الفصل السادس

وعشان مخك م يمشي شمال وتفهميني غلط عشان دي معرفه عالم افتراضي وكدة خليك على ثقهه وابشري ي زولهه م داير اي شي بالمقابل غير دعوة حلوة من الوالدة بس، من غير اي مقدمات كتبته ليهو لا طبعا شكرا ليك بس انا م حكيت ليك علشان انت تساعدني او تشفق علي، واصلا كانت غلطه او ممكن تقول عليها لحظهه ضعف بس م اكتر وإعتبرني م حكيت ابدا، ، طلعته من الفيس وبقيت قاعدة وبفكر وبهز في رجلي، بعد م صليت الظهر قعدتهه اسرح شعري بعد م خلصته شلته التلفون، في نفس الوقت بنات خالتي كانو قاعدين يلعبو جنبي في السرير وبشاهدو في التلفزيون، فجأهه واحدهه وقعت من السرير حتى انا اتخلعتهه لاني م كنت مركزة معاهم، على صوت الصريخ جات امها جاريه قالت لي مالها؟ قولته ليها وقعت من السرير، قالت لي بي نهره وصرخهه"وقعت؟وانتي وين م شايفاها يعني ولا م قاعدة جنبهم، قولته ليها انا ماسكه تلفوني م منتبهه ليهم لانهم كانو بشاهدو في التلفزيون، قالت لي اي انتي مع تلفونك دة م بتشوفي شي، البتتكلمي معاهم في التلفون ديل إن شاءالله نافعينك بي شي؟ بدل التلفون والفارغهه دي كان طلعتي غسلتي ملابسكم الماليه السله دي مش افضل؟مسكته اعصابي وم رديت عليها ابداا، طلعته لقيت ملك واليف قاعدين تحت الشجرهه قعدته معاهم، ملك قالت لي دي مالها بتنبح؟قولته ليها بصوت مبحوح ماف شي مهم، قالت لي شهد انا بمشي لي زمرد، وانتي امشي لي اي واحدة من صحباتك، وامي واليف يمشو اي مكان ان شاءالله لي واحدة من صحبات من امي نقعد فترة وبعدها نشوف حيحصل شنو لانو خالتك دي م فضل ليها الا تجدع لينا شنطنا بره البيت وتقول لينا بصريح العبارة اطلعو لي برهه البيت دهه، قولته ليها اليف انتي امشي لي امي اقعدي معاها في المظله دييك قومي يلا، بعد م مشت قولته ليها ملك في زول انا م بعرفو شخصيا معرفه فيس بس وهو قال لي انو هيساعدني، قالت لي زول منوو؟ قولته ليها م بعرفو قولته ليك بس بالصدفه حكيت ليهو وهو قال هيساعدناا، قالت لي ومنتظره شنو ي شهد؟م وافقتي؟نحن في يدنا ماف خيار لما ربنا كتب لينا الزول دة في طريقنا م نرفس النعمه برجولنا، قولته ليها وامي هنقول ليها شنوو؟حنقنعها كييف؟قالت لي امي م عندها طريقه ترفض بدل الجحيم النحن فيهو دة ي شهد، على طول فتحته بيانات تلفوني، لقيتو مرسل لي "ي بت الناس انا والله م شفقان عليك ولا اي شي بس كلنا بشششر وبتعدي علينا ظروف وزي م قولته ليك الناس بالناس والكل برب العالمين م تتمسكي انتي انا بس حبيت اساعدك بس اذا انتي م حابه يبقى انا اسف، اترددته اكتب ليهو شنو، قولته ليهو امممممم طيب انا موافقه، هو كان اون لاين، على طول فتح رسالتي، قال لي طيب ساكنين وين انتو وعايزين بيت في اي مكان والسلام ولا مكان معين؟قولته ليهو م بتفرق اي مكان وخلاص، قال لي طيب شويه كدة واتصل ليك ممكن ترسلي لي رقمكك؟قولته ليهو ام، قال لي عشان اقدر اتكلم معاك بصورة اوضح بس م اكتر، قولته ليهو طيب، رسلته ليهو الرقم، بعد نص ساعه بالظبط جاتني مكالمه من رقم غريب، حسيت انو دة هو اول م فتحته الخط قال"السلام عليكم، طبعا سكتتهه مساافهه، الصووت كان يلخبط م بين مبحوح ومخشوشن كدة، قولته ليهو وعليكم السلام، قال لي شهد؟قولته ليهو ايوة، قال لي معاك مهيد"بضم الميم

" كيفك ان شاءالله طيبه؟قولته ليهو تمام الحمدلله، قال لي والوالدة والأهل كلهم تمام؟قولته ليهو الحمدلله م عندهم عوجهه، يااخي سلامو بشووش لمن غلط، قال لي يلا اسمعيني ي شهد انا عندي صاحبي بعرف لي زول شغال في العقارات والكلام دة اسي كنت بتكلم معاهو قال لي في شقه ممكن تجو تشوفوها؟قولته ليهو وين؟قال لي في المعمورة، قولته ليهو اسي؟قال لي ي زوله عشان م تروح من يدكم، ولو ممكن كمان تركبو امجاد عشان م تاخدو زمن في المواصلات، قولته ليهو طيب، قال لي الوالدة كلمتيها؟قولته ليهو لا لسسهه، قال لي خايفاها تشاكلك وكدة؟قولته ليهو ايوة، قال لي طيب قولي ليها دي منظمه حبت تساعدكم بس م اكتر عشان تقتنع وكدة، قولته ليهو طيب، قال لي طيب تمام لما تطلعو وتصلو المعمورة رسلي لي مسنجر بتصل عليك، قولته ليهو ماشي، قفل الخط وانا فضلته واقفه في مكاني متنحهه، شويه كدة بعد م استوعبته طلعته لي ملك حكيت ليها، قالت لي كذابه والله شقه في المعمورة مرهه واحدة؟قولته ليها ايوة، قالت لي ظريف طيب

قولته ليها ارح نكلم امي، قالت لي يقنعوها كيف دي اسي؟قولته ليها انتي بس تعالي، مشيت لقيتها مهمومه وقاعدة في المصلايه وسرحانه، قولته ليها امي؟قالت لي ايوة، قولته ليها عندي صحبتي شغاله في منظمه حكيت ليها و...، اسي مدير المنظمه اتصل علي وقال في بيت ممكن نحن نجي نشوفو، سألتني اسإله كتيره وكل مره انا بزيد في الكذب لغايه م إقتنعت لبسنا وطلعنا مشينا، لما وصلنا المعموره رسلته ليهو" نحن وصلنا"، شويه كدة اتصل علي، قال لي ي شهد كيف تمام؟قولته ليهو الحمدلله، قال لي وصلتو؟قولته ليهو ايوة، قال لي يلا في جامع جامع القبب ادخلي بشارعو على طول، قولته ليهو طيب، قال لي في مغلق اسمو... بقع على يدك الشمال انتظرو شويه جنبو عندي صحبي اسي بجي عليكم، قولته ليهو طيب، فضلنا واقفين مسافه اتصل علي قال لي بتصل عليهو م برفع معليش ياخ، قولته ليهو م مشكله، جنب المغلق دة في بيت مقاصد ليهو طلعو منو نسوان، امي قالت لينا انا عطشانه ماشه للناس ديل يدوني مويه اشربها، قطعت الشارع ومشت، سلمت عليهم دخلوها البيت ونادتنا، لحقناها، دخلونا جابو لينا مويه وعصير وضيفونا وبقو يتونسو معانا، بعدها جهزو الغداء حقهم وقالو الا نتغداء معاهم انا ابيت، حلفو قالو الا ناس امي يتغدو، المهم امي قعدت معاهم قي الصفرة، اثناء م بيتغدو تلفوني ضرب، رديت قال لي ي شهد كييف؟قولته ليهو تمام، قال لي وين انتو انا وصلته، قولته ليهو جنب المغلق انت؟قال لي ااي، قولته ليهو نحن دخلنا بيت ناس كدة واسي اصرو على ناس امي بتغدو معاهم بس دقيقه اطلع ليك، قال لي لا كملو غداكم انا بنتظركم م مشكله اخدو راحتكم، قولته ليهو لالا انا اصلا م قاعدة اتغدا معاهم دقيقه، قولته لي ناس امي انا طالعه وراجعه، طلعته بقيت اتلفت يمين وشمال م شايفه زول جنب المغلق، إتصلته عليهو قولته ليهو م شايفاك وين انت؟قال لي دقيقه، شويه كدة قال لي لابسه شنو انتي؟قولته ليهو عبايه كحليه، طبعا في شارع زي الظلط كدة في النص هو كان في إتجاه وانا في إتجاه، عاينته بإتجاه الشارع التاني شايفه زول خاتي التلفون في اضانو وانا بهنا بنفس الوضعيه بتاعتو، اخدته حكايه بتاعه 10 ثواني وانا مترددة م بين هو ولا م هو، هو ي ربي، طبعا اول مرة اشوفو لانو حتى في الفيس بروفايلاتو كلها لونها اسود بس م اكتر، هو اساسا م كان محتاج يرفع يدو لانو طويل سلفا وملتحي لحيتو كتيرهه بس مرتبهه، لابس فنيله كورة برتقاليه وشورت طويل ولونو م بين اصفر واسمر خليط، وكل م يقرب علي انا بتردد بقول دة هو ولا م هو ي ربي

لغايه م قطع قال لي شهد؟قولته ليهو اهلييين مهيد؟؟، طبعا اترددتهه امد يدي لانو خفته يكون م بصافح، قال لي ايوهه مهيد ه، قولته ليهو كيفكك، قال تمام الحمدلله وانتي؟قولته ليهو الحمدلله بخيير، قال لي معليش يااخ جرجرتكم وخليتكم تنظرو، قولته ليهو م مشكله ي سيدي، فجأهه المغرب اذن، قال لي انا بدخل المسجد اصلي الزمن داك هيكونو خلصو غداء، قولته ليهو طيب، كان في مسجد قريب جنب المغلق، قطع مشى وانا فضلته واقفهه وبعاين ليهو لغايهه م دخل الجامع، فجاهه امي وملك طلعو قالو لي وينو؟قولته ليهم مشى يصلي في الجامع، جات ست البيت ومعاها بتها وقفو معانا اتونسو كدااا لغايه م جا طالع، قولته ليها ملك ياهو جاا، ملك قالت لي وينو؟اوووعى تقولي لي اللابس برتقالي دة؟قولته ليها ااي يااهو

قالت لي وااااااي ي شهد كذااااابهه قولي والله بس قولته ليها ي بت جنيتي؟قالت لي هو مالو سمح وطويل كدة وبعلياهه، قولته ليها بطلي عولاق انتي ي بت متخلفهه

قطع الزلط جا اول م قال السلام عليكم ملك مدت ليهو يدها سلم عليها، وبعدها مشى سلم على ناس امي، قولته ليهو طبعا دي امي، امي مهيد، قال ليها ي خاله كيفكك ان شاءالله تمام و...طبعا سلم عليها كانو بعرفها قبل كدة مع انو اول مرة تشوفو، وسلم على ناس البيت المعاها بعدها وقف بتاع ركشه واتحركنا، هو ركب قدام طبعا، قال ليها معليش ي خاله والله اخرتكم بس صحبي الغبي دة م ردة علي، امي قالت ليهو م مشكله، ونحن ماشين عمل مكالمه، قال "لا يااخ، انا مش قولته ليك اجحزها لي؟ي زول، طيب التانيه دي وين؟طيب خليك جنبها جاي عليكم انا، بعد م فصل قال لينا الشقه المفروض نمشي نشوفها لقوها إتعربنت والله لكن في واحدة تانيه نمشي نشوفها، امي قالت ليهو م مشكله ي ولدي، مشينا وصلنا الشقه لقينا صحبو ومعاهو السمسار دخلونا الشقه، اول حاجه قال لي شهد م توافقو على طول لو م عجبتكم قولو م عجبتكم م تدخلو في اي بيت سااي والخيارات متوفرهه تمام؟قولته ليهو طيب

اول م دخلنا شافها عاين ليها يمين وشمال وشاف الغرف، قال ليهو وين المراوح والمكيفات ي الحبيب؟السمسار قال ليهو بتاع الشقه قال الحجات دي استخدام شخصي، قال ليهو ي زول المكيف عرفناهو استخدام شخصي المراوح برضو؟السمسار قال ليهو اي والله، على طول هزة لي راسو قال لي م تنفع قولو لا، قال للسمسار خلاص طيب ماف خيارات تانيه؟قال ليهو لا والله اسي في دي بس متوفرهه، مهيد قال ليهو خلاص تمام ي الحبيب كان بقينا عليها بنديك خبر اتفقنا؟قال ليهو طيب، طلعنا صحبو كان عندو عربيه ركبنا مهيد قال لينا اول شي موقعها م تمام، تاني شي م نضيفهه وعلى العليها لا مراوح لا مكيفات م تنفع ياخ ولا شنو ي خاله؟امي قالت ليهو فعلا، قال ليها نشوف حاجه نضيفه وكويسه، لكن اسي المغرب اذن وانتو مكانكم بعيد شديد عشان كدة ترجعو عشان الزمن م يتأخر عليكم وانا بكره ان شاءالله بتصل عليكم تمام ي شهد؟انا كنت سرحانهه ملك قرصتني طااخ، قولته ليهو نعم؟"ملك قالت ليهو طيب تمام ان شاءالله، صحبو اسمو امجد قال ليهو خلي نوصلهم السوق العربي انا اساسا مشواري في طريقهم، مهيد قال ليهو تمام، بعدها هم بقو بتونسو مع بعضهم ونحن ساكتين، لغاايه م وصلنا السوق العربي ونزلنا وركبنا الهايص جا وقف جنب امي قال ليها ي خاله دة حق المواصلات من ولدك، قولته ليهو لا طبعا نحن معانا حق المواصلات بقيت مقلعه عيوني وبعاين ليهو، قال لي ي بت انتي هبله دي امي، قولته ليهو لا امي رجعيها ليهو، وامي مصره م تشيلها بس هو اصر ومسكها ليها وانا زعلتهه قربته انفجر من الزعل وهو بعاين لي وبقول لي عادي دي امي بطلي، العربيه اتحركت وانا اعصابي بايظه، رسلته ليهو "حركتكك تافهه شديد ع فكرهه اقسم بالله لو عارفاك حتعمل كدة م كنت جيت اساسا "ردة لي قال لي ي بتي بطلي عوارة امك زي امي والحركه دي عادي عندي يعني م جديدة علي، قولته ليهو بس انا ضايقتني وسخيفهه شديد ع فكرهه

قال لي لاحظتهه ليك كنتي هتطلعي لي بشباك العربيهه هههه طيب م تزعلي حقكك علي تاني م هتتكرر إن شاءالله، قولته ليهو طيب، رجعنا اليوم التاني تاني اتصل علي قال لي في بيت في المكان الفلاني تعالو نشوفو برضو مشينا وم اتوفقنا، وهو كل شويه يعتزر لي ولي امي، عدينا اسبووع على الحال دة اصلا نحن حظنا كعب في كل شي كل م يلقى بيت او شقه ي إتأجرت ي طلعت م سمحه وهو بقول لي بيت وضعو م كويس م هخليكم تسكنو فيهو، فضلنا اسبووع جارين وكل يوم ماشين وجاين في يوم مشينا والبيت طلع م كويس والحته مويتها صعبه وانا خلاص يئستهه اثناء م مهيد بتكلم معي كدة قال لي اصلا بيوت الإيجارات دي م بتتلقي بسهوله و...عايز يكمل كلامو معي دموعي جات جاريهه، اتلخلع لما انا بديت ابكي بقى م عارف يقول لي شنو بس قعد يعاين لي وانا بمسح دموعي، ملك جات مسكتني قالت لي شهد انتي عويرة بتبكي؟ قال لي عارفك تعبتي من المشيه والرجعه بس ان شاءالله بكره اخر يوم والله، امي قالت ليهو البت دي عويرة سااي اسي الببكيك شنو والولد م قصر والله بطل اشغالو كلها وبقى جاري معانا، قال ليها العفو ي خاله ياااخ م عملته شي انا طالما لسه م لقيت ليكم البيت دة معناها لسسه م عملته شي، شهد اسف مرهه تانيهه يااخ، ملك قالت ليهو لا م تعتزر ياااخ والله انت م قصرته ابدا، رجعنا البيت وانا يائسهه بجد م عارفه بس حاسه انو الدنيا قفلت ابوابها في وشنااا خلاص، وخالتي دي خلاااص اخلاقها بقت في مناخيرها م فضل ليها الا تجدع لينا شنطنا في الشارع، ملك كذبت عليها قالت ليها لقينا بيت واجرناهو ودفعنا حقو لكن فيهو صيانه لغايه يوم الجمعه كدة بتخلص، ونحن بيت م لمينا فيهو وملك كذبت الكذبه دي، وحتى م كلفت نفسها تسالنا القروش جبتوها من وين، بالرغم من انو هي عندها قروش كميه غير حقها البرسلو ليها راجلها عندها بيوت مأجراها وشهريا بصلها ايجار بيتين، كلهم بتوديهم الصايغ ونصهم داخله بيهم صندوق بي 100 حتى الاكل حارمه نفسها واولادها منو م عارفاها عايزة تصل لوين ههه سبحان الله غايتو وصلت لمرحله انها في يوم لبست ولبست بناتها وشالت ليها شنطه صغيره قالت ماشه ناس حبوبه تقعد كم يوم كدة، يعني متخيلين معاي الموقف يعني بصورة غير مباشره م عايزاكم تقعدو معي؟على طول رسلته لي مهيد قولته ليهو مهيد الله يخليك بعد كدة نحن في اي مكان حنقعد م عندنا مشكله ان شاءالله بيت م مشطب وم فيهو مراوح وم فيهو اي شي حتى في الأرض سااي حنقعد بس المهم عايزين بيت نقعد فيهو انا خلاص هموت عايزة اطلع من المكان الانا فيهو دة وبس

قال لي روقي ي شهد والله العظيم بكره ان شاءالله ننتهي من الموضوع دة بس اصبري للصباح اتفقنا؟قولته ليهو حااضر

، اليوم التاني اتصل علي حوالي الساعه 3 ظهرا قال لي لقيت بيت ظريف بتقدرو تجو؟قولته ليهو طيب، لبسنا ومشينا بس سيد البيت كان راجل وقال نسوان براهم م عايزهم، مهيد حنسو واتكلم معاه كداا رفض، خلاص كدة كملت، فجأهه اتصل على واحد صحبو قال ليهو داير لي شقه تكون نضيفه ومكانها قريب للمواصلات وم تكون بعيدة ياخ، طيب وين دي؟15 دقيقه؟طيب بنتظرك ي مان، في مطعم كدة دخلنا قعدنا فيهو طلب لينا بارد ومويه وقعد يتونس مع امي قال ليها والله الإيجارات في البلد دي بقت اصعب من حكومه الإنقاذ نفسها، امي قالت ليهو والله ي ولدي هي الحكومه ادت الناس نفس عشان تعرفها صعبه ولا ساهله غايتو بس ربنا يدي العافيهه، فجاه تلفونو ضرب قال لينا عن اذنككم، بعد م طلع قولته ليهم شايفين نحن مناحيس كيف والله حظنا اكعب من وشوشنا، ملك قالت لي عوارضنا اكبر منننا يااخ اقسم بالله، شويه كدة جا راجع مبسوط قال لينا انتو عارفين امس كان في واحد صحبي اتكلمته معاه قولته ليهو داير بيت وكدة، اسي ضرب لي قال لي في واحد صاحبنا عندهم شقه ماجره والليله ناسها طلعو اسي رسل لي رقمو ضربته ليهو قال لي جاهزة تعالو شوفوها ولو بقيتو عليها تدخلو فيها اليوم قبل بكره، قولته ليهو ظريف طيب وين؟قال لي قريبه من هنا شارعين بالكتيير، على طول طلعنا ركبنا ركششه ومشينا، لقينا الولد قاعد بره على طول دخلنا الشقه كانت سمحه فيها تلاته غرف وهول كبير وبلكونه ومطبخ جااهز، مهيد انبسط شديد قال ليهو انت وين من زمان ي زول ياخ نحن لفينا البلد دي كلهاا بس سبحان الله البيت دة قسمتهم طبعا دي خالتي ي معاويه، معاويه قال ليهو ي زول خالتك وبتفتش ليها عند الغريب كمان ي زول اعتبرهم سكنو خلاص، مهيد قال ليهو خلاص بقينا عليها ولا شنو ي شهد؟قولته ليهو اي م عندنا مشكله، قال لي امي ي خاله اها كيف معاك ان شاءالله عجبتكك؟امي قالت ليهو م فيها كلام والله ي ولدي، قال ليهو معاويه نضافتها عليك جيب نسوان ينضفوها نضيف تمام؟ معاويه قال ليهو جداا، بعدها ساقو بره اتكلم معاهو، بعد م جو راجعين مهيد قال لي امي، ي خاله بس فضل العقد تمام؟يعني متى م حابين تمشو تكتبو العقد وتسكنو على طول، قالت ليهو طيب ي ولدي الله يديك العافيه ويطول عمرك ويبعدكك من كل اذى ان شاءالله ي رب، قال ليها العفوو يااخ دعوتكك دي براها بالدنياا، بعد م طلعنا ناس امي وملك مشو قدام رجعته لي مهيد قولته ليهو بكم؟قال لي شنوو؟قولته ليهو الشقهه، قال لي وانتي مالك؟قولته ليهو م هو انت م هتدفع حقها العمر كلوو صح؟قال لي هي بي 7 لكن خلاها بي 5، اتفقته معاه على مقدم اربعه شهور وان شاءالله للزمن داك الحال بتعدل، قولته ليهو م جادي انت 4 شهور؟عارفهم بكم؟قال لي عارف وي ستي إعتبري الاربعه شهور الاوائل دي حقتي وبعدها ان شاءالله كل شي بتصلح، طبعا انا اتصدمته م عرفته اقول ليهو شنوو، دة دفع لينا 20 مليون ورقه تحك الورقه

بعدها وصلنا جنب المواصلات ومسك امي على جنب طلع قروش من جيبو قال ليها دة حق نقل العفش وكدة، امي قالت ليهو والله ولا قرش م بشيلو ليه يعني لا والله ي ولدي، ملك قالت ليهو لا طبعا، قولته ليهو مهيد انت م جادي؟قال ليها ي خاله انا مش زي ولدكك؟م تشتغلي بي شهد دي مجنونه سااي، قولته ليهو لا يعني لا، امي اصرت على موقفها، هو استسلم وصل معانا لغايه المواصلات ركبنا ودفع لينا وقال لينا يلااا اول م تصلو طمنيني ي شهد تمام؟قولته ليهو حاضر

بعدها اتحركنا ملك اتفقعت بكى وانا نفس الشي، يعني اللي م عملو معانا قريب لينا الغريب عملو، ملك قالت لي انا خجلته م عرفته اقول ليهو شنو، حتى كلمه شكرا م قدرت اطلعها، اهلنا واقرب الأقربين لينا م وقفو معانا الوقفهه دي بس معقولهه ياااخي لسسه الدنيا دي فيها ناس كدة

ونحن راجعين على امدرمان ملك بعد م ركبت العربيه جنب الشباك في واحد جا خطف منها تلفونها وجرى قالت تلفوني، بس زول اتحرك وجاب خبرو ماف، رجعنا البيت بالليل انا بقيت بتقلب م قادرة انوم وبفكر في العملو معانا دة، شلته التلفون حوالي الساعه 12 كدة ضربته ليهو، بعد مسافه فتح الخط ومكانو كان فيهو جوطه، قال لي شهد، انا م بين ببكي وم ببكي، قولته ليهو كيفكك، قال لي تمام الحمدلله وصلتو كيف؟قولته ليهو تمام اسفه اتصلته عليك في وقت متأخر بس عايزهه اقول ليك شكراا بجد يااخي، ضحكك قال لي ي بت انتي هبله ضاربه لي الساعه 12 ومقوماني من صحن العشاء بتاعي عشان تقولي كلامكك دة بطلي هباله ولا شكر على واجب يااخ العفوو ااهم شي انكم تاخدو راحتكم وكل شي بتحل إنشاءالله م تشيلي هم، قولته ليهو إن شاءالله، قال لي يلا تصبحي على خير وقولي للحاجه م تنسانا من صالح الدعوات يااخ...

نتلاقى®