الجزء 6
مصطفى بعد اغتصب الزينه اختو ،هرب مباشرة للمدينه خلاها تقاسي عذاب الحسرة والالم علي رابط الاخوة الكان هش بيناتهم !
حياتها بقت كئيبه والدمعه مافارقت عيونها ،وماقدرت تحكي او تفضفض للناس الحوليها وفضلت ساكته وحالتها ساءت ومرضت وماقدرت تتحرك من السرير ولو حاولت تقوم راسها يلف وحتى الاكل مسخ ليها ...
وفي يوم جاتها جارتهم التومه الدايه ولقتها شاحبه وملامحها اتغيرت ،قالت ليها : وحاة الله يابتي كان بقيتي معرسه كنت قلت ليك انتي حامل لكن اكيد مرضك ده لانك لسه حزنانه علي موت ابوك وشايله هم فرقت اخوانك بعد تعرسي !
الزينه سمعت كلمة حامل وزادت حالتها سوء وقالت اكيد كلام التومه صاح هسي اعمل شنو وامشي وين؟
وقررت تنتحر بس تاني فكرت في اخوانها وسمعتهم وكلام الناس يقولوا عليها انتحرت مالا؟
ولو فضلت عايشه اكيد الفضيحه حتكون ملازماها وكل يوم بطنها بتكبر وتتفضح اكتر وتاني فكرت في سامي خطيبها اكيد ماحيرضى بيها وهي بالوضع دا
ياربي اقول ليهو شنو؟مادايراك بس اكيد اخواني حيسالوني من السبب .
واثناء ماهي بتفكر جاهة اخوها احمد من المدينه وقال ليها : سامي قال جاي الاسبوع الجاي يعقد ويسوقك طوالي جهزي روحك !
الزينه الدنيا ضلمت في وشها واتمنت انها تموت ولاتحضر اليوم دا . وقالت كل البنات بتمنوا اليوم دا الا انا بالنسبه لي تعاسه و فضيحه قدام زول اختارني عشان اكون شريكتوا !
ومرت الايام وسامي واهلو جو للعقد واتلمو اهل الفريق والجيران والزينه ساقوها البنات عشان يجهزوها بس كان باين عليها انها ماسعيده وشايله هموم الدنيا كلها علي كتفها، وقبل العقد قالت ليهم نادو لي احمد اخوي وقالت لي احمد نادي لي سامي دايره اقول ليهو كلام قبل العقد
قال ليها : كلها ساعه وحتكونو مع بعض وبعدين قولي ليهو كل الدايره تقوليهو
اصرت علي انها تشوفو قبل العقد وفعلا سامي جاها : الزينه في البدايه اتوترت وماعرفت تقول ليهو شنو لكن تاني جمعت قواها وحكت ليهو قصتها وقالت ليهو : انا حامل ياسامي وانا مادايره اظلمك معاي عشان كده، ناديتك قبل ماتربط حياتك بي حياتي واحسن تشوف ليك واحده تاني تناسبك !
سامي اتصدم وشعر كانو في سكين طعنتو من الخلف من غير ماينتبه،خت يدينو في راسو ودنقر في الارض ودموعو جرت !
اليوم الكان بحلم بيهو من زمان مع الزينه وفرحتو اتقلبت لي صدمه عنيفه وفضل ساكت وفات خلى الزينه محتاره لكن شعرت بالراحه بعد حكت وفضفضت لي سامي .