الفصل السابع

فلة نطرت عويناتها...قبل ما تتعشرق وتكحكح. كروزو نزل راسو وهو بيضحك على شكلها...مدا ليها قزازة موية. فلة وهي بتشرب: شكرا.

كروزو بعد ما شال منها القزازة: اها قلتي شنو؟ فلة بي خجل: والله انت فاجئتني شديد يا كروزو. كروزو: بحب المفاجأت. فلة: انا ماعارفة اقول ليك شنو...يعني انت زول كويس.

كروزو ابتسم

فلة: مرات يعني مادايما(ياخ خليهو يكمل فرحتو...) لكن انا ما بقدر اعاين ليك بي طريقة تانية فاهمني؟

كروزو: لا

فلة: يا كروزو انا انسانه مسالمة وبحب المسالمين...بعدين انت فيك حاجة انا ما فاهماها مرات بتكون طيب شديد ومرات تانية بتبقا انسان شرير ومتوحش...فا ما حاقدر اكون معاك كدا...لازم على الاقل تتغير او تثبت على شي واحد يا اما شرير او طيب.

كروزو: لحدي هسه ما اديتيني حاجة مقنعة... انا بحبك فاهماني؟ طيب انتي ماف عندك اي شي لي؟

فلة: والله ما بنكر انو احيانا في مواقف بتخليني اتكيف منك وكدا لكن دا ما معناهو اني بحبك وكدا...ما بكرهك لكن. صرخت وهي بتشد شعرها: ما قاااادرة افهمك.

كروزو بي ابتسامه: اهدي اهدي ماف داعي للعصبية هسه... طيب شنو رايك تجربيني.

فلة: كيف يعني؟

كروزو: يعني تخليني اكون البوي فريند بتاعك...فتره بسيطة وبعديها قرري لو عايزة تكملي معاي ولا لا. كانت في نظرات رجاء شديد في وشو.

فلة سكتت مسافة وهي بتقلب في الكلام.

كروزو: عايني حسيبك شوية...حنزل اشوف ميري تأخرت لي وحاجيك اتفقنا؟ فلة: طيب.

استرخت في الكنبة وهي بتفكر في كلامو...حست بيها حتكون فرصة عشان تفهم كروزو دا جواهو في شنو...خصوصا بعد ما قاليها لو نزلت كنت حابكي ودي اختي الوحيدة ما عندي غيرها...حست انو كروزو دا جواهو في لغغغغز عميق تمنت انها تعرفو.

قامت من الكنبة.

ووقفت في البالكوني على قول كروزو.

شوية كدا شافت قنوان اختو واقفة برا وبتمسح في دموعها وبتتكلم مع كروزو كأنها بتعاتب فيهو انو ما جا وقت تلبيس الدببببل.

ضحكت على كروزو لمن شافتو بيجر يدها ويرفعها عشان يشوف الدبلة بي استهبال. جرت يدها منو وهي بتضحك...فتح ليها يدينو احساس عنااااق.

عانقتو رفعها من الارض ونزلها...ضربتو بخفة في وشو...تاني رفعها. جاهم خطيبها...كروزو سلم عليه ووقفو يتونسو...بعدها دخل جوه...وسابهم براهم. في اللحظة دي ميري جات شايلة الاكل في صينية. فلة رجعت قعدت في الكرسي وشالت صحنها. شوية كروزو جاها.

شال صحنو وقعد جمبها: اها قلتي شنو؟

فلة: اوكي موافقة بس زي ما قلت انت لو لقيت الموضوع ما عاجبني حسيب طوالي. كروزو: ما عندك اي مشكلة خت الصحن في رجلو وبقا بعاين في يدو اليمين المعوقة. كروزو: آكل بالشمال عادي؟ ولا بتقولي همجي؟

فلة بي ضحكة: اكل اكل

بدو ياكلو ويتونسو.

شوية علا صوت الافريكان ميوزيك من تحت. كروزو بدا يهز في رجلو...ما قادر يقاوم الموسيقى.

تحت ايهم كان واقف مع هزار ومي...شاف ياسمينة قاعدة وبتعاين للناس. انسحب براحة من جمب ديل ومشا ليها.

ايهم: اخت فلة السمحة.

رفعت راسها وعاينت ليهو بي ابتسامة. ايهم: ما اتعرفنا المرة الفاتت.

ياسمية: انا ياسمينة.

رد عليخا بي ابتسامة: وانا ايهم بتعرفيني؟ ياسمينة: لا

ايهم: صاحب كروزو.

ياسمينة: اي البلاك شيرتز الاشرار.

ايهم: لكن مع الزيك نهااااائي ما اشرار. ياسمينة: اهااااا لا تمام.

ايهم: طيب اتشرفنا نتلاقى في المدرسة وكدا ياسمينة: ان شاء الله وكدا. عند ناس فلة.

كروزو: عايز ارقص ياخ ماقادر استحمل كدا. فلة: ارقص كروزو: ارح تحت مع قنوان وخطيبها. فلة: قنوان حتكون خجلانه وكدا كروزو: قنوان اختي الواحدة دي؟ يا زولة دي حتكون هسه عاملة عمايل تحت...ارح ارح نزلو سوا تحت...وهم ماشين في السلم هزار تعاين ليهم سااااي بغيظ. مشو لقو تحت الحفلة راااااية بالافريكان ميوزيك.

كروزو لقا البلاك شيرتز شغالين رقيص تقيل. كروزو طلع جكت البدلة واداهو لي فلة.

من ما جا داخل كلهم قعدو يصفرو ويكوركو: ال boss جاااااا.

كروزو بيرقص رقيص عجيب كأنو مدربنو...مع ايهم والبلاك شيرتز عملو عمايل. كروزو كان بيأشر لي فلة تجي معاهم وهي بتأشر ليهم بيدها نظام لا لا شكرا. الناس كلها بقت متلمية فيهم.

هزار طوالي استغلت الفرصة ودخلت مع كروزو...رقصو رقيييييص الناس كلها بقت بتصفر ليهم.

وشوية كدا مي دخلت مع ايهم...المهم رقصو ورقصو ورقصو...قنوان جات دخلت فلة بالقوة وبقت بترقص معاها...قلة رقاااااصة بس ما بتحب ترقص قدام الناس بتخجل. اما فلانه ديك ام تفه تقوم وتقعد وتتمايل بي حركات جريئة...وامها الابتسامة من الضرس للضرس التقول حفلة تخرجها من الجامعة.

في حلة ناس انس.

ام انس: يعني هسه يا وليدي تاني ما حتمشي المدرسة؟ متخليني امشي احنس المدير دا

انس: يا يما ما تشيلي همي والله لقيت لي كم شغلانية من بكره ببدا وبلم القروش وبرجع عادي والايام دي بقرا برااااي في البيت.

ام انس: الله يوفقك يا ولدي ويقويك ويحفظك...ان شاء الله يا انس يا ولدي بكره اشوفك حاجة كدااا كبيرة وترفع راسي فوق يا وليدي.

انس: ان شاء الله يا يما...انا هسه ماشي النادي في كورة الليلة. ام انس: امشي الله يحفظك.

طلع براحة ومشا على الورشة اعتذر عن التأخير وبدا يشتغل في الجو السخن شديد دا بي نشاط شديد.(يا انس انا بحبك ياخ.))

هزاع كان قاعد قدام عروة و سمسم وبيحكي ليهم بي انس. عروة: دي مدرسة شنو دي كمان البيدفعو فيها الناس قدر دا. هزاع: حكومية.

سمسم: مصكين الولض ضا...صاكن وين؟

هزاع: والله ماعارف وين بالضبط لكن قال لي قريب مننا. عروة: لازم نساعدو الشغل دا حيأثر عليهو.

هزاع: نديهو قروش

عروة: لا لا هو قال نازل يشتغل معناها عفيف ما حيقبل منك شي زي دا. سمسم: انشاء الله يجي طاني ونشوفو.

هزاع: لازم نفكر في حاجة ونساعدو تمام؟ صمصم: طمام.

عروة: انتو همام وين؟

هزاع: مجكس في البلكونة.

عروة: البيت دا طاهر وحيفضل طول عمرو طاهر. سمسم: احصن ليهو انجظ انط اقعد يا الكبير.

عروة: لسا ما لقيت البت البتناسبني ياخ. سمسم: اي يعني بااااير.

عروة: اسكت ياخ.

سمسم: انا ماشي انوم.

عروة: حصحيك 3 عشان نذاكر. هزاع: انتو كل يوم امتحان؟ عروة: لينا الله بس.

سمسم: تصبحو على خير يا ولاد.

وتنقش تنقش مشا دخل ونام في سرير عروة.

مراد كان بيدندن بي اغنية يا طير يا الماشي لي بلدنا لي اختو النايمة في حضنو.سمع صوت جوطة شديدة تحت وكلام بي صوت عالي.

رقد اختو في السرير براحة وغطاها ومشا فتح الباب واتوجه على جهة السلم. كانت دي بنت عمو جايا داخلة وعاملين معاها جوطة.

ايمان: دي قلة ادب جديدة يعني ولا كيف؟ اسبوع كامل باينة برا البيت؟

امل(البنت): اسمعي هنا اطلع زي ماعايزة وارجع زي ماعايزة نهائي ماليك دخل بي. ايمان: انا امك امل: so what انا كبيرة وبعرف الصح من الغلط ما محتاجة ليك.

علي(ابوها): دي نهاية دلعنا ليك؟ امل: للأسف والله.

ايمان: انا ما مصدقة انتي كيف بقيتي كدا؟

امل: والله الزمن دا تتوقعي اي شي ويلا لو سمحتي انتي وهو عايزة انوم.

طلعت في السلم بي سرعة لاحظت لي مرةد وهو بيرجع اوضتو لكن ما عبرتو ودخلت اوضتها. مراد وهو بيقفل الباب: ما حاسا بي نعمتهم...الحمد لله.

دخل لي اختو عاين ليها مسافة قبل ما يبوس راسها ويمشي على اوضتو.

الحفلة في بيت ناس كروزو انتهت وبدو الضيوف يطلعو. دلال وقفت تتكلم مع ملكلة وقنوان.

ملكة: شكرا يا دلال ظبطي لي قنوان الفستان الناس كلها عجبها. دلال: عشان قنوان حلوة ظبط فيها.

: اي اي

قنوان بي ضحكة

دلال: يلا ما نستغنى...نتلاقى قريب ان شاء الله.

ملكة + قنوان: ان شاء الله.

فلة كانت راكبة في الضهرية مستنية امها.

كروزو بعد ما ودع اصحابو ما عدا ايهم البايت معاهو: بعد الفستان والفيونكة والحركات دي برضو مشعبطة كدا في العربية؟

فلة: مستنية ماما تطلع لي. ركب جمبها في العربية: احسن تقعدي معاي شوية.

تشك تشك دا صوت التأمين البينفتح لمن دلال ضغطت على الزر الفي المفتاح. فلة: ههههاااااي جاااات. كروزو وهو بينزل من العربية وبيمشو يدي في شعرو بي احراج: طيب نتلاقى قريب. فلة وهي بتنزل: ان شاء الله.

دلال: محمد ازيك كروزو: الحمد لله وانتي؟

دلال: بي عافية الحمد لله...عاد الليلة ابدعت رقيص تقيل. كروزو بي ضحكة: اي.

دلال: يلا مع السلامة. كروزو: الله يسلمك. ركبت مع بناتها واتحركت.

اول ما وصلو وفتحو الباب لقت عماد واقف ليهم. عماد: كنتو وين...ولي ما بتردي على التلفون؟ دلال: كنا في خطوبة قنوان بنت ملكة.

عماد: طيب ما كلمتوني لي؟ ولا انا هنا ماف لي اي 30 لازمة... تطلعي على كيفك وتجي على كيفك ولا حتى بتوريني ماشا وين؟

دلال: عاين انا ما فاضية هسه تعبانه وعايزة انوم.

عماد: شوفي انتي كترتيها شديد وصلتي لي درجة البجاحة. عاين لي بناتو: امشو نومو بعد دا بكره سايقكم عند حبوبتكم.

دخلو اوضهم بي سكات...كان في حاجة جواهم بتتكسر كل ما يسمعوا اصوات امهم وابوهم بتعلا. فلة بعد غيرت هدومها رقدت...بقت بتتقلب في السرير بي ضجر وهي لسا بتسمع في صوت امها وابوها.

لبست سماعاتها وبقت بتسمع في قرآن بي صوت قارئها المفضل ماهر المعيقلي...ما امداها كثير الا وهي نايمة بي

عمق.

اما عند عماد ودلال النقاش احتدم واصواتهم علت اكثر واكثر.

عماد: شوفي الواطة ليل وانا عارفك جعجاعة ومستعدة تكوركي وتنبحي لي نص الليل لا عندك احترام لي جار ولا زوج ولا اي شي...بس قلة الاحترام الطالعة فيها جديدة دي بوريك ليها.

شال غطاه ومخدته وطلع على الصالة...اول شي مشا اوضة ياسمينة ونرجس...بعدها مشا لي فلة طلع السماعات من اضانها...وشال التلفون بعيد عنها وختاهو في درجها...غطاها كويس وبعدها مشا نام.

في صباح يوم الجمعة: الساعة 6 صباح.

التوأم وعروة وسمسم جو راجعين من الصلاة. سمعو صوت زول بينادي وراهم: هزاع. قبلو وراهم لقوهو انس.

هزاع: اوووو انس ازيك. انس: بتصلو هنا بلاي؟ هزاع: اي.

انس: انا البأذن لكن ما حصل شفتكم. عروة: انت البتأذن؟

انس: اي

سمسم: صوطك جميل جضا ماشاء الله. انس: شكرا ليك.

عاين همام: دا توأمك؟ هزاع: اي انس: ماشاء الله بتتشابهو شديد...بيفرقو بينكم كيف. همام وهو بيظهر اسنانو: انا لابس تقويم.

انس: ايوا لو كدا كويس... خلاص ما اوقفكم كثير.

عروة: تعال لينا زيارة في البيت عليك الله انس: اي بجيكم ان شاء الله.

تابعو طريقهم واي زول مشا على بيتو.

عروة وهو بيفتح باب الشقة: ماشاء الله كمان بيأذن.

سمسم: ضا شاب ممطاز جضا.

هزاع: ناس بتأذن وناس بتجكس الاربعة وعشرين ساعة همام: عروة: عاينو ماشين لي ناس حبوبة بعدين كويس. همام: النوووووم النوم نعسان ماشي انوم مع السلامة. سمسم: جاي معاك.

امهم جات طالعة من اوضتها: عروة خالتكم عازماكم عشاء بعدين طيب؟ امشو لي حبوبكم وبعدها تعالو بي هناك. هزاع: انتي ماجايه معانا؟

قمر: اي بجي معاكم بقعد شوية وبطلع...لانو زاتو عايزة اتناقش مع صاحب جدك في موضوعك بتاع المدرسة. هزاع: امي مارااااجع ليها المدرسة دي طيب؟

دخل الاوضة بي سرعة.

عروة لي امو: خليني بتكلم معاهو بعدين. قمر: طيب.

رجعت اوضتها...عروة مشا على المطبخ عمل مشروب ال... والله ماعايزة اقول ليكم مشروب شنو عشان ما تكرهو ... ولا اقول ليكم اكرهو براحتكم عمل مشروب البيض اي البيض الواحد دا... جمبلق جمبلق شربو قلنا ليكم رياااااااااضي وكدا.

دخل الاوضة شغل الة المشي وبقا بيمشي بي سرعة شديدة...بعدها قعد في الارض وبقا بيعمل في تمارين ضغط بي يد واحدة وبي سرعة.

عندو حديدة معلقة في الباب مشا اتشعلق فيها وبقا بيرفع في نفسو. همام: ما ننوم يعني؟

هزاع: قلبت لينا الاوضة جيم؟

عروة: خلاص انتهيت ...5 شوفو سمسم ما هندا هسا نايم بي سكات.

همام: لا سمسم دا فيهو تخلف ولا حاجة انا ماشفت لي زول بينوم بالسرعة دي. سمسم وهو بيتقلب: سامعك يا ولض.

همام بي خلعة: سمسم الحب ياخ.

عروة ضحك قبل ما يقلع التيشيرت بتاعو الاتملا بالعرق من كثرة التمارين...دخل اخد ليهو دش منعش كدا وجا انجدع في المرتبة الفي الارض... اتخيلو سمسم نايم في سريرو وهو بينوم ليهو في الارض... اريتك يا يمة صاحب السرور انا عندي ناس لو حردت ليهم اكلي بياكلو.

مراد صحا بي صوت جعجعة وشكلة.

خلل شعرو الكثيف بيدو وقام يشوف الحاصل شنو. وقف في البلكونة بتاعتو الفاتحة في الحديقة.

لقا امل بتتكلم مع السواق: انت قايل نفسك اصلا زول زينا؟ انت هنا خدااااااااااام وانا اديك بي جزمتي فوق راسك عجبك ولا ما عجبك...يا حقير يا قذذذذذذر.

احمد(السواق) كان واقف جمب العربية وهو منزل راسو وساكت.

مشت بي خطوات سريعة على جهة العربية...كانت شايلة ليها كباية شاي...وبي كل وقاحة كشحتها ليهو في العربية: يلا غور اغسلها تاني. جاها صوت امها وهي جايه عليها: دا شنو الانتي بتسوي فيهو دا؟ دا اخر ما توصلتي ليهو؟ الناس خدم تحت رجلينك؟ عيب البتسوي فيهو دا.

رمت الكباية في الارض وهي بتعاين لي امها في عينها: انا بحب العيب...في حاجة تاني. مشت بي سرعة ودخلت البيت.

مراد هز راسو بي اسف ودخل.

زي الساعة 9 كدا عروة واخوانو وامهم كانو في بيت الجد.

قمر كانت بتتكلم مع عمو جلال(صاحب جدو) في موضوع هزاع وانو رفض يمشي المدرسة.

عمو جلال: دي حاجة طبيعية انو يرفض يمشي لانو مظلوم...انا متأكد ولد ابوه عبدالله وامو مرة زيك مستحيل يشيل حاجات زي دي في شنطتو... انا اليوم الاحد بمشي المدرسة.

عروة: المديرة دي زاتو دايما بتقيف ضدو يعني اول يوم برضو دخلوهم في شكلة ودقو همام لمن رعف...وبعد دا كلو قالت حتكتبهم تعهد وديلك خلتهم يرجعو فصولهم.

عمو جلال: والله من ما سامية دي مسكت الادارة ماف اي تحسن...كل يوم مشكلة والمدرسة مستواها متدني انا هسه قاعد افتش على مدير غيرها.

جاهم صوت هزاع: انا حارجع المدرسة بس بي شرط واحد.

قمر: بتتشرط على الناس(خليهو على كيفو يتشرط ويتقطع ويعمل العايزو دا زيزو ياخ)(.

عم جلال: قول شرطك.

هزاع: في واحد اتعرفت عليهو قريب...ولد على قدر حاله انفصل من المدرسة لانو ما دافع الرسوم وما عندو حق الرسوم اصلا...وهو مجتهد وشغال عشان يلمها...وشكلو طالب ممتاز وشاطر...لو خليتو ينزل معاي المدرسة اوعدكم انو ما حاقول طلعوني من المدرسة دي...وحاطنش المديرة والاولاد ديلك وحابعد من المشاكل.

عمو جلال: دا شرطك؟ هزاع: اي

عمو جلال: طيب ما عندي اي مذكلة خليهو يجي بكرة يشيل اليونيفورم بتاعو.

هزاع بي فرحة: بالجد؟ شكرا ليك.

عمو جلال: العفو...يلا مستنيك انت وهو يوم الاحد. هزاع: ان شاء الله.

عروة وهو بقعد جمبو: طلعت ذكي لكن. هزاع: كييييف اعجبك. شوية كدا علا صوت ماما يسرية وهي بتقول: يلا يا جماعة الفطور.

قامو كلللهم وجومو وبعديها شربو العصير والشاي والقهوة وحركاتك بركاتك.

جدو مختار بقا بيونس فيهم: انتو اولاد الومن دا ما عندكم اي مسؤولية ولا بتقدرو تتحملوها حتى...انا زمان لمن كان عمري 18 سنه كنت بي اولادي.(

همام: انتو جيبو لينا العروسات واحنا حنجيبهم ليكم توائم توائم. جدو مختار: انت منو؟

همام: انا هيما.

جدو مختار: اي انت التوم قليل الادب عرفتك. ورد: هي قلة ادب ساي؟

همام: شايف احسن تسكتي ورد: ابييييت. جدو مختار: ابوكم دا زاتو لمن عرس كان صغير عمرو 18 سنة لكن كان بيتحمل المسؤولية وماشاء الله قوي وماكن (اجججي يا الماكن) ماما يسرية: امكم زاتا كانت ضغيرة...يا حليل ابوكم كل يوم بيسأل منكم قال جاي الاسبوع الجاي. عروة: امس كان بيتكلم معاي.

قمر: يلا يا جماعة ما استغني لكن اختي عاملة عزومة عشاء بي مناسبة رجوع بنتها من شهر العسل لازم امشي اساعدها.

ماما يسرية فهمتها انها عايزة تتهرب من ذكر سيرة عبدالله: طيب يا بنتي وصلي ليهم سلامنا. قمر: ان شاء الله عاينت لي ولدها: قضو قعدتكم وبعديها الحقوني حاسوق عربيتك. عروة: ان شاء الله.

المهم ابشباب قضو وقتهم في بيت جدهم وطلعو بعد ما صلوا المغرب. عروة كان سايق والاستوب قافل وزحمة.

ورد بي خجل وصوت هامس: هزاع هزاع هزاع وهو بيخت تلفونو: نعم؟

ورد: انا عايزة ادخل الحمام هزاع: بتهظري صح؟

ورد: لا والله جادة.

همام: مالا قال بتتكلم بي ادب كدا هزاع: عايزة تدخل الحمام.

همام: نعم ياختي وقبيل لمن كنا في البيت كنتي بتسوي في شنو ورد: دا اسمو نداء الطبيعة يا فهم ما بيدي.

عروة وهو بيوطي الصوت: مالكم في شنو؟ همام: الانسة عايزة تدخل الحمام.

عروة: اوديك وين هسه حتى الاستوب قافل. همام: خلينا نوصل بيت خالتو.

ورد: والله العظيم ما تتصرفو ابهدل ليكم العربية دي عروة + هزاع + همام: لا لا لا ايااااك...اهدي سمسم وهي بيتلفت: في شنو يا جماعة ان شاء الله خير(اللمبي يادوب انتبه ليهم.) عروة: حالة طارئة.

سمسم: اهااااا...خلاص نظلو خليهو يمشي ورا الشجره ديك. عروة وهو بيخت يدو في وشو: دي ورد يا سمسم. سمسم وهو بيقبل وراهو: هي اي صح.

عروة: خليك خليك مع سب واي بتاعتك.

همام: زيد المكيف دا شوية يا عروة انا مسخن. هزاع: هماااااام - – - همام: خلاص ياخ.

عروة وهو بعاين لي ورد البتتململ: خلي الاستوب يفتح اشوف ليك اي مطعم.

شوية كدا الاستوب فتح...عروة مشا بيها اقرب مطعم(عاد السويتيها فيهم يا ورد.) عروة: انزلو معاها يالتيمان.

همام: انزلو انتو انا مااالي ومالها.

سمسم: واحد فيكم يعمل نفسو بيشوف في المنيو والتاني يوضيها.(سمسم بيفكر يا جدعان) هزاع وعروة نزلو بيها.

عروة عمل نفسو عايز يطلب وهزاع فحط بيها على الحمامات... وقف بعيد وهو بيقول ليها: ما تتأخري عليك الله.

عروة وهو واقف فجأة سمع صوت زول بينده عليهو... _نهاية الفصل السابع – انتظروني بعد ساعتين في الفصل الثامن

اسفة علي الاخطاء مرروها