الفصل الخامس

قالت ليهم م لي انا ي السجم للسجم دي وأشرت بصباعها علي، طبعا انا بشرب في المويه إتشركتهه وبقيت اكح، زمررد قالت لي شهد ليليان قالت ليها واي م بصدق ملك قالت ليهم لا صدقو واحد من اصحاب راجل لادن قال شاف شهد يوم العرس واظن صورها او حاجه بالشكل دهه ومن هم في شهر العسل ماعطهم قال ليهم انا داير البت دي عجبتني زمرد قالت لي ي شهد ي بت أم المحظوظهه احيهه انا دة زي هدف ميسي في الدقيقهه ال 90 ليليان قالت لينا انا خلاص يئستهه تاني م بتعب اخسر قروش في نفسي علشان اي عرس زول

قولته ليهم انتو اخسرو القروش ظي في تفسكم علشان نفسكم م علشان زول وبعدين شنو شافني وصورني وعجبتو وقال عايزني لا طبعا م هوافق بيهو وبعدين انا لسهه م زوله عرس ولا حاجهه، زمرد بقت تعاين لي بغييظ، ليليان قالت لي قالو ليك كابتن طيران قولته ليهم ئهه ويعني؟ملك قالت ليهم عايزة تبقى تقيله من جوة هتكون طايرهه خلصنا عشاء وفضلنا نرقي نرقي في نفس الموضوع لغايه م رجعنا البيت، الصباح ملك حكت الموضوع لي امي، امي قالت ليها والله صحي حظ القبايح قولته ليها اها القبايح ديل زاتهم م دايرين يعرسو ها

امي قالت لي ي بت هاا دي فرصه م بتجي مرتين شوفي الزول اذا بنفع معاك او لا م تقفلي الباب في وشو على طول كدة، قولته ليها امي انتي عارفه انو انا م بفكر في العرس اسي وكلامي واحد، ملك قالت لي ي شهد ي عويره دة كابتن طيران وفي الإمارات يعني الف مين بت هتكون واقفه في صفو، مشيت الغرفه وقفلتها م رديت عليهم، ملك قالت لي امي والله بتك دي بتكفي نعمتها بيدها اسي زول زي دة في الحلم م كان بجيها ي امي، امي قالت ليها خليها دي مجنونهه ساي، ، بعد اسبووع ونحن بنتغدا فجاهه تلفون ملك ضرب، ردت قالت "لدونتي خبرك، الحمدلله تمام، طيب، والله ي لدن م عارفه اقول ليك شنو بس شهد قالت شايله فكره العرس دي م راسها، اي متخلفه والله كلمتها قولته ليها لو م عايزاه امسكي بيهو زمن يمكن ينفع معاك وتتأقلمي معاهو لكن انتي عارفه شهد وعولاقها، هاك اتكلمي معاها انتي بزات نفسك، ادتني التلفون قولته ليها لدونهه، قالت لي ي بت ي متخلفهه، ضحكته، قالت لي م تضحكي ي بت دي فرصه م بتتعوض الجاياك مرتبه من الله م تجوطيها براك ياخ والله الولد متمردغ فيك مردغه السواد م خلانا نتهنى بشهر العسل حقنا زاتو

قعدته اضحكك قولته ليها والله ي لدن انا م نفسي اكذب عليهو ولا نفسي في الوقت الحالي دة ادخل في علاقه بغض النظر عن نوعها فاهماني انتي؟قالت لي شهد م قادرة اصدق ي بت انتي م جادة؟ قولته ليها جادة والله ي لدن قالت لي عمري م لقيت زول بقفل باب رزقو بي يدو متخلفه هطله عويرهه يلا اقطعي وشك دة هو زاتو إتكسر فيك بأي زاويه م عارفه

ضحكته قولته ليها دة المحيرني زاتو ي وسخهه يلا سلام، عدت فترة وانا جامعتي فتحت بقيت ممعوطه مع الجامعه وبس، في يوم جمعه صحيت لقيت أليف مشغله ناشيونال جوغرافيك قعدته احضر معاها في فيلم وثائقي حق سجناء كدة، جات ملك قعدت معانا شويه كدة قالت لي دة ملامحو قريبه من حبيب لادن المسجون داك، قولته ليها هو بالله لسسه مسجون؟شعورو كان كيف لما عرف انو لادن اتزوجت حيهه بقو عليهو عذابين ي حليلو

قالت لي زكرتيني كدة اسال منو واحد ود اهلو انا متواصله معاه كان عرفتني عليهو لادن، دقيقه ارسل ليهو في الفيس، ، ، المساء الولد ضرب ليها، اثناء م بتكلم معاها ملك قالت "لا والله ماف شي بس فجأهه خطر على بالي قولته اسأل منو بس ه، كيف؟لا والله لادن م عندها علاقه بالموضوع دة وبعدين هي اتزوجت يعني خبرو م جايباهو والله

، احلف ليك بشنو ي ود الناس ه، طيب تمام، مبروك يااخي ربنا يسهل طريقو إن شاءالله ي رب، والله إتظلم يااخ بس ربنا يعينو وينسيه كل قاسي، انا والله قبيل كنت بحضر في فيلم وثائقي في ناشيونال جوغرافيك عن المساجين المظلومين وكذا فخطر على بالي قولته اسال منو دي كل القصهه ه، الحمدلله ي سيدي

بعد م خلصت، قالت لي واي ي حليلو، قولته ليها مالو؟قالت لي مطلعنو يوم الجمعه قال كدة، قولته ليها هيكون منتظر على أحر من الجمر ه، قالت لي والله الزول لو قعد في السجن يوم واحد بموت خليك سبعه سنه وظلم كمان يااخ، قولته ليها يلا ربنا معاهو اكيد ربنا م هيظلمو وزي م قال "وبشر الصابرين"قالت لي فعلا يمهل ولا يهمل

في يوم امي جات راجعه البيت بدري حتى ملامح وشها متغيرهه انا حسيت بيها اول م جات م طبيعيه، اديتها مويه وخليتها ترتاح شويه سألتها ي امي مالك في شنوو؟قالت لي سميه صحبتي طفشت، قولته ليها ه وم تطفش كان طفشت يعني شنو؟قالت لي سميه انا مدياها قروشي ومستلفه ليها 400 مليون من ناس انا بعرفهم وانا كان عندي 600 مليون نصهم حقات صندوق ونصهم حقاتي خاتاهم بعيد لليوم الأسود اديتهم ليها لأنو قالت محتاجاهم شدييد وعندها قطعه ارض بتجيب 5 مليار اول م تبيعها بترجع لي القروش وانا على الأساس دة اديتها كل العندي واسي تلفوناتها مقفله وم باين ليها اثر لما مشيت سألته اهلها قالو سافرت القاهرهه عندها كم يوم، وم عندها اي قطعه ارض ولا يحزنون وانا اسي الناس واقفين لي في العزيزة دي دايرين قروشهم وفي إتنين إشتكوني الليله جابو لي امر قبض طلعته بكفاله، قولته ليها واي ي امي متين الكلام دة؟ولييه م كلمتينا؟قالت لي عندو فترة، م حكيت ليكم لانو م متوقعه دة يحصل، قولته ليها خالتو سميه معقوله تعمل فيك كدة؟قالت لي دة الحاصل ي بتي اسي الانا الشي الأعملو والله غلبني عديل، قولته ليها طيب شوفي صحباتك وديل يمكن يقدرو يساعدوك، قالت لي انا قروشي م مشكله، انا مشكلتي ال 400 مليون دي اسددها من وين وانا في يدي مافي ولا فلس، قولته ليها والله دي مشكله ي امي، قالت لي ربنا يحلها إن شاءالله،

بعد فترة طويله من الراحه وقعنا في المشكله دي وم عارفين نقول ي منو، بقينا قاعدين على اعصابنا ومتوقعين تحت اي لحظه يجو يدقو لينا الباب ويقولو عايزين امي، وبالفعل دة الحصل في يوم امي طالعه ماشه المحل بتاعها وقفت ليها عربيه قالو ليها سوسن؟قالت ليهم ايوة، قالو ليها عندك امر قبض اركبي معانا، ودوها القسم ونحن لحقناها، يدينا إتربطت، قولته لي ملك نحن حنعمل شنو ي ملك اسي، حنعمل شنو بس كدة قولي لي، ملك قالت لي م عارفه والله ي شهد، نتصل على ناس خالتو مريم وحبوبه ممكن يساعدونا صح؟قولته ليها لأ كل شي الا الناس ديل م دايرين وقفتهم معانا ابدا كفايه السمعناهو منهم، قالت لي طيب حنطلع امي من المشكله دي كيف ي شهد؟قولته ليها إتصلي براءة واحكي ليها يمكن تقدر تساعدنا، ملك قالت لي براءة عندها كم يوم برسل ليها وحكيت ليها المشكله كلها وقالت لي برسل ليك بكره، بس لي اسي لا رسلت ولا ردت على رسايلي وبتقرا الرسايل وم بترد، قولته ليها بي زهجهه كيف يعني م بترد امها واقعه في مشكله زي دي وهي مطنشهه دي شنو التافهه دي...

طبعا بعد سنوات من هروب براءة، بعد م امي سافرت الإمارات سفرتها الاولى وجات راجعه بفتره في يوم امي تلفونها دقهه نص الليل امي ردت "الوو السلام عليكم، امي قالت وعليكم السلام، حصلت لحظه بتاعه صمت غريبه بعدها جاها صوت بقول امي انا براءة، امي قالت ليها بلهفه براءة؟ وين انتي؟ الحاصل عليك شنو ومالك بتبكي نص الليل دة الحاصل عليك شنو؟ براءة قالت ليها امي انا واقعه في مشكله وعايزة قروش اسي، قالت ليها مشكلهه؟مالك ي بت في شنو مشكله شنو الواقعه فيها وين انتي اسي؟قالت ليها انا في قسم الشرطه اسي في زول عايز مني قروش واسي قافلني هناا، قالت ليها لا حول ولا قوة الا بالله، في اي قسم انتي اسي؟

اثناء م امي بتتكلم جات دقت باب غرفتي ومشت دقت باب غرفه صحتنا، طبعا صحينا مخلوعين بقينا نسالها في شنوو، قالت لينا قومو ارح اختكم دي قالت مقفوله في قسم ال...قولته ليها اختنا منو ولشنوو؟قالت لي براءة حتكون منو؟ملك قالت ليها براءة في السجن؟يعني هي عايشه في السودان دة؟امي قالت لينا بطلو الرغي الكتير اللبسو ارحكم نلحقها، امي طبعا مستعجله بقت داخله ومارقه في كسسر من الثانيه لبست توبها وطلعت، قالت لي شهد، قولته ليها ايوة، قالت لي انا اسي م عندي ولا فلس جيبي سلسلك الدقيتيهو داك خلي نمشي كان لقينا ليهو طريقه بيعه نبيعو ان شاءالله بس القروش م تكون كتيرة، قولته ليهو طيب اصلا لابساهو في رغبتي طلعتو اديتو ليها، قالت لي خليك انتي مع اليف انا وملك بنمشي نشوفها ونجي راجعين تمام؟قولته ليها طيب، اتحركو مشو، طول الليل فضلته صاحيه ومقلقه عليهم وكل شويه بتصل على ملك بتقول لي لسهه ي شهد، ااخر حاجه قالت لي الا بكره الصباح نحن حنبيت هنا في القسم وحنبيع السلسل الصباح وندفع القروش ونكفلها وكدة، قولته ليها طيب، اليوم التاني جو راجعين حوالي الساعهه 11 صباحا، اول م الباب ددق جريت فتحتو ليهم اصلا عيني م غمضت طول اليل، امي وملك دخلو بعدهم براءة، طبعا انا اخدته حكايه بتاعه 5 دقايق بالقليل علشان استوعب انو دي براءة اختي بالفعل، شكلها اتغير توتلي من لما طلعت مننا او يمكن الفترة طالت شديد، كاانت لابسه بنطلون وقميص ضيق، وحالقه شعرها مقصراه شديد، يعني هياتها صدمتني بجد، من غير م احس لقيت نفسي حاضناها وببكي وهي بقت تبكي وامي وملك كلنا قلبناهو بيت بكى، بعدها دخلنا البيت، امي قالت لي طلعي ليها حاجه تلبسها وخليها تستحمى، قولته ليها طيب وعلى بال م ترتاحو حجهز ليكم حاجه تاكلوها، ملك قالت لي انا بس تعبانه م نفسي في شي عايزة انوم، مشت دخلت غرفتها وبراءة دخلت مع امي غرفتها، شالتهم نومه م صحو الا قريب للمغرب، جهزته ليهم الأكل اكلو وبعدها اليف كانت واقفه بتعاين لي براءة، طبعا عاينته ليها إتفاجأتهه بي وشم بتاع قلوب مرسوم في يدها ولونو اخدر لمن مقرف، براءة قالت لي الييف، لوفتي م عرفتيني؟ تعالي كدة، اليف مشت ليها قعدت جنبها براءة ضمتها وبقت تتونس معاها، امي قالت ليها اسي ي بتي السنين دي كلها انتي عملتي فيها شنو بس كدة وريني؟براءة قالت ليها شغاله انا ي امي شغاله، بس مرتبي المره دي إتأخر شويه وبتاع الشقه جاط علشان م دفعته ليهو وعمل الدراما دي كلها، امي بقت تعاين ليها من فوق لي تحت نظره غضب كدة قالت ليها شغاله شنو انتي؟قالت ليها مديره علاقات عامه في شركه اجنبيه، كل فتره بتجيني سفرة في بلد بمشي، فجأهه ملك قالت ليها دي انتي في الشغل وااو فظيعهه، براءة قالت ليها اي انا هنا في المكتب، وهنا مع زملائي الخواجات في الطيارة كانت عندنا رحله، وهنا في... بقت ماسكه التلفون وبتشرح ليها وامي وانا بنعاين ليها، المساء وانا طالعه من المطبخ شايفه ملك ماشه بسرعه على البلكونه، م ركزته معاها كتير، شويه كدة بقيت شامه ريحه سجاير وعلى حسب هوا المكيف بشفط كل شي الريحه ملت البيت، مشيت بإتجاه اليف م مشت، لقيت براءة واقفه في البلكونه ومعاها اليف وبتشرب في السيجارة طبعا اتخلعتهه لمن جاتني دوشه، بعدها طفتها وقالت لي اليف وينها اللبانهه؟الليف قالت ليها هاك انا شلته واحدة، براءة قالت ليها لو عايزاها كلها تشيليها انتي حبيبتي

رجعته مطبخي وراسي بقى يودي ويجيب معقوله براءة اختي دي بقت بالسؤ دة؟سجاير ووشم ولبس اوڤر دة شنو العاملاهو في نفسها دة؟اليوم التاني براءة لبست من ملابس ملك وجهزت نفسها زيين وشالت شنطتها وقامت طالعه، امي فضلت تحنس فيها وتتكلم معاها كتيير، بس براءة إكتفت بجمله"ي امي انا شغلي بتطلب اني اكون عندي حريه شويه علشان في سفريات بتجي فجأهه وانا لازم اكون جاهزة تحت اي لحظه، وبعدين اسي عندنا رحله مفروض بعد ساعتين اكون في المطار، اسي همشي لي صحبتي في الشغل علشان نطلع سوا لكن اول م أرجع بجي عليكم ان شاءالله دة نظام شغلي كدة وصعب اني اخليهو او اخالف لانو ماضيه عقد وشايله نص الراتب لو خالفته حأتعاقب وحأتمرمط في المحاكم ديل اجانب ي امي، بعد نقاش طويل بينا وبينها طلعت مشت، طبعا امي انهارت زي م انهارت اول مره لما براءة طلعت، بالرغم من كل شي ومن عمايل براءة بس امي قلبها ميال اكتر لي براءة، بتريدها شديد وممكن تعمل اي حاجه علشانها، ، ، عدت فترة وهي بقت متواصله معانا على الدوام، وبترسل قروش لي امي احيانا وكذاا..

نرجع لي مشكله امي الما لاقين ليها حل، ملك إتصلت على زمرد وحكت ليها جزؤ من الحاصل، وعلى طول زمرد جات وجابت معاها ود خالتها صدق ليها الضمانهه وطلعت، مشينا البيت وبقينا محتارين في امرنا نعمل شنو بالظبط، امي قالت للناس يدوها مهله كم يوم بالكتير وحترجع ليهم حقهم، قاعدين وبنفكر، ملك قالت ليها اقول ليك حاجه ي امي ماف حل غير انك تبيعي المحل بتاعك دة بي كل حاجه فيهو شوفيهو بعمل كم اصلا حيعمل قروش كتيره اديهم حقهم بس، امي بقت تعاين لي ملك، ملك قالت لي ولا شنو ي شهد كلامي مش صح؟قولته ليها فيهو شي من المنطق برضو، امي قالت لينا انا برضو فكرته في الموضوع دة م عندنا حل غير كدة، وبالفعل دة الحصل، بس علشان امي كانت في اشد الحوجه للقروش الناس طمعت فيها وادوها ارخص الأسعار، ولما يئست خلاص، باعتو بي 390 مليون، ادت الناس الجزؤ حقهم وفي ناس فضل ليهم باقي قالت ليهم ادوني مهله وبسدد ليكم، عدت علينا فترة نحن انقطع مننا ااي شي حتى حبل الامل الكنا متمسكين بيهو اتقطع، امي مصدر رزقها الوحيد الكانت معيشانا منو اتلاشى، مدرسه اليف قروشها م مسددة كلها، وإيجار البيت دخل علينا الشهر التالت ونحن م سددنا وبتاع الإيجار بقى جايط في راسنا، لما تمينا الأربعه شهور في يوم انا كنت في الجامعه جيت راجعه متأخرهه إتفاجاتهه بي انو عفشنا في الشارع وناس امي ومعاهم ناس بلسم وخالتو عواطف واقفه وفي شويه اولاد بنقلو في العفش وخالتو عوطف كانت بتقول ليهم اي دخلوهو برااحه علشان م يتكسر الله يرضى عليكم ي اولادي، ، ، طبعا انا خلااص هبطتهه وحيلي مات تلقائيا خمنته الحاصل شنو بالظبط، مشيت قولته ليهم السلام عليكم في شنو ي ناس؟امي سكتت، ملك قالت لي بتاع البيت قال قبل كم يوم جا وجاب لينا امر إخلاء ونحن م كنا في علقو في الباب والحيطه واظن ماف زول انتبه ليهو الليله جا جاب الشرطه طلعتنا من البيت واهو حالتنا زي م انتي شايفهه، ، قولته ليهم كدة كملت معانا الحمدلله، خالتو عواطف قالت لي م تشيلي هم ي بتي كل شي بتصلح اصلا الدنيا دي هي كدة يوم ليك ويوم عليك والمر ظة رااقد والله العظيم، بقيت خاته يدي في راسي فجاهه صدعتهه وبقيت بشوف طشاش طشاش، خالتو عواطف قالت لينا يلا ادخلو انا بقيف مع الشباب ديل لمن ينقلو العفش دة كلو في البيت الفاضي دة، دخلنا، بلسم دخلتنا غرفتها وطلعت، ملك قالت لي وااي ي شهد م شوفتي منظرنا وهم بجدعو لينا في عدتنا بره البيت، بس تقولي بيت دعاره اقسم بالله بقت تتكلم وتبكي، قالت لي ولا اسلوب العساكر معانا كان كوم تاني خالص، ولا منصور بتاع البقاله الكان واقف وبضحكك ومبسوط، ووشوش الناس الواقفه وبتتفرج فجأهه الشارع كلو اتملى ناس كل وش زول منهم كانت فيهو شماته وضحك غريب نفسي افهم نحن عملنا شنو في الدنيا دي علشان نعيش ونشوف دة كلو بس

امي جاتنا في الغرفه ومعاها اليف، قعدت في السرير حتى ملامح وشها بقت مرهقهه وهموم الدنيا دي كلها في راسها، قالت لينا اسي نحن حنعمل شنو تاني؟في يدنا بقت ماف حاجه غير انو نرجع امدرمان نعيش مع ناس حبوبتكم لغايه م ربنا يسهل الامور بس، قولته ليها امدرمان م بنرجع ي امي تمام؟قالت لي اها سمح نقعد وين ونمشي وين؟ ونقول ي منو؟الاهل ديل وقت الحارة الزول م بلقى غيرهم حتى لو كعبين عشره بسندوك هم بس، وبيت الناس دة م بنقدر نقعد فيهو فترة طويله لأنو هم زاتهم م ملزمين بينا ولا اي شي، وبعد نقاش طويل امي ساقت اليف ومشت بيها امدرمان لي خالتي رفيدة، طبعا خالتو رفيدة دي هي اخف قدرا من خالاتي التانيات، وبعد اسبوعين لحقناها لانو اصلا راجلها ماف قاعدة هي وبناتها الإتنين الصغار بس، بس طبعا بقولو الزول انت لو م قعدته معاه م بتعرفو كويس، ي ريتنا م قعدنا معاها ورتنا الوش الكعب الألله خلقو، ودة كلو في غضون تلاتهه اسابيع بس حتى م لحقت تستحملنا شهر بقت تصر وشها وم بتعمل اكل خالص بتصحى الصباح بتعمل رز لبناتها بتكتفي بيهو حتى هي انا م عارفاها بتاكل شنو، نحن بنصحى الصباح بننضف معاها البيت واصلا بيتها م بكون محتاج نضاف كتير والكلام دة بس لو م رفعتي ليها ملعقه سااي معناها خلاص حتقلب فيك وشها اليوم كلو، وكل شي في بيتها لازم يمشي بي تعليمات م تفعلو داك وم تتركو داك و...برنامج طويل م ليهو اول ولا اخر، في يوم قالت لي ي شهد اخلطي لينا المنقه دي، شلته الخلاط ركبتو عايزة اوصلو بس الوصله بقت قصيرة والخلاط وقع بس م حصلت ليهو حاجه جات وجاطت وبقت تقول انا امور الحقد والحسد دي اساسا م بتنفع معي وتاني م تدخلي مطبخي، وقلعت الخلاط بكل قوتعا من يدي وقالت لي لأي سبب من الأسباب حجات بيتي بتاعه الكهربه دي م تمسكوها حتى المكوة رفعتها وبقينا نمشي الجامعه من غير مكوى، دة كلو وامي بتقول لينا اصبرو بتفرج إن شاءالله، طبعا انا من النوع العصبي شديد وم بستحمل الحقارة والإستفزاز بس كنت مجبورة علشان امي بتسكتني بي جمله لو دايراني ارضى عليك امسكي نفسكك، ودة الكنت بعملو فعلا، وبراءة اختي ملك رسلت ليها وحكت ليها بالحاصل قالت ليها اطلعو شوفو ليكم بيت وانا بكره المساء برسل ليكم قروش تستلموها وتأجرو، خالتي دي عندها ود حماها بجيها بسلم عليها وبجيب ليهم مصاريفهم وكدة، اليوم داك جا سلمته عليهو وفضلتو وكدة هي كانت مافي، قال لينا طبعا عمتي رفيدة قالت لي اشوف ليكم بيت في اي حته وسعرو يكون مناسب، ملك بقت تعاين لي متفاجاهه لانو نحن م جبنا ليها سيرة انو نحن عايزين ناجر وكدة، قولته ليهو فعلا، قال لي لقيت بيت فيهو غرفه واحدة وحوش ومعاهو حمام بي 2000 الف نهايهه والله، قولته ليهو بالجد؟قال لي اي لو عايزنو انا بكلم ليكم سيدو بكره تدفعو حق الإيجار وتدخلو طوالي م عندكم مشكله، سكته م رديت ليهو، اليوم التاني انا وملك طلعنا من الصباح نفتش لينا بيت لقينا كم خيار بتاع شقق حلوات ومناسبات معانا بس اتفقنا مع واحد وعلى حسب كلام براءة انو بكره حنجي المساء ندفع ونكتب العقد، رجعنا البيت شبه مبسوطين واخيرا فرجت، بس براءة اختي ي ريتها كانت بس لو حاسه بي ضيقنا ووجعتنا شويه م كانت هتخزلنا، م كانت هتقفل تلفونها، م كانت حتفضل تفتح رسايلنا وتسكت من غير م ترد، زعلته منها شديد لدرجه اني شلته التلفون ورسلته ليها رسايل وسمعتها فاارغ وختمتها بي جمله "على الاقل لو م كنتي بتعايني لينا نحن اخواتك كنتي تعايني لي حاله امك وحوجتها وم تعشميها في الفاضي ساي بس شكرا يااخي، شكرا بالجد والزمن دة الواحدة م تحوج نفسها حتى لي اقرب الأقربين ليها علشان م حتلقى منهم شي غير الزله، وبدل م تتزلى افضل ليها تبيع شرفها وتسترزق منو افضل على الاقل بي شرفها دة حتقدر توفر لنفسها اي شي عايزاه وم هتحوج نفسها لزول ابدا، وبعدين اتوقع شنو من زوله بقولو ليها امك في القسم مطلوبه ديون محتاجاك بتقرا الرسايل وبتطنشهم اتفو يااخي بجد...

بعد الردحهه دي فتحته الفيس كنت منهاره نزلته بوست طويل محتواهو انو انا في اللحظه دي فاقدة كل شي حتى ثقتي بربنا بقت مهزوزة و...، الناس بقت تعلق لي وبقولو لي كدة م صح و...شويه كدة جاتني رساله مسنجر، م رديت عليها تاني بقت تنزل رسايل كتيره فيهو، اخر حاجه البرسل دة بقى يتصل مكالمه مره واحدة، فصلته المكالمه ورسلته ليهو لو سمحته م تتصل علشان م اصرف ليك عربي وافرنجي باقي اليوم دة، قال لي إستغفري اول كدة، قولته ليهو م بستغفر انت مالك ومال اهلك، قال لي ختي الرحمن في قلبك وقولي بسم الله وانعلي الشيطان ي بت الناس، سكتت مساافه وجدعته التلفون بقيت استغفر حتى راسي بقى جايط وم عارفه انا عامله شنو اساسا، فتحته تلفوني لقيت تاني محادثات من نفس الزول، قولته وبعدين انا هتجيني من وين ولا من وين يعني؟فتحته المحادثه لقيتو كاتب لي"اذا حاسه بنفسك عايزة تحكي المضايقك انا اون لاين اتفضلي احكي لي يمكن اقدر اساعدكك بي شي ولو م ساعدتكك تكوني فضفضتي وشويه كسبتي طاقه إيجابيه، بقيت اكل في ضفوري بس بشكل تلقائي قولته ليهو طيب اسمع وحكيت ليهو الحاصل معي ومضايقني م كل شي بس جزؤ من الأحداث الأخيره الحصلت، قال لي ي بت الناس دي كلها إبتلاءات من ربنا بس ونحن مجبورين نصبر عليها وبعدين في ناس ربنا ختاهم في مواقف اصعب من كدة وصبرو عليها خليك متفائلهه م تستسلمي الحياة م بتقيف ماشه والله وكل شي حيعدي زي غيرو، بقيت م قادره اكتب رسلته ليهو ريكورد وانا كنت ببكي وصوتي مبحوح حقولته لمتين بس لمتين انا يئسته خلاص شكلو ربنا م كاتب لينا الراحه في الحياة دي نحن علشان اساسا دي م حياة دة قرف والله العظيم

، قفلته على كدة ونومته وانا عيوني ملانه دموع، اليوم التاني صحيت ندمانه اني حكيت وفضفضتهن لزول م بعرفو اساسا فتحته النت حوالي الساعه 12 صباحا كدة، لقيت رسايل كتيرة نازلهه في المسنجر حتى التلفون علق، قولته لنفسي بي نرفزة يااخي دة مالو كمان قافلها معاي اصلا غلطانه انا دقيقه احظرو، فتحته المحادثه علشان ادخل على صفحتو واحظرو لقيتو مرسل لي "صباح الخير وجمعه مباركه عليك ان شاءالله، بالنسبه للحكيتيهو لي امس مش قولته ليك كل شي بتحل؟فعلا انا يمكن م بعرفك ودي المره التانيه اتكلم معاك بس الناس بالناس والكل برب العالمين عموما ي ستي انا بقدر اساعدك وأوفر ليكم بيت مناسب ليكم تظبطو بيهو اموركم لغايه م ربنا يفرجها إن شاءالله وم تشيلي هم ابداا كل حاجه بتجي مرتبهه من ربنا وعشان مخك م يمشي شمال وتفهميني غلط عشان دي معرفه عالم افتراضي وكدة خليك على ثقهه وابشري ي زولهه م داير اي شي بالمقابل غير دعوة حلوة من الوالدة بس...

نتلاقى®