الفصل الثامن والثلاثون

قولته ليهو لا ابدا واتضايق ليه، عايزة اطلع مسكني لصقني مع التلاجه وقرب مني ولصق انفو مع انفي وبقى يعاين لي مسافهه وقال لي طيب رايك شنو بي اروى دي تنفع تبقى ست بيت افضل منك ولا الواحد يفتش غيرهاا؟...

عاينته ليهو مسافهه قولته ليهو انت شايفها كعبهه معاك؟قال لي ابدا بالعكس م معبه معي ابدا، قولته ليهو طالما انت شايفها م كعبه معاك انا كمان نفس الشي، اتفكيت منو وطلعتهه لمن دموعي جات جاريه بس مسحتها بسرعهه، ومشيت قعدته، يوسف جا راجع وبعاين لي بإبتسامهه خبيثهه كدة، وانا بحاول اتجنبو وهو بتونس وبضحكك عاادي وعارفني مغيووظهه وهو بتمادى، مسسخ علي الونسه وكل شي، فجأة جرس الباب دق، مشيت فتحتو لقيتها بلسم، بلسم دي بت جيرانا اهلها قاعدين في شقه واحد مغترب كدة هم حارسنها ليهو بتجيني بتتونس معي واحيانا بتساعدني في النضافه واحيانا عشان اخوانها كتار وبكونو جايطين بتجي تقرأ عندي في البيت بتقول لي عشان بيتك هادئ وكدة، قولته ليها اتفضلي، قالت لي معليش ي شهد والله من الصباح بغسل نسيت قصه انو انتي قولتي جاينك ضيوف وعايزاني اساعدك، قولته ليها لا م مشكله اتفضلي عادي حبيبتي، قالت لي عليك الله م تزعلي مني انتي عارفه امي يوم الجمعه دة بتشغلها لي كيف، قولته ليها والله ي بلسم م زعلانه منك، قالت لي طيب ضيوفك جو لو جو انا راجعهه، قولته ليها هم جو لكن طالما جيتي م بترجعي تعالي، جريتها دخلتها وقفلته الباب، جات داخله قالت السلام عليكم، كلهم قالو ليها وعليكم السلام ومشت سرعه دخلت المطبخ، قولته ليهم دي بلسم بت جارتنا في الشقهه المقاصدانا دي، بعد م خلصو غداء بلسم قالت لي انتي لمي الصحون كلها جيبيها لي انا بغسلها، قولته ليها م تتعبي نفسك ي بلسم ياخ، قالت لي ماف تعب والله، قلعت عبايتها وقفت في غساله العدة وبدت تغسل العدة الفي الحوض، وسن كانت بتجهز في الشاي قولته ليها خلاص ي بلسم ونسي لي وسن دي لمن اجي ه طلعته بره لقيت تالين عايزة يغيرو ليها شلتها، عثمان قال لي خلي العدة انا بدخلها ليك المطبخ، عثمان وهو داخل اتلاقى مع وسن في، قالت ليهو خلي انا بدخلها المطبخ، قال ليها لالا واصلي ودي الفي يدك دة، هي مشت وهو جا داخل المطبخ، بلسم قالت "اخيرا جيت...اتلفتو لقت عثمان في يدها فكت ليفه العدة وشالت طرحتها بسرعهه ختتها في راسي، عثمان حساها خايفهه ومتوترة قال ليها اسف م قصدي ادخل كدة، خته العدة في مصطبهه المطبخ وطلع مستعجل، لاقاني وانا ماشه على المطبخ قال لي م تقولي لي انو بت الناس قاعدة في المطبخ، قولته ليهو بت الناس منو؟مشى م ردة لي دخلته المطبخ لقيت بلسم واقفه بتغسل اتلفتت مخلوعه لما حست بي دخلتي، وكانت لابسه ليها جلباب خفيف لمن غلط وواقفه بيهو، قولته ليها عثمان جا هنا؟قالت لي تخيلي بس وشافني بالمنظر دة واي ياخ، قولته ليها ه م كان عارفك والله، قالت لي انتي عارفه انا حألبس عبايتي واغسل بيها مع اني كنت مخطهه بكرة اللبسها عشان كدة قلعتها، رجعت لبستها، قولته ليها عادي على فكرة، قالت لي شنو العادي؟يشوفني بالحاله دي عادي لا طبعا م عادي عيب عيب، قعدته اضحك بعدها قعدو يتونسو كدا لغاايه بعد المغرب بعدها قامو طالعين اروى قالت لي يوسف اكيد.م نفسك تخليني امشي براي بالليل دة صح؟قال ليها اخليك تمشي براك كيف معقوله ي اروى، لما قال كدة حمرته ليهو، طلعو كلهم وهو زاتو طلع معاهم، انا من باب الشقه وودعتهم م كان عندي حيل انزل تحت، طبعا بلسم م قصرت غسلت معي العدة كلها ورصتها لي كان فضل لي ترتيب البيت بس بديت ارتب كدة باب الشقه فتح، يوسف جا داخل، عاينته ليهو وانا ساكته، قال لي لمه ظريفهه والله، قولته ليهو كانت اظرف بي زولتك والله معقوله وصلتها بالسرعه دي سكنت جارتنا ولا شنو، قعد يضحك، قولته ليهو مالك؟قال لي ماق

شال بتو وقعد وهو ساكت، بعد م خلصته ترتيب كان في زي مساند صغيرهه كدة في الكراسي شالها رماها، رفعتها تاني رمى التانيه عاينته ليهو وسكته دخلته استحميت وجيت طالعه جا لاحقني، قال لي انتي م زعلانه صح؟قولته ليهو انت عملته حاجه بتزعل؟قال لي ابدا يعني كونو اخطب صحبتي لي اخوك دي ابدا م حاجه بتزعل لكن م عارفه انتي المزعلك شنو، قولته ليهو صحبتك تخطبها لي اخوي م فهمتك، قال لي قصدي اروى ومجاهد ي سجم، قولته ليهو اروى ومجاهد مالهم؟قال لي اخوك عجبتو البت وقال عايزها وانا دخلته ليهو واسطهه خير بس، قولته ليهو نعم؟يوسف انت بتهظر صح؟ضحك قال لي واهظر ليه اتصلي على اخوك واسأليهو,قولته ليهو وأروى؟قال لي م عندها مشكله هي، قولته ليهو وافقت على طول كدة خفيفه بنت الخفيفهه

قال لي م خفيفه انا عرفتهم على بعض قبل فترة، بالصدفه انا ومجاهد كنا بنتغدى في مطعم واتصلت علي اروى وصفت ليها المحل جات واتعرفو على بعض من هناك وانا كان عندي مشوار ضروري واروى م جات بي عربيتها عشان كدة قولته لي مجاهد يوصلها و..، قولته ليهو و شنوو؟قال لي وبس ه، قولته ليهو وليه م حكيت لي، قال لي عشان جنك الفي راسك وغيرتك الزايدة دي تطير، قولته ليهو يعني م أغير قال لي لا م تغيري، قولته ليهو ليهه م أغير مش حقي يبقى من حقي أغير بقى يعاين لي وهو مبتسم، قولته ليهو مالك ولا انت م حاجه بتخصني

مسكني من خصري وقربني منو وقال لي، في فرق ي شهد م بين انو انتي تغيري وتشكي، اذا جينا لاحق هو كلنا بتاعين ربنا ضربتو قولته ليهو بس انا م بشك فيك ي يوسف، قال لي بتشكي ي شهد، قولته ليهو طيب م انت السبب في كدة

قال لي ربنا قال خير الخطائون التوابون وانا عرفته غلطي وبحاول اصلحو بكل الطرق فأكيد م حأمشي أعمل شي يخليني اخسرك مرة تانيه انا بس دي النقطهه العايزك تفهميها، وبعدين انا لو عندي علاقه بي اروى بجد او مرتبط بيها حأعمل كل دة قدام عيونك وبالعلني كدة؟قولته ليهو انا م عارفه بس بموت غيظ لما اشوفها قدام عيوني معاك، ضحك قال لي م دة كلو من غيرتك الزايدة دي وضربني في راسي، قولته ليهو ي زول بغير وبغير اها انت مالك دي حاجه بيني وبين حاجه حقتي، قال لي والحاجه دي انا لاحظي

قولته ليهو حتى ولو، جراني عليهو اكتر وقال لي طيب طيب ي ستي عندك صلاحيه بكل حاجه تغيري تكسري الدنيا كلها فوقاني تحتاني بس حاجه واحدة م تنسيها انو في الأخير انا ليك وانتي هنا مسك يدي وختاها في قلبو وكمل كلامو وقال لي وختي في بالك انو من بين ألف مرهه انتي في نصهم ماف واحدة حتلفت نظري غيرك وكان لفتت نظري م حتلفت نظر قلبي، قولته ليهو دي حركات هنود منك على فكرة، قال لي هنود في عينك ي سجم ضيعتي ام اللحظهه

لفيت يدي حوالين رقبتو وقولته ليهو يوسف انا م بشك فيك ابدا وحياة الخلقني م بشك فيك بس م عارفهه بتغاظ، ضحك قال لي واحلى حاجه غيظك دة وتكشيرة وشك وبوزك ماخد وضع الطيران كدة قولته ليهو حيوان يلا فكني قال لي خلينا كدة نحن كويسين، قولته ليهو بتك بتبكي ه اتفكيت منو وطلعتهه مشيت شلته تالين، جا فكه ليها تسريحه شعرها، قولته ليهو يوسف انت بكره حتسرح ليها؟قال لي خلي شعرها يتنفس وفكه لي شعري قال لي وانتي كمان، قولته ليهو يوسف يااخ بقيت اضرب فيهو شال بتو قال لي اها بعد كدة حتضربيني كيف

لما جينا ننوم قولته ليهو يوسف انت ليه م بتغير علي يعني لما كنت بتكلم مع ماذن، قاطعني قال لي تعالي رقدتي قي حضنو وقال لي كتيير فقدتهه اعصابي م اكزب عليك والدليل على كدة لما كسرته ليك تلفونك لما تالين وقعت، بس بعدين قعدته فكرتهه مع نفسي كداا لقيت انو انا قناعتي بإنو انتي م حتعملي شي غلط اهم من فكرة اني اغير عليك، وانا بحبك واذا خليت عنصر الغيرة يدخل بينا حيجي وراهو الشكك، وبعد الشك، حيكون في وسواس قهري، وحياتنا حتتحول لي صراعات وجحيم م بعدو جحيم وفي الأخير بالرغم من انو حيكون في بينا حب كبيير، حيكون في بينا فراغ كبيير والفراغ دة بسببو هو الحيخلينا نخون بعض والغريبه انو نحن حنكون خلقنا الفراغ دة بنفسنا فيعني هي معادلهه بسيطهه انا لما اغير عليك معناها حأحبك اكتر ولما أحبك اكتر معناها انتي جزء مني واقرب لي من الأوكسجين الأنا بتنفسو ولازم احافظ عليك، شهد انا بأي وسيلهه من الوسائل بحاول اني اتجنب الحجات الحتخلي يجي علي يوم واخسرك، انا بعرف يعني شنو وحدة، ويعني حياة فاضيهه لا اهل ولا اقارب ولا حتى زول يطبطب عليك لما تكون في عز وجعك، عارفه ي شهد احساس انو انت تصل لمرحله انو ممكن تموت عادي وماف زول يسأل منك؟وجثتك تقعد في التلاجات وفي الأخير يتبرعو بيها عشان يدرسو فيها ناس طب؟بس دي كانت حالتي انا لغايه م انتي دخلتي حياتي، خليتي يكون عندي 100 سبب اعيش عشانو، غيرته نفسي عشانك بالرغم من اني كنت طايش، لما الواحد يلقى واحدة تتخلى عن القدامها والوراها عشانو حيكون عايز شنو تاني من الدنيا دي؟انا لقيت فيك امي واختي واخوي وكل شي تفتكري حأخسرك بالساهل؟وحاتك ماف شي بخليني اتخلى عنك او اخسرك الا الموت بس طول م انا حي وبتنفس حأفضل واقف في حلقكك زي الشوكهه ه، قولته ليهو وأحلى شوفي في الدنيا ه ختيت يدي في لحيتو قولته ليهو وانا م عرفته انو الحياة ليها طعم بجد الا وانا معاك ي يوسف ...

الفترة دي وسن اتحبست وكنا بنتعب ونحن بنجهز وانا طبعا مشحتفه بينهم، وسن اخترته معاها الشيلهه وأهلي طبعا لازم اجهز معاهم للعرس برضو، انا وصلته لدرجه انو كنت عايزة ارحل امشي اقعد معاهم بس يوسف م خلاني

وفي الجانب التاني عمه يوسف كانو بادين ليها في علاجات كدة اول قالو العمليه محتاجه وقت بس وضعها كان ماشي في تحسن حتى يوسف كان بتكلم معاها فيديو وكانت بتقول ليهو الله يفتحها عليك محل م تقبل ي ولدي نحن كنا متابعين معاهم يوم بيوم قعدو شهر ولسسه كانو مأخرنهم، في يوم اتصلت علي الاء وهي مبسوطه، قولته ليها تضحكي سااي شكلو سيف قدر يقنعك، قالت لي لا والله م كدة بسس هو خلاني أعمل فحوصات لموضوع الإنجاب وكدة، وانا اتقررت لي عمليه في المبايض لانو قالو عندي انسداد ولا تكيس في المبايض م عارفه، قولته ليها طيب دي حاجه كويسه، قالت لي هو واقف معي وقال لي انو م ضروري اعمل الحاجه دي عشانو بس طالما جيت بلد العلاج وعندي امكانيه انو اتعالج ليه م اتعالج و...المهم اتكلم معي كداا لغاايه م اقنعني وهو اتكفل برسوم العمليهه واعتزر لي على العملو بس انا ابدا م بهمني كان اعتزر ولا لأ، قولته ليها واضح جدا انو م بهمك واساسا يهمك لييه

قالت لي م تضحكي جادة انا، قولته ليها وانا كمان جادة شديد ه لما قعدته اتثاقل عليها قفلت الخط في وشي ه ...

دخلت علينا ايام العرس رحلته بيت اهلي وبقيت اليوم كلو داخله ومارقه حتى بتي بنساها، يوم الحنهه حقت وسن طبعا انا كنت معاها يوسف قال لي الا تصوريها لي لايف، والعكس يوم حنه رامي وسن جات عديل بس ماف زول شافها يوم العرس طبعا، يوسف لحظهه العقد اتصل علي قال لي مرتي اللحظهه دي نحن م عشناها مع بعض صح؟ يلا تعالي أعقد ليك من اول وجديد، قولته ليهو بغض النظر عن اي شي مشتاقهه ليك والله قال لي كلها ساعات العرس يخلص ونمشي بيتنا

قولته ليهو عايزة اشوفك، قال لي حاضر شويه كدة حأكون جنب الباب بس العقد دة يخلص، قولته ليهو طيب ه، بعد نص ساعه اتصل علي قال لي وين انت، جريت سرعه لقيتو واقف جنب الباب وي يمه الجلابيه والعمهه مع اللحيه والجزمهه النمريهه تقول فيهو ي ليل اول م شافني طلعتهه غمز لي عينو، مشيت عليهو، قولته ليهو عارف نفسي في شنو؟قال لي في شنو؟قولته ليهو انا زمان لما م احب زول يشاركني في حاجه بحبها باكلها كلها اسي نفسي اعمل الحاجه دي، عايز يقرب مني اتزكر انو نحن في الشارع، قعدته اضحك فيهو قولته ليهو فاكرنا في البيت

ضحك وحكهه لحيتو وقال لي طيب خلينا نمشي بيتنا ه، قال لي بالمناسبه انا قولته ليك انو انا مشتاق ليك بجد؟ قولته ليهو م اكتر مني بس اعمل شنو روحي بقت مشحتفه بين العروس واخوي

قال لي طيب قولته ليك انو انتي حلوة اكتر من اللازم وانا لازم اسي اخبيك من الخلق دي؟بقيت اضحك وخجلتهه وبقيت اعاين ليهو بإستحى كدة، قولته ليهو طيب انا حأدخل، قال لي وين خلينا واقفين انا لسسه م شبعتهه من شوفتكك، قولته ليهو بس وقفتنا دي م حلوة يعني لو شفنا زول، قال لي ويعني انا واقف بحنك فيك مثلا؟ مرتي وانا حر فيها عايز يمسكني من انفي قولته ليهو يوسف دي شنو اللابسها في يدك دي؟قال لي شنو؟قولته ليهو مش دي الإسورة الكتبته فيها اسمي لقيتها ويين؟قال لي كنت ناسيها في قطر عند محمد وصيت عليها محمد لقاها وجابها لي معاهو قولته ليهو واي م بصدق ياخ كنت محتفظ بيها

قال لي مش حاجه بتخصكك؟ ضحكته قولته ليهو يلا انا داخلهه، اول م دخلته اتصل علي تلفون، قولته ليهو مالك؟قال لي مالي كيف؟نسيت اقول ليك بحبك عامله عيونك السمحات ديل قولته ليهو ياخي انا اكتر ه

المساء في الصاله انا كنت قاصهه فستان عنابي وفيهو بالأوف وايد وبتي قاصه ليها فستان بنفس اللون، وم كان طويل ولا قصير، واكمامو نص وراسمه بس حجول في رجولي ومحننه يدي وحتى يدي ماليه اناملي حنه رقيقه بس والإكسسوارت كلها كان اوف وايد، قولته لبتاعه الكوفير عايزة مكياج بسيط م عايزة فل ميكب، يااخي لما العروس ساقوها وانا انتظرته يوسف كل الفي الكوفير كانو بسألوني انتي الليله عقدك ولا خطوبتك؟فكنت بقول ليهم عرس اخوي، بقولو لي انتي متزوجه؟بقول ليهم والنايمه دي بتي، م كانو بصدقو

قولته ليهم راجلي اسي حيجي يسوقني، فجأة يوسف اتصل علي قال لي انا بره، طلعته وانا شايله جزمتي في يدي عشان كعب عالي وشايله بتي بالجهه التانيه، اول حاجه وقف يعاين لي مسافه، بعدها شال تالين وهو لسه بعاين لي، قولته ليهو مالك؟قال لي وكمان بتسألي مالك؟انا مفروض اعمل شنو في الحاله دي اسوقكم وارجع بيتنا؟قعدته اضحك، قولته ليهو ام انت البتهبل حبيبي

ياخي هو زاتو كان لابس قميص وجكت كدة م قدرته اميز اللوانهم بس عاملين ميكس غريب، ركبنا العربيه مشينا الحفلهه اول م ضمنته انو وصلنا لبسته جزمتي وهو شايل بتو بإتجاه وانا ماسكاه من يدو بالإتجاه التاني، دخلنا الحفله استلمتنا ليك اروى وشغلتها لينا، بعد م الحفله خلصت اثناء م نحن راجعين اتصلت علي بلسم، قالت لي وين انتي؟قولته ليها راجعه على البيت انتي رجعتي متين؟قالت لي انا لسسه في بيتكم م رجعته جيت مع العربات الرجعت الناس، قولته ليها ووب ي بلسم ليه م اتصلتي علي اسي نحن قربنا على البيت، قالت لي اسي انا اعمل شنو ي شهد انتي عارفه امي زاتها خلتني اجي معاك بعد تحنيس، قولته ليها طيب روقي م تبكي نحن حنجي عليك اسي، فصلته منها، يوسف قال لي عثمان مش قاعد؟ اتصلي عليهو ولا على مجاهد، اتصلته على مجاهد.م ردة اتصلته على عثمان، ردة قولته ليهو عثمان بلسم بت جيرانا دي انا نسيتها اسي هي في بيت ناس حبوبه واهلها حيشاكلو لانو ابوها صعب جيبها البيت عليك الاه، قال لي والله فتران صليبي طالع لكن طيب رسلي لي رقمها انا زاتي ي دوب داخل على البيت، قولته ليهو طيب، اتصلته عليها قولته ليها بلسم عثمان حيوصلك تمام، قالت لي بالليل دة برااي بري بري، قولته ليها هو حيوصلك م حيغتصبك وبعدين دة عثمان اخووي م زول غريب هو حيتصل عليك اسي اطلعي ليهو تمام؟سكتت، قولته ليها تمام؟قالت لي طيب، وبالفعل فضلنا منتظرنهم في العربيه لغاايه م وصلها بعدها نحن سلمناها امها ودخلنا بيتنا، انا والله من الارهاق م شايفه قدامي وقعته في السرير ونمتهه، اليوم التاني صحينا الضهر حتى تالي كانت مرهقهه زينا كدة ه صحيت على صوتها وهي بتبكي، استحميت وشعري منكش طبعا، مشيت المطبخ جهزته لينا فطور، ختيت بتي في عربيتها وطلعته اصحي يوسف، كان نايم في سابع نومه، جبته لي مويه في كبايه وبقيت ارش فيهو، فتح وشو وقال لي شهد اطلعي واقغلي وراك الباب، قولته ليهو جهزته الفطور وانا جعانه

قال لي طيب افطري ي شهد، قولته ليهو م بفطر براي اصحى ياخ العصر قرب يأذن اصحى اصحى ورشيت فيهو المويه فتح وشو وقام على حيلو وجراني رقدني في السرير قال لي طيب تعالي ننوم مع بعض وبطلي ازعاج، قولته ليهو يوسف يااخي بطل حركاتك دي قال لي وانتي ليه م تبطليها؟ مش انا نايم؟قولته ليهو طيب كمل نومك فكني، قال لي لا ماف نزله من هنا، قولته ليهو تالي بره براها وربي قال لي خليها اصلا هي ساكته سااي وبعدين سلفا انا مشتاق ليك طولته م ضميتك كدة، قولته ليهو ثقيل

فجأة تالين قامت تبكي قولته ليهو سامع يلا واتفكيت منو ونزلتهه، بعد اسبووع من الكلام دة اتصل علي قال لي عندي صحبي امو مرة في المستشفى تمشي معي؟قولته ليهو حاضر، قال لي جهزي نفسك، بالفعل جهزته نفسي وهو جا من الشغل اتدوش وطلعنا مشينا المستشفى لقينا زمن الزيارة خلص، ونحن راجعين يوسف قال لي نمشي نتغدأ؟قولته ليهو طيب، مشينا اتغدينا ودخلنا السينما حقت عفراء حضرنا فيلم وم تميناها طوول فترة الفيلم تالي كانت مرة تبكي ومرة تلعب بصوت عالي ومسموع

، لما جينا طالعين كانت في محلات فضهه كدة اتلفته عاينته ليهم بعدها طلعنا، يوسف قال لي نسيت حاجه ماشي وجاي رجع المول وجا راجع وصلنا البيت غيرته ملابسي جيت انوم يوسف مسكني قال لي حبيبي، قولته ليهو ايوة، قال لي تعالي قربني منو وفتح يدو لبسني سلسل، طبعا انا واقفه وبعاين ليهو، وتاني لبسني واحد، وتاني لبسني واحد، وقفني قدام المرايه وقال لي م عارف اي واحد فيهم عجبك بس على العموم جبته التلاته العيونك كانت واقعهه عليهم، فكرك لو قولتي لي عايزة واحد منهم حأستخسرو فيك؟قولته ليهو يوسف انت م جادي طبعا تقوم تجيب التلاته سلاسل علشان...، قاطعني قال لي يعني حيغلو عليك مثلا؟

وبعدين هم حياكلو من رقبتكك حتهه كأنهم اتصممو عشانها باسني في رقبتي وقال لي انتي بس اتدللي طالما انا في، ، ،

في الفترة دي عمة يوسف اتعملت ليها العمليه وصحتها كانت في تحسن ملحوظ ورجعو السودان ويوسف عمل ليها كرامه، ومجاهد واروى اتخطبو رسمي، لدن طبعا راجلها خيرها م بين انو يأجر ليها بيت بس بشرط تقعد معاها ماما ومصاريفها تكون ماشه، او تفضل قاعدة مع ناس جدو كدة، وطبعا هو ساق مرتو ومشى بيها قطر خلاها تستقر معاهو هناك، الاء رجعت لي سيف طبعا بس بعد شروط وقومه وقعده اهلها رجعوها ليهو وساقها معاهو السعوديه هي وامو، وطبعا مرتو العرسها ديك طلقها، عمي عبدالباسط من يوم م طلع م عارفين الحاصل عليهو شنو بس اختفى، بس مرتو واولادو مستقرين مع ناس حبوبه، في يوم عثمان اتصل علي اتونس معي كداا قال لي شهد، قولته ليهو ايوة، قال لي ام صراحه كدة انا جيرانكم ديك عايزها، قولته ليهو بت جيرانا منو؟قال لي بلسم م عارف بس المهم اتصرفي اقنعي لي ابوها عشان انا زول جادي ودايرها والله، قولته ليهو يوسف انت جادي؟قال لي بجد والله بت حلال وطيبانه والإحترام يضوي من وشها، انا عندي فترة متواصل معاها فاتحتها في الموضوع قالت لي انو اهلها صعبين انا حسيت انو هي م عندها مشكله بس بتخاف من اهلها، قولته ليهو ام يعني بتحبها؟ولا حاولته تلعب عليها وم ادتك فرصه ه؟قال لي والله ي شهد بدون كذب البت دي انا نفسنته بسببها ابوها دة معذبها كدة مالو لو قتلتو فيها حاجه؟قولته ليهو معذبها والله ياخ لكن م لدرجه انها تقتلو لكن ي زول قدام بفاتح امها في الموضوع وربنا يكتب الفيهو الخير، بالفعل فاتحته امها في الموضوع وكلمت ابوها وابوها وافق على طول عثمان جا نازل السودان وبدل الخطوبه عمل عقد عديل ورجع ه

في يوم يوسف في الشغل وانا في البيت قاعدة مدبرسه فجأة جاتني رساله كانت من يوسف وكاتب عليها"انتي مشغوله بالبيت وبتي، وانا في الشغل مشغول بيك وبي شغلي وفي نص انشغالاتنا دي عايز اقول ليك "مشتاق ليك خلي بالك من نفسك ومن الوتين حقنا لمن ارجع بحبك "ياخي لمن اتهبلته وانا بقرا في المسج حقتو نفسيتي كانت محتاجه المسج دي بحد هو حسه بي ولا الحصل شنو م عارفه بس غيرت مزاجي 360 درجهه ه وفضلت منتظراه بفارغ الصبر علشان يرجع

المساء ويوسف قاعدين في غرفتنا، يوسف قال لي ملاحظه انو فجأة كدة ماسورة سعادة اتفتحت في الأسرة دي؟قولته ليهو بالجد يعني عن كميه الراحه النفسيه البقينا عايشنها نحن، قال لي م عارف السبب في كدة شنو بالظبط بس طالما ربنا انعم علينا بي كل السعادة دي اكبر نعمه على تمام رضاهو علينا، قولته ليهو يوسف عاين تالين بتحاول تمشي كيف ركز، بقى ينادي عليهو ويقول ليها يلا هاا تعالي لبابا حبيبي، يلا، قالت ليهو دادا، قال لي سامعه، قولته ليهو هي مفروض تقول ماما اول، قال لي ماف طفل بقول ماما اول ي عويرهه ه، قام شالها وبقى يبوس فيها وينططها، قولته ليهو ليه كدة م راضيهه انا الشالها في بطنو تسعه شهور منو انا ولا انت؟قال لي والبجيب ليها البامبرز منو انا ولا انتي؟قعدته اضحك جا قعد جنبي وبقى يغيظني بيها لغاايه م نامت، رقدها وقرب مني قال لي بالمناسبه نحن قولنا حنجيب كم بيبي؟عاينته ليهو بي تكشيرة، قال لي بما انو تالي قالت دادا وقربت تمشي رايك شنو نجيب ليها اخوي بشبهني كدة بدري بدري يعني عشان م تحس بالوحدة وتحس انو وراها سند وكدة، قولته ليهو يوسف

قربني منو اكتر قال لي م عايزة واحد طيب نجيبهم اتنين م مشكله، وانا لسه ماخدة وضعيه التكشيرة دي قال لي طيب ولا تزعلي تلاته، خلاص دسته ي ستي المهم عايزين بيبي تاني وجراني عليهو

الصباح صحيت بوستو قولته ليهو صباح الخير، قال لي صباح النور باسني في خدي وقال لي يسعد صباحك حبيبي، قولته ليهو انت امس بالليل قولته لي انو عايز بيبي يكون سند لي تالين، بس انت م عارف انو انت سندنا نحن م عايزين سند غيرك ابدا، بحبك ي يوسف، قال لي لما انفصلنا ي شهد عارفه الحاجه الوحيدة الخوفته منها انو يجي عليك يوم وترتبطي بي واحد م يصحى الساعه تلاته صباحا عشان يفتش على رسال منك، لأني اتعودته اصحى نص الليل واتأكد انو انتي متغطيه كويس ولا لأ، انتي كنتي طفلتي قبل م تكوني مرتي، فأنا كنت بهلوس بيك عديل لو م محمد كان بصحيني وبقول لي استغفر وصلي ليك ركعتين حترتاح ي شهد انا حتى م لاقي كلمه اعبر بيها عن حبي ليك بس على العموم كدة انا م بحبك بس، ولا بقدر هيمان، انا وصلته حد الوله، انا ولهان بيك بجد ي شهد ولهان بيك بجد سامعهه ...

ضماني ورجع نام انا كان عندي دفتر كدة قاعد في الدرج الجنب سريرنا وعليهو قلم، شلته الدفتر وانا سرحانه في يوسف وكتبته عليهو:

"أحببتك حتى توقف الحب عند اجفان عينيك،

احببتك حتى ذرفت الدموع دموعا مستعيذهه خوفا من التفكير بغيرك

أحببتك حتى نسيت كل حياتي وأصبحت انت حياتي،

أحببتك حتى انحيت لك تقديسا كإنحناء تلك الفلسطنيه لذلك الجندي اليهودي لإخراجهه طفلها من بين طيات الدمار

أحببتك حتى في اللاشيئ_ومع_كل_شيئ

أحببتك حتى وكفى...

النهايهه...

مليحيظهه

م عارفه في النهايه اقول شنو وم عارفه رايكم في القصه شنو بالظبط بس انا حأقول حاجه واحدة وبقناعهه وهي الأم لما تحب ولدها شديد حبها ليهو دة تأثيرو على طفلها دة بكون سلبي اكتر من ايجابي كيف؟لأنو حيكون في بالها حاجه واحدة بس انها توفر ليهو كل حاجهه وتحقق ليهو كل رغباتو واحيانا بتمشي معاهو في الغلط وهي عارفه انو هو غلط بس بتمشي معاهو، بس هي م عارفه انو هي بكدة تدريجيا بتأزيهو من غير م تحس، هي البتبني شخصيتو زي شخصيه لدن في القصه اي نعم امها عارفه انها بتغلط وجارتها في غلطها لغاايه م وصلت لمرحله انها تخرب بيتها وفي النهايه ضيعت حق اولادها بيدها وكتير حاصله قصص زي دي في مجتمعنا، وبعدين مهما بلغ حجم المشكله بينك وبين راجلك حاولو خلوها في اطار بيتكم عشان كل م تطلع من الاطار دة حتضخم وم حتتحل، المشكله زي الحبل لما الأطراف تشد عليها بتنقطع بس لما واحد يسد والتاني يرخي بتدو نفسكم فرصه ودة ابدا م يعتبر استسلام او ضعف منك بالعكس دة زول عايز يمشي لي قدام، احيانا كلمه انا اسفه والإعتراف بالغلط م بتكسر راس زول ولا بتنزل من قيمه زول يعني اسي لدن لو كانت قالت الكلمتين ديل ومعاهم الله يهديني م كانت خلت راجلها يصل لمرحله انو يتزوج عليها ويرميها الرميه دي، عزيزتي المتزوجه عمرها الفارغه واللف والدوران والشذوذ ببنو مرة او بخلوها تمشي لي قدام، بالعكس بعد فترة حتلقي نفسك انتي الخسرانه، لدن غلطت بس دفع تمن غلطتها دي طفل بريئ اتيتم واتحرم من نعمه اسمها حنان الأم وهو في أول ايام عمرو علشان كدة ي بتي الراجل ودايرك بجد بصل بيتكم م بخليك تغلطي غلطه زي دي وبعدها كل البعملو انو ينكر او يقول ليك حادفع ليك كدة وارميهو في اي حته، انتو كدة بتنتجو لينا في جيل متضرر نفسيا، وي ستي الراجيك دة راجيك م تستعجلي انعلي الشيطان واتحصني والكاتبو ليك ربنا بحصل، انا بقول ليك كدة م مثاليه مني بس المجتمع بقى قذر جدا بذات مجتمعنا نحن كبنات لانو نحن بقينا ندي الشباب فرصه فينا وبنمشي ليهم برجولنا تحت مسمى الحب نحن بقينا نديهم اريحيتهم بي انهم يغلطو فينا زي م عايزين ودة الغلط النحن شايفنو صح تحت مسمى حريه شخصيهه، الحب عمر م كان كدة ولا عمرو كان حدو السرير وكم حركه منك ومنو، والرجوله عمرها م بي نفخهه الصدر والتجدع والكلام المعسول بالتلفون، المجتمع م باطل نحن العقولنا باطلهه صراحهه ومحتاجين نفكر بطريقهه اعمق من كدة في الحب اذا كل همنا في الحياة ونقطهه ضعفنا كانت هي الحب...

اخيرا

وأعيد وأكرر انا م كاتبه روائيه ولا عندي علاقه بالروايات ولا العولاق البكتبو دة عندو مقومات الروايات والله ي جماعه انا انسانهه قليله ادب وفارغهه سااي واقرب لي اني وهميه او وهميه بالفعل م فرقت المهم بلقى نفسب فاضيه ومدبرسهه بكتب وبشخبط م عارفه هل انا بمسك بيكم زمن ولا انتو البتمسكو بي زمن المهم نحن بنمسك زمن ببعض وانا وبعزكم وانتو بتنبسطو وانا بنبسط ودة احلى م في الموضوع والمطلوب اثباتهه صح؟

بس على العموم رمضان كريم مقدما اعادهه الله علينا وعليكم بالخير واليمن والبركات تصومو وتفطرو على خير وم تنسوني من صالح الدعوات يااخ

وشكرن