الجزء 16

فكرت كتيير ماعارفة ، انا خايفة من المستقبل ، خايفة اجيب عيال اتمرمطو طول حياتهم ، طيب جايز مااكون بلد اساسا ، متمنيه لكن يكون عندي ولو طفل واحد اغمرو بي الحب المخزون ليهو سنين، تاني قلت ربنا هو الداري بالمستقبل مالي شاغلة بالي انا يعني حايحصل شنو اكتر من الحصل ،مبارك فرصتي الوحيده على الاقل هو شاريني ومامستعر مني ، وزي ماقالت حبوبة يمكن نداوي جروح بعض، قمت قعدت في النت افتش عن الاستخارة وطريقتا ، وقررت استخير ربي ،بالليل عملتها ونمت وصحيت مرتاحه غايتو ،المهم اتوكلت على الله وانتظرتا مبارك في الجنينه ، اي صحيت انا بدري ماهو لما تكون بتفكر ولا مقلق ولا مسافر بتصحى قبل وقتك المتعود تصحي فيهو ، انا ومبارك بنتلاقى هنا كل يوم نتكلم شويه قبال يطلع ، قعدتا زي ساعة كده اتأمل جمال الشجر والزرع والجنايني شغال على قدم وساق فيها، بعد شويه جا مبارك وكان شكلو حزين يمكن عشان امس كنت سلبيه وضايقتو ، لما جا قعد صبحتا عليهو ومسكت يدو وقلت ليهو قبل نبدا في اي كلام انا موافقه اتزوجك يامبارك ، ابتسم لي وشويه ضحك غايتو مجنون خلاص مبارك ده، قال لي حااسعدك ان شاءالله واعوضك عن اي زعل والعرس برانا بنعملو حانعقد في المحكمة ، وحانرجع البيت وتلبسي فستان زفاف ونحتفل انا وانتي وحبوبه ، قلت ليهو الزفاف خليهو ماضروري قال لي انتي عبيطه تلبسيهو زيك وزي اي بت انتي ماعجوز مثلا انتى لسة ١٨سنه قلت ليهو خلاص تمام قال لي الخميس ده بإذن الله نكون انجزنا كل شي ،وقام وودعني وقال لي اطمني يالورا كلو حايكون لي الاحسن ان شاءالله المهم نكون سوا ، مبارك زول مسكين الدنيا ضللتو شويه، عسى نقدر نوازن بعض .

مرا الاسبوع وجا الخميس ومشينا عملنا كل الاجراءات وانا لبست فستان زفاف بسيط كدة بس حلو قال لي مبارك انتي في اي شي حلوه في الصارخ والهادي في البسيط والجايط والفخم وايييي شي، غايتو الله يجبر بخاطرو دايما كلامو حلو ، صحي الكلمه الطيبه كشجرة فروعها في السماء وجزورها في الارض ، ماتبقو لي زي مباركي القال انا فيلسوفه هههههههه اسمعو بي هنا وفضو بي هنا، يلا حبوبه فرحت بينا وزغرتت زغاريت قضينا اليوم معاها وتاني يوم مبارك قال نمشي شهر عسل تلاته يوم في مكان جمييييل ،ده كلو وانا مامصدقه كأني بحلم ولا شنو انا والله مابتزكر يوم اتمنيت الشي ده، المهم عملنا كل الاتفقنا عليهو وتم الزواج وعملناها بالحلال ومااحلى الحلال ، ورجعنا نعيش مع بعض مع حبوبة سكينه،كانت الايام التلت الزواج جميله وعاديه ،وفي يوم ضحوية اتصلت عزمتني على زواجا وانا حكيت ليها الحصل فرحت لي وزفتني ياخاينه بتعمليها براك، ضحكنا واتونسنا ووعدتها اجي احضر، كان العرس بعد اسبوع كلمت مبارك طبعا قال لي نمشي طوالي مالو وساقني اخدت توب فاهم وطقمتو تمام وهو اخد كمان قميص وبنطلون وجزمه وساعة ،هههه قلنا نظهر جدااااد وحنسنا حبوبة بس وين ابت هي صحتا بقت على قدرا الله يديها الصحة والعافية ، يلا مشيت حضرتا الحنة كانت حفلة حلوة خلاص هججنا تمام انا وصاحبات ضحى وبنات اهلا ،وضحى طالعة بي البلدي عزاااب جميلة خلاص،اما يوم الدخلة قمنا انا ومبارك اتشيكنا واتظبطنا والريحه بخ بخ بخ ومباركي كان ماشاءالله الله يغطيهو من العين ، اي مسمياهو مباركي وهو بقول لي لورتي حبينا نغير من قصة حبيبي وحبيبتي دي لانو نحن بدايتنا ماكانت حب كانت تفاهم واحتياج للاخر مااكتر الحب جا بعدين ، يلا مشينا ليك الصالة ولما جينا داخلين تقول عريس وعروس الناس دي كلها تلفتت وعلقت وانا بقيت حمرا عديل من الخجل ههههههههههه سبحان الله بقيت اخجل ، ولما قعدنا في التربيزة بعد شويه بدت الزفه وجات ضحى وعريسا ماشاءالله حورية ياناس طيبتا وبرائتا كانت مزيناها اكتر من الميك اب والتسريحة ،غايتو عشتا عبرها واقع الفرحه بي الحب والزواج واللمه والاهل والاصحاب ، مبارك ضغط علي يدي نظام انا اهلك انا صحبك انا اي شي دايراهو ، حس بي الحبيب

ماكملت الفرحة لانو مبارك جاهو تلفون خلانا نقوم كلمونا انو حبوبة تعبت وطلبو ليها الاسعاف جرينا مستعجلين باركنا لي ضحى وعريسا واعتزرتا منها اني حاامشي عشان مبارك قالت لي الله معاك والله يطمنكم عليها ، اصيلة البت دي بتمنى زوجها يسعدا ، نحن جرينا بي لبسنا ده على المستشفى لقيناها في العنايه المركزة داخلة في غيبوبه مبارك كان خاايف وانا كمان انا حبيت المرا دي وحبيت اني اراعيها وافرق عليها واونسا ، ونحن واقفين الدكاترة يعاينو لي الممرضين والممرضات يعاينو ، اي عشان لبسي وشياكتي مامناسبه مع المكان ،طبعا مبارك حسى بي الغيرة ههههههه وقال لي ارجعي البيت غيري وارتاحي وتعالي الصباح قلتا ليهو لأ بغير وبرجع مابخلي حبوبة براها قال لي انا في قلت ليهو دي حبوبتي برضو مابخليها ليك براك ضحك وهو في عز خوفو وحضني وباس جبيني وقال لي بحبك ، يلا غيري وتعالي راجعة لي بستناك انا كلمتا السواق يجي قلتا ليهو سواق؟ قال لي اي ده سواق حبوبه انا عاملو ليها متى ماتحب تمرق وانا مافي هو موجود هو حسي حايجي يرجعك وبستناك يجيبك هنا

تاني ، يلا رجعت بعد داك غيرتا وعملت سيرمس العربيه قهوة وشلتو ونزلت مشيت المستشفي، حبوبة رقدت ٨يوم كنا بنتناوب عليها بس حارسين شنو ماعارفة لحد ماروحا فاضت ، كنت وصلة حزن جديدة بكينا انا ومبارك عليها بي الدمعة الرويه وخلاص بقينا لي بعض مافي لينا زول يحن ويطبطب ، الناس الكبار ديل شمعة البيت ، مبارك نفذ رغبتا في انو تندفن في البلد مع اهلا ومشينا البلد وهناك استقبلونا وسوو معانا الواجب ،دفناها ورجعنا وبقت الفيلا علينا فاضية وحزينة والله يصبرنا يااارب .

تعبت عايزة ارتاح ولسه حكاوينا ماخلصت باي