الفصل الثاني والثلاثون

"يوسف معاك شهد انا في المستشفى تعال حصلني انا محتاجه ليك وخايفهه، خايفهه شدييد الله يخليك تعال ي يوسف وربي م بلد لو انت م جيت وسن مسكت مني التلفون وقالت لي تعالي، قولته ليها م عايزة اتمشى انا، م ماشه اي مكان انا بس عايزة يوسف، اتصرفي خليهو يجي هسي انا عايزاه انا م قادرة ي وسن انا عايزاه يكون معي

مسكت تلفونها قالت لي لسسه م ظهر في الفيس وتلفوني حيقفل لأنو شحنو خلص عامل 3%، قولته ليها ارجعي اتصلي ليهو تاني ي وسن الله يخليك اتصلي ليهو، وانا طبعا من الخوف جسمي كلو نازل مويه، قالت لي طيب انتي اهدي ي شهد هو لو شاف الرسايل اكيد حيجي انا رسلته ليهو اسم المستشفى والجناح النحن فيهو، قعدته ابكي، دخلت الرقم تاني ورجعت اتصلت عليهو فجأة قالت لي تلفوني قفل قومي نمشي شويه، بعد تحانيس مشيت معاها، فجأة صرخته قولته ليها واااااي بطني ي وسن بطني وقفته، في مرة ومعاها بتها جو مارين بي جنبنا المرة قالت ليها اصلا دي قله ادب النسوان اسي الصريخ في شنو، قولته ليها تعالي اشيلك ليهو طالما انتي شايفاها قله ادب

وسن سكتتني تاني رجعتني للدكتور، الدكتور قال ليها لسسسه مشوها تاني، قولته ليهو وربي تاني م بمشي، شابكني مشوها مشوها انا م قادرة امشي انت ليه م بتفهم كدة

الدكتور قال لي م هو لو م مشيتي م حنقدر نولدك ي بتي عشان كدة امشي، قولته ليهو ي دكتور انا م قادرة امشي وربي م قادرة وقعدته ابكي طلعنا من الدكتور حبوبه وماما قالو لي لي لسسسه؟مشيت م رديت عليهم اصلا الوجع م كان مخليني اتفاهم مع زول، وسن قالت ليهم لسسه ولحقتني، قولته ليها يوسف م حيجي صح؟معقوله م شاف الرساله والمكالمات؟؟قالت لي م عارفه، قولته ليها ارح نطلع برة، قالت لي برة وين؟قولته ليها نقعد قدام باب المستشفى يمكن يجي وم يعرف مكانا، قالت لي شهد انتي جنيتي ننزل السلالم دي كلها هو انتي قادرة تمشي عشان تنزلي السلالم؟ والأصانصير م شغال، قولته ليها اعمل شنو طيب هو ليه م جا

حاولي افتحي تلفونك شوفيهو ياخ مشينا شويه كدة قعدته قولته ليها بعد كدة انا م قادرة امشي، وم بمشي عدييييييييل م بمشي

نزلته وشي في الأرض وغتيتو بي يدي وبقيت ابكي، فجأة اسمع ليك صوت بقول لي "شههد"وسن اتلفتت، انا رفعته راسي واتفاجأ بي يوسف واقف بعيد مننا مسافهه، قولته ليهو بصوت خااافض يوسف...في محلي داك بقيت ابكي وانا بعاين ليهو، هو زاتو واقف ومخلوع وبعاين لي، وسن سلمت عليهو وقالت ليهو اتصلته عليك ورسلته ليك رسايل بس م رديت، قال ليها كنت بعيد من التلفون والله واتصلته على رامي اتأكد بعد م لقيت محادثاتك، قولته ليهو تتأكد فاكرنا نحن بنكذب مثلا؟البخلينا نكذب في موضوع زي دة شنوو؟فااكر الولادة دي حاجه باردة عشان الواحد يكزب فيها؟ولا جربتها انت؟وسن سكتت ورفعت ليهو حاجبها وابتسمت وقالت لي شهد انا حأمشي اشحن تلفوني واجي، قولته ليها ومخلياني براااي؟قالت لي مش من قبيل شابكاني عايزة يوسف عايزة يوسف اها ياهو يوسف جاك، قالت كدة ومشت، انا قاعدة في الكنبه ويوسف واقف ومدخل يديهو جوة جيوبو، كان لابس فنيله سوداء كمها نص وبنطلون رمادي وبعاين لي وانا ببكي، قال لي شهد انتي كويسه ليه م كلمتيني انو انتي حامل؟رفعته عيني عاينته ليهو بغيييظ وقولته ليهو كويسه والله الحمدلله زي م انت شايف مبسوطه ورايقه وبعدين ليه انت منو عشان اكلمك؟و ليه م بترد على تلفونك انت عارف وسن اتصلت عليك كم مكالمه؟كنت وين؟طبعا بتكلم وببكي، يوسف قعد جنبي، فجأة الوجع رجع لي تاني قولته ليهو يووسف بطني

قال لي بلهفهه في شنو؟بطنك مالها قومي ارح ندخل الدكتور دكتورك وين، قولته ليهو م حيولدني الحيوان دة اسي حيقول لي امشي اتمشي يمشي في الناار ان شاءالله قمته على حيلي عايزة امشي، مسكني قال لي شهد ماشه وين انت؟قولته ليهو حأكون ماشه وين يعني ي يوسف؟قال لي طيب تعالي مسكني من يدي وقال لي اتكلي"اتسندي" علي، مشينا مسافه قصيرة وقفته، قال لي ترتاحي شويه؟عاينته ليهو قولته ليهو يوسف انا خايفهه خاايفهه انوو... قاطعني قال لي هسسس ومسح لي دموعي قال لي م تخافي انا معاك، هزيت ليهو راسي قولته ليهو انت حتعمل لي شنو انت م حاسي بالأنا حاساه

م قادرة اقيف ي يوسف خلاص م قادرة، عاين لي وهو مخلوع وانا جسمي كلوو نازل مويه هو زاتو بقى م عارف يعمل شنو، الساعه كانت اللحظه ديك 12 باليل، جات دكتورة مارة بجنبنا، قال ليها لو سمحتي، قالت ليهو اتفضل، قال ليها م ممكن ي جماعه مرتي دي من قبيل بتتوجع وانتو م شغالين بيها معقوله مستشفى كامل م قادرين تولدوها ؟"ركزو في مرتي دي

"وين دكاترة النساء وتوليد م ممكن لو مافي طريقه نحن نشوف لينا مستشفى تاني، قالت ليهو اهدأ ي اخ يمكن لسسه مواعيد ولادتها م جات عشان كدة مأخرنها، قال ليها شوووفي حالتها كيف وتقولي لي مواعيد ولادتها م جات؟ حتنتظروها تموت في محلها يعني؟قولته ليهو انت حتمسكني ولا حتتشاكل مع الدكاترة الدكتور فجأة جا طالع من غرفتو لقانا واقفين، الدكتورة قالت ليهو ي دكتور صدام الزوله دي ...، قال للمرضه المعاهو دخلوها غرفه الولادة بعد كدة، لما قال كدة مسكته في يوسف وضغطته عليهو بي رجفهه، عاين لي وقال لي مش اتفقنا م تخافي؟قولته ليهو م تقول لي م تخافي

انا داخله على الموت وانت بتقول لي م تخافي الممرضه قالت لي تعالي عشان نجهزك، يوسف قال لي يلا ي شهد قربتي كلها لحظات وتطلعي، بقيت ابكي، قال لي شهد بطلي بكى وبعدين البيبي زمنو جا خليهم يدخلوك، رامي ومجاهد جو قالو لي خلاص عايزين يدخلوك؟سكتته، الدكتور قال ليهم لا حول ياااخ خوافه خووف مجاهد قال لي م تخافي ي اختي كلها دقايق وبطلعوك

حبوبه قالت ليهم اصلا البكريه دي كدة، ماما قالت ليهو دكتور صدام انا حأدخل معاكم، قال ليها لا ماف داعي ي دكتورة سوسن خليك هنا، وسن قالت ليهو انا دكتورة تحت التدريب ممكن ادخل اشاهد من غرفه المراقبه بليز؟ قال ليها طيب، الممرضه قالت لي يلا، مسكته في يوسف، قال لي شهد اسمعي الكلام، قولته ليهو يعني انت م حتدخل معااي؟حتخليني ادخل برااي ي يوسف

طبعا انا م شايفه زول وانا بتكلم معاه، قال لي شهد انتي م براك معاك الدكاترة وامك، وانا حأنتظر برة لغايه م تخلصو، قولته ليهو لا ي يوسف م داخله براي ليه كل حاجه انا اعملها براي مش شايلاهو 9 شهور براي مش انا كنت التعبانه التعب دة كلو ومستحمله كل الوجع دة براي؟ يعني بغلبك تدخل معااي؟ قال لي شهد، قولته ليهو الله يخليك ي يوسف م تخليني براااي انا عايزاك انت تدخل معاي ومسكت يديهو وضغطته عليهم، قال لي حاضر حأدخل معاك، الدكتور قال ليهو طيب خلي يدخلوها يغيرو ليها ملابسها، يوسف لما شافني ماسكه فيهو شديد قال ليهو انا بدخل معاها، دخل معاي، الممرضه جات علشان تلبسني قال ليها خليها انا بلبسهاا، الممرضه عاينت لي وابتسمت قالت لي طيب وطلعت، مشت لي صحباتعا في المكتب قالت ليهم وااي من الأنا شوفتو ان شاءالله حالي ي رب واااي من حنيه الراجل وخوفو على نرتو، قعدته اعاين ليهو، قرب مني قال لي ارفعي يديك، هزيت ليهو راسي بمعنى لا، قال لي حتقدري تلبسي براك ولا انادي ليك الممرضه؟ قولته ليهو بلبس براي، قال لي طيب انا طالع، مسكتو قولته ليهو لا م تطلع ي يوسف

سكت مسااافه وهو بعاين لي قال لي طيب حاضر، اداني ضهرو وانا غيرته ملابسي فجأة الباب دق,يوسف فتح، الممرضه قالت ليهو خلاص عشان نمشي؟قال ليها اي خلاص، طلعنا دخلنا غرفه الولادة وانا ماسكه فيهو وماشه خطوة خطوة، اول م شوفته السرير المفروض انا اقعد فيهو على طول كنكشته فيهو، الدكتور قال لي كان كنكشتي في راجلك ولا كان طلعتي ليهو في راسك الراجيك دة راجيك تعالي خلينا ننتهي وقعد يضحك، وانا بطني كانت واجعني والبيبي دة بطني دي التقول مأجرها بضربني بطريقه خياليه، يوسف قال لي يلا حبيبي اقعدي، يلا ي شهد كفايه بكى، قعدني في السرير وقلع لي شبشبي ورفع لي رجولي، الدكتور قال ليهم ادوها المخدر، وانا لحظتها ي دووووب بطني وجعتني كويس وبقيت م قادرة انتظر بقيت اقول ليهو يوسف انا بموت

يوسف انا كان مته خلي بالك من بيبيني، قال لي حبيبي هي ولادة يعني شويه وتطلعي بخير وسلامه زي م كنتي، قولته ليهو انا خايفه م اطلع شايف دة كلو بسببك قال لي شهد، قولته ليهو اسكت مني هسسس م تتكلم معي سكتت وبقى بعاين لي وانا ببكي، قولته ليهو يعني عشان قولته ليك اسكت بتسكت؟ قول حاجه مسح على راسي وباسني فيهو قال لي خليك ماسكه يدي وكل م تحسي بوجع اعملي اي حاجه ان شاءالله عضيني حاضر حبيبي؟قولته ليهو يوسف انت شايفني كلب هنا ولا حاجه؟انا في شنو وانت بتقول لي عضيني شايفني بهظر معاك

خته يدو في خدي قال لي حبيبي انتي لو بطلتي خوفك دة م حتحصل ليك اي حاجه، وانا هنا معاك م حأخليك براك ابدا، قولته ليهو يوسف انا م عايزة أجيب عيال تاني، قال لي حاضر ماف ولادة ولا عيال تاني ابدا يلا انتي هدي لي اعصابك ماشي حبيبي؟فجأة حسيت بوجعه صرخته وعضيتو في يدو وانا بصرخ، ياخي لمن عيونو حمرت، قال ليهو ي دكتوووور شوفها مالها، الدكتور بقى يتكلم معي ويقول لي ساعدينا م بالصراخ لكن، بقيت اصرخ وابكي ومرة اعضي يوسف، وهو زاتو بقى يبكي معاي، بكى بكى غريل، ببكي وبمسح لي في دموعي، لغايه م ولدته بطلته صراخ، يوسف الممرضه مسكتو البيبي، الدكتور قال ليهو مبروك جاتكم بنيه، يوسف بعد م سافها انفقع بكى، ياخي انهار عدييل بقى يبكي وم قدر اتمالك نفسو، فجأة الدكتور شال منو البيبي وقال ليها سرعه دخلوهو الحضانه تنفسو م منتظم، وانا طبعا البنج لسسه م فكه مني بس ببكي، يوسف بقى يهدي فيني وانا ببكي، قال لي حبيبي خلاص الحمدلله عدت على خير، قولته ليهو بتي مالها؟قال لي كويسه بس دخلوها الحضانه، بعدها طلعوني من غرفه الولادة ودوني غرفتي، يوسف اول م وصلوني غرفتي خلى معي حبوبه وطلع مستعجل

في الجانب التاني في الحضانه كان في رامي وماما ومجاهد ووسن الدكتور كان بقول لي ماما لازم نحاول ننفسها بجهاز التنفس، يوسف قال ليهم في شنو البت مالها؟وسن قالت ليهو تنفسها ضعيف شايف، قال ليها كيف يعني تنفسها ضعيف، وقف بعاين للدكاترة وهم بنفسو فيها، كان في كم دكتور ومحاوطين سرير البيبي بكل الإتجاهات، وناس يوسف واقفين برة وبعاينو بالقزاز، والبت كان تنفسها ضعيف لدرحه، يوسف بقى يقول استغفر الله ي رب، ي رب، لا اله الا انت سبحانك اني كنت من الظالمين، ي رب تتلطف فينا ي رب، استغفر الله، وسن بقت تبكي، رامي سكتها، قالت ليهو تنفسها ضعيف شديد ي رامي وقالو عندها انخفاض شديد في السكر، بعد نص ساعه الدكتور طلع من الحضانه ومعاهو ماما، قال لي ماما في غرفه العنايه في جهاز حندخلها فيهو وم معروف لمتين بالظبط وضعها حساس شديد، قالت ليهو طيب، رامي قال ليها ي امي، ماما دموعها كانت جاريه مسحتها وقالت ليهو بعدين، شالو البيبي دخلوها غرفع العنايه، يوسف قال ليهو ي دكتور البت مالها؟ممكن تشرح لي؟قال ليهو تنفسها م منتظم وعندها انخفاض شديد السكر، وعندها يرقان، امها زاتها في فترة الحمل وضعها م كان تمام ودة أثر عليها شديد، يوسف قال ليهو والحل؟قال ليهو والله نحن حنعمل العلينا والباقي على ربنا،

انا في الغرفه قولته لي حبوبه "ليه م جابو لي بتي لغايه الأن؟حبوبه قالت لي دخلوها الحضانه خايفين عليها من العدوات البتجي فجأة دي ي بتي، قولته ليها طيب يوسف وين؟قالت لي م عارفاهو والله ي بتي، فجأة الباب دق، جا رامي ومجاهد ووسن ويوسف، سلمو علي قولته ليهم بتي وين؟وسن قالت لي في الحضانه، قولته ليهو ليه م جابوها لي انا عايزة اشوفها، حبوبه قالت لي ي بتي انتي صابره كم شهر م بتقدري تصبري الساعات دي؟الدكتور جا داخل قال لي الخوافهه

قعدو يضحكو معاهو رامي قال ليهو خوف شدييد، الدكتور قال لي حاسه بوجع ولا اي شي؟قولته ليهو لا بس عايزة اشوف بتي، قال لي جدا تشوفيها طوالي لكن اصبري عليها شويه كدة، وي جماعه الساعه 3 صباحا بعد كدة امشو ارتاحو وبكرة تعالو راجعين، حبوبه قالت ليهم انا بقعد معاها انتو امشو، رامي قال ليهم طيب امي وينها؟دكتور صدام قال ليهو امك مداومه عندها عمليه بعد نص ساعه، قال ليهو اهاا طيب، يلا ي جماعه تصبحو على خير بنجي عليكم بكرة، بقيت اعاين لي يوسف وهو بعاين لي,مجاهد قال لي يوسف "يوسف معاك عربيه؟يوسف قال ليهو انتو امشو انا حأفضل معاهم هنا، حبوبه قالت ليهو ماف داعي ي ولدي امشي البيت ارتاح، عاين لي لقاني لسه بعاين ليهو وسن عاينت لينا وضحكت، قال ليها لا ي حبوبه اساسا ساعات والشمس تطلع، قالت ليهو خلاص سمح بعد م طلعو حبوبه قالت ليهو خلاص خليك معاها انا نازله المسجد تحت اصلي العشاء فوتو واصلي لي ركعتين، قال ليها طيب، بعد م طلعت، قال لي انتي كويسه؟هزيت ليهو راسي بمعنى "ايوة"قال لي عايزة حاجه؟قولته ليهو بتي، قال لي حبيبي اسمعي الكلام البت مناعتها ضعيفه شديد يعني م ينفع تتعرض لأي نوع من انواع الجراثيم حتى انتي خطر عليها، سكتته، قال لي في شي واجعك؟هزيت ليهو راسب بمعنى لا، فضل هو ساكت وبعاين لي وانا ساكته، قال لي ارتاحي، قولته ليهو بلهفه وانت ماشي وين؟قال لي حأقعد برة، قولته ليهو خليك هنا

قال لي وحبوبتك لو جات حتقعد وين؟قولته ليهو طيب م تطلع لمن هي تجي

قعد قال لي طيب، م كنت عايزاه يبعد ابدا م عارفه الكان بحصل معي دة شنو حتى انا محتارة في نفسي، فضلنا تلاته اسااابيع في المستشفى حتى انا لما كنت اكون عايزة ارضعها بلبسوني ملابس معقمه اول وم كنت برضعها مباشرة اللبن كان بتشفط مني شفط، كنت كل م اشوفها مدخلنها في الجهاز داك ومسلطين عليها الأشعه ببكي وهي كانت صغييرهه شديد، بعدها وضعها اتحسن وخرجونا، اخر يوم يوسف كان قاعد معي في الغرفه فجأة جاتو مكالمه عاين لي وشال التلفون وطلع، في اللحظه دي انا ي دووب رجعته للواقع حقنا اللي بقول انو نحن منفصلين وانو العملو هو م كان بتغفر، رجعوني بيت ناس حبوبه، بقى يجي يومي يسلم علي ويشوف بتو ويرجع، وانا فجأة رجعته بقيت م طايقاهو، في يوم اتصل علي بالليل، قال لي حبيت اتطمن اليوم م قدرته امر عليكم، قولته ليهو شكرا وعلى فكرة انت م مجبور تجي اساسا، قال لي جيتي بتضايقك؟قولته ليهو شديييد للأسف، قال لي انا بجي اشوف بتي، قولته ليهو بتك؟هههه انت واعي وانت بتقول كدة؟اسمح لي اقول ليك انو البت دي بتي انا وبس وبس اوكيه؟انت م ليك علاقه بيها بالمناسبه وين البقرة بتاعتك خليها تجيب ليك بت زي م خلتك تبقى زول، وم اسمعك تاني بتقول بتك تمام؟وشكرا على خدماتك، وقفلته الخط في وشو، وقف بقى م بجي ابدا، بعد شهرين اتصل علي محمد سلم علي وقال لي يوسف م كلمني انو انتي ولدتي والله، قولته ليهو صح والله ي محمد، قال لي مبرووك يااااخ تتربى في عزكم ان شاءالله وتكبر وتشيل اسمها، قولته تسلم ي رب، قال لي سميتوها منو؟قولته ليهو سميتها تالين قال لي ي سلام اسم جميل جدا، يوسف زاتو نازل السودان الإسبوع الجاي ان شاءالله، سكتته سااي، قال لي م عندك علم؟قولته ليهو وحيكون عندي علم من وين اذا م عارفه انو سافر متين اساسا وبعدين رجعتو م بتهمني كتير، محمد قال لي شهد يوسف غلط وعرف غلطو يااخي انتي م تبكي متمسكه كدة، قولته ليهو عررف غلطو؟عاين ي محمد انا بأي شكل من الأشكال يوسف شلتو من حساباتي وم عندو بت عندي مش اتزوج؟ خلي مرتو ديك تجيب ليهو بت اما بتي م ليهو دخل بيها، قال لي دة منو دة الإتزوج دة ي بت انتي هبله انتي فاكرة يوسف اتزوج؟سكتته، قال لي يوسف م اتزوج ولا شي، من زمن مشكلتكم ديك انا نزلته السودان وجيت سوقتو معي قطر شغلتو معاي في شركتنا واسي الحمدلله كان عندنا مشروع شركه كدة في السودان وتم بحمد الله ونازل يشتغل فيها، طبعا بقيت مصدومه وهو بقول كدة، قال لي لما هو غلط وعمل علاقه مع الخاله ديك كان بفتش للمصلحه وعشانك انتي لكن بعد م انتي خليتيهو وحصلت بينكم المشكله ديك خلاها طوالي وقطع علاقتو بيها، قولته ليهو في النهايه غلط وعمل ي محمد والبغلط مرة بغلط ألف مرة، قال لي شهد م تفكري في نفسك بس فكري في بتكم دي ياخي، قولته ليهو بتي مالها؟فكرك م حتعيش من غيرو يعني؟قال لي هي حتعيش وحتربى بس تربيه لتربيه بتفرق ليه تحرمي البت من ابوها وهو عايش؟قولته ليهو محمد ممكن تقفل الموضوع؟قال لي شهد فكري بعقلانيه وخلي قوة الراس الانتي بتعملي فيها دي، بعد اسبوع من الكلام دة بي اسبوع في يوم جمعه كانو اخواني قاعدين ومعاهم جدو، عملته ليهم الشاي جبتو ليهم مجاهد قال لي اقعدي ي شهد عايز اتكلم معاك، قولته ليهو نعم؟قال لي طبعا ي شهد بغض النظر عن المشكله الحاصله بينكم انتي وراجلك اسي انتو م بقيتو براكم في طرف تالت لازم تعاينو ليهو في كل خطوة بتعملوها، والراجل دة اتكلم معي قبل م يسافر قال لي انا داير احل المشكله وارجع مرتي وانا م عارضتو ابدا وهو حكى لي المشكله وصراحه م داير افاتحك او اقول ليك هو صح ولا غلط، الراجل داير يبدأ صفحه جديدة معاك ومع بتو من حقو ياخد فرصه، رامي قال لي وبعدين ياخي لو م عشانك عشان بتك دي نحن م ضدك بس كمان م معاك، وانتي م تفتكري التربيه دي ساهله واكل وشراب وبس، لو على الأكل والشراب هين في حجات اصعب من كدة والله الأبو لو ماف مشكله، جدو قال لي ي بتي الزمن دة الناس بتفتش على السترة، واساسا طلاقك م كان واقع لأنك كنتي حامل والراجل دة نحن م شفنا منو غير الأخلاق الحميدة والله اسي انا بنبسط منو لأنو ولد اخلاقو عاليه خلاص انا مزحصل كلمتك لكن هو في حاله اتصال دايم بسأل مني ومن صحتي، كان انتي شايفه منو حاجه في البيت غير كدة معليش، حبوبه جات قالت ليهم اي والله ولد مهذب تهذيب سبحان الله بس الله يكملو بعقلو، مجاهد قال لي انتي لما جبتيهو نحن م اعترضنا واديناك ليهو اسي ي شهد نحن م دايرين منك شي اسي ارجعي منك ونحن زاتنا بنديك ليهو بشروط اخلا بالشروط دي نحن بنجي نوقف عرباتنا بنسوقك من قدام عيونو وم يقدر يفتح خشمو، رامي قال "والله انتو بنات مشاكلكم كتيرة وم بتنتهي فترتونا معاكم يعني نحن م نحل مشكله لدن تجينا شهد مالكم انتو ي اخواتي؟ال احدة م توسع صدرها دة شويه وتستحمل نحن م ورانا غيركم يعني؟تبقى علينا بدل المسؤليه الواحدة كم مسؤليه ليه بس م يقولو الا بنات عبدالله فعلو وبنات عبدالله تركو؟خلونا نتفنس شويه من المشاكل البتقع في روسينا دي ياخي م ممكن نحن زاتنا عندنا حياتنا عايزين نعيشها، جدو قال ليهو اهدأ ي رامي م كدة نحن بناتنا م تقال علينا، رامي قال ليهو م تقال ي جدي لكن الواحدة تكبر عقلها اصلا البيوت دي كلها مشاكل لكن في ناس بتتصرف بعلاقنيه وبتصبر م طوالي فايرين وشايلين شنطكم، مجاهد قال لي اسمعي كلامي المرة دي ي شهد ي اختي عارفك عنيدة وم بتسمعي الكلتم بس لو انا اخوك الكبير ووليك بالجد اسمعي كلامي لأني اديت الراجل كلمه واسي هو نزل السودان من اول امس ومنتظر ردي، سكتته سااي، قال لي اها قولتي شنو ترجعي؟بتكلمو معي وانا ببكي، قال لي بتكلم معاك انا ي شهد؟هزيت ليهو راسي بمعنى ااي، قال لي متأكدة؟قولته ليهو ايوة ومشيت غرفتي، وقعدته ابكي لأنو انا م عندي الرغبه اني ارجع ليهو ابدا بس كلام رامي حسسني انو انا حمل تقيل عليهم، مع انو انا م كنت عايزة احمل مسؤليه بتي لي زول كنت حأشتغل وحأتعب وحأربيها بنفسي، وم حبيت اكسسر كلام مجاهد لأنو ادى كلمتو، بالرغم من معرفتو بسبب المشكله اخد الموضوع بغايه البساطه وقال لي ارجعي، هم في نظرهم كرجال يمكن الموضوع عادي بس في نظرنا نحن كنسوان دي م بتتسمى حياة زوجيه ابدا بعد خيانه الراجل لمرتو بتتسمى جحيم، وماف اصعب من معرفه المرة بإنو راجلها بخونها وترجع تعيش معاهو عادي، م بتتخيلو حجم القرف الهي بتكون حاسه بيهو بس مجبورة تعيش معاهو وتتقبل خيانتو الحتتكرر مرة واتنين وتلاته لأنو م بيدها شي، بعد يومين في يوم المساء كدة يوسف جا، حبوبه قالت لي انزلي راجلك جا ونزلي معاك البت، قولته ليها حبوبه انا م نازله هاك شيلي تالين وديها ليهو، قالت لي غايتو ي بتي انتي الله يهديك، شالتها وطلعت، شويه كدة سامعه صوت تالين

بتبكي، فتحته الباب وانا بقول بكت ص...اتفاجأ بي يوسف واقف قدامي، صريت ليهو وشي وشلتها منو، قال لي كيفك؟قولته ليهو تمام، بعد م مشى جدو ناداني قال لي جهزي نفسك عشان يوم الجمعه راجلك بجي يسوقكم، قولته ليهو كيف يعني؟قال لي تمشي بيتك، قولته ليهو بالسرعه دي؟قال لي تقعدي تعملي شنو وراجلك قاعد براهو؟سكتته سااي ورجعته غرفتي ضربته ليهو تلفون قولته ليهو عااين انت انا قولته ليك مستعجله لرجعتي ليك؟البخليك تقول لجدي انو انت جاي تسوقني يوم الجمعه شنو شاورتني انت؟ قفل الخط من غير م يرد لي، احين عايزة انفجر من الغضب الحيوان قفل الخط في وشي انا، حبوبه قالت ي بت الليله جهزتهه ليك الحفرة قومي اتدخني، قولته ليها حبوبه م عايزة اتدخن بلا دخان بلا زفت، قالت لي لا تقومي تدخني بعد جوطه وشكل مشيت قعدته في الحفرهه، يوم الخميس صحيت من الصباح لقيت في مرة قاعدة في البيت، قولته ليهم صباح الخير وسلمته على المرة، حبوبه قالت لي صباح النور حبيبتي الشاي جاهز اشربي وتعالي اقعدي، قولته ليها اقعد؟قالت لي اقعدي يحننوك، قولته ليها حبوبه م جادة انتي طبعا صح؟حنه شنو وكلام فارغ بتاع شنو يااااخي؟قالت لي نوديك لي راجلك غبشه يعني يقول حبوبتها وامها م عندهم زوق وم شايفين شغلهم عااد بتبالغي ي بتي، قولته ليها رجلو بالكسسر ي رب، قعدت تضحك قالت لي ارح المظله جنب الباب عشان يرسمو ليك المرة دي م عندها وقت اسرعي انا زاتي جبتها بعد تحنيس، طلعته مشيت قعدته عاااد هي كمان التقول قالو ليها انا عروس حننتني من الكوع للكوع رسم العروسات بس، يوم الخميس دة كان زي الجحيم نهائي م قدرته انوم ومقلقه لدرجه، يوم الجمعه بالرغم من اني كنت صاحيه بس نهائي م طلعته فضلته راقدة وماسكه بتي جنبي، حوالي الساعه 12 كدة حبوبه صحتني وشالت تالين ومشت، قريب لصلاة المغرب كدة يوسف جا قعد في الهول مع جدو ورامي ومجاهد اتكلمو معاه كداا بعد م صلو المغرب حبوبه جات لقت معي وسن لبست لي بتي وانا بلبس، قالت لي البشوفك مستعجله م بعرفك، قولته ليها لا بس مستعجله زي م انتو مستعجلين علشان تتخلصو مني، قالت لي لالا ي بتي م كدة والله لكن المرة ماف مكان ببقى ضلها غير بيت راجلها، قولته ليها يعني بيت اهلها م ببقى ضلها صح ي حبوبه؟سكتت، بعد جهزته جدو قال لي اطلعو خلاص، شالو لي شنطي نزلوهم لي ورامي شايل تالين وبشاغل فيها، وواقفه معاهو وسن، بعد م رفعو الشنط في العربيه فضلو واقفين ومنتظرني، لما اتأخرته رسلو لي وسن قالت لي بتعملي في شنو انتي؟قولته ليها دقيقه"ي ماذن طالعه انا برجع ليك بعد شويه تمام؟يلا سلام ههههه حاضر، بعد م قفلته قالت لي ماذن الواحد دة م غيرو

قولته ليها يب، قالت لي اطلعي ي زفته منتظرنك، طلعته، لقيت يوسف واقف وبتونس مع جدو ومجاهد، وماما مع حبوبه وام وسن، رامي لما شافني قال لي كان طالعه من كوفير م بتتأخري كدة ه، قولته ليهو والله؟، جدو قال لي الوقفه طالت اركبي يلا خلاص بعد كدة، ودعتهم وركبته العربيه، مجاهد جاني بي شباك العربيه قال خلي بالك اوووكييه زي قولته ليك، قولته ليهو طيب، عايزين نتحرك حبوبه جات طالعه قالت لينا انتظرو، يوسف وقف العربيه، فتحت الباب قالت لي دة سبتك حق الريحه كنتي ناسياعو، عاينته ليها بغييظ وسكته، قالت لينا امشو ي اولادي الله يعدلها عليكم ويهدي سركم ي رب، يوسف قال ليها الله يديك العافيه ي امي ويطول في عمرك ان شاءالله، بعد م اتحركنا مساافه من البيت قولته ليهو وقف العربيه، قال لي نعم؟قولته ليهو فجأة بقيت م بتسمع؟قولته ليك وقف العربيه، وقفها نزلته من جنبو وفتحته الباب الورا وركبته، ولا سألني على طول اتحرك، ونحن في نص الطريق جاتني مكالمه، فتحته الخط قولته ليهو ماذن سووري يااخ نسيت فكرة انو المفروض ارجع ليك، قال لي م مشكله الحاصل شنو؟قولته ليهو ماف شي اهو زي م انت عارف المصيبه الواقعه في راسي والمفروض استحمل عفانتها، قعد يضحك وفضل يتونس معاي ونضحك طول الطريق ونص بتكلم معاه انجليزي ونص عربي لغايه م يوسف وقف العربيه ونزل وشال معاه تالين ومشى، نزلته مشيت وراهو وانا متغااظه لأنو م قال لي وصلنا ولا شي، دخلنا العمارة وبقيت ماشه وراهو في السلم، انا م متوقعاهو ساكن في شقه اتوقعتو يمشي بينا بيتو القديم، وصلنا جنب باب الشقه فتح الباب ودخل غرفه كدة وجا طالع من غير تالين طلع من الشقه مشيت الغرفه لغيت تالين نايمه، طلعته قولته انا عطشانه ياخ وين المطبخ ان شاءالله يكون في مويه مشيت لفيت في الشقه لغايه م لقيت المطبخ شربته مويه جيت راجعه اتلاقيت معاهو في باب الغرفه هو طالع وانا داخله، انا من الخلعه قولته ليهو انت الجابك هنا شنوو كمان؟طلع وقفل الباب وجراني بي كل قوتو ودخلني غرفه كدة كلها مضلمه وقفل الباب...

...