الجزء 1

بقلم: مريم النصري

الجزء 01

#نادرين_1

"للقدر راي آخر .. لا يشبه احلامنا"

انا ومهند بالرغم من اننا بقينا اي زول في دوله وبنتلاقي مرتين في السنه او 3 بالكتير 😢 لكن متواصلين بشكل يومي وابدا مافي شي اتغير ما زلنا هنودي ومريومتي اخوان للابد وتبا لي اي زول لبط 😍 دا غير تواصلنا من خلال قروب عائله الحسيني برعاية الادمن نانا الفارضه علينا نرسل صوره كل يوم من الصباح اي زول و اولاده مع عباره صباح الخير يا نانا 😂 عشان تشوف خلقنا وبعد داك الدوير يشتغل 😅 بنقشر من دغش الرحمن عشان الصوره دي هرشه بس 😂 هسي خلوكم مننا نحن قصصنا ما بتنتهي😅 اخير نشوف نادرين

في يوم مهند رسل لي صور عرس وقال لي رائك شنو؟ العرس فخم جدا شكله واضح من ديكور الصالة وباقي البهرجه من فنانين للبوفية للبس الناس .. العروس حلاتها ومع انها سمراء لكن بتلمع 😍 ومركبه وش كده ما وش عروس فرحانه😅 اما العريس اصفراني وسماحته سماحه بنات 😂 المهم اتفرجت تمام وعلقت لمهند حتي مهند ضرب لي تلفون

مهند: مريومتي لسانك بقي طويل اكتر من اللازم ايليف خربتك خلاص 😂 العروس دي ممكن نقول صديقتي اسمها نادرين وبكره جاين تركيا لشهر العسل وانا اديتها رقمك عشان لو احتاجت لحاجه، مريومتي اوعك تقصري معها وكمان لو لقيتوا فرغه اعزميهم

انا: صديقتك 😲بقيت بتصاحب من وراي ومالها مركبه وش كده زي المجبوره علي العرس؟

مهند: هههه صديقتي سابقا قبل ما اعرفك وصراحه ما جات سيرتها وانا زاتي نسيتها 😅

انا: نسيت تاكل؟نسيت تشرب؟نسيت تنكد علي ابوك؟يا ولد انجز واحكي بتعرفها من وين

مهند: اوووف منك طيب اهل نادرين كانوا مؤجرين مننا شقه من الشقق الفي بيتنا .. ناس بسيطين وطيبانين امها اسمها فوزية من قري الشمالية مراه مسكينه وحبوبه كده وابوها اسمه نصرالدين من نفس منطقه ناس امها زول متعلم وشاطر شغال محاسب .. الشركه الشغال فيها نقلتوا من منطقتهم للخرطوم و اجروا ليه شقتنا لانها قريبه من فرع شركتهم ودا سبب عرفتنا .. وبعدما عاشرناهم بقوا لينا زي الاهل .. نادرين ما كان ليها في القراية كانت بتنجح بالجلاله و لولا اجتهاد امي معها ما كان نجحت في الشهاده الثانويه .. لما وصلت اولي ثانوي عم نصرالدين صحبه من البلد شبكوا معه في شغل ابار الدهب وفي اجازته السنوية مشي معه مناطق الدهب دي وزي ما تقولي زول محظوظ لقي ليه كمية من الدهب وفجاءه حالهم بقي حال تاني لما قدم استغالته من الشغل 😂 ودفع لينا ايجار سنه كامله وخلي زوجته ونادرين وسافر السعودية دخل ليه في شراكه مع سعودي في شركه استيراد وتصدير ولحدي ما نادرين امتحنت شهاده سودانية كان امور شركتهم ظبطت وعمل اقامه لزوجته ونادرين .. نادرين جابت كم وستين وابوها طوالي دخلها دبلوم ادارة اعمال قبول خاص وقعدها في داخلية خاصة وساق معه زوجته فوزية السعودية .. بعد سافروا اخبارهم اتقطعت مننا ونادرين جات لي امي كم مره في اول شهور وتاني هي زاتها اتقطعت منها .. وانا زاتي في نفس السنه كنت سافرت لندن للجامعه و تاني ما سمعنا عنهم حاجه

قبل 5 يوم فجاءه نادرين جاتنا في البيت وعزمتنا عرسها وقالت لينا الا تجوا انا ما عندي ناس بعرفهم هنا اعزمهم غيركم انتو وصحباتي واستغربنا لما قالت انو امها وابوها ما جوا للعرس عشان ابوها عيان ومابقدر يجي لكن عقدوا ليها هناك وعملوا عزومه وحفله مختصره .. وراجلها اصر انو يعمل عرس تاني في السودان وزي ما قلتي هي نهائي ما ظاهر عليها فرحانه بعرسها دا ولانها كانت مستعجله وحماتها واقفه ليها بره وابت تدخل ما حبينا نسالها من اي تفاصيل وزي ما شفتي في الصور عرسها فخم لانو راجلها طلع ود ناس ... اكيد بتعرفيهم او سمعتي بيهم لانو يعتبروا جيرانكم و بيتهم الكبير جنب بيت جدك ناس عندهم وضعهم في البلد دي وانا لما شفتها لسه مركبه وش مافهمت هي مالها بالضبط وكل العرفتوا منها انها مسافره شهر العسل تركيا قمت طوالي شلت منها رقمها ورسلت ليها رقمك في الواتس و وريتها انك زي واحد ولو احتاجت لاي شي ترجع ليك وهسي ح ارسل ليك رقم الواتس بتاعها احفظي عندك عشان لو رسلت ليك منو تعرفيها

انا: عرفت اهل العريس فعلا جيران ناس جدو لكن مابعرفهم معرفه شخصيه سمعت بيهم بس لكن تمام مافي مشكله لو اتصلت علي بنعزمهم ان شاءالله

قفلت من مهند ونسيت ليك نادرين زي الماحصل شي مع عصابة الحسيني بعد اسبوع تقريبا لقيت في رقم تركي ضارب لي كتير ومسج مكتوبه فيها انا نادرين صديقة مهند محتاجه ليك ضروري رجاءا ارجعي لي الكلام دا كان قبل 5 ساعات انا كنت ملخومه في الشغل وما انتبهت للتلفون .. رجعت في الرقم ردت لي مراه بتتكلم تركي لما سالتها من نادرين وقلت ليها ضربت من الرقم دا حتي جمعت و قالت لي انا اسمي جيلان عامله النظافه شغاله في العماره النازله فيها نادرين تاني ما بلاقيها الا بكره الساعه 1 ظهر دا الوقت المحدد لنظافه شقتهم .. قلت ليها يعني انتي ساكنه في نفس العماره .. قالت لا دي شقق فندقيه انا شغاله بنظام الدوام معاهم ودوامي ك

ل يوم من 8 ص ل 8 م وهسي في العماره لكن ناس نادرين ديل ما بفتحوا لي الباب الا في وقت النظافه المحددنه بس .. استغربت انهم نازلين في شقه ليه هم جاين شهر عسل وحيكونوا لافين في كم منطقه مفروض ينزلوا في فندق وقصه انهم ما بفتحوا الباب الا في الوقت المحدد للنظافه بس خلاني استغرب زياده ويا يوم بكره ما تسرع قلقت وما دايره اقلق مهند الا لما اعرف الحاصل

تاني يوم تلفوني ما فارقني وفعلا الساعه واحده و شويه تلفوني ضرب اول ما رديت قالت لي انا نادرين ارجعي لي انتي هسي طوالي عشان دا تلفون المراه الشغاله ، طوالي رجعت ليها

نادرين: انا صديقه مهند وهو قال لي لو احتجتي لحاجه ارجع ليك وانا هسي محتاجه ليك جدا وماعندي زمن احكي ليك بالتفصيل انا راجلي حابسني في الشقه وانا عايزه اهرب منه لكن هو شايل جوازي وتلفوني وحتي القروش المعاي شالا مني ، وانا لا بعرف زول ولا المكان هنا وماعندي طريقه اهرب الا في وقت النظافه من الساعه 1ظهر ل 2 ظهر رجاءا ساعديني يا مريم ما عندي زول غيرك ألجأ ليه

انا : كيف يعني حابسك 😲 ممكن توضحي لي عشان اقدر اساعدك

نادرين: قصه طويله يا مريم وانا هسي بتكلم من جوه الحمام وخايفه يكتشفني راجلي طلع شاذ جنسيا اكتشفت الكلام دا اول امبارح وقبلها كان حاكي لي قصه تانية ومهددني بشيكات كاتبه ليه ابوي انا هسي الهاميني اني اهرب منو حتي اشوف باقي مصيبتي الوقعت فيها

انا : شاذ وكمان بهددك 😱 اسمعي انا بساعدك لكن ما بانك تهربي بالعكس بانك تهددي لكن خليني افكر باقي اليوم دا كويس وحتواصل مع جيلان وبكره الصباح ح ارسل ليك معها تلفون وانتي دسي كويس وما تخلي يكتشف انك عندك تلفون ، لكن بس سوال هو عارف انك عارفه انه شاذ؟

نادرين : لا ماعارف اني شفته هو وصاحبه ، لكن يا مريم انا ما بقدر اقعد تاني معه ولا يوم 😭 انا من المنظر الشفته بطني بقت طامه منه وما طايقه خلقته

انا: كدي بس استحملي لبكره عشان تلقي فرصه توضحي لي بالتفصيل واقدر اساعدك

نادرين : طيب 😔 خلاص ما ح اتصل عليك بكره الا بعدما هو يطلع ورجاءا الموضوع دا خلي بينا ، لحدي ما نتلاقي ما عايزه مهند يعرف

قفلت منها وراسي عايز يطق قدر ما سمعت بقصص الشواذ لكن ما اتخيلت انو في يوم حتمر علي قصة زي دي .. وقبل ما اساعدها لازم ادخل حسام في الصوره ويوافق اني اساعدها عشان مايقوم يتجنن علي 😏 بالمساء قعدت حكيت ليه كل القصه وهو زاتو اتخلع 😱

حسام : مريومتي انتي جاده انو دا ولد ناس فلان ؟؟؟؟ عائلته دي عاملين فيها انهم اشرف خلق الله ، وربنا خلقهم براهم كدا وما بعرسوا من اي عائله وعندهم راي في اي زول

انا: ايون دا كلام مهند انو ود ناس فلان وانت بتعرفهم من وين كمان قدر دا ؟

حسام: ولدهم الوسطاني قرا طب في لندن واول ما اتخرجت اشتغلت معه في نفس المستشفي سنه كامله وبعد داك هو كان خلاص ظبط اموره ورجع السودان ،اكتر بني ادم مفتري لاقني علي وجه الارض ونهائي ما كان عاجبه زول وابا يرتبط بي اي بت من لندن قال كلهم ما نافعات 😂 استغفر الله اللهم لاشماته لكن انا متاكد انو ما حيكونوا عارفين بموضوع ولدهم دا

انا: خلينا في المفيد ياخ

حسام: المفيد اننا نساعد البت دي بفهم ومع اني ما بحب القصص دي لكن حننتني واتخليت انو اخواتي كان ممكن يكونوا في مكانها

انا : مادام هو ما شافها لازم تصوروا عشان تقدر تهددوا

حسام: بالظبط كدا نحن مبديا نشتري ليها نفس كميرتنا الصغيره المركبنها في الهول عشان هو ما ينتبهه و نبرمجها ليها مع التلفون ، انا ح امشي هسي اشتري الكاميرا والموبايل والصباح ح اوديهم لي جيلان وانتي تتواصلي مع نادرين تاني بالتلفون الحنشتري وتفهمي منها الحاصل بالتفصيل لكن علي شرط ما تعملي اي خطوه من غيري، ماعايز اي احتكاك بينك وبين الراجل دا لو في اي شيء مفروض يتعمل انا البعملوا اتفقنا👍

انا : اتفقنا يا قلبي 👍

حسام مشي جاب الكاميرا والتلفون بعدما برمجهم و ضربت لي جيلان فهمتها انو حسام حيجيها الصباح والحاجات الحيديهم ليها تديهم لنادرين من غير ما زول يشوفها

تاني يوم زي الساعه 3 ظهر حتي نادرين اتصلت علي بعد السلام

نادرين : ماعارفه اشكرك كيف يا مريم ح احكي ليك الحصل لي من ما جيت هنا بس ، والباقي بحكي ليك بعدما نتلاقي من اول يوم جينا هنا نزلنا في شقه طوالي ،الشقه غرفتين انا استغربت لكن مشيت الموضوع و اول يوم عماد نام في الغرفه التانية قلت عادي عايزني اتعود عليه وتاني يوم نفس المنظر وبرضو سكتا .. لكن المفاجأة انو ثالث يوم صحبه الانتيم الكان وزيره في العرس جاء ونزل معانا في الشقه وانا اتخلعت وسالت عماد وقام هاج فيني قال لي انا لا بحبك ولا ح احبك انا بحب واحده تانية وهي خانتني وانا عرستك بس عشان اغيظها يعني زواجي بيك علي الورق بس .. انا طبعا هجت وانفعلت فيه لانه كان عامل لي فيها بحبني وميت فيني طوالي قام هددني وقال لي عندك سنتين اجباري تعيشهم معاي مقابل شيكات ابوك كاتبهم لي و وراني صورالشيكات في تلفونه وقال لي لو ما نفذت كلامه حيدخل ابوي

السجن سكتا اليوم داك وبقيت بس قاعده في غرفتي ومصدومه في عماد وفي موضوع الشيكات الاول مره اسمع بيه، طلع هو وصحبه بعد الظهر ورجعوا زي الساعه 10 بالليل وجاب لي معه اكل دخلوا لي الغرفه وطلع انا كنت ميته من الجوع اكلت وما حسيت تاني بنفسي الا الصباح نمت نوم لما استغربت في نفسي ، وتاني يوم نفس المنظر صحي الظهر جيلان جات نظفت وطلعت وهم طلعوا وراها وقفلوا علي الشقه وما رجعوا الا بليل شايل لي برضو اكل وانا اكلت طوالي لانو مافي اكل في البيت الثلاجه كلها عصائر بشرب الصباح شاي ببسكويت وبس عشان كدا لما يجيب لي اكل طوالي باكل .. وحصل لي نفس منظر امبارح بعد الاكل نمت وما صحيت الا الصباح وجسمي كلو واجعني وراسي تقيل طوالي شكيت في انو بخت لي حاجه في الاكل وقررت اني لازم اتاكد .. لما جاب لي الاكل تاني يوم شلت جزء كبير منه كبيته في السله نظام اكلته ورقدت عملت نفسي نايمه هو بعد نص ساعه جاء دخل الغرفه وناداني وجاء يصحي فيني عملت نفسي ميته قام طوالي اتخارج ، بعد ساعه حتي قمت اتسحبت ومشيت علي غرفتهم وسامعه اصوات ما ياها ولما عاينت شفت المنظر الخلعني هو وصحبه بمارسوا مع بعض والدخلت فيني ما مرقت جريت الغرفه ورقدت ودايره اموت من الخوف لما جاتني حمي ..تاني يوم عملت نفسي كاني ما شفت حاجه خفت لو واجهته يقوم يعمل فيني حاجه وفكرت طوالي اني اضرب ليك، واول ما جات جيلان طلعت رقمك من تلفوني واتصلت عليك وانتي ما رديتي ، لما جوا طالعين ناديته وقلت ليه اني عايز اطلع معاهم اغير جو طوالي شاكلني وجاء قلع مني تلفوني وفتش محفظتي لحدي ما لقاها وشال كل الفيها وقال لي الكلام دا كان قبل ما تقلي ادبك علي لكن هسي من الشقه علي المطار وقفل الشقه علي وطلعوا وحمدت ربنا اني اتصلت عليك قبل ما يشيل التلفون

انا : لا حوله ولا قوه الا بالله .. طيب اسمعيني وما تخافي تشيلي الكاميرا دي تختيها في غرفتهم وتفتحي البرنامج في الموبايل وتظبطتي مكان الكاميرا بحيث انك تقدري تشوفي السرير بكل وضوح وتجي تدسي الموبايل وتعيشي عادي واعملي انك اكلتي ونمتي زي كل مره ، و بالليل افتحي الموبايل حتلقي تسجيلات الكاميرا نازله ليك في شكل مقاطع فيديو تشوفي الفيديو الفي و هم وبمارسوا وترسلي لي في الواتس للضمان، وانا وعد مني ما ح افتحوا بعدما تعملي القصص دي اضربي لي

نادرين : تمام ح اقوم هسي اظبط الكاميرا والصباح بتصل عليك هم ما بصحوا الا الظهر

انا : تمام خلي بالك من نفسي وأقري اية الكرسي طوالي وما تدخلي معه في اي نقاش خشمك عندك

نادرين : ان شاءالله

انتهي حوارنا انا ونادرين علي كده وبكره منتظرين نشوفها عملت شنو ..

يتبع.....