الجزء 1

بقلم: مريم النصري

الجزء 02

#نادرين_2

(مهما كانت تحديات الحياة التي تواجهك .. تذكر دائماً أن تنظر إلى قمة الجبل .. فأنت بهذا .. تتذكر العظمة وتنظر إليها . تذكر هذا .. ولا تدع مشكلة ما أو أمراً ما .. مهما بدا لك خطيراً أن يثبط من عزيمتك.. ولا تدع شيئاً ما .. مهما كان .. أن يصرفك عن القمة هذه الفكرة .. هي الوحيدة التي أريدك ألا تتخلى عنها )

(ألفونسو أورتيس)

طول اليوم كان تفكيري مع نادرين وماقادره اركز في شغلي وما ممكن احكي لي ايليف لانها حتنفعل وتقول لي نقوم نمشي ليها هسي من بقت ناشطه في الجمعية بقت صعبه وما في زول بقدر يسكتها 😅

ياربي هل نادرين فعلا ما ح تخاف وحتقدر تخت الكاميرا وتظبطها في مكان من غير ما يلاحظوا ليها .. حاجه صعبه انك تكتشف الزول الحبيته واخترته يكون شريك حياتك انو كان واهمك بالحب و من تاني يوم يفاجئك انو ما بحبك وزواجكم شكلي ويذلك بالقروش 😢 لحدي هنا دي براها كارثه 🙆 يقوم كمان يطلع شاذ 😱 والغرض من العرس انو يبقي عندو زوجه تبقي ليه كواجهه اجتماعية فقط دي الكارثه الاكبر .. ما اتخيل لي في واحده بتقبل تعيش عيشه زي دي الا لو هي زاتها عندها شذوذ جنسي وعايزه راجل كواجهه ليها او هي نوع النساء الما بكتفوا برجل واحد وعايزه تعيش علاقات متعدده فبتعرس ليها واحد زي دا عشان ما يقدر يسالها لكن انسانه طبيعية سوية مستحيل تقبل بكده❌

الليله الجمعة ، والجمعة عندنا بنكهه الخميس عندكم 😉 مما جينا البلد دي احلي حاجه انو حسام بشتغل من الثلاثاء للجمعه ، و سبت واحد و اتنين مؤجز وطبعا اتلاوق فيني عشان ااجز نفس ايامه 😂كل اسبوعين في الاجازه 3 ايام دي بخمنا انا والعصابه وفتون وبنمشي اي حته قريبه من اسطنبول المهم يحس انه سافر 😅 وفي النهاية انا وفتون حسمنا وبقينا 3 يوم بس في الشهر بنمشي معه وبكره الثلاثه يوم بتاعته بتبدا واكيد ماممكن نسافر بعد قصه نادرين دي هو حيرضي يقعد لكن حيتجنن فينا و3 يوم بعوضها دبل فيما بعد 😏 وانا الليله ماعندي ليه اي جمعه بعد قصه نادرين دي كلمه راجل ساي بقت بتطمم لي بطني 😤

حسام: الليلة الجمعه بكره الاتنين اللميكا كيرا تمنه 👏👏👏

انا :لا جمعه لا غيروا انا حااااده 😢 ما تسالني عليك الله براي منفسننننه

حسام: حااااده ومنفسنه 😲 ومالك ماحاده في اللبس ، اللابسه دا لون وردي ولا بتخيل لي 😏

انا : الحداد ليس في ما نرتديه بل في ما نراه هو يكمن في نظرتنا للأشياء بإمكان عيون قلبنا أن تكون في حداد ولا أحد يدري بذلك

حسام: هوي يابت النصري خليني من كلام احلام مستغانمي دا ، ماعندك رغبه لحاجه اوووكي لكن دايره تعملي لي وليك نفسيات بقصه نادرين دي اقسم بالله اقطعوا معاك وما اخليك تساعديها واضرب هسي تلفون لاحمد اوغلو احكي ليه بقصتها وانو راجلها حابسه، راجلها يلقي نفسه في السجن في لحظات براك عارفه جدك ، وهي بنسفرها لاهلها 😡 انا لما وافقت انك تساعديها عشان تدعميها نفسيا ماعشان نفسياتك انتي التتعب وانا زاتي حاني عليها وعايز اقيف جنبها ونطلعها من الهي فيه سريع عشان تاني مايبقي عندها عقده من الرجال مش عشان انتي التتعقدي لي 👉

انا : طيب من الاخر غضا عن السبب انا حاليا ماعندي رغبة 😏

حسام : جدا يا مريم براحتك وطبعا اكيد بكره موضوع السفر خستك مع الحاصل دا 😠 فشنو قومي البسي خلينا نطلع نبرمج بره عشان ما نتشاكل لانو انا شياطيني بدوا يزنوا لي في راسي 😡

قمت اختصرت الشر ولبست ماعشان هرشوني 🙈 طيب خلاص مافي داعي للكذب 😅 هرشت حبه كدا 🙊 كله ولا يقوم يتجنن فينا ويقطعوا معاي في موضوع نادرين ، أساسا طلعنا متاخرين وساهرنا بره زي الساعه 1 صباحا جاتني مسجات من نادرين لما فتحت الواتس لقيتها مرسله لي 3 فيديوهات

انا : حساااااام شيل القرف دا مني وحولهم في تلفونك وامسحهم من تلفوني

حسام : بعدما ما حولهم عندو ومسحهم من تلفوني .. مريم انتي متاكده بتصرفاتك دي حتقدري توري البت دي تتصرف كيف؟ انا شايف احسن تخليني انا الاتكلم معها

انا: لا ما تتكلم انت معها هي براها متحسسه وحتتحرج منك وانا قرفانه وبس لكن بعد الفيديوهات دي ح اوري التهديد علي اصوله عشان تاني مايفكر يهدد بنات الناس وانت حتشوف بعينك الحيحصل

في الاثناء دي اتصلت علي نادرين بعدالسلام

نادرين: اها يا مريم عملت الطلبتي يلا وريني اتصرف كيف بعد دا انا تاني ما بقعد ولا يوم مع الراجل دا

انا : طيب اول شي تخلي الخوف الانتي في دا وعايزاك لما تتكلمي معه تتكلمي بكل ثقه وعينك في عينه .. تاني حاجه تتكلمي معه لما جيلان تكون في عشان اطمئن عليك زياده

نادرين : ح اقول ليه شنو يعني ؟

انا: تنادي وتقعدي وتخلفي رجلك وتمدي ليه التلفون وتقول ليه شوف حبيبتك العرستني عشان تغيظها 😂 وتخلي يشوف الفيديو بتاعه الحقير دا و طبعا اول حاجه حيفكر فيها انو يشيل التلفون منك ويضربك وانتي طوالي تقطعي ليه تفكيره وتضحكي فيه بكل ثقه لما تخلعي و تقولي ليه عندك ساعه واحده بس عشان نتفاهم بالزوق والا بعد ساعه

حتلقي الفيديو بتاعك منتشر في الفيس وانا ما بالغباء دا عشان اجيب موبايل واصورك وما ارسل الفيديو لزول عشان اضمن سلامه نفسي

نادرين : 😂😂😂 ياخ انا كدا ياداب اتبسطت لاني كل ما اتذكر الذله الذلاني ليها قلبي بوجعني

انا : بس انا دايراك تذكري الزله دي وانتي بتتكلمي معها عشان تقدري تذلي كويس الزول الزي عماد دا سمعته وبريستيجه اهم شي بالنسبه ليه وحيقعد ليك زي الكلب ويسمع كلامك .. بس سوال انتي عارفه جاي شايل قروش كم ؟

نادرين: ماعارفه هو عندو كم لكن لما كنا في مطار السودان شيلني 10 الف دولار واول ما جينا شالها مني بالاضافه لي انو لما جينا هنا دفع قروش الشقه بالفيزا كارد

انا : اذا حتعملي الاتي

اولا : تقولي ليه قوم جيب لي جوازي وتلفوني وقروشي الشلتها وجيب لي ال 10 الف دولار الكنت مشيلني ليها و الفيزا كارد حتي بعد داك نتكلم وحيمشي يجيبهم ليك لانو ما عندو حل تاني

ثانيا: بعد تشيلي الحاجات تخلي بالفيزا كارد يحجز ليك سويت في الفندق الفلاني دا من افخم الفنادق في تركيا وبعد دا تقولي ليه كدا الفيديو بتاعك في الحفظ والصون وطول ما انت بتسمع كلامي ما حنختلف وسرك في بئر انا اعصابي تعبانه خليني استجم كم يوم حتي بضرب ليك عشان تجيني ونتفاهم في موضوع الشيكات .. تشيلي شنطتك والقروش وجوازك وتتخارجي وعنوان الفندق بتلقيني مرسله ليك في الواتس بس اركبي تاكسي و ادي العنوان واضربي لي بتلقيني منتظراك في الفندق لانه علي بعد 5 دقائق من بيتي .. نادرين مهما يقول ليك اوعك تتهزي خليك قويه و واثقه من نفسك وانتي بتتكلمي معه وما تتنازلي ليه من اي شي ولو ما صدق انك عندك نسخه من الفيديو طوالي تضربي لي قدامه وتقولي لي عايزين نعمل بث تجريبي رسلي الفيديو في الرقم دا الهو رقمه تمليني ليه وانتي عينك في عينه وانا في ثواني برسله ليه 😅

نادرين: ياسلام اشعر بالحماس .. مريم ماعندي كلام ممكن اقولوا ليك لانك خليتيني احس اني اقوي مراه في الدنيا

انا: ماتقولي لي حاجه لانك فعلا قوية و واثقه اني حلاقيك في الفندق وجايا وانتي مبتسمه لانو البذل نادرين نصرالدين ربنا لسه ما خلقه 💪 وما حيكون في اصلا لانو ربنا ما خلقك عشان اهلك يربوك و يتعبوا فيك لحدي ما يكبروك ويجي راجل لا يسوي قرشين يذلك، يلا قومي ستفي شنطتك ونومي بمزاج واستعدي للمواجهه

حسام: مرررريم 😲 انا هسي خفت منك والله ما اتخيلتك فكرتي في دا كلو بعد التوتر الكنتي فيه

انا: خاااااف ساي كلو ولا الذله والاهانه مافي راجل مهما كان بستاهل انو الواحده تهين وتذل نفسها عشانه خلي يكون ما راجل كمان 😏

حسام: رااااجل والحمدلله 😂 لما عندي النيه اعرس 4 كما الشرع حلل لي 😉 لكن هسي خفت منك تقومي تعملي فيني مصيبه

انا: عرس ساي ولا بسالك وكمان لو بتنتظرني اتم العده ممكن نعرس في نفس الصاله انا زاتي تعبت منك ودايره لي راجل بمواصفات اخري

حسام: مريم انتي جاده انك ممكن تنفصلي مني بعد اولادنا ديل لو انا داير ادبل

انا: ولا دايره نقاش من حقك تعرس وكمان اولادك ما بتجيهم عوجه فتون معاك ونانا ما بتقصر معاهم وانت ما بتلعب فيهم يعني ح اكون مطمئنة عليهم ، وكمان زوقك عالي في اختيار النسوان والدليل انا 😍 يعني مراه ابوهم لاولادي حتكون ليهم بنكهه امهم 😉 اما انا بعرس داك يالعرس بس اغير حالتي في الفيس لمطلقه والخبر بنتشر في ساعات والعرسان تتطاقش غير انو احمد اوغلو حيكون دايرني اعرس من عليتنا وبراك عارف مستوي الرجال الفيها 😍 اها قلت لي حنتطلق متين 😂

حسام: مرررريم احسن تسكتي

انا : انا بوريك في الحقائق وانت مادام ماقدر الكلام احسن انت التسكت 😂

(وحكينا القصه دي ليه حركات انك تقومي وتفوري لما يحصل حوار زي دا ،دي بقت دقه قديمه وما بتاكل عيش ، بكل برود توري راجلك انك بتعرسي الاحسن منه وهو واولاده يتهنوا مع المراه الجديده مافي شي بخوف الراجل غير ثقه الواحده في نفسها ، خصوصا لما تكون قائمة بكل واجباتها )

تاني يوم بعد الفطور ودينا الاولاد لناهد اوغلو ومنتظره تلفون نادرين عشان الاقيها حاجه مستلمه عارفه روحي 😉 وحاج مستلمه زاتو منتظر معاي 😂 ولما جات الساعه 2 الا

نادرين ضربت لي

انا : نادرين بشرررري يلا

نادرين: ماعارفه حاسه اني ح اعرفك اول ما اشوفك بالرغم من اني ما شفت شكلك قبل كدا 😉 في التاكسي انا 😍

انا : ايييييوي يييييوي يوي ياخ مبسوطه منك تصلي تلقيني منتظراك

انا وحسام طوالي مشينا الفندق وهي جات بعدنا بشوية وبالرغم مني اني بعرف شكلها لكن خليتها هي التعرفني باحساسها وغير انو ظاهر علي من لبسي مافي زول قاعد في الاستقبال ولابس طرحه غيري 😂 طوالي جات علينا

نادرين : مريم ... صح ؟ 😀

انا: هههههه خطيره لكن ما شديد لبسي ساعدك .. سلمنا علي بعض بالاحضان وعرفتها علي حسام

نادرين : شكرا يا حسام جيلان قالت لي زوج مريم الجاء اداها الموبايل والكاميرا

حسام : مافي داعي للشكر انا اعتبرتك زي اخواتي

انا : خلينا من الشكر والحركات دي ورينا الحصل شنو

نادرين : عملت القلتي ل

ي واول ما مديت ليه التلفون وشاف الفيديو اتخلع وكان ماصدق لحدي ما استوعب وقرب مني عايز يضربني انا طوالي ثبتوا زى ما قلت لي واتخلع زياده لما قعد 😂 ونفذ كل الطلبته منه وقلت ليه بعدما اروق بضرب ليك تجي عشان نتفاهم وطلعت وخليت خشمه ملح ملح

انا: 😂😂😂 خلاص امشي السويت طلعي شنطك وتعالي

مشت طلعت شنطها وجات مشينا اتغدينا وبعد الغداء قلت ليها امشي نومي بمزاج وارتاحي الليله وبينا كول بكره من الصباح بجيك

اليوم البعده مشيت ليها من الصباح ابتدينا يومنا بجلسه مساج ومشينا الكوافير اقنعتها تعمل نيولوك ومشينا عملنا شوبنق ولما تعبنا قعدنا في كافية

انا : نادرين ممكن توريني اتعرفتي علي عماد كيف؟

نادرين: ابوي عنده شركة استيراد وتصدير وعماد واحد من العملاء العنده ، ابوي شغله في الفتره الاخيره اتدهور شديد لما مرض ورقد مستشفي واول مره اشوف عماد هناك لاقيته مرتين كان بجي الزياره لابوي .. بعد اسبوع ابوي طلع من المستشفى وقال لي عماد دا طلبك مني رأيك شنو؟ .. انا طوالي قلت ليه اديني فرصه اتعرف عليه اول وعماد بقي بجينا البيت يتونس معاي وعمل لي فيها انو حباني من اول نظره .. وانا بصراحه في فتره الجامعه كنت مرتبطه بزميلي واول ما اتخرجنا وانا رجعت السعوديه وكنا متفقين انو يجي يخطبني لكن قعد يماطل فيني وبقي بطنشني وفي النهاية طلع انو ما جادي وكمان عمل علاقه مع زميلته في الشغل دي كان اول تجربه لي وقررت بعدها اني ماعايزه زول صغير وعايزه زول كبير و واعي وعماد كان بالنسبه لي الزول المناسب فرقنا 10 سنين ومتعلم وراقي و مرطب جدا وكمان بحبني وكان بعمل لي اي شي عايزه عشان يرضيني وبكده كنت شايفه مافي احسن منه وبعد شهر وافقت واصر علي العرس طوالي عملنا عقد في السعودية وجينا السودان نتم باقي العرس واتفاجاءت برفض امه وابوه لي عشان شايفين انا ما من مستواهم وكرهت نفسي ومافي حاجه كان بتخفف علي غير حب عماد لي والاسبوع القبل العرس دا كان كلو مشاكل مع أهله وما كنت متخيلاهم حيحضروا العرس ونسيبتي طوالي قالت لي جينا عشان منظرنا قدام الناس وبس والباقي انتي عارفه لكن موضوع الشيكات دا المحيرني لانو ابوي ما جاب لي سيرته نهائي

انا : كله بنعرفه بس انتي باقي الاسبوع دا ارتاحي وروقي لي بالك وبعد داك ح اوريك تعملي شنو

انتهي يومنا علي كده ونشوف في الحلقة الجايا موضوع الشيكات والتغيرات الحصلت

يتبع.....