الجزء 11

فترة ترقب لقيت الجامعه فتحت مشيت كم مرة مالقيتا سألت من ناس دفعتا وروني ناس مشيت سألتهم قالو لي لورا دي بتجي للمحاضرات بس وبتمشي مامحتكة بيهم لكن دلوني على بت اسمها ضحى قالو دي الوحيدة البتقعد معاها مرات , فتشتا عن ضحى دي لمن عترتا فيها، طبعا لمن عرفت انا منو عاينت لي عين استغربتها وقامت ساقتني بعيد من اصحابا الكانت قاعده معاهم ، اول شي قالت لي ياخسارة ضيعتو البت مرة تانيه واذيتوها رجعتوها اكعب من اول، انا بهطتا من كلاما قالت لي ماتستغرب انا لورا وثقت فيني وحكت لي عن حياتا وحسي حكت لي عن نكبتا مرة تانيه ، واحب اقول ليك انا ماعارفة هي وين انا مابلاقيها برا الجامعه لانها بتخاف تمس سمعتي دي لورا يااستاذ الجبرتوها تنتحر ، نصيحة اعتبروها ماتت وماتنبشو في المات واندفن ، للمرة التانيه بنطعن في رجولتي وده خلاني اصر القى بت خالتي وانقذا، مشيت طوالي وقررت اراقب الجامعه كل يوم واخدتا اجازه اسبوع عشان اقدر اراقب كويس وانتظرت الفرج .

هاي انا معشوقتكم لورا ههههههههههه اي عارفة بحب اتظارف واخفف دمي دي حاجه مهمة في شغلي ، عايزه احكي ليكم عن زبوني الجديد مجاهد ، انا ماعارفه الاسامي ديل بسموهم ليهم كيف ده لا مجاهد لا شاف الجهاد ده ضلالي ساي سكر وعربدة وامور والله لو قلتها ليكم جسمكم يقشعر وانا منغمسه في كل دة لكن انا زي ماقلتا ماسكرتا ولا سطلتا ابدا كفايه الانا فيهو ماناقصة اتعولق زياده لكن برضو حضرتا جلسات الانس والشراب وكل امور الفوضه ، يلا جهاد ده شغلو براهو والله علمني امور في الزنا شي شي مقذذ لكني سويتو وبعد كل مرة اعمل فيها الشي ده برجع غرفتي ديك ابكي واعزي وامعط شعري بقيت مامستطعمة الشي البعمل فيهو زي زمان حنيت لي عيشة النضافه وقررت جااادة اني ابعد لكن مالاقية فرصة لحد مافي مره من المرات بتول لمتني في زبون جديد وده غير حياتي قلبا فوق تحت والزول ده اسمو مبارك ، شخص غريب بمعنى الكلمة خلاني احتار وبعدين اصدق انو ربنا ماناسيني .

قبل مانتطرق لي حكايتي مع مبارك تعالو اكلمكم عن مقابلتي لي شهاب ودخالتي ماحاقول طليقي لانو البيناتنا ماكان عرس فلا انكسرت القزازه ولا اندفق الزيت لانو القزازه ماكان فيها زيت اساسا ، يلا في يوم خميس كان عندي محاضرة الساعة ١٠صباحا مشيت طوالي على الجامعه ومااسمع ليك ليك الا شهاب بنادي فيني يالورا اقيفي استني ، كنت لابسه عبايه وطرحه لاني في الجامعه بحب احفظ صورتي الحسنة عشان اقدر اقرا في هدؤ، وقفت وجاني مسرع وقال : اخيرا لقيتك ، وين مشيتي يابت انتي وليه طفشتي ، قلت ليهو شهاب انتهينا وارجوكم اعتبروني متا خلاص وعيشو حياتكم النزيهه، قال لي ولو قلت ليك حياتنا قلبتيها برجوعك وخربتيها بي فوتك، قلت ليهو بكرة تنسو الدنيا نسايه ، قال لي مابسيبك لازم ترجعي معاي ابوي مستني رجعتك وامك كمان، قلت ليهو عشان هم اطهر ناس عرفتهم ماعندي رغبه الطخ بياض قلوبهم بي سوادي ، انا بايظه خلاص حياتي شبه حياة روح في حال سبيلك واعتبر نفسك ماشفتني ، قال ليك بقتلك يالورا لو اصريتي تعيشي عيشتك دي واغسل عارك ، قلت ليهو لو تتزكر انا الحياة دي مامتمسكه بيها وانتحرت بس ماتم المراد وانت السبب انت رجعتني لي فسادي تاني ولو حسي عايز تقتلني تكون عملت فيني جميل على الاقل اكون ما قتلت نفسي براي ويمكن وقتها ربنا ينظر لي بي عين الرحمة ، عاين لي مذهول وقال لي جنسك شنو انتي مافي كلام بتقال ولا عندك قصادو كلام انت بت عجيبة جد ، مشيت خليتو في وقفتو دي وكملت طريقي ومشيت محاضرتي .

بعد كده اقدر اكمل ليكم حكايت مبارك زبوني الجديد ، مبارك ده واحد شاب وصغير عمرو ٢٧ سنه عندو مطعم ملكو وبديرو هو نوع المطاعم الراقيه ديك متكلف فيهو ديكورات وحركات ، يلا جا عند بتول يوم وهو زبون مستديم بس ماشفتو حصل انا مابعرف كل زباين بتول بس البتجيبني ليهم ، يلا كان طلب من قشور يجرب بت حلوة تكون وصغيرة ومامستهلكة كتير فكنت انا بحمل المواصفات دي وفعلا جابوني ليهو ويلا لمن دخلتا ليهو في الاوضه وعينو لقطتني وقف مزهول مساااافه وانا بقيت اتبسم واتمايع واقول ليهو مالك شفت عفريت قال لي لا وحياتك شفتا فتاة احلامي ، المرة دي انا التنحتا وزهلتا وقلت ليهو شنوووو ، قال لي انتى هي والله هي

وبديت من النقطه دي تحويله في مجرى حياتي للابد