الفصل الخامس عشر

طبعا" مرت الايام .. وهند دخلت في احلام وردية .. لا ليها اول ولا ليها آخر .. وخدر مشغول في تجهيزات بيتو .. وشغلو ماشي كويس .. وابراهيم داك ساكي المشكلة بتاعة الارض لكن وين؟ .. التمساح قام بيها .. بس لغاية الان ما اتبني فيها مبني .. والمشكلة دي هسي ليها قريب شهر ..

في يوم من الايام حسيب ابو خدر نادى خدر وقعدو وقال ليهو انا خطبت ليك ياخوي ..

قال ليهو خطبت لي؟ كيف يابوي الكلام ده ؟؟ انا قلت ليك داير لي عرس؟

قال ليهو انت عايز تقعد كدا لمتين؟ .. انا البارح مشيت لواحد صاحبي في الصحافة .. وخوة قديمة .. وشفت بتو .. بتقرا في اخر سنة في الجامعة .. والله عجبتني .. وانت ذاتك كان شفتها بتعجبك .. وقلت لي ابوها داير بتك دي لي ولدي خدر .. وهو مشكور قال لي مبروك .. من قبل ما شاورها ..

قال ليهو يابوي ده كلام شنو ..؟ انت زول متعلم .. انت من زمن العرس البتموهو الابوات؟ والله البت ذاتها ماتقبل خليني انا ..

بعيدن يا ابوي .. انت البنات ديل مابتعرفن .. اسالني انا عندي دكتوراة في علم الاناث .. خوتك مع صاحبك على العين والراس لكن حياتي دي خليها لي براي .. الله يخليك يا ابوي.

قال ليهو اسمع ياخوي .. ماتقعد تبرطع .. هسع كان ماك دايرها مان جابرك .. انا عقدن ليك عليها؟ كان داير تقعد كدي لامن ضهرك ينحني ..

انا ماعندي مانع .. بس والله انا كنت بتمنى اشوف وليداتك قبال اموت ..

قال ليهو يابوي ان شاء الله عمرك طويل .. وتشوف اولاد اولادي ..

انت بس روق لي شوية .. هسي انا بس قدامي تشطيبات شوية في بيتي .. وبعدين العرس هين ..

عمك حسيب صرا وشو وقبل كدا ...

خدر فعلا حسه انو ابوهو زعل من الرفض المبدئي .. واصلا ماقاعد يغلط على ابوهو .. قام قال ليهو كويس يا ابوي .. انا بمشي لي صاحبك واشوف بتو .. ماعندي مانع .. بس لو حسيت انها ما بتنفع معاي .. الحل شنوو؟؟ .. برضو اقبل ؟؟ ولا كيف؟

قال ليهو لالا .. امشي شوفها .. لو مانفعت معاك .. تعال كلمني انا براي بمشي بنط من كلمتي ..

طبعا " كلمة (بنط من كلمتي) دي اثرت في خدر شديد .. كيف يعني يخلي ابوهو ينط من كلمتو .. والله كدي دخلتا في مشكله ياخدوري ..

خدربقى كايس ليهو لي فرصة .. يمشي يشوف البت .. احتمال تنفع .. عشان تبقى فيها مرضاة لابوهو ..

لكن الحقيقة انو خدر ماعندو اي رغبة في زواج الان .. الا ان يحدث الله امرا.

هناك بين نسرين وخالدة حصل اتصال .. نسرين قالت ليها اها ياخالدة قال ليك شنو خدر؟

قالت ليها اداني اقتراحات .. وانا ما اقتنعت بيها .. قال لي تقبلي نكون نحن اهلك .. وتقولي لي راجلك انا عندي اهل وشنو وشنو .. عشان يخاف .. طبعا " انتي عارفاني يا نسرين انا مابقدر اكضب على اي زول خلي راجلي .. وقال لي بتصرف اشغلو معاي .. ووو ..

المهم حكت ليها الحاصل .. وقالت ليها خدر سأل من هندوية تصدقي؟

قالت ليها اصلو مابصدق .. الزول ده قلبو ميت ولا عندو كك في راسو ده .. عليك الله العملتو فيهو هندوية .. تاني كان لقاها ميتة بسأل منها ..

قالت ليها لالا ماتفهمي غلط .. هو سأل قال لي .. قالو مقاطعاك .. وانا قلت ليهو رجعنا .. قال لي والله انا بتمنى مشاكلا تتحل ..

نسرين قالت ليها كدا معليش .. كلنا بنتمنى مشاكلا تتحلا ..

خالدة قالت ليها اصبري .. النوريك الباقي .. بعداك صحبتك اتصلت علي .. وبتٍسأل من اخباري .. وانا كلمتها قلت ليها خدر اتصل .. وسأل منك ..

واظني غلطتا والله بالكلام ده لانها .. صنت مسافة .. وقالت لي ياحليلو ياخالدة .. تتخيلي انا مأمله علاقتنا ترجع زي زمان ..

نسرين فقع فقع .. فقعتها ضحكة .. قالت ليها البت دي هبلة ولاشنو؟ .. والله خدر كره البنات عشانها هي .. يجي يرجع ليها الا يكون مجنون وغبي ..

قالت ليها والله يا خالدة .. مادام الزول ده منتظر لغاية الان ما اتزوج .. احتمال يكون منتظرها .. نسرين قالت ليها ياخالدة انتي بتفكري كيف .. ؟؟ ماكان منتظرها ولا حاجة .. يعني كيف ينتظر ليهو واحدة معرسة؟؟ .. ده زول كان بطنو طامة من العرس .. اسأليني منو انا .. بس انتي اصلك ماكان تعشميها في موضوع زي ده .. قالت ليها انا حكيت ليها الحصل بس .. ان شاء الله ان بقى عندهم قسمة .. ربنا يلمهم يانسرين

قالت ليها مستحيل .. مستحيل .. واصبري وشوفي .. وقولي نسرين قالت .. اها انتي اخبارك شنو؟

قالت ليها .. والله الحمد لله .. من البارح لا انا ولا اولادي .. ماعندنا اكل ..

بلم ليهم في الرغيف اليابس .. وارشو ليهم بي موية الملح والبصل وناكل .. وهسي الرغيف ذاتو قرب يكمل ..

قالت ليه راجلك وين؟ .. قالت ليها والله من طلعة امس الصباح تاني ماجا .. الاكل طاير .. هسي انا بقيت خايفة عليهو .. ماقاعد يبت برة البيت اصلو .. قالت ليها اتصلي عليهو طيب شوفيهو ..

خالدة قالت ليها المشكلة انو مانعني اتصل عليهو نهائي .. لو اتصلت عليهو بعدين بجي يوريني ليهو .. خليهو على راحتو ..

قالت ليها خلاص انا هسي بحول ليك خمسين .. تتصرفي لامن يجي ..

المهم نسرين كانت واقفة مع خالدة وقفة ناس اوفياء والله ..

يوم من الصباح .. خدر طالع على الشغل في كافوري .. جاهوتلفون

من رقم غريب .. فتح التلفون .. يسمع ليك صوت الزولة المابتغباهو .. هندوية !!!..

قالت الو السلام عليكم ..

قال ليها .. عليكم السلام .. معاي منو .. وهو عرفها من البداية

قالت ليهو معاك انا هند ياخدر ..

قال ليها هند منو؟؟

قالت ليهو هند .. هند ياخدر نسيتني؟

قال ليها .. مرحب والله .. اي خدمة؟

قالت ليهو يخسي عليك ياخدر .. يعني نسيتني كلو كلو؟

يعني العشرة تهون عليك بالطريقة دي؟ .. ياخي افرض القسمة ما ادتنا .. والظروف حرمتنا من بعض .. تقوم تقطع مني .. مايهدا انت متواصل مع خالدة صاحبتتي .. يعني انت ما مؤمن بالقدر؟؟ .. ده القدر عمل فينا كدا ياخدر .. يعني انت دايرني اعصى امي ؟؟

بعد ماكان يسمع فيها وهي تتكلم .. قاطعها قال ليها ..

قال ليها دقيقة دقيقة .. انتي مصرة تكذبي؟ انتي لغاية هسي ما اتعظتي من الكذب .. قالت ليهو انا عارفاك ممكن خالدة تكون قالت ليك .. الموضوع بي رغبتي .. لكن مادام انت بتصدق خالدة .. اكتر مني يبقى مافي فايدة ..

قال ليها خالدة؟؟ .. خالدة والله خسارة تكون بتعرفك انتي .. والله فردة نعال خالدة اقيم منك .. قالت ليهو طيب ماكانت من زمان معاك .. مالك ما اتقدمت ليها؟ .. قال ليها للاسف الزول مابعرف المستقبل .. والقسمة مافي يد زول .. لو القسمة في يد زول .. خالدة الحارقاك دي انا كان بعت الدنيا عشانها .. وانتي ما بقبل بيك خدامها في بيتها .. لكن الحمد لله .. ولو سمحتي تاني ما تتصلي علي .. لاني ممكن تجيني جلطة بسماع صوتك .. قالت ليهو حرام عليك ياخدر .. انا هسي اتصلت عليك بعد الفترة دي كلها .. عشان اسال منك بس واشوف اخبارك ..

تجي تسمعني كلام زي ده؟ ..

انا هسي طلبت منك حاجة؟ ياهو بسأل منك .. ومن اخبارك .. تاني مافي شي .. قال ليها ليه تسألي مني؟؟ .. بيني وبينك في شنو؟

قالت ليهو بيني وبينك العشرة الزمان ياخدر .. قال ليها ياتو عشرة دي؟؟ انتي يابت مخك ده ما مركب صاح؟

اسمعي انا عندي شغل ومستعجل .. عليك الله اطلعي من راسي .. مع السلامة .. قالت ليهو انا بتصل عليك تاني مامشكلة .. ولارد عليها قفل التلفون ..

خدر قفل منها التلفون .. الزول ده حسا احساس مامعروف شنو .. وعيونو اتملن .. وبكى كدا لامن اتنخج .. وهو ذاتو ماعارف سبب البكا ده شنو؟ .. (حكاية غريبة .. البكا شنو ياخدر؟؟؟)

البكا ده سببو محتاج لي تحليل نفسي عميق .. مرات انا اقول احتمال حنين الذكري .. والحب القديم؟؟ وحركتو داخل مسالك الروح .. هيج الاحزان. زي بكا الام لمن تكون مطولة من ولدها الزعلانة منو .. وفجأة يظهر ليها .. بجيها بكا غير معروف ..

مرات اقول لالا .. دا تنفيس الغضب الكامن جوة قلب خدر .. كان عندو كمية من الاسى والغضب .. ومالقا فرصة ينفسو فيها فجأة لمن سمع صوتها وقال ليها الحقايق دي .. ونفس عن غضبو المخزون .. عبرت الروح بالدموع ..

والله اعلم بالدواخل طبعا .." كلو تخمين من الكاتب .. المهم خدر بقى يسرح كتير .. ومرات يجيب ليهو كلمة براهو كدا مامسموعة ..

اما هند قفلت التلفون .. وجواها حقد الشياطين كلو تجاه خالدة وحست انو خدر بحب خالدة .. وبينهم علاقة ما شريفة .. والمفهوم ده سيطر عليها شديد .. واصرت جواها انها تشيل البت دي من طريقها .. وتسوي المستحيل عشان تنزع خدر منها وكلها طبعا زي ما متابعين ظنون ماعندها اساس من الصحة .. والمكالمة دي بدل ماتقنعها من خدر زادتها تمسك واصرار ..

مرت يومين .. وهند ماعارفة تعمل شنو؟ نفسها تتصل علي خدر .. بس خايفة من كلامو وهيجتو .. وخدر كل مايشوف تلفون يقول ده تلفون هند .. يعاين ليهو .. يلقاهو ماياهو .. ونفسو انها تتصل عليهو تاني .. بس ماعارف ليه .. ياربي داير يعتذر ليها عن الحصل .. ياربي الزول ده اتحرك احساسو القديم .. ولا احتمال عندو باقي كلام حارقو ما كملو داير يزفتها معاها اكتر ..

ياربي في شنو بالضبط .. والايام جاية .. وبتظهر كل الحقايق

اها خدر يوم الاتنين .. اخد الوصف حق بيت ناس مصطفى ابو البت القالو ليهو ابوهو .. في الصحافة ومشى ليهم العصر .. وابوهو اتصل تلفون على مصطفى ابو رغد .. عشان يوريهو انو خدر جاييهم زيارة ..

ومصطفى فهم طوالي انو خدر جاي عشان يشوف البت .. والبت لسع ماعندها خبر ..

ابوها قال ليها .. يارغد بعدين تعالي بدري من الجامعة .. انا عايزك في موضوع ضروري هه .. (موضوع ضروري ولا داير تقطع خيتها .. ؟؟)

المهم طبعا البت اخدت ليها وقفة .. تعاين لي ابوها مستغربة لانه دي اول مرة يقول ليها كدا .. وعايزة تسأله من الموضوع شنو؟ بس غيرت رايها .. ولفحت شنطتها ومشت ..

ناس عمك مصطفى اسرة خرطومية مية المية .. ماعندهم عادات ناس البلد .. وشوية منفتحين وعندهم حرية .. بس عمك ده مرات قاعد يجاري حسيب الله في حركات ناس البلد .. وعلي الطلاق .. وحررم ماتقول حاجة .. واديتك بتي بدون شورة وكدا يعني ...

بس طبيعة البيت غير كدا .. يعني البنات يطلعن زي ماعايزات وباللبس البعجبن .. ويجن في الوقت البريحن .. هسي البت الاسمها رغد دي .. طلعت الجامعة متمكيجة وكاوية شعرها بالاستشوار .. وخشمها ده عامل زي بطن البطيخة من الطلاء واللبس ضيق لدرجة مبالغ فيها .. دي لو شافها خدر بديها بونية خلي يقول دايرها .. انا بعرفو .. كرهتو في الدنيا البنات البتعاورن كدا

بس ابوها قال ليها تعالي بدري مخصوص عشان الولد يجي يلقاها بي شكل محترم .. وخدر لو لقاها انسانة محترمة وعجبتو .. احتمال يبقى عليها .. لانها بالجد جميلة حتى بدون اضافات صناعية ..

اها خدروصل البيت زي الساعة 4 ونص .. ودق الباب .. وعمك مصطفى فتح ليهو الباب براااهو .. وسلم وقال ليهو والله متوقعين حضورك .. ودخلو علي المضيفة ..

لكين عارفين المشكلة انو البت لسع ماجات من الجامعة .. ولو جات داخلة بي شكلها داك .. خدر مامعروف يقول شنو؟ لانو زول في قول الحقيقة دي لامن عوير .. وبتكلم طوالي .. ومابقدر يسكت .. احتمال يقول لابوها بتك دي مامحترمة انا ماعايزها ..

عمك مصطفى حسه بالحكاية دي .. من شكل خدر .. الوش الصبوح من الوضوء .. وعلامة الصلاة .. كلها علامات بتوضح انو خدر زول متدين .. عمك مصطفى شعر فعلا انو الولد ده ممكن يرفض البت لو جات بي شكلها بتاع الصباح ..

قام دخل جوه .. وقال لامها البت دي لسع ماجات؟ قالت ليهو ماجات .. في شنو انت يامسطفى؟؟ ودمنو الجا بيغادي؟؟ قال ليها بعدين بكلمك .. هسي انا داير اتصل على رغد ..

طلع التلفون وضرب ليها .. رغد انتي وين؟ وليه اتاخرتي؟؟ قالت ليهو في شنو يابابا؟ انا دوبك طلعت من الجامعة .. وجاية على البيت ..

قال ليها اسمعي .. ماتجي داخلة بالباب الكبير .. تعالي بالباب الصغير .. انا بجيك جوه عايز اقول كلام .. بس انا معاي ضيوف وماعايزهم يشوفوك ..

قالت ليهو .. الله؟؟ يابابا.؟ !! ده كلام شنو ؟؟ انا مالي لو شافوني .. هاربة من العدالة؟ قال ليها الله يرضى عليك يارغد ماتناقشيني .. لمن تجي بحكي ليك .. قالت ليهو اسفة .. الا توريني في شنو بالضبط ..