الفصل الرابع

اصبحته الصبااااح كان عندي حصص في المدرسه كنته بجهز لعلشان اطلع شروق فتحت عيونها لقتني بلبس قالت لي ماشه وين؟؟قلته ليها شايفاني بلبش في لبس المدرسه اكيييد حأكون ماشه المدرسه قالت لي اهااا افتكرتك ماشه مكاان تاني ضحكته قلته ليها اجي ي شرووق مكان تاااني وين البمشيهو انا قالت لي م عااارفه يمكن الحوااشه شلته شنطتي وم ركزته معاها وانا طاالعه قالت لي اهااا نسييت زمان كان بتمشي الحواشه عشااان شي معين واسي خلاص ماف شي بخليك تمشيها صح قلته لي ابوووي ابوووي اديني القروووش انا ماشه المدرسه طبعا بتجاااهل كلامها كأني طرشه

علشان عارفااها هي عقلها صغييير ومبسوووطه بس ابوي قال لي خليني اقدمك ي بت انا زااااتي طالع وطريقي في شااارع مدرستكم قلته ليهو خلاااااث اطلع ارح امي غااالت لي اشربي الشاااي ي بت انتي من امس م اكلتي ها قلته ليها ياااخ م دايره اصلا عندي حصتين بس وبجي رااجعه ابوي قال لي م تطلعي معي لو م شربتي الشاااي قلته ليهو ابوووي الزمن اتأخر الاستاذة بتدقني لو اتأخرته قال لي خلاص اشربي وانا بوصلك لحدي المدرسه وخليها تسألك بس قلته كدة كدة حتغصبوني عليهو يلا شلته كبايه الشاااي وغعدته اشررب

بعد خلصته ابووي قال لي بعد كدة ممكن الاستاااذة تدقك عااادي ولا بمشي معاك المدرسه قلته ليهو احلف قال عندنا اجتماااع بعيييد مستعجل ماشي ي بت امي قالت لي امشي استعجلي بس شلته شنطتي وبقيت ماشه مستعجله ابووي قال لي انتظر هاا ماشي معااك حصلني قعدته اضحك مسكتو من يد جلابيتو قال لي بتكرفسيها لي يكرفس وشك دة فكيني يلا قلته ليهو في النهااايه انا البكويها لي ي ابوووي م مشكله يلا بنتناقش في موضوع الجلاابيه وم الجلابيه لحدي م وصلته المدرسه بالجد وانا ماشه مع ابوووي وبنتونس وبنضحك نسييت كل الحاااصل

اول م دخلته المدرسه البنات اتلموو فيني كلهم ويسألوني عن عقد شرووق وكدة قلته ليهم اااي والله عقدو ليها والعرس بعد الجمعه الجايه واحدة فيهم قالت لي هاا وانتي عرسك متين؟؟ ضحكته قلته ليها انا لسه باااايرة ياخ جات صحبتي نهى قالت لي هو استااااذة خاااالدة لسه باااايرة كدة خلييييك انتي قلته ليها وااااي درعتها وقعدته اضحك البنات كلهن قعدن يضحكن بس الاستاااذة جااات دااخله واظنها سمعت كلام نهى قالت لينا الكااانو بضحكو اقيفو على حيلكم الفصل كلو بقى سااااكت ساااي قالت لينا م اعييييد كلااامي تاني الناس الكانت بتضحك تقيف على حيلها والله خوووفه بس وقفته على حيلي براي

لانها صعبه باقي بنات الفصل جبانات قالت لي م كان صوتك برااك طلعي المعاك نهى لسه كانت بتضحك قالت ليها اقيفي انتي معاها هاا يلا تااني شلتي المعي في الكنبه كلهن وقفن وبضحكو قالت لينا شله يغس بتضحكو مالكم ضحكونا معااكم واحدة شليقه من بنات الكنبه القدام وقفت قالت ليها ي استاااذة نهى قالت عليك بايرة وجع خلاااث ضيعتنا شكيتها لي الله الاستاااذة وشها حمرر بقى زي الطماطمه وطبعا الفصل كلوو بضحك بي تحت الكنب قالت لينا وانتو بتضحككو عشان كدة

قلته ليها لالا والله ي استاااذة م بنضحك عشان كدة لكن في واحدة قالت لي اختك عقدو ليها وانتي لسه باايرة والبت القدام دي فهمت الكلاام غلط الاستاذة اتراجعت قالت لي اهاااا اختك العقدو ليها عمرها كم قلته ليها 15 سنه قالت لي اجي عمرها كم اسي دة عمر بعرسو فيهو بت ابووك دة عااايش في العصر الحجري ولا شنو في قلبي قلته ليها باااايرة بجد والله قالت لينا اترزعن قعدنا ونحنا بنصحك بعد م خلصنا حصص طلعنا مشيت البيت لقيت ابووي قاااعد طبعا اووول حاجه دخلته لي حبووبه قلته ليها حبوبه قيلتي كيف قالت لي كوووويسه لكن عندي ملاااابس دااايرة مكوى الله جااابك لي

قلته اسي انا الدخلني ليك شنووو غااايتو محن قلته ليها سمح ي حبوبه تدفعي كم قالت لي ي بت البلا الياااخدك اسي انا كان اديتك قرووش بتشيليهم، قلته ليها كيف ي حبووبه م بشيلهم قالت لي والله بنات اااخر زمن نحنا زمان الواحدة لو حبوبتها ادتها قروووش م بتشيلهم منها قلته ليها هي ي حبوووبه لكن عاااد انتو في زمنكم دااااك اي شي ماشي بالمقلوب قالت لي بطلي نضمي كتيييير وشيلي الهدوووووم دي اكويها شلتهم وانا متنرفزة جيت لي ابووي لقيتو بتكلم مع امي م فهمته شي لكن سمعتو بقول ليها اي جاااي بكره ولازم نضبح و.. دخلته عليهم وانا شاااايله ملابس حبوبه

قلته ليهو ابوووي الجاااي منو لمت عايز تضبح ليهو قال لي امي شووفي بتااعه الشمااار جات امي قالت لي دة وااااحد صاااحب ابووكي جاااي من الخرطوووم عندو شغل هنا قلته ليهو ابوووي انت عندك اصحاااب من المدينه يعني قال لي ي بت هاااا ابووك دة م تشوفي كدي ابووكي دى عندو معااارف في بلد قلته ليهو ايوااا وصحبك دة شغل شنووو العندو في بلدنا دي في زووول بجي من المدينه عشان يشتغل هنا قال لي والله م فهمني غاااايتو لكن جهزووو البيت دة ونضفوهو كويس قلته ليهو ابووووي انا عندي مكوة لكن قال لي انا زاااتي عندي جلاليب اكويهن لي معاك قلته ليهو سمح

قعدته باااقي اليووزم داااك كويييت وقمته ناديت بنات اعمامي كل واحدة مسكتها حاجه تعملها طبعا وناس امي كانو بشربو في الجبنه ولا همهم المغرب كدة خلصنا نضااف طلعنا الشااارع مسكناااهو من اولو لي اخرو نضفناهو تحلفو تقول جاااايييينا وزييير م ضيف عادي ودخلنا البيت استحميت وربطته شعري ورقدته ابووووي قال لي الليله تعبتي كان تخلي شروووق تشتغل معاكم قلته ليهو ي ابوووي شروووق عروووس وعرسها الجمعه الجااايه البخليها تشتغل شنووو؟؟قال لي اصلا هي من غييير العرس البت دي م بتشتغل كدة خليني منها بالله شرووق كانت واقفه وبتسمع في ابووي قالت ليهو اها ي ابووي شنوو

قال ليها ماف شي ي بت هوي قلته ليها والله ي شروووق ابوووي كان قاعد يقوول انتي م قااعدة تشتغلي في البيت سكتت ساي ابووي قال لي غااايتو بليله في خشمك م بتتبلا بعد كدة ابوووي طلع من اوضتنا ونمته اصبح الصبااح من شدة م مرهقه ناااايمه للسااعه 8 صباحا جات شروووق قالت لي نااايمه كدة البشووفك بقووول وارثه وانا من الصباااح انضف قلته ليها ياخ انا امس نضفته البيت دة كلووو م تعيطي في رااااسي اطلعي واقفلي وراااك الباااب دة طلعت تاااني جاتني راااجعه قالت لي امي قالت ليك اطلعي المدرسه

قلته ليها وااااي نسيت الحصه الصباااحيه نطيت من مكاني جهزته سريع مشيت المدرسه وجيت رااجعه لقيت ابوووي ضبح وناس امي جهزو الغداء وغااايتو كل شي جاااهز ولا ركزته معاهم دخلته نمته زي المغرب كدة امي جات صحتني غالت لي اصحي ي بت ضيوووف ابووكي ديل وصلو قلته ليها ي امي ضيوووف ابوي م ضيوووفي والله انا نعساااانه ياااخ قالت لي اصلك رمه خلاص اتخمدي نووومي ولا اشتغلته بيها نووومته كملته نووومي والله نااايمه للصباااح ولا حاااسه بي شي تغووول بااالعه منووووم اصبحته الصباااح طبعا علشان نايمه بدري صحيت بدري الساعه 7 كدة عشان اجهز للمدرسه

طبعا لابسه جلباب مخوووولق وشعري فاااكي طبعا مشاااط امي المشطتني ليهو داك ونص مفتحه عيوني ونص مغمضاهم طلعته من اوضتنا امي المطبخ سمعتني قالت منو؟قلته ليها دي انا ي امي ماشه الحمام قالت لي انتظري م تمشي ي بت امشي حمااام ناس عمك طبعا ولا اشتغلته بيها شلته الابريف وبقيت ماشه طبعا في فاااصل حيطه كدة عاملنها بين الصالون وبين بيتنا اول م لفيت لفه الصالون اشوووف ليك واحد وشوو كلوو محمر قلته بسم الله ولاااا عاينته ليهو كووويس زاااتو جيت جااااريه راااجعه امي قالت لي في شنوو ي بت قلته ليها ماف شي ماشه حمام ناس عمي بس