الفصل الأول

انتي عارفهه عملتي فيني شنو ي أمي؟انتي رميتيني في النار وجهنم بي يدك ي امي، انا في البيت داك كل يوم بموت الف ميته، انا عايشهه في جحيم، انا بقابل طبيب نفسي وعايشه على المهدئات وحبوب التنويم وبقيت مدمنه عليها وبقت م عندها ااي مفعول في جسمي، جيبي يدك ي أمي شوفي عيوني دي؟أهبشيها شايفه السواد الحواليها دة؟دة بسبب عدم النوم انا، انا م بقدر انوم من حاله الخوف الأنا داخله فيها، لو جات ريشه سااي طايرهه من قدامي انا بفقد اعصابي، انا تعبانه ي امي تعبانه بجد بقى ماف شي بحسسني بالأمان في الدنيا دي حتى حضنك الأنا حاليا فيهو دة م حاسه فيهو بالأمان انا ي أمي..، م تبعدي، م تبعدي مني، غطيني ي أمي انا بردانهه بردانهه شدييد حاسهه بنفسي هموت...

❖

بسم الله بعد غيبهه إشتقناا ياخ

"في حياتنا في حجات كتيرهه نحن بنكون عاملين ليها الف حساب وهي بالنسبه لينا جواهر بتلمع من بعيد علشان كدة دايما بتكون عندها الأولويه في حياتنا ولو بإمكانا نعمل ليها محميهه خاصه بيها هي وبس، والحجات دي عادي ممكن تكون كائنات، وبما انهم جواهر الشي الطبيعي انو نحن نخت كل ثقتنا فيهم وم نعمل اي حساب لكل خطوة بتتخطي مننا تجاهم وم نتوقع منهم إلا كل خير، بس احيانا زي م بقولو "تأتي الرياح بما لا تشتهي السفن ودة تماما الحصل مع شهد... "

انا زولهه في البدايه ممكن تقولو علي مرحه لحد ما، طموحه، مثابرهه وعندي حدود لكل شي في حياتي، عارفه انا بعمل في شنو ومتين ووين بالظبط، إنطوائيه نوعا ما م بتعامل مع اي زول وم اي زول بكون عندو زاويه في حياتي، أمي وابوي منفصلين، وعندي تلاته اخوات إتنين اكبر مني وواحدة صغيره"براءة، ملك، أليف"، امي هي المتحمله مسؤليه تربيتنا، شغاله مع واحدة بتاعه كوافير، ومأجره لينا بيت فيهو حوش صغير وغرفه واحدة ومعاهو مطبخ ومظلهه اهو حالها حال اي مره متزوجه ومطلقه لازم تتحمل مسؤليه تربيه أولادها بنفسها لأنو ادم السوداني معروف بنسبه 80%إنو لما يطلق المرهه بطلق معاها اولادها وبرمي عليها كل المسؤليهه معظم النسوان في البلد دي بعانو من الحاجه دي للأسف، وكأي ام الله م رزقها غير بالبنات ومتحمله مسؤليتهم وبتعافر في الحياة دي عشانهم براها الشي الطبيعي انها تكون شويه صعبه وصارمه وإتجاها واحد علشان علشان م يضيعو من يدها...

وانا في عمر ال 11 سنه في يوم براءة اختي الكبيرة جات البيت ومعاها صحبه امي واساسا هم لما طلعو طلعو مع بعض، وصحبه امي دي اساسا انا م بحبها بحسها استغلاليه وماكله راس امي، والغريبه امي بتسمع كلامها، وهم داخلين سامعه وجدان صحبه امي بتقول لي براءة"دسي التلفون دة في شنطتك حقت المدرسه وم توري بيهو زول عارفه امك انتي صح"انا من الفضول طلعته من المظله الكنت بلعب فيها وبقيت اعاين فيهم، وجدان قالت لي شهودة ازيك امك ماف؟هزيت ليها راسي قولته ليها هئهه ماف، قالت لي طيب الحقينا بي مويه بااردة كدة عليك الله سمح؟

براءة قالت لي ملك وين؟وأليف نامت؟قولتها ليها أليف نايمه اي وملك طلعت البقاله، قالت لي اتغديتو؟قولته لي ااي، قالت لي اها زاكرتي قبل م تجي تلعبي؟

وجدان قالت ليها ي بت ها انتي شايله همهم مالك زي التقول امهم؟والله امك زاتها م بتسألهم الإسإله دي مالك مالهم، وضحكت، براءة قالت لي خلاص اجري جيبي مويهه يلا

وجدان صحبه امي دي اساسا اهلها كانو م في الخرطوم، بس جات قاعدة مع اختها في بيتها نظام الجامعه وكدة بس اغلب وقتها بتكون في بيتنا، ، ، وبراءة اختي ي دوبها ممتحنه تامنه يعني صغيره ومراهقهه ولا مقارنه بيها، بس بس إستغلت حته انو امي أغلب الوقت بتكون في الشغل دي وبقت صحبه براءة وانا عارفه انو براءة عندها تلفون، وبعدها ملك عرفت وسالتها الجاب ليك التلفون دة منو ي براءة؟

براءة قالت ليها لقيتو واقع، ملك قالت ليها والبتتكلمي معاهو دة برضو لقيتي رقمو واقع؟والله م تقولي الحقيقه بكلم ليك امي اقسم الله، براءة ساقت ملك ودخلتها الغرفه واتكلمت معاها مساافهه بعدها جو طالعين، براءة قالت لي شهد اوعى تكلمي امي سامعه مش انا صحبتك؟ملك قالت ليها اسمعي ي براءة علشان م تدخلي نفسك في متاهات سااي انتي استشيري امي، براءة قاطعتها قالت ليها انا؟بري انتي عارفه امي ممكن تموتني عارفه ولا م عارفه؟ملك قالت ليها في كل الأحوال حتموتك انتي فاهمه الحاجه دي؟مشيتي وجبتي التلفون من زول غريب م بتعرفيهو ودخلتيهو البيت دايراها تعمل ليك شنو مثلا؟براءة قالت ليها والله صحي كلام وجدان ي ريتني لو م حكيت ليك

ملك قالت ليها اصلا وجدان دي هي الحتغطس حجرك بس انتي حره اقعدي باريها لي كويس في عمرك ولا في عمرك هي زاتها؟وفضلو يتناقرو فجأهه امي جات داخله قالت ليهم مالكن بتتناقرن زي الضررات؟براءة فضلت مقلعه عيونها وملك بلعت لسانها وانا بقيت اعاين ليهم، امي قالت ليهم في شنو مالكم؟براءة قالت ليها ماف اي شي ي امي ماسكه كتابي بسمع قالت لي م تقري بصوت عالي بس، امي قالت ليهم البيت دة م واسع انتي ي ملك امشي اقري في اي مكان خلي اختك تقرا هنا هي ممتحنه، ملك عاينت ليها بي غيظ وسكتت،

بعد اليوم دة براءة اختي بقت تتمادى ويومي بتتكلم بالتلفون وبتطلع مع وجدان والكلام دة، لغايه في يوم انا مشيت معاها بيت ناس خالتي هم م بعيدين مننا مسافه بالرجول بتتمشى، والزمن إتأخر طلعنا من هناك بعد أذان العشاء، ونحن راجعين فجأهه براءة تلفونها إتصل ردت وقالت"اي طلعته وين انت؟طيب اسرع لانو الزمن إتأخر شديد امي بتشاكلني لو جات لقتني ماف"وقفنا، قولته ليها نحن منتظرين شنووو؟قالت لي انتظري شويه بس، فضلنا واقفين ربع ساعه تقريبا بعدها جاتها مكالمه وقالت الركشه الجايه دي؟طيب تمام"مسكتني من يدي وقالت لي تعالي مشينا خطوتين وقفنا جات ركشه وقفت نزل منها ولد سلم عليها وعليها وقال ليها اها الرصه شنوو؟قالت ليهو حنمشي البيت، قال ليها يااخ انا جاي ألايقك عشان تقولي لي ماشه البيت كدة تعالي ومسك يدها وجراها، طبعا انا مع مسكتو ليها دي خوفته، ركب الركشه وركبها معاهو، قالت ليهو وشهد؟قال ليها انتي جايباها معاك لشنو؟طيب خليها واقفه هنا ناخد لينا لفه بالركشه ونجي راجعين نسوقها، براءة قالت ليهو لالا الدنيا ليل م بقدر أخليها براها واقفه هنا، سواق الركشه قال ليهو المكان دة زاتو م ضمان ي صحبي ارفعها معاكم، الولد قال ليهو طيب، ركبته معاهم، السواق قال ليهم اوديكم وين؟الولد قال ليهو خليك لافي بس في الشوارع دي امشي اي مكان، اتحركنا وي ريتني م ركبته معاهم عن كميهه القرف الأنا شبه شوفتو، براءة أختي مخليه الولد يعمل معاها حجات غلط وببوس فيها وحجات كلها مقرفهه وانا راكبهه جنبهم ولا كاني موجودة

وحتى م قدرته افتح خشمي أقول ليها لا او م تعملي كدة، أو، او، او، اي نعم يمكن كنت صغيره بس الغلط دة معروف غلط حتى لو اتعمل قدام طفل عمرو ساعات بس، بعد م خلصو من القرف البعملو فيه دة وصلونا شارع البيت نزلته وانا ماشه مستعجله وهي بتتكلم معي وبتقول لي "شهد انا بعمل ليك اي حاجه دايراها بس اوعى تكلمي امي فاهمهه"شوفتو احساس القرف؟وهي أختي والكبيرهه كمان ههه؟قرفتني منها، قولته ليها انا لو وصلته البيت بحكي لي امي اااي حاجه حتى التلفون العندك دة بكلمها بيهو اصبري بس، دخلته البيت لقيت امي م جات وبراءة على طول دخلت الحمام، بغض النظر عن كل حاجه بس لما حاجه زي دي تحصل قدام بت في عمري او طفل دي في حد زاتها حاله نفسيهه، انا نمتهه اليوم الاول عدة واليوم التاني صحيت من النوم لقيت براءة مجهزة الشاي لي امي وبتتكلم معاها ومعاهم ملك، براءة قالت ليها امي؟

امي قالت ليها ايوة ي بت، براءة قالت ليها في واحد قال داير يجيب لي تلفون، ، ،

امي قالت ليها واحد منو؟وعرفتيهو من وين ومتين؟انتي بت متين لمن بتتعرفي على اولاد وبتشيلي منهم تلفونات؟وكيف يعني واحد؟هو ابوك ولا اخوك لمن يجيب ليك تلفون؟براءة قالت ليها اتعرفته عليهو في حفله في نادي الضباط يوم مشينا تخريج ناس خالتو علويه، امي قالت ليها اسمعي هنا ي بت لا واحد ولا عبد الظمبار انا قله ادب البنات دي م بتنفع معي فاهمه ولا لا؟اوعى تدخلي لي تلفون ولا غيرو في البيت دة ولا تجيبي لي سيرة واحد ولا غيرو عشان م اكسرك فاهمهه ولا لا؟براءة قامت مشت، انا من الخوفه بتاعه ردة فعل امي لمن شعر جسمي غزز، لأنو امي م عارفه راجيها تعرف كتيير عن فعاايل براءة، ملك طلعت لحقت براءة وقالت ليها "شايفه كلام امي؟انا حزرتك م بتسمعي تحزيري رجعي التلفون دة لسيدو، انا الصباح مشيت المدرسه وفي الرجعه غشيت خالتي ومشيت حكيت ااي حاجه عملتها براءة اختي حتى قصه الركشه حكيتها ليها، وخالتي م قصرت مشت حكت لي امي والقيامه قانت، تقريبا الضرب الإنضربتو براءة اختي سجين م إنضربو، لمت فيها امي ومعاها خالاتي التلاتهه حتى وشها دة كلو جرحو ليها حتى من غير مبالغه واحدة من خالاتي حلقت ليها شعرها بالموس، ، ، انا بعد م شوفته حاله براءة البقت عليها قلبي إتقبض لأني حكيت، إفتكرته خالتي حتمسكها على جنب وتتكلم معاها م اتوقعته يعملو فيها دة كلو، م عارفه وقتها تصرفي دة هو كان صح ولا غلط بس لو م اتكلمتهه واثقهه انو براءة هتتمادى، قفلوها في غرفه براها وامي حالفه البتدخل ليها مننا هتموتها ولا حتى كوز مويه م مفروض نحن نناولو ليها، كلنا بقينا عاملين حسااب، في يوم الصباح امي قالت لي ملك امشي ودي لي اختك دي الشاي خليها تتحنطر، ملك شالت الشاي ودتو ليها اول م فتحت باب الغرفه لقتها ماف، جات قالت لي امي "براءة ماف في الغرفه ي امي"امي قالت ليها كيف يعني ماف؟مشت على الغرفه لقتها بالفعل ماف، بقينا نفتش في البيت ماف ليها اثر واساسا بالليل كانت قاعدة، عاينته بإتجاه حيطه الشارع كان فيهو اثر قولته ليها ملك عايني جنب الحيطه؟ملك عاينت قالت لي امي أبشرك ي امي بتك هربت، ، امي بقت تتجارى يمين وشمال وتقول "هربت؟هربت مشت وين؟مشت وين بت الراجل دي؟لبست توبها وطلعت الشارع، اليوم داك فتشنا م خلينا محل، وامي مشت فتحت بلاغ، بس للاسف في حاله زي م حيقدرو يساعدوها، عدينا فترة ونحن حالنا حال وامي واخواتها بفتشو كل الأركان كل زول متوقعنو تمشي ليهو سالوهو، عدت 6 شهور لا حس ولا خبر، ملك قالت احكي لي بابا، بالرغم من انو م سائل مننا وم جايب خبرنا بس براءة دي أقرب زول ليهو يمكن تكون معاه اسي، بالفعل اتصلت عليهو وحكت ليهو الحصل، بابا إتنفش وقال امي تتحمل المسؤليه وانو هو هيشتكيها وهياخد حضانتنا منها لأنها م مسؤله و...سمع امي كلام فارغ كتيير، حاله امي بقت تبكي الكافر وظروف شغلها بقت زفته شديد وعليها حق إيجار البيت ومصاريفنا و...إضافه لي شغلها الشغالاهو بقت تعمل طعميه وإسكريم والكلام دة لأنو بدخلو ليها زيادة قروش، في يوم جات من الشغل بدري وكانت تبكي شديد حتى نحن خوفنا قولنا الا لو حاصله عليها حاجه، سألناها الحاصل شنو؟م اتكلمت، شويه كدة جات وجدان سمعتها بتحكي ليها وبتقول"براءة إتصلت علي وقالت انو هي كويسه ومرتاحهه وانو هي تاني م عايزة ترجع البيت والعيشه دي، قالت انا غير الفقر وعيشه النكد م عندي شي، انا ي وجدان معيشهه بناتي في فقر؟انا مقصره منهم في شنو لمن تمشي تجيب لي تلفون ولد من بره؟انا ألحق لي أكلهم وشرابهم وقرايتهم ولا لشنو بالظبط؟انا الليله اليوم دة عندي سته شهور عيوني دي م شافت النوم زي الخلق وهي ضاربه تقول لي انا مرتاحه وتقفل الخط في وشي؟"وجدان قالت ليها بتك دي قليله ادب ي سوسن انا كلمتك ياما نصحتها واتكلمته معاها لكن براءة بتسمع كلام زول هي؟خليها الشارع المشت ليهو دة ان شاءالله يضوي ليها، امي قالت ليها والله ي وجدان انا م في يدي لا حول ولا قوة بس كان صحي انا في الدنيا دي ربنا داير يبتليني ويمتحني؟ابتلاني بالبت دي، اسي انا في ظروفي دي كان قعدت حضنت لي اخواتها ديل وخلت لي بالها منهم ماالها ي وجدان مالها كان وقفت معي بس؟

انا والله من اللحظهه دي خليتها للواحد الأحد والله زي م بقولو الجنى بتلدي لكن م بتلدي قلبو بس عوضي في اخواتها ديل ...

بابا م أخد اي خطوة تجاه موضوع براءة اختي او م أداهو اهميهه اساسا كل مشكلتو كانت مع امي وحملها مسؤليه الموضوع وبقو لينا عباره عن نكد ومهاترات وبس وهو اساسا عايش حياتو بالطول والعرض ومتزوج بدل الواحدة تلاتهه، عدة الموضوع على كدة وعدت كم سنه حالتنا مشت لي اسوأ وبقينا نطلع من ضيق معيشهه وندخل في ضيق معيشه، إتلمينا مع ناس حبوبه وسكنا مع بعض علشان امي حق الإيجار بقى عليها صعب شديد ي دوب بقت تقدر تدخل حق أكلنا وشرابنا، بس برضو حتى ونحن في بيت ناس حبوبه كانت حياتنا لا تخلو من المهاترات والنقاشات، امي على قدر م هي صعبه معانا بس طيبانه شديد وهي أكبر أخواتها، بس اخواتها في معاملتهم ليها كأنها م اختهم الكبيرة، مستغلين النقطه بتاعه انها طيبه وسكاتها عليهم ودي اكتر نقطه كانت شبه بتقهرني، بس كنا مجبورين نتحمل علشان م عندنا خيار تاني وزي م بقولو المافي إيدك بكيدك، عدت علينا ايام أسود من الليل جوع، مرض، حياة مقرفهه شديد، عادي كنا بنمشي المدرسه بدون مصاريف وبنرجع وناكل وجبه واحدة في اليوم او في اليومين وجبه، وعادي حتى في العيد السعيد دة الناس كلها بتلبس جديد نحن عكس الناس، خالاتي بالرغم من انو وضعهم ووضع رجالهم كان كويس شديد بس بالكتير لو فكرو واحدة مننا بفكروها بي نعال بس م اكتر دة في حاله فكرونا، بعد فتره فجأهه امي جاتها فرصهه بتاعه شغل في كوفير في قطر، امي م اترددت مشت طلعت جوازها م كان هاين عليها تخلينا ونحن بالحاله دي بس برضو مجبورة تخطي الخطوة دي علشانا، وبالفعل سافرت، وبعد سفرها وضعنا شبه إتحسن من اول شهر رسلت قروش، مدة العقد بتاعتها كانت سنه، بعد تمت سنه رجعت وماشاءالله ربنا فتحها عليها بجد، بعدها إقترحت علينا نرحل ونسكن برانا افضل وبالفعل دة الحصل لانو امي رجعت وعندها فكره تفتح ليها مركز تجميل، حتى ناس حبوبه م متخيلنها ترجع بالقدر دة من القروش، أجرت لينا بيت كويس وسمح سماحه م كنا بنحلم بيهو و أمورنا بقت أحسن من أحسن بكتيير، الحمدلله وبعد سنتين ملك اختي إمتحنت شهادة سودانيه ودخلت هندسه معمار، وانا السنه البعدها إمتحنته ودخلته مختبرات، وانا في نهايه المستوى الأول، في يوم بنتونس ملك قالت لي طبعا ي شهد لادن صحبتي بتحب ليها واحد في السجن اسي عندو تقريبا 5 سنه، قولته ليها جنت بتحب في المساجين المجارمه من عدم الرجال يعني؟قالت لي انتي اسي شن عرفك انو مجرم؟والله مسجون ظلم ياخ ي حليلو، قولته ليها ليه مالو؟

قالت لي "متهمنو انو كتل خالو، وهو اصلا م كتلو ولا اي شي، قولته ليها لا حولاا خالو مره واحدة؟ولشنو يعني؟قالت لي مشكله بتاعه قروش م قروش بس، قولته ليها كان كدي بكون كتلو اصلا الواحد عشان القروش بعمل ااي شي ه، قالت لي والله ي شهد كان شوفتي سمح سماحهه وبعليي منو، قولته ليها وعلشان سمح عشان كدة انتي زعلانه عليهو يعني؟اصلا قلهه الادب والتفاهه م بتجي الا من السمحين ديل، قالت لي والله م كدة، اساسا هو ابوهو متوفي ومخلي ليهو ورثهه جد، بس أهل امو طماعين ياخ وخاتين عينهم على حق ابوهو، واصلا هو لما إتناقش مع خالو واتشاكلو قبل تلاته شهور من خالو يموت، بعد مات شرحوهو لقو عندو قال شق في الراس ولا حاجه بالشكل دة المهم ضربه وحبوبتو قالت دة هو بس الضربو وم بتخليهو إلا يتقاضى، قولته ليها طيب وصحبتك متواصله معاهو كيف وحارساهو لشنو يعني؟قالت لي اتحاكم والله م لاقين ليهو ادلهه بس ادوهو سبعه سنهه يخخ مضت منها 5 وشويه تقريبا غايتو م متأكدة لكن فضل ليهو لسه مدة في السجن م كتيرة شديد، المهم هو بتصل عليها من جوة السجن والله ي شهد كان شوفتي بحبها حب، كل م يتصل عليها تتكلم وتبكي ي حليلها كاسرهه قلبي، قولته ليها اييييييهه على الزمن وجمالو زكرتيني مسلسل سجين الحب بتاع هنادي وسعود فوزي، احييهه من سعود فوزي لما يقول ليها أنسهه هنااادي"باللهجهه السعوديهه"وبعلياااهه منو هو زاتو يخخ

ملك بقت تعاين لي بي غييييظ وقهر كدة قولته ليها طيب نرجع لموضوعنا ئهه هي زاتها م عندها موضوع سااي حارسه ليها واحد مسجون وكمان متهم بجريمهه قتل أيعقل؟"بصوت محمد هنيدي" تاني رجعت حمر ت لي كدة واصلته وقولته ليها إحم إحم والله بكره يطلع يعرس بت عمو او يلقى ليهو صاروخ يبقى عليها م عارفه إنو ادم السوداني لقبيله اسمها المستكلبين؟

وطبعا هو حيكون أكلب نوع صدقيني انا سيرسلي بتكلم معاك من ناحيهه واقعيهه خليها تشوف مصلحتها وين والله بكره تتحول من وردة مفرهدة وكلها حيويهه لي جرجيرهه ناشفهه، ملك قالت لي والله في الحياة دي ماف زول جينات المستكلبين بتجري في دمو غيرك انا اصلا غلطانه البجي بحكي ليك خصوصيات صحباتي، فجأهه الباب دق، ملك قالت لي امشي افتحي، قولته ليها انتي مالك محننهه؟تاني دق كتيير، قالت لي شهد هنتعازم على فتح الباب امشي افتحي ياخ، قولته ليها تف عليك وبعدين الحيوان الفي الباب دة بغلبو الصبر مشيت وانا بطنطن وحالفه افتح الباب وامسح بكرامه البدق فيهو بلاط الأرض، بس أول م فتحته اتفاجأ ليك بي كميهه بتاعه عساكر بي كلابهم واقفين في الباب، قولته ليهم في شنووو؟؟واحد منهم لزاني بكل قوتو و قال ليهم يلا سرعه خشو فتشو البيت دة م تخلو لي فيهو ركن الليلهه دة ي صابت ي خابت ...

نتلاقى®