الفصل التاسع والعشرون

المهم قام مشى لابوهو .. وقال ليهو يا ابوي طبعا" انا قعدت مع البت .. واي حاجة فيها عجبتني .. وانا موافق .. وكمان متمسك بيها جدا .. بس خايف انصدم .. لانها شكلها كدا زي الماعايزاني .. والله انا خايف تقول كدا ولا كدا ..

قال ليهو وانت ما سألتها؟ .. قاليهو شكلها رافضاني .. بس انا عايزها يا ابوي .. لازم ترضوها لي ..

ابوهو قال ليهو بالله عليك؟ .. وهي لاقياك وين؟ .. كدي النشوفا ترفضك ..

انت يا ولدي عز وتعليم واخلاق وقروش ووجاهة ..

والبنات كلهن يتمننك ..

نادوووووها نادو البت .. البت جات .. عمك مصطفى قال لي عامر اطلع برة ياعامر عايز اتكلم معاها .. عامر خشه بي باب الصالون التاني ودخل قعد جنب الشباك وبسمع .. خالها قال ليها اها يابتي ..

شفتي عامر وقعدتي معاهو صح؟ .. اها رايك شنو؟ ..

قالت ليهو طبعا ياخالي .. انت اي كلام تقولو لي انا مستعدة انفذو .. الا عامر ده لو بقى اخر راجل في الوجود .. ابا بقعد عانسة.. لكن مستحيل اقبل بيهو ..

قال ليها ليه يابتي الحصل شنو؟ .. نعل ماسمعك كلام ماياهو .. ولاقال ليك ماعايزك .. قالت ليهو بالعكس.. هو عايزني شديد .. بس انا ماعايزاهو ..

انا ماعندي راي يعني .. ؟؟

حتى لو دايرين تجبروني عليهو .. حرام لانو في الدين الزواج البجبرو فيهو البت عقدو باطل صح؟ قال ليها لالا مافي زول بجبرك الا برضاك ..

لكن والله عامر ولدي ده انا بعرفو والله بسعدك ..

قالت ليهو اسفة ياخالي ده سابع المستحيلات ..

عمك مصطفى قال نادو لي امها ..

قال لي امها عليك الله اتكلمي مع بتك دي.. مقوية راسها في شنو ماعارف ..

امها دايرة تتكلم معاها .. قبل ماتبدا الكلام كويس.. قالت لامها .. امي لو سمحتي انا ماعايزة معاك اي كلام .. الا قدام ابوي .. خلينا نصل ابوي ونشوف الكلام ده شنو؟ بعدين قولي كلامك قدامو ..

وقولي ليهو انا سقتها زي الغنماية .. المودينها السوق .. عشان اعرضها للبيع لي ناس المنشية.. كلامي معاك تاني قدام ابوي ..

المراة اتلفتت على اخوها عم مصطفى.. وقالت ليهو البت دي اصلها ابوها تفاها تفة .. (يعني شايلة طبايعو) ..

قالت ليها مالو ابوي يا امي ؟؟ .. حصل يوم غلط على زول.. ولا اكل حق زول .؟

بس نحن مابنرضى الحقارة .. وماشايفين زول اعز مننا .. وعمرها القروش مابتقيم الناس..

عن اذنكم انا ماشة وطلعت طوالي ..

عمك مصطفى اتحير طبعا في تصرف البت شديد.. وبقى شايل هم ولدو .. قال نادو لي عامر ..

عامر جا .. ابوهو قال ليهو.. عامر ياولدي البت دي مقويه راسها ..

عامر قعد يدعك في عيونو .. .وعامل فيها متأثر وقاليو .. مش قلت ليك يا ابوي انا ماعندي حظ .. والبت البدورها كلها ترفضني .. وانا كنت حاسي انها حترفضني .. لكن قلت اكسب رضاك ..

ابوي .انا تاني ماعندي رغبة في عرس نهائي

عمتو قالت ليهو ليه ياولدي؟ تغريد دي اول البنات ولا اخر البنات؟ المغفلة البليده..

عليك الله كان ماهي شومة وهقيتة .. انت في بت بتاباك؟

طبعا .. عامر ده داخل في دور العاشق المصدوم.. وركب عربتو وطلع..

وعمتو تسوي كرعلي يايمة .. عامر ولدي ما يستاهل كسرة الخاطر ..

وهو اول ماطلع .. مابعد من البت اتنين كيلو .. ضرب لي ثويبة ..

ودي المكالمة ..

عامر: - .. ابشري ياحبيبة قلبي ابشري هاااانت خلاص ..

ثويبة - الحصل شنو يا الغالي؟

عامر - البت رفضتني ..

ثويبة -. بالله عليها ؟؟ اكيد البت دي ما واعية تكون شاربة حاجة ..

كدي شوف تكون واحدة من اخواتك سقتها روب حامض ولاشي؟

عامر - انا ياحبي ماقادر استوعب روحي من الفرحة ..

ثويبة - اهم حاجة ابوك كيف ان شاا الله الكلام ده مايكون تثر عليهو ..

عامر - بس ابوي مندهش ..

من رفض البت .. وحاني علي انا .. اااااه انا مصدوم من الشاكوش ..

(وقرقرقرقر .. قعدو يضحكو الاتنين ..)

ثويبة - غايتو انت زي ماقالت امي.. الفي راسك بتسويهو بتسويهو ..

عامر - اسمعي .. انا اشتقت اشوفك .. شديد ممكن اجيكم في البيت ..

ثويبة -مرحب بيك البيت بيتك.. قال ليها .. خلاص حضري الشاي ..

وانتهت المكالمة ..

في الوقت ده بدت ثويبة تحكي لابوها وامها قالت ليهم في موضوع انا كنت عايزة احكيهو ليكم بس ماكنت عايزو اسبق الحوادث .. وبدت تحكي ليهم في الحاصل من طق طق للسلام عليكم ..

وقالت ليهم انا اصلا أخرت احكي ليكم الكلام ده .. لانو كان كلام ساي .. مامضمون ..

وقدامو كان في عقبات ..

ابوها قال ليها .. انتي استخرتي يا ثويبة؟؟

قالت ليهو طبعا" يا ابوي في موضوع زي ده الزول بمشي فيهو بدون يستخير ربنا .؟

قال ليها خلاص كدا انا اطمأنيت واكيد ربنا مابختار ليك الا الخير ..

انا طبعا ياثويبة عندي فهم في الزواج من الناس الاغنياء ..

لانهم بكونو عايشين في دنيا مختلفة من دنيا الغلابة زينا كدا .. لكن والله لمن اتعرفت بي عامر غيرت راي ..

واكيد اهلو بكونو كدا .. لانو صفاته شكلها تربية اصيلة ..

نحن موافقين ياثويبة. ومافي اي مشكلة .. وانتي رغبتك فوق كل شي ..

قالت ليهو انا واثقة منك يا ابوي ..

وامها ديك ماقادرة تعبر .. وقالت ليها .وانا يا ثويبة كنت بتمنالك راجل يعيشك منغنغة وتريانة ..

البشرى قال قولو ربنا يتم على خير ..

وعامر وصل وختو ليهو الشاي وكانت احلى ونسة ..

بس اصلو ماجابو سيرة الموضوع ..

ومشى منهم قريب الساعة 9 بالليل .. وهو طالع قال ليهم والله انا حسيت كاني في بيتنا .. ياجماعة انا شاعر بي الفة غريبة في بيتكم ده ..

اها باكر الصباح طبعا ناس النيل الابيض مسافرين .. ربنا يكتب السلامة ليهم ..

قام عامر وصلهم بي عربيتو لغاية المينا البري .. والغزالة الحلوة صارة وشها .. وتعاين في الشارع بالقزاز .. مربعة يديها طول الرحلة .. وعامر يعاين ليها بالمراية.. وبتكلم مع عمتو .. بالجد ياعمتي حنفقدكم .. تعالو لينا تاني .. امكن المرة الجاية .. الزول السمح ده يرضى .. ويوافق ..

تغريد.. ياتغريد .. مالك ساكتة كدا قولي حاجة..

تغريد فتحت خشمها .. بي سخرية .. قالتليهو وينو كلامك بتاع امبارح ؟.. استسلمت سريع كدا مالك ..؟؟

قال ليها اعمل شنو؟ يعني اجبر لي زول ماعايزني ..

عمتو قالت ليهو والله ياولدي كلامك صاح .. المابدورني مابدورو ..

المهم طيب خاطرهم كدا .. ودفع ليهم التذاكر .. وعزا عمتو بي ربطتين جامدات..

وشالتن بالدس من بتها ماتشوفها .. شكلها عارفة موقف بتها من عامر واهلو ..

لانو تغريد دي ابوها شاحن ليها راسها من ناس خالها ديل ..

وكانت جاية تتأكد هل هم كا فعلا ..؟ وهسع مصدقة كلام ابوها تب ..

وطبعا" اكبر غلط ارتكبته الام .. هي انها ماكلمت بتها بي هدف الرحلة ..

وده المخلي تغريد فايرة كدا .. احتمال لو الظروف ماكانت بالطريقة دي.. تغريد كان ممكن توافق بي عامر ..

المهم يازول ودعهم سافرو وجا راجع لابوهو .. وقال ليهو يا ابوي انا تاني ما مستعد للصدمات دي .. يا اما تخليني اختار بمزاجي او نلغي فكرة العرس دي من اساسو ..

ابوهو قال ليهو حاضر ياولدي والله انت ماقصرت .. وعمرك ماكسرت لي كلام .. بعد ده البتقولها انا معاك .. قاليهو بتوعدني يا ابوي تقيف معاي المرة الجاية ..؟

قال ليهو بوعدك بس انت اصلا ماتتاثر بي البت المغفلة دي ..

عامر قاليو ابدا يا ابوي اهم حاجة عندي رضاك انت ..

وهنا طبعا" عامر بدا الامل يكبر جواهو .. وكل مرة ثويبة بقت تقرب من حياتو ..

ومشى الشركة فرحان فرح ماطبيعي .. وفي اليوم ده جاء مكتب الحسابات 13 مرة ..

وقال لثويبة احتمال كبير ابوي يومين تلاتة يتصل عليك .. جيبي التلفون العندك .. انا رسلت الول د لهشام بتاع الموبايلات الجنبنا ده يجيب ليك جلكسي زي الصاقعة.

ثويبة قالت ليهو براحة علي انا كدا بصدم ههههه

وفعلا جابو ليها جهاز جديد برقم جديد ..

اها يازول باختصار برضو وصلها البيت .. عشان يلقى فرصة يتونس معاها .. ويسمع من كلامها البشفى العلة.. ويروي العطيش .. ورجع المنشية .. وباكر برضو عمل نفس الشي .. وناس الشركة كلهم كشفو العلاقة النزيهة بين ثويبة وبين عامر .. ومبسوطين جدا .. قرشي يوم قال ليها .. وين يا ناس المنشية يا البتنومو من عشية .. والله ماتتخيلي ياثويبة انا فرحان ليك كيف ..

اها يازول بعد تقريبا اربعة ايام من سفر ناس الابيض .. عامر جا البيت بدري شوية عشان يتغدى مع ابوهو ..

اها فوق الغدا قال لابوهو.. يا ابوي .. في بت شغالة معاي في الشركة .. في الحسابات .. بت مهذبة ومربية وملتزمة .. وانا حاولت اتكلم معاها .. وشايفها متخوفة .. بتقدر تساعدني ؟؟

ابوهو قال ليهو متخوفة من شنو؟.. واساعدك كيف؟..

قال ليهو البت اهلها حالتم المادية مش ولابد .. وهي قالت لي اهلك ماح يحترموني .. وقالت ناس القروش بحقرو بالناس ..

انا بس عايزك تحطم ليها المفهوم ده من راسها ..

ابوهو قال ليهو اعمل شنو مثلا .. ؟؟

عامر قاليو عايزك يا ابوي تتصل عليها .. وتتكلم معاها وتقول ليها انا ابو عامر وانا صديقو ..

والزول ده عايزك ونحن عايزنك .. وتحاول بس تطمنها شوية ..

لانها بت مكسب ..

قاليهو جدا بعد الغدا شيل تلفوني.. واضرب ليها واديني ليها في التلفون ..

وفعلا .. اتصل عليها .. اها ثويبة فتحت الخط ..

قالت عليكم السلام ..

عم مصطفى كيف حالك يابتي؟

انتي تويبة؟

قالت ليهو نعم مرحب حبابك والله ..

قاليها انا عمك مصطفى.. ابوعامر مدير شركتكم .. طبعا عامر ده انا ابوهو وانا صاحبو .. وحكا لي عنك كتير .. وانا اتمنيتك تكوني من نصيبو ..

ياريت ماتردي طلبي .. عشان نجي نطلبك من ابوك في البيت ..

قالت ليهو .. اسعد يوم ياعمي كونو سمعت صوتك .. كنت من زمن متمنية اشوفك او اسمع صوتك وانا سامعة عنك كل خير .. ربنا يواليك بالصحة والعافية ويخليك لينا .. ياعمي .انت في مقام ابوي .. وانت مابتطلب طلب .. انت بتامر امر .. وانا اطيع امرك زي عامر مابطيعك بالضبط ..

ومناك محقق ياعمي .. ورضاك وعفوك عندي بالدنيا .. بس ماتنساني من دعواتك ..

عمك ده يسمع في كلام البت .. شووو دموعو كبن ..

عامر قعد يعاين لابوهو يبكي ..

استغرب قال البت دي بتقول لابوي في شنو؟.. خلت الراجل الصنديد ده يبكي ..

عمك قال ليها خلاص كلمي ابوك .. كم يوم كدا ونجيكم بالباب..

المكالمة انتهت ..

عم مصطفى قال لي عامر .. عامر ياولدي.. الحمد لله بت عمتك العاندت وقوت راسها ..

البت الاتكلمت معاي دي .. عبارة عن ملاك .. وتستاهلا انت والله ..

بت عمتك لاعندها احترام لي خالها ولا احترام لامها.. وبتتكلم بقلة ادب غريبة ..

البت الهسع دي .. بتتكلم بطريقة سبحان الله.. زي نقاط العسل .. اصلك ماتشبع منو .. وانا بديت اقارن .. بين اسلوبها في الكلام .. واسلوب بت اختي ..

والله فرق الليل والنهار .. ياسلام على التربية.. والله لامن بكيت ياولدي ..

خلاص ياعامر .. انا كدا ارتحت وقلبي اطمأن .. والله من كلام البت انا دي حسيت اني صحتي اصلحت .. قبيل كنت مصدع .. وبطني مكركبة ..

هسع زي الفل .. سبحان الله ..

عامر ده من البسطة قلبو بقى يعزف موش يدق ..

بالجد. لو الدنيا دي جمعو الفرح الفيها كلو وادوهو لزول .. فرحة عامر اكبر ..

اها يازول بالاختصار تقريبا بعد يومين.. عامر وامو واخواتو مشو لناس البشري في البيت .. يودو ليهم قولة خير .. كانت خمسة وسبعين مليون سلمهن عامر لي البشرى في يدو .. وقال ليهو.. دي لي ابو العروس ماتديهم منها قرش .. هههه .. وقاعدين يعتذرو انها حكاية مستعجلة ..

ومعاهم شنطة قالو ليها الحاجات دي ياثويبة للخطوبة بس ..

قالت ليهو ياولد دي شيلة كاملة .. قاليها يابت شيلة شنو .. انا كمان حبيبتي ..

هينة ولاهينة؟ على قول تغريد بت عمتي ..

ونحن بنجيكم للخطوبة يوم الاتنين البعد الجاية ..

وكان ده اسعد يوم يمر علي الاسرة النقية دي كلها.. خلي ثويبة .. والحمد لله ربنا عوضهم عامر بدل احمد ..

ودخل عليهم بالبركة والخير والسعد .. وبقا ليهم اكتر من ولد ..

ياجماعة ماتفكرو انو الزول البسعد الناس.. ربنا حيخذلو .. ده وعد من رب العالمين.. انو يساعد البساعد الناس ..

كان الله في عون العبد ماكان في عون اخية ..

انت تقوم بي مهام الناس بهنا .. وربنا يؤدي ليك مهامك بهناك من حيث لاتدي ..

وانتم مدعوون .. ^ – ^ ..

شوفو الكرت الذهبي ده مكتوب فيهو :...

يدعوكم ال البشري السلطان وال مصطفى الصنديد ..

لعقد قران الاستاذ عامر على كريمة البشرى ثويبة ..

بمنزل الحاج مصطفى بالمنشية شرق ..

في تمام الرابعة عصرا .. يوم الخميس 15 ./10/2009

وشكرا ^ – ^

والحمام بالفرحة ساجع ..

والقلوب ترقص سعيدة ..

وكل يوم بالبهجة عامر ..

ومن ثويبة الباهي جيدة..

نورت كل المداين ...

والمحطات البعيدة ..

فرحة كانت فوق سماها ..

للجميع يارب تعيدا ..

اخوكم طارق اللبيب ..

بحري .. 2014