الفصل التاسع عشر

خدر وكت شافها سكتت

قال ليها الووو ..

قالت ليهو نعم ..

قالا مالك سكتي كدا؟ كلامي ماعجبك ولا شنو؟

قالت ليهو بالعكس كلامك حلو ربنا يخليك خلاص يلا انا هسي في الجامعة .. بعدين بنتلاقى .. نحن في انتظاركم

فجأة البت بقت جادة .. ماعارف ليه .. شكلها في الاول .. جاية بي فهم وهسي اتصدمت .. ولا الحاصل شنو؟

على كل المساء الحسيب وولدو خدر ركبو مشو على ناس عمك مصطفى .. خدر ماشي على الناس ديل وقلبو يضرب وفرحان ومنتشى وحاسي بالعربية دي ماشة لي ورا .. ومشوار الصحافة بقى بعيد بعد ..

اول ما وصلو خدر حاسب بتاع الامجاد ..

وقال ليهو بنتصل عليك تجينا راجع ماتبعد .. الكلام ده قريب الساعة خمسة مساء .. دخلو جوة وخدر طبعا" متوتر .. ومناهو بس الناس ديل سريع وقبل كل شي ينادو ليهو رغد يشوفها

لانو حاسي انو مشتاق لي نظرة واحدة فقط

وقعدو وحاج مصطفى اكرمهم كرم شديد .. قام عمك حسيب قال ليهو خدر ده عايز يتكلم مع البت شوية يا مصطغى

عمك مصطفى قال ليهو والله البت هسي ماجاهزة يا حسيب

قال ليهو ماجاهزة كيف يعني؟ الولد ده جاي من هناك يامصطفى .. عشان يقول معاها كلمتين .. عمك مصطفى بقى يقطع .. ويتمتم

قال ليهو والله ياحاج ماعارف اقول ليك شنو ..

لكن موضوع يتكلم معاها ده خلوهو هسي .. نكرمكم ونتونس شوية .. ولي قدام شوية بتلاقو ان شاء الله ..

قال ليهو والله يامصطفى اول يوم تحيرني .. ياخي البت بتي والولد ولدي لو في مشكلة قولا لينا ..

قال ليهو مافي اي مشكلة .. وانا موافق بي نسبكم وبتي موافقة وامها واخوانها مافي اي زول عندو مانع بس الليلة خلوني من قصة تشوفوها دي

عمك حسيب قام على حيلو ..

وقال ليهو خير يامصطفى الوكت اتاخر ونحن بنمشي .. وخدر يعاين بي عيونو .. اصلا لا قال خير لا قال شر .. بس قام مع ابوهو وطلعو .. وابوخدر شكلو زعلان من الموقف بتاع مصطفى ده جدا"

خدر قال ليهو يا ابوي ولاتزعل نفسك .. البت انا بشوفها بي طريقتي .. والله باكر بمشي ليها في جامعتها ..

قال ليهو مخير .. انا الموضوع ده بطني طمت منو ..

قال ليهو كيف يا ابوي؟ وانا ماشي في الموضوع عشانك

عليك الله ماتعمل كدا .. انا تاني مابلقى لي مراة بالساهل قال ليهو يازول يهديك الجامعة امشي وانا مابعترض .. ده موضوع انا بديتو ليك وبتمو .. لكن مصطفى ده الفيهو اتعرفت يعني مستكتر عليك شوفة البت .. انا فاهمو مصطفى ده وعارف قصدو .. عندو نظرية الممنوع مرغوب .. داير يمنعك تشوفها .. عشان تتعلق بيها وتجن بيها .. شوف بالله الراجل ده

خدر قال ليهو يا ابوي ده ظن ساي .. هسي انت اتاكدت كيف من الموضوع ده؟؟ احتمال يكون في عذر

قال ليهو العذر شنو؟؟

قال ليهو يا ابوي البيوت اسرار مامعروف الحاصل المفروض نحن مانتضايق من خصوصيات الناس .. والله البشوفك يقول داير تعرسها انتا .. ياخ انا الجاي من هناك عشان اشوفاا والاقيها ما اتوترت زيك كدي

ابوهو قال ليهو انا الشي الضايقني شنو غير كسرة خاطرك انت

وتانيا" انا عايزك تقنعها سريع .. انو الزواج يتم قريب قبل التخرج ذاتو بلا تخريج بلاجامعة بلا غم

قال ليهو انت بس اصبر لي لاباكر وانا بمشي ليها في الجامعة خلي الموضوع ده علي

ورجعو البيت .. باكر الصباح خدر لابس جاهز ماشي الجامعة اتصل عليهو ابراهيم صاحب العمل

وقال ليهو انا عايزك هسي تبطل اي حاجة وتجيني في المكتب قال ليهو في شنو يا ابراهيم ..

قال ليهو بس انت تعال ..

قال ليهو انا عندي مشوار والله .. مشوار مهم ومصيري ..

قال ليهو بقول ليك ياخدر لو في زول غرقان ماتمشي تمرقو بس تعال لي

خدر ركب سريع مشى ليهو وقال عشان يحصل الجامعة .. اول ما وصل لي ابراهيم في المكتب .. ابراهيم وقف ليهو على حيلو وقال ليهو تعال .. تعال خش سلام بالاحضان .. سلم عليهو وقال ليهو البشارة .. البشارة .. الموضوع اتحلا وانا زي ما وعدتك يوم الموضوع يتحل انت بترتاح في حنانك

قال ليهو عليك الله اتحلا؟؟ كيف يعني كدي قول لي ..

قال ليهو والله ياخدر انا يومي الاتصلت عليك .. وقلت ليك ادعي لينا .. علي الزول الشال الارض .. انا كنت واثق انو دعوة منك مابتقع واطة .. ياخي انا بعرف الناس

اها بقينا كل مانمشي للزول ده عشان نتفاهم معاهو نلقاهو في مستشفى .. عند دكتور .. في المعمل الفلاني .. اخيرا تحت تحت سمعت انو متهمنو بي سرطان .. يمشي يحلل يقولو ليهو عندك سرطان .. يمشي يحلل في حتة تانية يقولو ليهو الورم حميد .. جابو ليهو مخولة في راسو .. طبعا" انت عارف هاجس انو يقولو ليك عندك سرطان دي صعبة كيف .. وبتكون محتاج لي ربنا يقيف معاك باي شكل من الاشكال .. اها يازول الزول ده فجأة كدا اتصل على اللليلة الصباح الساعة 7 .. وانا وكت قال لي معاك فلان لمن اتهجمت ..

قال لي تعال لي في البيت ..

مشيت ليهو في البيت

قال لي والله نحن قررنا انو نتنازل ليك عن الارض .. ونحل ليك مشكلة الورق دي .. لانو هسي الارض لا انت ح تستفيد منها ولا انا ح استفيد منها .. انا بكلم فلان يمشي يجهز ليك اوراقك والليلة الساعة 2 بجيب ليك الورق جاهز ودعواتك معاي انا محتاج ليها .. وماعايز اكون ظالم .. وانا زول بقيت عيان ومسافر اتاكد من فحوصاتي .. داير منك النية انو تطلع فحوصاتي نضيفة .. والله يا خدر انا عرفت كيف قيمة الانسان الضعيف .. الزول ده بعد ما كان بتنهر علينا .. وما بسمح لي باني اقابلو اساسا" ..

بقى ضعيف ومسكين تحن على حالتو طوالي اتذكرتك ياخدر واتذكرت دعوتك

خدر قال ليهو والله انا فعلا" دعيت ليك بنيه خالصة .. لكن انت مظلوم برضو دعوتك مابتقع واطا ..

قال ليهو المهم انا من بكرة عايزك تجي تباشر الشكل والشغل بالنسبة زي ما وريتك .. وعشان اريحك

وتكون مطمئن .. انا في العشرة مواقع الاولى .. حق المواد والعمالة علي .. وانت عليك المتابعة بس

خدر قال ليهو مامكن ؟؟ يازول انت جادي ؟؟

قال ليهو اي والله جادي ..

خدر ده من الفرح لامن وقف على حيلو ..

وقال ليهو والله انت بي كدا بتكون قدمت لي خدمة عمري ما انساها ليك ..

خدر قال سبحان الله بالله شوف ارزاق اليتامى .. بالله شوف فعايل رب العالمين معاي بدت من هسي .. الله اكبر

قال ليهو خلاص يا ابراهيم والله .. كمان انا اشتغل ليك شغل اخلي المايشتري يتفرج .. بس انا طالع عندي مشوار مهم وباكر معاك

خدر داير يطلع كدا ..

ابراهيم قال ليهو .. خدر انا داير منك طلبين عليك الله ..

قال ليهو من عيوني والله قول بس ..

قال ليهو اولا انا داير معاك خوة لوجه الله مايفرقنا الا الموت

قال ليهو والله ده شرف لي وانت راجل ماساهل ربنا يديك العافية

والطلب التاني .. قال ليهو بس عايزك تدعي للزول ده ربنا يشفيهو

خدر قال ليهو ربنا يشفيهو عشان يجي يقلع مننا الأرض تاني هههه الاتنين اخدوها ضحكة قويه ..

خدر قال ليهو يازول ان شاء الله ربنا يشفيهو ويلقى فحوصاتو نضيفة ويسلم لي وليداتو .. وتبقى ليهو بي توبة من حق الناس والظلم

خدر ودع الراجل ومشى الجامعة وصل متأخر ولقى الجامعة مقفلة

وضرب في تلفون رغد لقاهو مقفول .. كل مايضرب بلقى التلفون ده مقفول .. ورجع البيت قال بجي بكرة الصباح واتصل على نسرين بسأل من احوال الاطفال وامهم ..

قالت ليهو ..

والله الصباح والمساء معاها بالتلفون وكويسة واولادها تمام وتشيل وتدعي ليك بالتوفيق في حياتك .. ولو في اي حاجة انا براي بتصل ياخدر ماتقلق

تاني يوم الصباح ضرب لي كل العمال الوقفو منو من يوم خلص الشغل بتاع المرحلة الاولى .. وقال ليهم كونو على استعداد نحن يوم السبت نازلين شغل على مستوى عالي

اها يازول ركب مشى للجامعة .. وسأل من رغد مصطفى

قالو ليهو شكلها ماجات الجامعة .. دلوهو على صديقتها اسمها لجين .. بتاعة الفكرة متذكرنها؟؟

وكانت في محاضرة انتظرها بره وقاعد اتصل على تلفون رغد برضو قفول .. اها انتظر لامن طلعت البت الاسمها لجين والبنات قالن ليها في واحد هناك بسأل من رغد .. جاتو سلمت عليهو قالت ليهو انت خضر؟

قال ليها نعم ...

لجين طبعا" بت غير متوازنة وشكلها هبلة وبتتكلم وتعاين هناك وشكلها ذاتو ما مرتب

قال ليها وين رغد الليلة ماجات الجامعة ولاشنو؟

لجين ارتبكت وبقت تقطع برضو ..

قالت ليهو والله ماعارفة اقول ليك ..

قال ليها احكي لي خليني اعرف الحاصل عليها والله بحفظ سرك بس اكون مطمئن .. وانتي ح تكوني صديقة عزيزة علي .. زي ما انتي صاحبتها .. بس دايرك ما تدسي علي حاجة .. انا حاسي انو في شي ماطبيعي ..

طبعا" قالت ليهو بي صراحة انا بحكي ليك بس خايفة من ردة فعلك ..

قال ليها والله ليك الامان .. اصلو في شنو هو لو ما مصدقاني خلاص ماتحكي ..

قالت ليهو خلاص خلاص .. بحكي عارف يا خدر رغد دي طبعا بتحب ليها واحد اسمو عمرو ومتعاهدين الاتنين على الزواج وكل الدنيا عارفة كدا .. بس ما اتقدم ليها

قال ليها طيب ليه قبلت بي ووافقت؟

قالت ليهو والله بس كدا .. تصرف جنوني .. لكن بصراحة ماعندها ليك شي .. الزولة دي مع عمرو مابتقول بحبو بعض بتقول متزوجين عديل .. حتى بتقول ليهو ياراجلي ومستعبدها استعباد وهو بتشوفو حياتها .. والله مرات بتمشي معاهو الفتيحاب وكت اهلو يكونو مافي .. والبيت يكون فاضي .. وانت افهم الباقي

خدر نطط عيونو وقمز لافوق زي الفي دبيب طقاهو ..

قال ليها معقووووووول؟؟

قالت ليهو شنو المامعقول عادي زي شراب الزبادي يا انت

قال ليها اها واصلي ..

قالت ليهو اها اول امبارح .. جا لقاها بتتكلم في التلفون والظاهر التلفون كان منك انت .. الصباح كدا موش؟

قال ليها ايوة هي اتصلت علي

قالت ليهو انا عارفة ياخدر وقت اتصلت عليك ده كانت هنا في الجامعة ..

وكانت جات من البيت الصباح تضحك وتستهزا ..

وقالت لي الليلة الخطيب المزور جاييني في البيت .. خليني اتصل عليهو واحبو شوية .. عشان يجي فرحان .. واتصلت عليك وهي بتتكلم معاك كدا .. اول ماخلصت المكالمة .. عمرو كان واقف وراها .. وما استحمل الخيانة قام ضربها في وشها ووشها اتورم وعينها بقت قدر الليمونة .. وسقناها وديناها البيت .. وهو مشى معانا البيت .. في الشارع بعتذر ليها ويبكي زي المراة .. وهي بتقول ليهو ضربك شفا ياحبيب عمري .. بس خليك عارف ياعمرو انو ده زول بغشغش فيهو ساي مراضاة لابوي

شفت الهبلة؟ والله انا لو كنت في محلها تاني ما اقبل عليهو اها وصلناها البيت وقالت ضربتها الركشة ..

العصر اتصلت علي وقالت انتو جيتو البيت وهي ماقدرت تقابلكم بي شكلها داك .. وقالت لي ابوها انا خدر ده ماعايزاهو لانو من قلت عايزة اقابلو ضربتني الركشة .. عملت السبة في الركشة .. ووصفت الحادث وصف دراميكي .. قالت كنت راكبة في الركشة .. والركشة عملت فرملة والسيخة القدام ضربتني في وشي

اها قالت لي انا عايزة انهي اللعبة دي لانو خدر ده زول ومابستاهل الغشغشة ..

وانا قلت ليها لو غلبك اديني تلفونو انا بفضحك ليهو لاني زعلانة منها .. واهو انا حكيت ليك كل حاجة عشان تكون على بينة .. عليك الله ماتقول لي زول

قال ليها جدا" والله مابقول لي زول .. لكن انا هسي اصدقك كيف احتمال بتكذبي .. وعايزة تنتقمي من رغد؟

قالت ليهو كيف يعني؟ هي والله صحبتي ..

قال ليها يا اما تثبتي لي الكلام ده يا اما انا بفتك وافتها هي ذاتها

البت خافت طبعا"

وقالت ليهو طيب اثبتو ليك كيف

قال ليها اتصلي عليها في تلفون امها لانها تلفونها مقفول خليها تتكلم واسمعها .. وقولي ليها رايك شنو في الخطيب الجديد

قالت ليهو تلفونها فاتح بس ضربت ليك بي شريحة خارجية عشان كدا قعد تلقاهو مقفول

وفعلا اتصلت عليها في رقمها الاصلي ..

وقالت ليها اسمعي يارغد

خطيبك الجديد جاييكم متين؟

قالت ليها خلاص المسرحية انتهت ماح يجينا تاني .. انا راجلي عمرو وانت عارفة كدا لو قتلني مابتخلا عنو ..

لجين قفلت الخط ..

خدر قعد يتبسم ..

لجين بقت تعاين ليهو مستغربة

قالت ليهو بدل ماتكون متضايق .. كمان فرحان ومبسوط

قال ليها اتذكرت دعوة زول دعا لي .. ورسل لي الدعوة رسال قال ليهو قولو لي خدر (ان شاء الله عمرك ماتلاقى الشر ياخدر) طبعا لو متذكرين دي دعوة خالدة يومو الاتكفل بي اولادها .. وانا بقول برضو الاستخارة العملا في بيت ناس رغد جابت مفعولها الان .. لانو لايمكن الزول يطلب من ربنا يختار ليهو .. وربنا يختار ليهو الشر والفساد

قال ليها انتي عارفة يا لجين انا دي المرة الرابعة بحاول الاقي رغد وماقدرت حتى حسيت انو ربنا صارفني منها صرف غريب

خدرمشى البيت مرتاح نفسيا .. بس بطنو طامة من حاجة اسمها رغد .. وبقى يقول .. سبحان الله للمرة التانية وانا اتخدع من البنات .. واتغشه .. والحالة شايف نفسي ذكي وشاطر .. واحدة زي دي تلعب بي .. وتمسك الصدارة بعد هند؟؟ ربنا كريم

بس الحقيقة ياجماعة خدر ابدا قصة رغد ما اثرت فيهو .. بالعكس حسة بارتياح غريب ..

وبقى يسرح هناك ويقول انا الزول البريدو وبحترمو وبعزو وبجلو ان شاء الله يقبل بي .. وان شاء الله ربنا يكتبو من نصيبي .. وتفكيرو انصرف انصراف غريب .. للزولة الاصيلة الاسمها خالدة .. خدر مشى البيت .. وبقى مابجيب سيرة لابوهو وابوهو ساكت

بعد اسبوع تقريبا تقريبا" عمك حسيب نادى خدر ..

قال ليهو انا عايز اتلكم معاك بي صراحة .. انا عارف اني دخلتك في قصة ناس مصطفى دي .. لكن والله ياخدر انا هسي خجلان منك .. تتخيل الزول ده اتصل علي البارح وقال لي نحن صرفنا النظر .. وانا بيني وبينك لو ماهو صرف النظر انا كنت ح اصرفو .. بس ياخدر ماعايزك تتاثر انا عارف البت عجبتك وبنيت عليها امال

قال ليهو يا ابوي امال شنو؟ انا امالي في الدنيا كلها انت بس ولايهمك .. البت ربنا يقسم ليها من خير وانا ربنا يقسم لي من خير .. والموضوع ده تاني ماعايزين نتناقش فيهو بس .. في حاجة عايز اقولا ليك .. انا سمعت كلامك ومشيت معاك في انسانة اخترتها لي انت .. المرة دي انا عايز اختار .. وانت تبارك لي ..

عمك حسيب قال ليهو افو والله معاك ..

قال ليهو بس انا خايفك ترفض ..

قال ليهو والله مابرفض موش حاجة انت عايزها بس قول

قال ليهو انا رغبتي في واحدة بعرفها من سنين وعارف اخلاقها

وجميلة وعاجباني .. واصلا لو ماكلامك وربطة لسانك مع عم مصطفى انا ماكنت فكرت في غيرها .. بس المشكلة الممكن تخليك ترفضها انها .. ارمله وعندها طفلين