الجزء 2

انو انا اهرب من السودان دي حاجه ما كانت بالسهوله الأنا اتخيلتها .. السؤال عن

الهجره الغير شرعيه في حدو زاتو يعتبر جريمه بس اصراري على الطلوع منعني من

التردد والخوف .. كنت بفتش في النت عن قصص الناس الهربو و كيف عملوا الحاجه

دي و اذا مسكوهم او لا .. لقيت انو موضوع التزوير محتاج لقروش هائله وطبعا ما

عندنا انا وحنان مقدره للصرف ده .. بقينا اسبوع بنحاول نشوف طريقه تحت تحت

بدون مازول يعرف نحنا بنعمل في شنو لحدي ما يوم فاتحهه الفيسبوك لقيت في

واحد من القروبات زول منزل صوره صاحبو ولد شااب كده اتوفى غرقان في بحر ليبيا

وهو داخل عليها .. عرفت من التعاليق انو الولد مشى هروب طوالي رسلت لي صاحبو

و قلت ليهو انا عارفه انو الموضوع تم بالهروب بس كيف ! انا محتاجه لمساعدتك

ضروري .. انتظرت ردو وماجاني .. بعد تلاته ايام بالضبط الولد رد لي في المسنجر

كيف حالك ! قريت رسايلك بس انشغلت .. ممكن اعرف السبب الخلاك تتكلمي معاي

بجراءه كده شنو ؟ رديت عليهو انا عارفاك بتهرب الناس حتى لو مابتعمل كده فأنت

مجرب الحاجه دي قبل كده .. انا ما اتجرأت من فراغ انت الكنت عامل منشور

وبوضوح كان ظاهر موت صحبك من غرق اثناء التهريب فإذا ما حابي تساعدني ممكن

تقول كده من الاول وما تستهبل .. الولد رد علي بقدر ما انا مستغرب من وقاحتك في

الرد بقدر ما جرأتك عجبتني .. ممكن نتقابل بكره عشان اوريك الموضوع بتم كيف؟

قلت ليهو جدا الساعه تسعه صباحا جنب برج الاتصالات .. انتظرت الصباح يجي بفارق

الصبر عشان الاقيهو لما جهزت واتأنقتا كنت مركزه انو اظهر بأجمل شكل عندي لاني

كنت عارفه البت السمحه في السودان بتصل لي اااي شي دايراهو .. انتظرت الولد

الاسمو عاصم لحدي ماجاني الساعه عشره ونص ودي حاجه مابستغربها مع الشعب

السوداني الماعندو مواعيد والتزامات .. اول ماشافني انطباع الدهشه كان ظاهر في

عيونو سلم علي وهو بعاين من فوق لتحت بخلعه .. ما اتوقعتو يسألني ده شعرك !

ضحكت باستهتار كده وقلت ليهو انت جاي من هناك واتلاقينا عشان تتاكد من ده

شعري ؟ ارتبك زيادة وبقى شبه بتمتم في الكلام .. قلت ليهو مافي مشكله انا اسمي

شيرين قال لي اتشرفنا يا شيرين .. ! قلت ليهو انا اكتر يا عاصم .. قال لي نتفضل لي

شارع النيل نشرب كبايه قهوه ؟ ولا عندك مانع ! قلت ليهو لا والله ماعندي مانع ..

مشينا لحدي ما وصلنا شارع النيل وقعدنا طلبنا قهوتنا وبقينا نتكلم .. شرح لي

موضوع التهريب بتم كيف او بالأصح اعترف لي انو بهرب الناس لبره وبعدها وراني

انو لازمني جواز سفر مزور واتبسط لما عرف اننا فاقدي ابوين .. وقال لي كده

الموضوع ببقى اسهل تختاري شهادة ميلادك و كنيتك وكل التفاصيل دي وانا بتكفل

بالموضوع ما ح اشيل منكم قروش كتيره لانكم بنات و زي ماقلتي انك عايشه حياة

زله جوه الدار .. عموما الجواز عشان يجهز ليك ولصحبتك منو؟ قلت ليهو اسمها

بسمات قال لي طيب برسل ليك عنوان الحساب في البنك ترسلي فيهو القروش و بعد

كده انتظري مني تلفون .. بعد الجواز يجهز ح تسافرو بالباخره لحدي ماتصلو حدود

ليبيا .. لما تصلوا الحدود بعد كده انا ح ارفع يدي منكم .. قلت ليهو كيف ح نصل

الحدود .. قال لي الباخره بتقيف في نص الطريق بركبو ركاب .. من هناك انتو ح تنزلوا

وتختفو طبعا ح يفتشوكم لكن م حتظهرو لحدي ما الباخره تفوتكم ح تركبوا مركب

عاادي و حتصلوا الحدود بيهو .. هناك في حرس وضباط و عساكر ح يلاقوكم ح

توريهم جوازاتكم وانكم اتخلفتو من الباخره لما يختموا على الجوازات هنا ممكن

اقول ليك مبروك .. انتي دخلتي ليبيا بسلام ... قلت ليهو طيب متفقين مشيت منو

وبعد يومين رسلت القروش في حسابو بعد اسبوعين رد لي انو الجوازات جهزت ..

رسلت ليهو حنان عشان يديها ليهم طبعا وريتها انو اسمها من الليله بسمات .. فعلا

امورنا ظبطت وبقينا مستنين يوم الطلوع .. يوم الخميس بالعصر كان مفروض نتحرك

بعد ماجهزنا روحنا انا و حنان مشينا للميناء طبعا عاصم كان متابع معانا بالتلفون

حاولنا نخفي التوتر عشان ما نلفت انتباه الضباط .. فعلا لحدي ما دخلنا الباخره امورنا

كانت ماشه كويس شديييد .. ركبنا واتحركنا بالليل فعلا لما قربنا للدخول لي ليبيا

الباخره وقفت في ناس كانوا مفروض يتشحنوا .. في اللحظه ديك كان مفروض ننزل

انا و حنان عشان نتخلف من الباخره نزلنا سوا منها و اثناء ما الناس بركبوا انا جريت

بسرعه وساعدني بنطلوني والبود الكنت لابساهو لحدي ماقدرت استخبى ورا الشجر ..

المفروض كان انو حنان تعمل نفس الشي بس غباءها وخوفها خلاها ترجع تاني للسفينه

.. كانت خاته في راسها اننا ح نتلاقى هناك في الحدود ومشت خلتني براي اللحظه

ديك ما لمتها لانو خوفها كان مسيطر عليها .. انا شخصيه ما بتخاف على شي

ولاعندها حاجه تخسرها ف استمريت بخطت عاصم و انتظرت لحدي ماطلع الفجر وجا

الزول المفروض يوصلني الحدود ركبت معاهو لحدي ما وصلنا ..

كنت خاته في راسي انو الحرس هناك عباره عن عساكر بس .. ما اتوقعت قوتهم

ونظراتهم الحاده وجبروتهم .. في الحقيقه كل الضباط كانوا

بنفس الوجاهه و القوه

والرجوله ... نزلت من المركب ومشيت لحدي م وصلت الحرس طبعا كان مفروض

يوقفوني .. وقفني ضابط اسمو ناجي سألني من وين انتي و جايه كيف؟ طلعت ليهو

الجواز و وريتو اني اتخلفت من السفينه وانو طلبت المساعده عشان اقدر اصل

الحدود .. من بين الضباط كان برئسهم واحد اسمو مهر تقريبا مفروض تمر بيهو كل

الحالات المخالفه قام الضابط ناجي قال لي تعالي وراي لحدي ما مشينا دخلنا مكتب

الضابط مهر .. و يابخت البتشوف مهر 💜 كان منزل راسو في ملف كده وماسك

قلم بيدو الشمال و بهبش في دقنو بيدو اليمين ولابس ملابس الضباط في الحقيقه

ماكنت بميز الضابط من اللواء من غيرو بالنسبه لي كلهم واحد .. وقفت في الباب و

دخل ناجي ضرب ليهو سلام زي مابقولوا هنا عرفت انو الزول الاسمو مهر ده اكبر منهم

في المكانه .. الحاجه العجبتني انو ما كلف نفسو يرفع راسو كان بتكلم وراسو نازل

لسه وبسأل فيهو نعم ياناجي ؟ قال ليهو انو لقينا بت بتقول انها اتخلفت من الباخره و

جوازها مزور يا سيدنا .. اللحظه دي انا جسمي اتشلا يعني الضابط ناجي اول ماشاف

جوازي عرفوا مزور يعني انا قبضوني الخوف الدخلني كان اول مره يدخلني خوف

بالشكل ده جسمي بقى ماشايلني اول ما سمعتو قال الكلمه دي .. مهر سألوا من الاسم

وقال ليهو اسمها شيرين ولحدي اللحظة ديك مهر مارفع راسو وعاين لي شكلي كيف ..

قال ليهو طيب دخلها الخيمه لما اجي والحقك .. الضابط طلع بدون مايتكلم معاي

كتير قال لي بدون شوشره امشي قدامي للخيمه الشماليه ديك .. مشيت وانا ساكته

دخلتها وقعدت في الجلسه العربيه الكانت جوه الخيمه.. كانت خيمه عاااااليه اول مره

اشوف زيها بقيت بفكر انا ح يحصل لي شنوو .. انتظرت ساعتين من القلق والخوف

والتوتر والاضطراب القرب يقتلني .. بعدها جا داخل مهر ضابط اسمراني عندو وجنات

في خدودو الاتنين ملامحو جمييييله جدا ومقاطع وشو جميييله عيون واسعه و انف

عمودي حاد ودقن 💜 وطول طول 💜 بعد ما دخل الخيمه باندفاع ورسميه

وعاين لي بنظره حااااده ... عادة متعوده الرجال يعاينو لي بنظرات اعجاب بس اول

مره راجل يعاين لي بنظره حاده ما اقدر افسرها .. لما شفتو ارتبكتا و وقفتا على حيلي

طوالي من التوتر و ماقدرت اتكلم .. قال لي السلام عليكم مارديت عليهو تاني كررها

ما رديت حسيت عيوني ح يرقرقو و كنت عايزه ابكي و بالعاده ماببكي كتير بس

قلقي على الجاي خلاني ابكي قدامو طوالي .. انهرت من البكا ووقعت وانا ببكي

لحقني وقرب قال لي قومي يابت واسكتي .. انا كنت مستمره قال لي تاني اسكتي ..

برضو انا مستمره ابكي .. بصوت نهره عاااليه جدا و بغضب قال لي اسكتي .. في

اللحظه دي خرستا تماما كنت متاكده من ناجي انو سوداني الجنسيه .. لكن مهر

ماقدرت احدد جنسيتو شنو الا لما بدا يتكلم معاي .. قال لي شيرين! انتي جايه تهريب

و في زول ساعدك و وصلك .. جيتي بالطريقه دي ليه؟ و الساعدك منو و الاداك الاوامر

منو؟ .. انتي لو ما اتجاوبتي معاي م ح تعرفي مقدار الخطوره الانتي ختيتي نفسك

فيها .. ياريت ماتتعبيني عشان ما اتعبك معاي .. قام جا قعد في الجلسه العربيه و قال

لي اتفضلي اقعدي مدا لي ورقه وقلم وقال لي اكتبي معلوماتك الحقيقيه و انا منتظرك

.. طريقة كلام مهر معاي ورتني انو زول اتجاهو واحد مابلف ولا بدور .. حسيت

بالخوف منو قلت اني لازم اصر على موقفي وانكر