الجزء 15

قال لي بي غضب قلته ليك أنزلي امشي بيت اهلك ي شهد م

بتفهمي انتي؟؟

مسحته دموعي وقلته ليه طيب تمام ي ماهر بس خليك على علم

انا لو نزلته من العربيه دي ومشيت بيت اهلي م تفكر تجي

تسوقني منهم تاني ،

فضلته قاعدة وانا منتظرة منو اي ردة فعل بس حتى م فكر يعاين

لي بالعكس سكت وهو ماسك الدركسون،

الجواب كان واضح نزلته من العربيه وقفلته الباب بكل قوتي واتحرك

قبل م ينتظرني ادخل حتى على عكس عادتو،

طلعته وانا م شايفه قدامي وببكي حتى السلالم دي م عارفه روحي

طلعتها كيف ، ماما اول م فتحت لي الباب قالت لي مشيتو وين

انتو؟والحصل شنووو؟منذر دة لحقكم الحصل شنو راجلك مالو مع

الولد؟

كانت بتتكبم بي خلعه وانا دموعي في عيني

مسكتني قالت لي ي بت بتكلم معاك في شنو؟؟؟

قلته ليها ماف شي

قالت لي كيف يعني ماف شي؟ماهر مالو مع حسام والحصل شنو

وانتي مالك بتبكي اتكلمي ي بت؟؟

قلته ليها ماما انا م قادرة اتكلم عليك الله خليني بس اللحظه

دي

قالت لي لا م بخليك الا تفهميني ماهر وين؟

إتفكيت منها ودخلته غرفتي ورقدته في السرير وبقيت ابكي،وهي

تشيل وتتكلم معي في النهايه قالت لي انا بتصل على ماهر

دقيقة طلعت من الغرفه ...

..................

ي ولدنا الزول دة زي م نحن شايفين هو المتضرر منك م انت ..

ي سعادتك الزول دة انا متضرر منو عندي كم شهر تمام

طيب ليه م جيت فتحته فيه بلاغ طالما متضرر منو؟

م كنت لامي فيهو،م كان قاعد في بيتهم ،انا عندي كم شهر

بمشي بيتهم دة اكتر من ميه مرة بس هو م راجل عشان يقعد

زي الرجال ويعمل الكان بعمل فيهو دة ✅

طيب يعني اسي م عايز تسحب البلاغ دة نهائي؟

لكن الزول دة راسو كلو مربط شاش لو ..

قاطعتو وقلته ليه ي سعادتك الزول دة لو طلع من هنا م حيسلم

مني برة ✅

م كنت شايف قدامي ،ولا حاسي بنفسي واعي للأنا بعملو والممكن

اعملو ومتأكد تماماً إنو الزول دة لو طلعوه من القسم م حيسلم

مني ابداً واهلو م حيقدرو يتخذو ضدي اي اجراءات لأنهم عارفين

ولدهم غلطان ✅

طلعته من القسم وطلعته تلفوني لقيت كميه من المكالمات من

طه ومنذر وزياد

رجعته لي زياد م رد بعدها رجعته لي منذر ورد وقال ..

ي ماهر

اي ي منذر ..

،في شنو ي زول وانت وين ومالك م بترد على مكالماتنا؟

انا ماشي على البيت

جاي علينا يعني؟

لا ماشي على البيت بجي عليكم بكرة الزمن إتأخر

قال لي انت متأكد إنك كويس ي زول؟

قلته ليه لالا انا تمام ي منذر والله .

قال لي جاي عليك،

م كنت في وضع يخليني اتكلم مع اي زول ولا اتفاهم معاه سواء

كان من قريب او بعيد لما عرفته منذر جاي علي م رجعته البيت

وقفلته تلفوني

عديت يومين وانا قافل تلفوني وم طايق زول وحتى مهند في البيت

م كنت متجاوب معاه،سألني مالك مع شهد؟لما م رديت عليه

طلع ..

جا زياد البيت وحاول يتكلم معي ويفهم مني الحاصل قلته ليه بي

عصبيه ونفاذ صبر زياد م تفتح الموضوع انا لو شايف انو ممكن

يتحكي كنت حكيت ليك من غير م تسأل، زول غلط علي وانا

شوفته شغلي معاه بس ✅✅قال لي طيب شهد وين؟

بعد سؤالو لي عن شهد حتى راجعته نفسي بخصوصها في اللحظه

ودة كان اليوم التالت من المشكله، بتفكيري في شهد وأخر

كلامها القالتو لي لقيت نفسي بديت اطلع من الحاله الأنا فيها

شويه شويه،بس هل انا ندمان لأني عملته كدة؟

لأ ابداً ..

اخدته بعضي وعلى طول مشيت على بيتهم الساعه كانت 4عصر

" الجمعه" ،لما وصلته البيت إستقبلني منذر واول حاجه قالها لي

لما شافني ماااااهر؟؟ مالك ي زول في شنووو وانت وييين؟

وتلفونك دة جادعو وين؟لا بترد ولا بترجع ولا بتتلقي في البيت

قلته ليه انا تمام!!!

قال لي تمام شنو ي زول م تمام ولا اي شي والله حيرتنا كدة

ادخل نتفاهم،

دخلته لاقتني عمتي من المدخل مااااهر ي ولدي،مالك في شنو؟

والحاصل شنووو؟والله قطعته قلوبنا انت كويس ان شاءالله؟

قلته ليها ماف شي ي عمتي انا تمام الحمدلله 🌻

قالت لي كيف يعني ماف شي؟مالك مع حسام اللماك معاهو

شنو ؟

قلته ليها عمتي روقي ماف شي ،مشكله بسيطه وإتحلت

قالت لي مشكله شنو ي ولدي؟اللماك شنو مع العواليق الفقر دة ؟

ومنذر دة مشى ليكم في البيت اكتر من مرة ،اكتر من مرة وقال

ماف زول بفتح الباب ،كتر خير مهند الطمنا عليك لو م كدة والله

كان راسنا شطب

سكتت

منذر قال ليها امي خلاص عليك الله م تكتري اسئله بعدين بعدين

كدة خلينا نقعد اول ..

قالت ليهو كدة اجيب ليهو مويه واجهز ليهو غداء

قلته ليها لا ي خالتي والله م عايز على مشيه،

شهد موجودة صح؟

قالت لي اي قاعدة في غرفتها لكن كدة اتغدأ اول اسي نحن

اتغدينا قدامك

قلته ليها ي عمتي انا متغدي والله م عايز شي الله يديك

العافيه 🌻❤ بس كلمي شهد خليها تجهز عشان نمشي،

قالت لي ي ولدي كيفن الكلام دة؟سمح اشرب حاجه طيب حتى

بعدين امشو..

ٌ. ...........

ماما جاتني في الغرفه فجأة،قالت لي شهد ي بت قومي راجلك

جا برة ،اطلعي سلمي عليهو ،وبعدين اجهزي عشان تمشي معاهو

❤

قلته ليها انا م بطلع اسلم عليهو ولا زفت وم ماشه معاهو✅

قالت لي اجي ي بت في شنو كدة قولي بسم الله مالك كمان؟

جاوبيني عندي كم يوم بسألك السؤال دة وانتي سااااكته اوووعى

يكوني حسام كان برسل ليك عشان كدة ماهر ضربو؟

قلته ليها بنبرة حادة امي انتي بتفكري فيني كدة؟

قالت لي اها مالك مع راجلك ي بتي؟وهو مشى ضرب الولد لشنو

لا انتي دايرة تقولي لا هو داير يحكي ي بتي م تدسي مني شي

عشان كان في شي نحلو ونعرف نتصرف

قلته ليها ماف شي دي مشكله بيني وبينو وماف زول يتدخل فيها

انتهينا ✅

قالت لي سمح طالما دة قولك ودة اسلوبك تقومي تمشي تحليها

معاهوفي بيتكم اسي

سكتت

جابت لي التوب والشنطه قالت لي قومي يلا امشي مع راجلك

واتفاهمو براحه لو حصل بينكم شي اقعدو حلوهو بالهداوة

قعدته في نص السرير وشلته التوب والشنطه رميتهم في السرير

التاني وقلته ليها م ماشه يعني م ماشه كلامي واضح ✅✅

قالت لي بنبرة حادة والله امشي اكلم منذر يجي يشوف شغلو

معاك لأنو دي قلة ادب فارغه منك بس م اكتر الدلع البتسوي فيهو

دة كان زمان اسي انتي بت متزوجه تصرفات الشفع دي م بتنفع

حكمي عقلك دة وختي الرحمن في قلبك وخليك مسؤله وبطلي

البتسوي فيهو دة ،كان اي واحدة بتختلف مع راجلها بتسوي

جنس عمايلك دي وبتقول م راجعه معاه كان الدنيا خربت ،قالت

كلامها دة وطلعت خلتني 💔✅

امي م بتفهمني وم حتقدر تفهمني ابداٌ،انا موجوعه شديد من

تصرف ماهر معي،والواجعني اكتر اني هنت عليهو ،حتى م فكر

يراجع نفسو ويرجع يتكلم معي ولا حتى فكر يرفع سماعه التلفون

ويتكلم معي ويعرف حالي كيف وهو عارف الحاجه دي ممكن تأثر

علي قدر شنو،وعارف إنو انا م حتغمض لي عين بسببو وفعلاً دة

الحصل بس هو انانيتو طاغيه طاغيه شديد وم بفكر غير في نفسو 💔😭😭

كنت بفكر بيني وبين نفسي وببكي

بعد 5دقايق وانا قاعدة في نص السرير ومغطيه وشي بي يدي

وببكي من كلام حسيت بالباب فتح،

اتوقعته اسمع صوت منذر زي م قالت امي انها حتكلمو بس

العكس،

سمعت صوت ماهر وهو بقول لي بصوت خافض شههد ❤فضلته

ساكته لغايه م حسيت يدو في كتفي اتنفضته منو ورفعته راسي

وقلته ليه م تهبشني،اوعى تهبشني ،

بقى يعاين لي مسااااقه بعدها قال لي انتي كويسه؟؟

لما م رديت عليه قال لي قومي خلينا نمشي البيت!!

كنت مقررة اسكت ون اتكلم معاه بس كلامو هنا استفزاني

قلته ليه بيت؟؟؟

اي بيت الانت جاي تسوقني ليه بعد 3 يوم دة ؟انت الجابك هنا

شنو اساساً؟

مد يدو وقال لي شهد ..

نزلته من السرير وانا دموعي ماليه عيوني قلته ليه ماااا

شهد،مااا شهد ي ماهر وم تمد يدك دي و ..

قبل م اتم كلامي مسكني حضني وقال لي لزيتو وقلته ليه قلته

ليك م تمد يدك دي وتقربها مني م تقرب مني إياك انت فاكر

نفسك براك بتعرف تقرف؟اسي انا قرفانه منك ومن خلقتك دي وم

طايقاك ابداً ي ماهر

قال لي طيب نمشي البيت نتفاهم وقولي العايزة تقوليه هناك

قلته ليه عاين انا م كيفك ولا مزاجك وقت م عايز تجيبني ترميني

في بيت اهلي ووقت م عايز تجي تسوقني،قبل يومين لما كنت

بسأل فيك وبقول ليك ي ماهر ما تسكت و جاوبني مش اخترته

تسكت؟مش قلته ليك لو نزلته من العربيه دي م تجي راجع

تسوقني وبرضو اصريت على موقفك؟

عايز شنو انت اسي؟عايز تتفاهم معي بعد م طرته ارضيت

حماقتك؟يلا انا بعد كدة م عايزة معاك اي تفاهم امشي كمل

الكنت بتعمل فيهو وخليهو ينفعك

ضغط عيونو بأصابعو وقال لي بحيل مهدود انتي م عارفه شي تمام

انا ...

قاطعتو وقلته ليه لا عارفه،مش القرف البرسلو ليك حسام دة ولا

غيرو؟طيب جاوبني انا ذنبي شنو في قرفو وبطالتو؟ليييه تتعامل

معي كاني عملته معاه شي بالحرام وكأنك م كنت عارف

شي؟ ،قبل م تتزوجني مش كنت عارف إنو انا كنت متزوجاه ولا

لأ؟كنت عارف ولا لأ سألتك انا رد؟الكلام الكاتبو ليك دة مش ياهو

البحصل بين اي اتنين متزوجين؟الزول دة انا عندي منو قسيمه ن

كنت عايشه ولافه معاه ساي علشان تقرفني بسببو،وبعدين تعال

هنا وانت احتفظته بكلامو دة كلو ليه؟م حذفتو ليه؟كنت بتقراه

علشان تزيد حماقتك و تقرف مني انا صح؟صح ي ماهر؟

قرب مني تاني عايز يضمني لزيتو وقلته ليه م تقرب مني قلته

ليك واطلع برة بيتنا ي ماهر ،

رجع كم خطوة ورا و

طلع مشى ..

بعدها قدر م امي ومنذر حاولو يتكلمو معي علشان يفهمو مالنا

والحاصل بينا شنو ابيت اتكلم المشكله كانت م بتتحكي اقول

ليهم شنو يعني؟الكلام الكاتبو حسام لماهر؟كدة ي دوب ولعته

المشكله زيادة ومنذر وانا بعرفو حيكبر الموضوع اكتر من ماهر

وممكن يحصل اكبرمن كدة،وصلته الحد في النقاش مع منذر

لدرجه إني في الاخير قلته ليه دي مشكله بيني وبينو انت م

تدخل وكان عايز يضربني بس امي دخلت في النص،وحكت لبقيه

اخواني حسام ومؤيد ومجتبى وعملو لي موالات مكالمات واسئله

وتحقيقات

.......................

شهد ردة فعلها على قدر م إنها كانت طبيعيه على قدر م إنها

صعبت علي الموضوع شديد،انا لما اخترت اوديها بيت اهلها لأني

م كنت في وضع يخليني اقدر اتعامل معاها في اللحظه ديك ، انا

واحد من اللي لما يغضبو م بشوفو قدامهم وفي لحظه ممكن يخربو

اي شي عشان كدة على الأقل محتاج مساحه عشان اقدر احكم

عقلي وتصرفاتي واقدر اضبط نفسي واهدأ ودة م معناها إنو هي

غلط وانا بعاقبها لأ ابداً بس انا خفت عليها مني ف فكرة إنها

تكون في بيت اهلها كانت بالنسبه لي اضمن من إنو تكون قدامي

في البيت والحاجه دي كانت في صالحنا نحن ال 2 هي محتاجه

تهدأ وانا كمان ودي خطوة بالنسبه لي كانت إنها بتخفف علينا

نحن الإتنين ،اخر مرة مشيت بيتهم منذر كان عايز يغصبها على

الجيه معي بس انا رفضته قلته ليه خليها طالما هي م عايزة

تجي برضاها خليها تاخد راحتها ووقتها 💔❤

..........

إتصلت علي مناسك واظن ماما حكت ليها انو انا عندي مشكله

مع ماهر وم عايزة ارجع البيت وطلبت منها تتكلم معي،

م كنت عايزة احكي ليها بس هي ضغطت علي علشان تفهم

المشكله ف بديت احكي ليها وابكي،

قالت لي وااااااي لكن م قادرة اصدق إلهي تتحرق بجاز وسخ ي

حسام الكلب ،وااااااي فظيع دة مريض مستحيل يكون طبيعي في

راجل بعمل كدة؟

فضلته ساكته وانا ببكي

قالت لي بسس

على فكرة ي شهد تصرف ماهر رجولي شديد وسليم ولو م كان

عمل كدة حرفياً كان بنطبق عليه لفظ الباطل البنقولو دايماً

دة،شهد انتي مرتو يعني عرضو وماف راجل بستحمل اياً كان وإن

كان طليقك حتى يعاين ليك بطرف عينو ساي لضفر من ضفورك

خلي من انو يرسل ليهو حجات زي دي عنك ،احمدي ربك انو م

انتحر بيهو ،دة تصرف طبيعي منو واياً كان العملو بسبب الحاجه

دة انا شخصياً شايفاه م مفروض يتلام عليه انتي متخيله معي ختي

نفسك مكانو مرتك يجي واحد زي حسام يكتب ليك عنها كلام زي

دة وحجات مقززة زي دي،انا اتخيلته نفسي مكانو ساي يشهد

الله عايزة اركب طيارة وامشي انتحر بحسام،دي حاجه بتهز الما

بتهز وم ليها علاقه بالثقه او الحب او غيرو دي حاجه بتمس رجوله

الراجل ي شهد اسي جربي اتصلي على حسام احكي ليهو الكلام

دة بالتفصيل صدقيني صباح يوم بكرة حتلقيه عندك، ولا اقول ليك

خليك من حسام كدة اطلعي قولي الكلام دة لي منذر صدقيني

نهايه اليوم منذر حيكون في القسم ومتهم بجريمة قتل،الحاجه دي

حارة شديد لأي راجل قلبو حار 💔✅

بقيت ساكته ودموعي جاريه ..

قالت لي شهههد افففففف اسمعيها مني الموضوع على قدر م إنو

بزعل بس انا لو مكانك بنبسط لأنو عندي راجل قلبو حار علي كدة

ودة من حبو الشديد ليك ي شهد افهمي ،عارفه غيرتو دي ممكن

توصلو مراحل ابعد من كدة ،وحسام دة اصلاً هو باطل وانتي عارفه

كدة من مواقفو الزباله معاك،تتزكري ي شهد لما كنتِ حامل

وضربك وخلاك مرميه في مكانك الا فاطمه اتصلت على ماهر جا

ساقك وداك المستشفى،

تتخيلي ي شهد لو دة ماهر كان حيخليك بالحاله ديك؟حيسكت

على تعامل امو الرف معاك؟

لأ ي شهد،خليك عاقله وواعيه وافهمي انتي عندك راجل رجولتو

بتسد عين الشمس ودة عوض ربنا بعد م ابتلاك بي واحد الله جابو

في الدنيا دي بس بي إسم ذكر ساي 💔✅✅

قفلته منها وقلبي واجعني اكتر وزدته في البكى

انا عارفه إنو موقف ماهر يمكن صح بس برضو م قادرة اتجاوز حته

انو انا هنت عليه،هنت عليه الايام دي كلها ، كان موقفي ممكن

يتغير لو جا راجع نهايه اليوم واتفاهم معي،كان ممكن يتغير لو

حتى رفع سماعه التلفون وغض نظر عن الحاصل بينا وحاول يتطمن

علي بس هو لا عدة الكم يوم ديل عادي عادي شديد ف معناها

زي م هنت مره حأهون الف مرة جايه اكيد 💔😭

وانا نايمه صحيت بصوت ماما بتصحي فيني وبتقول لي شهد،ي

بت شهد ،فتحته عيني مخلوعه قلته ليها في شنو؟

قالت لي هاك ختت لي التلفون،قلته ليها منووو؟ طلعت وهي

ساكته

شلته التلفون م عاينته للرقم ختيتو في اضاني وقلته الوو؟

سمعت صوت بقول لي " حبيبي "سكتت وانا قلبي عايز يطير من

الكلمة دي

قال لي شهد،صوتو كان مبحوح،قال لي اتوقعته اي شي بس م

اتوقعته ابداً تعدي علينا ايام نصل للمرحله دي ،يعني كانت ممكن

تهون لو كنا على نفس الموقف دة في بيت واحد،م طايقاني م

حأخليك تشوفيني،وم حتسمعي صوتي بس المهم تكوني موجودة

في البيت ،شهد انتي عارفه وجودك بفرق فرق السماء عن الأرض

في حياتي صح؟طيب ممكن تبطلي عناد وركوب راس بعد كدة

وتخليني اجي اسوقك؟انا كل يوم بقعد احسب الساعات عشان

الأيام دي تعدي وم حاسي بي إنها ماشه ابداً،

فضلته ساكته وانا بسمع في كلامو وببكي بس م محسساهو إني

ببكي 💔

قال لي فهمنا انك زعلانه وم طايقه وشي ولا حتى سماع صوتي

بس من حقي اتطمن عليك ممكن تفتحي تلفونك؟ممكن لما اتصل

تفتحي الخط حتى لو م حتتكلمي انا عايز اتطمن وفتحه الخط دي

حتطمني ممكن ي شهد تعملي الحاجه دي لغايه م حالنا يتعدل

ونرجع؟ 💔❤

قفلته الخط واتفقعته بكى ،انا مشتاقه ليه مشتاقه ليه شديد بس

برضو م قادرة اتجاوز العملو ابداً 💔❤😭

،الصباح وانا شغاله بنضف وبمسح في البيت فجأة جرس الباب

ضرب وعلشان انا م لابسه دخلته غرفتي اشيل توب جيت لقيت

ماما بتقول :

اهلاً وسهلاً اتفضلي،اتفضلي ي بتي كيفك ان شاءالله طيبه

واتفاجاته بي فاطمة في وشي،هي زاتها اتفاجأت لما شافتني في

وشها قالت لي بي دهششه شهههد؟انتي هنا؟وجات سلمت علي

بي حرارة وحضنتني وماما من وراها مُكشرة وشها وبتعمل لي

حركات،

فاطمة قالت لي كيفك وكيف احوالك ان شاءالله تمام؟

قلته ليها الحمدلله اتفضلي اقعدي

،خليتها قاعدة ودخلته المطبخ جات ماما لاحقاني قالت لي

اسمعي هنا دي الجابها ليك شنو؟انتي الناس ديل مش انا قلته

ليك اقطعي علاقتك بيهم نهااائياً؟انتي ي بت دايرة تخربي بيتك

بقصادهم؟مش كفايه الراجلك عملو واسي مشكلتكم م دايرة تتحل

تاني دايرة تشربكي نفسك معاهم؟

قلته ليها ماما؟؟اسي انتي مالك ؟وانا ذنبي شنو هي الجاتني م

انا،

قالت لي اقطعي علاقتك معاهم رسمياً وم تخلي يكون في اي

تعامل بينك وبينهم ولا اقول ليك اسي انا بطلع اقول ليها الكلام

دة ،

قلته ليها ماما ،مسكتها وقلته ليها فاطمة دي م زي باقي

اهلها وهي م قصرت معي كدة بعدين نتفاهم ي امي لو سمحتي

تمام؟

جهزته مويه وعصير وطلعته لفاطمة،

قلته ليها اولادك كيف؟

قالت لي تمام والله كانت متغيرة شديد ووشها شاحب م فاطمة

السمحه بتاعه الزمان ولونها سمح ومهتمة بنفسها وفي حزن كدة

ظاهر على وشها 💔

قلته ليها عيانه ولا شنو ي زوله؟

قالت لي بري والله لكن ي شهد هموم الدنيا كملتنا 💔

سكتت وانا بعاين ليها مسافه وقلته ليها الله يصلح الحال خير

مالك؟

سكتت مسافه وهي بتعاين لضفورها قالت لي اتصلته عليك تلفونك

مقفول كل الوقت م عارفه بيتك لكن ختيت النيه وقلته اجي لي

خالتي سوسن توصلني ليك والحمدلله إني لقيتك

قلته ليها خير اتفضلي!!

امي جات طالعه سكتت وبقت تعاين لي وامي بتعاين لينا نحن

ال 2عشان سكتنا،

فهمتها انها م عايزة امي تسمع العايزة تقولو،بعد مسافه قلته

ليها عن إذنك دخلته غرفتي م تميت دقيقتين جيت طالعه قلته

ليها فاطمة تعالي ،بقت تعاين لي وامي بتحمر لي،قلته ليها

اتفضلي،

جات داخله وامي لسه بتحمر لي بي غيظ ،دخلنا وقفلته الباب،

قلته ليها اقعدي ي فاطمة ،قعدت وسكتت ،

قلته ليها فاطمة خير احكي مالك؟نحن قبل كل شي مش كنا

اخوات ؟؟

قالت لي بصوت مبحوح والله ي شهد م خير نهااائي،عارفه

بالحصل في اليومين المضو ديل وراجلك ماهر اريتو راجل السرور

م عليهو عتب ابداً وفشاني في حسام لأنو حسام م راجل ولا شاف

الرجاله بعينو و بقى سكااري ساااي ولافي من هنا لي هنا كان

شفتي ومرة يتقبض ويتجلد وتاني يرجع لسكرو وحالو ،عندو فترة م

قاعد معانا مع خالو في الدهب امو ودتو على اساس انو حالو يتصلح

ويبقى زي الرجال ويتهدي هناك لكن قام خرب مرة واحدة وكل

البطلعو مكمل في السكر والكلام الفارغ،وطبعاً الدكان قطعو وقطع

راسنا بي سفاهتو وانطلاقتو مع البنات والنسوان المتزوجات

البباريهم وحالتنا والله ي شهد بقت بالبلاء كان شفتي وعمتي

جاها سكري والله معذبها عذاب السنين ي شهد والظروف بقت

صعبه شديد ي شهد اصعب م بتتصوري ،والله ي شهد بقيت

بعوس الكسرة وببعيها في البيت ،وبعمل الدلكه والبخور والريحه

وبجيب لي شويه ملابس ووحاجات بقسمها في الحله عشان شويه

نمشي بيها امورنا واساعد بيها ،وفي النص الوضع الكعب النحن

فيهو دة حسام م اكتفى بكل العملو فينا دة وبدل م يعقل امورو زاد

سؤ وجا راجع وقرفنا حياتنا يومي جوطه يومي مشكله في البيت

والله موقف امو وابوه واخوهو بي رجل واحدة بشيل الليل دة بتكلم

وبهضرب بس و أظن هو على حسب م انو بسكر بقى يرسل لي

ماهر كلام م تمام وماهر دة قبل فترة جانا في البيت سأل منو انا

دي طلعته ليه وقلته ليه مافي وقدر م حلفتو عشان يدخل رفض

ورجع على طول واظنو كان بفتش عليهو عندنا كتير،اها حسام دة

قدر م رجعناهو الدهب بعدي فترة بسيطه بنضغط في الشغالشغل

بلم ليه قروش بجي راجع والله ي شهد م بدي منها امو غير

قريشات بتنتهي في نفس اليوم والباقي بكملهم سكر وسفاهه

وبقى يسرق ي شهد،بسرق وبنط البيوت عديل نهاراً جهاراًلما م

يلقى حق السكر ،والله امو في البيت م رحمها كان شفتي

الانبوبه سرقها،التلفزيون سرقو،عندها سراير حوش اتنين جمب

الباب سرقهم،قبل فترة نط في بيت ناس والله ي شهد قبضوه م

خلو فيه حته سليمة والله بقى علينا الما بقى في زول فضايح

فضايح م يعلم بيها الا الله واظن ببلع الحبوب دي وبشرب

السجارة زي البقى مجنون كدة تلقيه احياناً ماشي ويتكلم براه،

اسي من من خالو م تم اسبوع م عارفه الكلم ماهر بجيتو منو بس

يوم الحصل طلعنا مخلوعين بأصوات صراخ وكواريك قدام البيت

طلعنا لقينا ماهر بضرب فيه والحله كلها واقفه تتفرج،والله انا

من مغستي منو م زعلته عليه واسيلو طلع من المستشفى واتقفل

في السجن لو علي انا دي والله اهون علينا من البعملو فينا في

البيت وهو سكران والله قطع حشى امو دي وخلاها تتمنى الموت 💔

لكن ي شهد لو دخلوه السجن وبقينا في موالات محاكم وجرجرة

وغرامات والله بتبقى لينا مشكله لأنو نحن بقينا عدمانين

الشي،والله ي شهد حق الأكل نحن عندنا في تلتله خليك من انو

ندفع غرامات وغيرها 💔

قلته ليها بصوت مبحوح فاطمة

قالت لي دة الحاصل والله ي شهد شوفي اسي الحال بقى صعب

كيف والله الأنسولين البتاخدو عمتي براه ميزانيه دة غير انو زول

السكري دة م بتحمل لا جوع ولا غيرو ومحتاج معامله خاصه ،اسي

من يوم الحصل والله ي شهد عمتي م ارتاحت ولا اكلت ولا

غمضت ليها عين بس شغاله تهضرب وهي قاعدة جمبو في

المستشفى وتهضرب وانتي عارفه انو حسام دة نفسها الطالع ونازل

وقدر شنو بتريدو،خربت طبعو وبوظتو لكن اها نقول شنو غير حسبي

الله ونعم الوكيل بس؟؟

م لقيت نفسي قادرة اواسيها قلته ليها الله يصلح الحال 💔 قالت لي

ماهر لسه بلاغو في القسم ومنتظرين حسام يطلعوه من

المستشفى عشان يدخلوه السجن والله ي شهد لو علي انا لو

عملو فيهو العبر م اسفاً عليه بس والله خوفي كلو على عمتي وانا

عارفه وضعنا كيف يعني لا حمل مستشفيات ولا غيرها،بس عليك

الله خلي ماهر دة يخلي موضوع البلاغ دة و اصلاً بعد كدة حسام

ابوهو سايقو بذات نفسو مرجعو الدهب عليك الله ي شهد خلي

ماهر يخلي موضوع البلاغ دة بس والمجنون في ذمه الواعي خليه

يعتبرو مجنون انا عارفه لو دخلو السجن واتحكم واتفرضت عليه

غرامات عمتي حتعمل اي شي عشان تطلعو من السجن اي شي

حتى لو تشحد او تبيع حجات البيت حتبيعهم عشان تطلعو ونحن

والله ي شهد العلينا م يعلم بيها الا الله

قلبي وجعني لقيت دموعي جاريه 💔

وهي زاتها كانت بتبكي،

يعني حاجه حسبي الله ونعم بس ،في بني ادم بلدي ذنوبو؟والله

ام حسام دي والدة ذنبها 💔😭 حاجه حارة شديد لما زول يتكلم معاك

بصيغه وكأنو بترجاك ترجي عديل 💔

ونحن بنبكي ماما جات داخله وشايله كبايه العصير والمويه في

يدها وقالت ليها خليتيهم يسخنو قلته اجيبهم ليك،لما شافتنا

بنبكي بقت تعاين لينا قالت لينا مالكم؟

مسحته دموعي قلته ليها ماف شي،

قالت لي سمح معليش ازعجتكم وطلعت ،بعد لحظه صمت مسافه

قلته ليها طيب م تبكي ي فاطمة إن شاءالله م يحصل الا كل

خير صدقيني اشربي المويه و العصير كدة،يلا شيلي العصير ،

بعد م راقت شويع قالت لي ماهر كيف اسي؟ان شاءالله الطعنه

الطعنو ليها م كانت كبيرة؟

قلته ليها بخلعه طعنه؟؟؟

قالت لي طعنو بالسكين قالو في رجلو ولا وين م عارفه انا م

شفتها لكن سمعته نسوان الحله بحكن كدة 💔

خفته واتوترته طبعاً،ماهر مطعون وانا م عارفه؟

............

مهند انا فاهماك وفاهمة انو انت شايف دي حاجه بين اتنين

متزوجين وخاصه بيهم وم عايز تدخل في الموضوع،بس عاين انت

منو؟

انت اخو ماهر الكبير وبمثابه ابوه اليوم تمام؟

يعني شنو؟

يعني كلمتك مفروض تكون مسموعه عند ماهر ولا على كيفو يسمع

كلامك ،وانت قاعد معاه في بيتو م منطق ابداً يسوق شهد يوديها

بيت اهلها قدامك وانت ساكت بتتفرج ما صح وحركه ما جنتل

منك ،

انا اتصلته ي سمر وحاولته افهم من شهد نفسها الموضوع وم

حكت وم حبيت اضغط عليها

طيب م تضغط على شهد بس تمسك اخوك من يدو وتمشي بيه

بيت مرتو تقعدهم وتختهم قصادك وتقول ليهم ي حليناها في

اللحظه دي ي حليناها وم ترجع الا وهم ال 2 معاك ،وانا متأكدة

إنهم حيسمعو ليك صدقني 🌻❤

سمر انا ...

انا عارفه انو انت مقتنع بي انو اي مشكله بين اتنين يدخل فيها

طرف تالت حتبوظ وعايز تخليهم ياخدو راحتهم ومساحتهم بس ي

مهند المساحه دي لو كبرت حيحصل جفا وخمول 💔

انت فاهمني ي مهند؟

فاهمك ايوة انا اصلاً نيتي اني اختهم واصالحهم بس متردد لأني

سألته ماهر من اصل المشكله وبرضو م جاوبني ف قلت يمكن

حاجه خاصه هم م عايزين زول يناقشها وعايزين ياخدو وقتهم

عاين ي مهند مش نحن اتفقنا بي انو نتخلص من خوفنا تجاه

حاجات معينه بمواجتهتا ونحشر مناخرنا في حاجات ونعتبرها

استثناءات؟

ايوة !!!

طيب معناها زط صح؟

زط؟؟؟انا م قلته ليك اللفظ دة بايخ وسخيف؟؟؟

خلاص دسيس 😔

ههههههههه متخلفه و هبله والله انتي ✅🌻💔😂

.........................

كلام فاطمة دخل فينا غصه خلتني شايله اليوم كلو بكى وم عارفه

ببكي من زعلي عليها ولا من خوفي على ماهر وفقدي ليه،فاطمة

من الناس الوقفو معي في اسوأ لحظات حياتي انا لولاها م كنت

حأكون طلعته من البيت داك لغايه اللحظه،واحدة من الناس الخافو

ربنا فيني شديد فكونو اشوفها بالحاله دي والله م بتهون

ابداً،فضلته على الحال دة وانا بفكر لغااايه الساعه 12بالليل ،م

كنت قادرة اوقف تفكير في الموضوع وم قادرة اوقف تفكير في

ماهر،م قادرة اتنافق مع نفسي واقول اني م مشتاقه ليه وعايزة

اسمع صوتو ،بقيت اتقلب في سريري وانا م قادرة انوم،فتحته

تلفوني وفتحته صورو وبقيت اعاين فيها وابكي،بعدها دخلته

المكالمات وبقيت اعاين لرقمو وسرحانه وتلقائياً لقيت نفسي

متصله عليه،بعد اكتر من جرسين فصل الخط ورجع لي هو،بعد

مسااافه فتحت الخط اول م فتحتو ..

قال لي شههههد؟؟حبيبي ❤🌻

فضلته ساكته وانا بسمع في صوتو

قال لي ي بابا انتي كويسه؟

لسه انا ساكته وببكي بصوت بطيء

،سكتت مسافه واخد نفس عميق حتى قال لي بي تنهيدة حبيبي

وانا كمان مشتاق ليك،مشتاق شديدوفاقدك والله لو عارفه فقدك

بعمل فيني شنو م حتخليني افقدك ثانيه ي شهد 💔

هنا انا اتفقعته ليه بكى في التلفون 💔 هو فاكر نفسو هو براه الحاسي

بالفقد،حتى في دي فاكر نفسو براه البحس وانا لا 💔😭 بقيت ببكي

وهو بهدي فيني وبقول لي حبيبي خلاص بطلي بكى،

................

كل شي ممكن يكون بالنسبه لي عادي واقدر اعديهو الا بكى

شهد،في حياتي دي اي شي ممكن يهون إلا شهد دي حاجه

اتفرضت في نفسي فرض وبلقى نفسي مقيد بيها غصب عني،لما

اتصلت وكانت بتبكي فكرة انو احاول اهديها بالتلفون بالنسبه لي م

كانت كافيه ابداً ،اصلاً كنت محتاج لسبب يخليني اسمع صوتها

واتسبب بيهو عشان امشي اشوفها لأني اكتفيت بالبعد دة في

الايام الما عايزة تعدي دي،خليت الخط فاتح وانا بتكلم معاها

طلعته الشارع م كان معي عربيه لأنو رجعته لي عزو تلفونو،بتكلم

معاها وانا ماشي في الزلط وبأشر على اي عربيه ماشه في

إتجاهي،م كنت عايز اقفل منها الخط وهي بالحاله دي عشان

اطلب ترحال،م كنت قادر ابداً،وهي كانت لسه بتبكي وببتنهد وانا

بهدي فيها لغايه م وقف لي بتاع بوكس ركبته معاه ورا ولسه

بتكلم معاها نزلني في شارع رئيسي بعدها اقرب امجاد ركبتها

،قفلته السماعه وقله ليه ماشي ال ... ي معلم،قال لي تمام بي

300 جنيه،قلته ليه امشي بسرعه طيب،

م قلته ليها جاي عليك ابداً بس كل العملتو اني كنت لسه

سامعها بتبكي وكل م اقول ليها كفى كانت بتبكي زيادة

،شهد

وانا بعرفها م بتصل للمرحله دي من البكى الا بعد م تكون خلاص

وصلت الحد الفوق طاقتها حتى،اكتر من ساعه الخط فاتح وهي

بتبكي ،بعد اكتر من نص ساعه بالضبط قلته ليها حبيبي انا في

شارع البيت ممكن تطلعي ؟

سكتت

قلته ليها شهد انا عارف انك صاحيه اطلعي بس خليني اتطمن

عليك م عايز اسوقك ولا عايز اجبرك على حاجه انتي م عايزاها بس

تعالي طالعه اتطمن عليك بس وارجع ،يلا ي شهد وحياة الخلقني

وخلقك اطلعي خليني اشوفك انتي م متخيلهةفي اللحظه دي انا

مقلق كيف وصلته هنا وم حاسي بنفسي وصلته كيف،يلا ي شهد

اطلعي الله يرضى عليك م هو ي إما تطلعي او اتصل على منذر

باقي الليل دة واقول ليهو انا قدام بابكم جاي اسوق مرتي وم

حيمنعني اكيد✅