الجزء 8
سامي رجع زعلان ومتعصب الزينه قالت ليهو : مالك
قاليها : مصطفى الجبان هرب لكن مصيرو يقع في يدي !
الزينه فرحت واتمنت مصطفى مايجي راجع عشان سامي ما يقع ليهو في مشكله بسببو !
مرت الايام والشهور والزينه ملازمه البيت،وتتهرب من المشي لي خالتها ام سامي وخالتها زعلت منها وقالت لسامي : قول لي مرتك لاتجيني لا اجيك،وحتى احمد اخوها لمن يجيهم في البيت بتمشي تدسه منو وتقول لي سامي قول ليهو : الزينه مشت ناس امي !
الزينه قاطعت اخوانها واهل سامي والدنيا كلها عشان تستر علي نفسها من الفضيحه وسامي كان واقف معاها وباقي ليها ستر وغطاء ... لحدي مابقت علي مشارف الولاده وشالت هم المولود ده حتودي وين ؟
وتنسبو لمنو؟
سامي قال ليها : ماتشيلي هم يا الزينه انا المولود ده بعتبرو زي ولدي
قالت ليهو : وانت ذنبك شنو تنسب ليك طفل جا في الدنيا دي بالخطأ اكيد حتكرهو زي كرهك لي ابوه
قال ليها ربنا يسهل !
الزينه بقت تحسب في الايام للولاده والدكتور وعدها بيوم الولاده بس منعها من الحركه وانها ماتبذل جهد شديد .. بس كان شايله هم البيت وراحة سامي فكانت بتجهز ليهو كل حاجه سامي قال ليها : ماالقاك عملتي حاجه لحدي ماتلدي بس هي ماسمعت كلامو وفضلت مواصله في نضافة البيت والغسيل وو .. لحدي ما في يوم اتزلقت ووقعت
جا سامي لقاها مغمى عليها ولابتتحرك لابتتنفس وطوالي مشى بيها الدكتور وهناك قررو ليها عمليه مستعجله؛
دخلت العمليه ساعتين وبعدها جاهو الدكتور قال ليهو : ماقدرنا ننقذها اتوفت !
سامي ختا يدينو في راسو ووقع في الارض ودموعو جرت،وقال الزينه ماتت؟
الدكتور قال ليهو : لاقصدي المولوده ماتت لكن الام في حاله جيده بس هسي نايمه من اثر التخدير
سامي بين مبسوط وحزين رفع يدينو للسماء وقال : الحمدلله علي كل شيء وربنا ينتقم من الكان السبب
واثناء ماهو بدعي شاف زول جايبنو بالاسعاف دخلوهو اوضة العمليات !
ما اهتم بيهو ومشى للزينه انتظرها لحدي ما صحت وقال ليها : حمدلله علي سلامتك وربنا يعوضنا بمولود جديد
قالت ليهو وهي مبتسمه : سبحان الله ربنا شال امانتو من غير مانتدخل فيها نحنا ودا كلو بسبب صبرك وتقبلك لي ياسامي
وفجأة سمعو صوت مره بتبكي في في الغرفه الجنبهم مشى لقاها دي حياة حبوبة مصطفى وعرف انو مصطفى اتحرقت بيهو عربيتو ومات في العمليه !
اتشهد وقال : اللهم لاشماته !
وعاشوا حياتهم بكل سعاده وهناء
# تمت
" ومن يتق الله يجعل له مخرجا "