الجزء 7

بعد شلنا الكتب وطلعنا وركبنا العربية، عادل خت الكتب في المقعد الوراء و ما دورالعربية طوالي...خت يدينه فوق الدركسون وقعد مسافة ساكت و مدنقر... و انا بس دخلت النار... ما قادرة اتكلم ...ما عارفة اقول ليه شنو..

في الاخر رفع راسه و اتلفت علي وقال لي (اول مرة يا ايمان تعملي حاجة اشعر انها ممكن تزعلني منك. انتي بتفتكري انه انا ممكن ابخل عليك باي حاجة مهما كانت غالية؟ )

انا في اللحظة دي اتمنيت لو الارض دي تتخسف بي و بسرعة قلت ليه ( انا بس ما عايزة اكلفك ...)

قاطعني بانفعال (ايمان انت عايزة تزعليني بالجد ولا شنو؟...شنو يعني ما عايزة اكلفك؟...انتي بتعتبريني زول غريب يعني؟ انتي بتشحدي فيني؟ ..انا ما ملزوم بيك؟ يعني لو دي كانت عبير كانت ح تقول زي كلامك دة؟ يعني شايفة نفسك مختلفة منها انتي؟ ...هل في اي زول مننا خلاك تشعري انك ما واحدة مننا ؟)

انا بس قاعدة اهز في رأسي... ومن غير ما اشعر حسيت بدموعي جارية ...اكتر شي مازمني انه عادل زعلان مني ...عادل لما شافني ببكي اتنهد كدة وقال لي براحة ( ايمان ...انا ما عايز اقول انه دي حساسية زيادة عن اللزوم و ما في ليها داعي اصلا.....ارجوك انا ما عايز الحكاية دي تاني تتكرر... انتي واحدة مننا...مافي فرق بينك وبيني وانور وعبير والتومات...قشي دموعك دي... و زي ما انا ح انسى انه الموضوع دة حصل عايزك انتي برضه تنسيه....)

وقعد ساكت انتظرني لغاية ما سكت وقشيت دموعي حتى دور العربية و رجعنا البيت ...لما وصلنا خلاص ما كان في اثر لدموعي لكن فرحتي الكبيرة بالكورس الكانت ديك انطفت شوية بعد الحصل دة... و الليلة ديك رقدت مسافة اتقلب في السرير وانا افكر في الحصل..

تاني يوم لقيت عادل رجع يعاملني عادي زي اول ...عرفت انه كان قاصد بالجد اننا ننسى الحكاية بتاعة امس دي ..وقررت انا ذاتي احاول انسى الموضوع دة برضه.. وفرحتي وانفعالي بالكورس رجعت تاني زي ما كانت...وقعدت احسب في الايام عشان الاسبوع ينتهي و ابدأ الكورس..وقعدت اطقم في هدومي و طرحي و الاسبورتات..لغاية ما جاء اول يوم في الكورس..

قمت بدري قلت البس من بدري عشان ما اتاخر على عادل...لبسي معظه اسكيرتات وبلوزات وشوية بناطلين وتونكات...الاسكيرتات والبلوزات امي بتختار لي الواسعات ما بتحب الكارينات و البلوزات المجبصة على الجسم خاصة انا جسمي مايل يكون مليان...

المهم قمت اخترت اسكيرت وبلوزة جديدات وحلوات قلت اقشر بيهم اول يوم.. مشيت سريع عشان اشرب الشاي..خالتي عشة متعودة تجهز الشاي السادة براه في ثيرموس و اللبن في ثيرموس تانية.... واي زول يجي يكب حسب مزاجه..

انا من مشياتي لحلتنا في شرق النيل عجبني الشاي البعملوه ناس خالتي نفيسة... بلخبطوا الشاي الاحمر مع اللبن في الكفتيرة او البراد ....و يختوه مسافة في النار... بطلع رهيب و ايناس قالت لي ( اصلو الشاي البتعمل في الكفتيرة ولا البراد ملخبط طعمه براه....الحالة كمان لو عملتيه في الفحم في المنقد ..حاجة ما تخلص..)

انا طوالي مشيت اشتريت لي براد و بقيت اعمل كبايتي بتاعة الشاي بطريقتهم و اشرب بمزاج...

اها اول يوم في الكورس واثناء ما بجهز في الشاي بتاعي عادل جاء نازل ...عاين لي وقال ( دة شنو البتعملي فيه دة؟)

قلت ليه ( بظبط في شاي صاموطي..اعمل ليك معاي؟...)

قال لي ( اعملي يا ستي ...نشوف الشاي الصاموطي دة كيف..)

كبيت ليه معاي شاي و قعدت اعاين ليه لغاية ما شال منه جغمة منتظرة ردة فعله حابسة نفسي واقول ان شاء الله يعجبه ..لما قال لي ( والله تمام ...يا الشيف اسامة ...) انا اتنفست وابتسمت وقعدت اشرب شايي...

بعد داك ركبنا العربية واتحركنا على الجامعة ..عادل بدأ يسأل فيني من المواد بتاعة تالتة...بحب ياتو واحدة اكتر؟ و واكتر واحدة صعبة علي شنو؟ و كدة.. وانا برد عليه..

و اكتشفت انو من انا كبرت كدة و بديت احب عادل دي كانت من المرات النادرة الكنا فيها انا وعادل قاعدين نتكلم مع بعض برانا كدة...معظم الوقت بنكون مع باقي ناس البيت قاعدين في ونسة جماعية...

لما كنت صغيرة كنت مرات كتيرة بمشي لعادل في اوضته واقعد معاه اسأل فيه اسئلة الاطفال وكدة.....لكن بعد كبرت ومشاعري تجاهه اتغيرت لحب لقيت اني بقيت ما بقدر اتكلم معاه زي زمان ..ما عارفة خجل و لا احراج ولا شنو..وما عارفة هو حس بالتغيير دة فيني ولا لا؟

لما وصلنا الجامعة عادل قال لي ( يللا اول اوريك مكان مكتبي عشان لما تخلصي الحصص تجي علي ..بعد داك نمشي القاعة مكان الكورس...)

دخلنا مبنى الكلية بتاعتهم واثناء ما ماشين لاقينا كم زول سلموا على عادل ..وفكرت في نفسي اني ح اتعرف على جانب من حياة عادل انا ما كنت عارفاه قبل كدة...

مشينا في صالة طويلة فيها ابواب كتيرة... لغاية ما وصلنا واحد قريب لنهاية الصالة الباب... كان مقفول لكن ما بمفتاح ...عادل فتحه ودخل... لقيته مكتب حق زولين ...فيه تربيزتين حقات مكتب... عادل اشر على واحدة وقال لي( دة مكتبي و التاني دة حق زميلي رضوان معا

ي هنا في القسم...بعدين بعد تخلصي تعالي طوالي هنا حتى لو ما لقيتيني ولا لقيتي رضوان الباب بكون مفتوح.. اقعدي انتظريني لغاية ما اجي.. انا بكون في محاضرة ولا شئ..)

بعد داك طلعنا مشينا على القاعة وعادل قال لي ( انتبهي للطريق كويس ...بعدين لو رحتي ولا غلبك بس اسألي اي زول عن مكاتب الاساتذة ...انا لو عارفكم بتخلصوا الساعة كم كنت ح اجيك في القاعة اسوقك لغاية ما تتعودي على المكان..وحاسبي ما يبرلموك) وضحك..

قلت ليه ( ما تخاف بصل ان شاء الله ... الطريق واضح...)

اثناء ما ماشين وراني الكافتيريا وقال ( انا ما عارف ح يدوكوم بريك الساعة كم.....انا بكون قاعد في المكتب من 10 لغاية 11 ...لو طلعوكم المواعيد دي تعالي لي المكتب افطري معاي.....لو طلعوك قبل كدة ولا بعد كدة تعالي للكافيتريا ...)

قلت ليه ( كويس)

ومشينا لغاية ما وصلنا قاعة واقفين قدامها مجموعة من الاولاد و البنات شكلهم قدري كدة وجايين للكورس.. دخلنا القاعة وكانت ما كبيرة شديد....وكان في برضه مجموعة طلاب قاعدين جوة ..

عادل عاين كدة وقال لي ( اها ..خلاص شوفي مكان كويس اقعدي ...)

طوالي في اللحظة دي اسمع ليك صوت بنادي فيني (ايمان..)

اتلفت القى ليك واحدة من بنات مدرستي اسمها سهى قاعدة في القاعة وتأشر لي ... انا اشرت ليها طوالي فرحانة اني لقيت زول بعرفه ..

عادل قال لي ( اها كويس لقيتي ليك معارف...)

قلت ليه ( ااي دي سهى معاي في المدرسة..)

قال لي ( خلاص امشي عليها...اها لبعدين ) ومشى..

انا مشيت على سهى واتسالمنا وقعدت جنبها..سهى من البنات الظريفات في فصلنا ... ساكنة الامتداد.. مع انها ما كانت من صاحباتي القريبات لكن علاقتي بيها كانت كويسة.. لقيتها برضه ممتحنة ادبي زيي ..اختها الاكبر منها بتقرا في رابعة ادارة اعمال... ياها هي الكلمتها بالكورس...انا برضه وريتها انه عادل هو الوراني الكورس وشرحت ليها علاقتي بيه..طوالي قالت لي (دة هو الكان واقف معاك دة ؟ )

قلت ليها (ايوة..)

قالت لي (بالله دة ياهو استاذ عادل علي؟..سامعة بيه عند سهام اختي...) وضحكت وقالت لي ( طبعا قالوا البنات هنا في الكلية كلهم مكسرات فيه..الطالبات و زميلاته من الاستاف برضه ...يستاهل لكن...)

قلت ليها ( عادي ..عندنا برضه كدة وسط الاهل و الجيران ..) وقعدت افكر انو المنافسات لي عددهم ماشي زايد..

بعد شوية باقي الطلاب دخلوا كلهم قعدوا في القاعة... و جوا الطلاب المشرفين على الكورس وورونا الجدول... وورونا الحصص المشتركة متين... وحصص العلمي متين.. وحصص الادبي متين ...تقريبا الجدول حقي يبدأ يوميا من الساعة 9 صباحا ...و بدونا بريك الساعة 10 للفطور... و تاني ندخل من الساعة 11 لغاية واحدة ونص... بس نطلع بريك لصلاة الظهر.

يتبـــــــــع