت بي سرعة على الباب ما فتح ليها لانو مراد قافلو بالمفتاح...حست بيهو طالع جرت ادست في البلكونة.

مراد: اي اكيد حتكون بتوجعها...بس تبلع المسكنات الكتبوها ليها...ربنا يشفيها ان شاء الله.

مراد رجع لي الدولاب...شال منو بشكير ورجع لي الحمام بعد مارمى التلفون في السرير...فلة سمعت صوت الباب اتقفل جرت بي سرعة وفتحت الباب...وطلعت جري على الاوضة وهي بتشيل في نفسها...ضحكت على نفسها.

مراد طلع من الحمام وهو بينشف في شغرو بي بشكير صغير.

فجأة حس بي الم مفاجئ في راسو...كانو مصدع شديد وفي زول شادي ليهو شعرو بقوة. قعد في السرير وهو بشيل في انفاسو.

كان منزل راسو...شاف بقعات دم في بشكيرو المتلفي بيهو...وقف بي سرعة وعاين لي نفسو في المراية لقا تفسو رعفان...مسح الدم بي يدو...رجع غسل وشو...لبست بنطلون جينز اسو ومعاهو تشيرت ازرق.

طلع من الاوضة بي سرعة...اطاقش مع فلة...تلفونو وقع منو.

فلة بي عصبية: عميان انت؟ ما بتشوف؟ مراد وهو بيرفع التلفون: اسف.

فلة: ما مقبول

مارد عليها وتابع طريقو.

فلة: كريه دا

مشا ركب العربية كانت سايقة سوزي...معاهم ماما زينب...وياسمينه.

المهم وصلو وقعدو مستنيين دورهم...كان في بنت عمرها زي 10 سنوات كدا...بيدو فيها في الكيماوي وهي بتبكي...كانت بتعاين لي امها وهي بتقول ليها: انا ما حاعيش...حاموت...اي زول بيجيه السرطان نهايتو الموت.

امها كان صوتها متهدج وهي بتقول ليها: لا لا ما تقولي كدا حتقدري تغلبيهو.

مارين قامت ومشت ليها...قعدت جمبها وهي مبتسمة: يعني شنو سرطان؟ حتخليهو يشيل حياتك بسهولة؟ لا اكيد...احنا كبشر عندنا قوة كبيرة جوانا وممكن نتغلب على اي حاجة...شوفي من الازل...اتغلبنا على الحر والمطر والبرد بي اننا بنينا بيوت...اتغلبنا على طول المسافات بي صنع السفن والطيارات والعربيات...اتغلبنا على كثير من الامراض وصنعنا ليها الادوية...خليك قوية...والله حتتغلبي عليهو...حتقدري تهزميه وتفوزي...وحيبقى حاجة من الماضي... ناس كثار قدرو يتغلبو عليه...انا هسه عندي في الدم وما حاستسلم ليه...حاغلبو يعني حاغلبو...وعايزاك برضو تغلبيه طيب؟

الام ابتسمت وهي بتعاين ليها.

البنت مسحت دموعها: طيب ما حاستسلم. مارين: ايوا خليك كدا. (حلفتكم بال يا جماعة...حلففففتكم بال...ما تنسوهم من الدعاء اخوانا الشجعان مرضى السرطان...ادعو ربنا يشفيهم وينصرهم على عدوهم اللعين) ياسمينة: مراد انت رعفان.2 مراد وهو بيخت يدو في انفو: بالجد.2 ياسمينه ادتو مناديل شالها وطلع عشان ماما زينب ماتشوفو.

يلا برضو حلفتكم تدعو على حميدة السحاره... طقت مراد عين العمه يا يمه.

شوية كدا مارين قعدت عشان تاخد جرعتها...كانت مسترخية وهي بتستغفر...كانت احيانا بتظهر تعابير في وشها بتدل على انها متألمه...لكن بتقدر تخفيها بي سرعة...وبتبتسم. مراد مسح الدم النازل بي غزارة.

جا واحد من الدكاترة ماري...اداهو قزارة موية وخلاهو يدنقر راسو عشان الدم مايرجع لي حنجرتو.

ياسمينة طلعت تفتش عليهو لانو اتأخر...وهي ماشا في الممر لقت ايهم واقف وماسك تلفونو...زح التلفون اول ماشافها

ابتسم وهو بيقول: اخت فلة السمحة. ياسمينة: اهلا.

ايهم: ان شاء الله خير؟

ياسمينه: بنت عمتي بتاخد جرعة كيماوي. ايهم: ايوااا سلامتها.

ياسمينة وهي بتحرك يدها بتوتر: وانت؟ ايهم: جدي ضغطو ارتفع وكدا.

ياسمينه: سلامتو.

ايهم بي ابتسامه: الله يسلمك يا عسل سمعت صوت مراد بيناديها: ياسمينه؟

اتلفتت وراها...لقتو بعاين ليها...ونظراتو اتحولت على ايهم.

ايهم بقا بعاين ليهم باستغراب...وهو بيسأل نفسو علاقتو بيها شنو؟ ياسمينه مشت لي مراد: مشيت وين؟ اتأخرت.

مراد: غسلت وشي...

سكت شوية وبعدها قال: يلا؟ ياسمينه: يلا.

مراد رمق ايهم بي نظرات قبل ما يمشي مع ياسمينه.

عند فله:

كانت عايزة تضرب لي هزاع بي اي طريقة عشان تكفر لي اختو. ضربت لي ميرنا: اسمعيني اضرب ليهو ميرنا: هو منو؟ فلة: هزاع ميرنا: لا... خلي الخفة بتلقيه بكره في المدرسة(احححي انا من الصحبة الكدا) واصلا حتجيبي رقمو من وين؟ فلة: من عبدالله ميرنا: فلة اتقلي شوية.

فلة: خلااااص.

قفلت منها جات ماره جمب اوضة مراد...رجعت لي ورا وفتحتها بي شقاوة ودخلت تاني...لقتو خاتي دفتر كبير كدا في الكومودينه بتاعتو.

فلة: لا لا عيب يافله...ما صاح تفتحي حاجات الناس الشخصية...لكن...لكن يعني بس شوفا واحدة ما حتعمل لي شي...بس شوفة كدا من بعيد.

فتحت الدفتر...اتفاجأت من الرسومات المرسومة...كان بيرسم رسم واقعي كانها صورة حقيقية...كان راسم هزاع في الدفتر...مشت يدها في الصورة...قلبت الصفحة التانية كانت صورتها عمتها ام مراد.

مكتوب تحتها كلام بالتركي ما فهمتو...قفلت الدفتر...وختتو مكانو وطلعت وهي بتهمس: ماشاء الله بيكاسو معانا في البيت.

بهناك التوأم وعروة كانو قاعدين وهم بعاينو لي ورد النايمه.

شوية كدا الجرس ضرب...حميدة جات شايلة ليهم اكل وشوربة لي ورد.

حميدة: عملت ليكم شوية حاجات تاكلوها...عارفاكم قاعدين براكم يا يمه واكيد ما بتاكلو كويس...بعد ما تاكلو بجي اشيلها منكم.

عروة: شكرا ليك تعبناك معانا. حميدة: تعبكم راحة والله يا وليداتي. طلعت وهم قفلو الباب.

ماكان عندهم نفس للاكل وحارسين اختهم تصحى من النوم.

كروزو كان قاعد في اوضتو...كان بيحاول يقرا. بينقر بي طرف القلم في الدفتر.

(لن انكر انني احسست بالخجل من نفسي عندما تحدثت الينا تلك الفتاة الصغيرة...سخرنا من شعرها بطريقة بشعة...وبعدها اكتشفنا انها محاربة للسرطان...تمنيت في تلك اللحظة ان تنشق الارض وتبلعني...فقد بدوت صغيرا امام نفسي وامامها...محمد كروزو) باب اوضتو دق. كروزو: منو؟

الباب اتفتح وجاهو صوت ايهم: دا انا يا حيوان. نط في السرير بتاعو وختا المخدة في وشو. كروزو: اقلع جزمتك. ايهم وهو بيقيف في السرير بي جزمتو: في حاجة يا اخ؟

كروزو: ايهم. ايهم: عيونو. كروزو رما القلم وقام عليهو. ايهم بقا بينطط في السرير.

كروزو جراهو...ايهم زح منو واداهو شلوت في يدو.

كروزو نطا في السرير ولزاهو..ايهم وقع في الارض على ضهرو(دا هظار ما يفوتكم) ايهم: اتشلييييت. كروزو: احسن.

ايهم: ارح طلعنا...قبل ما يجي استاذك بتاع العربي القادي دا. كروزو: ارح.

سرق مفتاح العربية من اوضة امو...وطلعو بره ركبو العربية. ايهم: ورينا انجكشناتك وحركاااتك.

كروزو اتحرك بالعربية...كانو مستمتعين بي الصوت العالي...فحطو في الشارع لمن الله غفر ليهم...لساتك العربية قربت تولع...بعدها كروزو وصل ايهم بيتهم...ورجع البيت...طلع اوضتو وخلا ميري تجيب ليهو غداهو فوق...اتغدى وبعدها قعد يلعب في البليستيشن حقو...اي استاذ يجيهو بقول ليهم قولو ليهو عيان.

قنوان جات داخلة الاوضة بي غيظ: انت يا انشتابن قايل نفسك حتجيب ليك نسبه زي الناس بي طريقتك دي؟ لا بتذاكر لا بتحضر دروس... قوم استاذ الفيزياء جاك.

كروزو: عيان والله.

قنوان قفلت الشاشة...رجعت قرصتو في اضانو بي غيظ. كروزو وقف بي الم: براحة ياخ في شنو.

قنوان: انزل تحت سريع الاستاذ مستنيك. كروزو: لكن قنوان: ولا كلمة انزل. اتأفأف ونزل بي زهح للاستاذ القاعد...بي هنا قنوان شالت البليستيشن...واليدين والاسطوانات. قنوان: اها تاني نشوف حتعمل شنو؟

كروزو الحصة نصها مع الاستاذ نصها شنو ربعها بس مع الاستاذ...وثلاث ارباعها سرحان...الا ستاذ خلص منو متأخر...بعدها طوالي وبعدها طوالي هو مشا نام. _نهاية الفصل الثالث عشر_