الجزء 8

طبعا قصصي مابتخلص وتعالو اوديكم الجامعه تشوفو قصتي هناك شنو ، انا لقيت ليك انو لو انت حبيت تتوب الناس مابريحوك ابدا ، يلا انا بديت السمستر الاول وحاولت ابعد من الناس انا اصلا لو لاحظتو ماعندي صحبات نهائي ولا زمن المدرسه ولو على سماح ديييك ماكانت صحبتي ديك زميلتي في الانحراف ، يلا كنت بعيدة من ناس دفعتي ، لكن في بنوتة عسوله لذوذة كده اسما ضحى كانت دايما بتجي تقعد جمبي في المحاضرة المهم هي اقتحمتني اقتحام واتعرفتا بيها ، بت والله لو كنت اتمنى اكون زي زول كنت اتمنى اكون زيها ، بت طيبه ونضييييفة وظنها دايما حسن في الناس ، انا دموعي ماكانت بتجري في عيوني كانت بتجري في قلبي بي جوة ، لما عرفتها بكيت بي قلبى انى ماكنت زيها ، حبيتا وحسيت ممكن تكون لي اخت ، يلا كل مرة تتعابط فيني عايزة تعرف عني اي شي يلا عشان انا التمست فيها الطيبه ماخبيت عنها حقيقتي وحكيت ليها موشحي مع اختصار بعض الاحداث عشان ماألوث النقاء في روحا و اصدما في طبيعة البشر ، يلا من عرفت الحقيقة وهي تبكي محنتني والله ، وانا اقول ليها يابت المبكيك شنو اذا انا ست الشي مابكيت ، وقعدت اضحك فيها طبعا انا بحب اسخر من نفسي ودي ماده للضحك ، غيرتا ليك مزاجا وقشقشتا ليها دموعا ، خلاص عدت الايام وانا اصلا مابختلط بي زول بحضر محاضراتي وبتكل ، يلا قام في مره جاني واحد من الزملا وعرض علي اعجابو انا قلت ليهو افتكر انت شايفني لابسه دبله وفي الشمال يعني انا متزوجة ومابنفعك قال لي بي كل سفاهه القال منو مابتنفعي ، بس انتو عارفيني مابسكت لكن المرة دي سويت شي مختلف ماانفصمتا فيهو قمت على حيلي نحن كنا في الحوش برا وانا اصلا كنت ماشه البيت وهو وقفني ، يلا قمت على حيلي وبقيت انادي لكن مابي كورايك طبعا مامحتاجه اكورك انا بس ناديت للناس الحوالي والناس بقت تتلملم قلت ليهم : ياناس تعالو اسمعو الشاب المحترم موقفني وبقول لي تعالي احبك وهو عارفني متزوجه يرضيكم ياناس، يرضيكم يمرمط شرفي وشرف اهلي وراجلي ' ، علييييكم الله ماتضحكو في كلمة شرفي دي ههههههههه عارفة ماعندي شرف لكن بتكلم عن شرفي الجديد شرف راجلي واهلي المساكين ديل والمرة دي انا فعلا بريئة وعشان اربي الحيوان ده وانتقم لي كل البنات الداس علي طرفهم ولو بي العين بس، يلا قعدتا احمس في اصحاب الدم الحار لمن انفصمو ليك فيهو وقبقبوهو وقعدو يعتزرو لي معليش يااخت خلاص امشي وسيبيهو ده حيوان مابستحق ، يلا مشيت وجات ضحويا لاحقاني وهي متكيفه وتضحك قالت لي عفيت منك قلت ليها : انا لي راجلي ماعندي حاجه خلي هو المعفن المقطع ، ياخ ضحكت ضحك وقمنا مشينا كل واحده علي بيتهم .

يلا مشيت لي عمي سليمان وحكيت ليهو الحصل ، قال لي جدعة ده العايزو منك ماتخلي زول يدوس عليك وعلى عرضك ابدا طوالي وقفيهو عند حدو ، وقعدنا تمينا ونستنا وقمتا مشيت طلعتا فوق شقتي ، اي شقتي مش حقت راجلي ؟ حتى لو نحن فيها ابو الزمل ، ماتقيفو لي على الواحده كده ههههههههههههههه، دخلت استحميت ودخلتا لي في فستان اسود بي اصفر كده نوع المنفوش من تحت وفوق لي الركبه داك يلا جيت رقدتا في الكنبة كده في الصاله سمعتا الباب دقا قمت فتحت وعشان ماتستلموني فتحت ووقفت بي ورا الباب اشوف منو ، ياخ صدقو عليكم الله اني اتغيرت ، المهم فتحت لقيتا رنا بت خالتي ،دخلتها وضيفتها وقعدت تتونس معاي قالت لي نفسي اكون زيك حلوة وناعمة قلت ليها تبري وتستبري قعدت تضحك على وكنا مبسوطين لحد مادق الباب تاني ولقيتا خالتي والساعة النهرت ليك البت ونزلتا تحت وقالت لي دي بتي الوحيدة يالورا ابعدي عنها ماتخليها تتأثر بيك ، قلت خير ان شاءالله مابتكلم معاها تاني ولا حتى السلام مابدي ليها ، ياخ اقسم ليكم بالله قلبي ده بي جوة اتجرح تجرح بقى نثاير نثاير فتر من الصدمات نزف وفتر لي درجة اني شايفه موتي حايكون بي النزيف الداخلي ، مافي زول عايز يرحمني مافي زول داير يشوف حقيقتي وضعفي الا ربي وده يكفيني ، القال ياالله مافضل شي ، بس انا عايشه بين البشر مافوق في السما وصدقوني الكلمة احد من السيف فياريت تحاسبو وانتو بتتكلمو مع غيركم، انا اي فسدانة بس عمري ماضايقت زول بي كلمه تجرحو ولو على حيات وخضر حقو تعزروني في اني قليت ادبي ونهرتهم لانو انقهرت منهم ، يلا خالتي نزلت ولاقت شهاب في الباب وصرصرت ليهو وقالت ليهو رنا مادايراها تطلع لي مرتك هنا كلما وكلم مرتك تبعد عنها مابستناها لمن تفسد بتي معاها ،نزلت وهو جا داخل انا كنت سامعاهم وقلبي شغال نزيف ، لما دخل لقاني قاعده في الكنبة وعيوني منكسرة ودي اول مرة زول يشوف كسرت نفسي وده زاد الالم في حشاي لانو انا بعتبر انكساري هزيمة واخر زول عايزاهو يشوفني كده هو شهاب لانو من جنس الرجال وانا بكره الرجال ، لما شفتو مشيت دخلت جوا وقفلت الباب علي لحد ماهو بعد شويه جا دق لي الباب قال لي : لورا افتحي عايز اتكلم معاك قلت ليهو من ورا الباب معليش اعفو لي تاني مابقرب من رنا بت خالتي ولا بديها السلام عشان يدها الطاهرة ماتتلوث ، مابسلم على شادي عشان ماتفت

كروني حاافسدو خلاص ارتاح ياشهاب وخلي خالتي ترتاح وكلم امي في طريقك اني بت فسدانة بلوث امومتا خلوها ماتجيني وانت ياشهاب اعفي لي انا ماكنت دايرة الوث شرفك الغالي وبعد داك سكتا بقا يدق يدق وانا مشيت رقدتا في السرير ومسكت الموس وبكييييييييت دموعي المخزنة ليها سنين طلعتها كلها استغفرت ربي وطلبتا يسامحني لاني عايزه امشي عندو يمكن يكون هو احن علي من حكم البشر وبي يد ترجف قطعتا شرياني لمن صرختا وبقيت شايفه دمي بنزف كميه بقيت بنزف برا وجوا

اليأس ده اكعب شي لو لما في الانسان وشويه كده حسيت بي الدوخه والرؤية بقت تتلاشي اخر شي سمعتو ضربات شهاب في الباب