الفصل الثالث عشر

خلصت مكالمتها قلت ليها اها؟

قالت لي اها شنو؟ اول هو مصدق؟ هسي قعد يتنخج من الفرحة .. لكن يا فتحي والله دي مسؤولية كبيرة وانا خايفة منها طفلين الولد 11 سنة والبت 9 سنة .. وامهم متوفية .. والله الحكاية دي اصعب مماتتصور ..

قلت ليها كيف يعني كدي فهميني .. قالت لي اولا مابقدر اتصرف معاهم زي امهم .. يعني لو غلطو مابقدر اعاقبهم .. ولو خليتهم على راحتهم بتكون التربية فاسدة ..

قلت ليها ليه مابتعاقبيهم موش انتي ح تكوني في مقام امهم .. قالت لي صح بس في الحقيقة لا. يعني هسي كان هبشت لي واحد واهل امو عرفو بريحوني؟ ابوهم ذاتو احتمال يتحسس .. ومايقبل اني اتصرف معاهم زي تصرفي معاك انت مثلا .. انت ولدي وانا لي الحرية اربيك زي ماعايزة .. وكمان لو اديتهم حريتهم .. ح يطلعو عجين وبرضو اكون ما اديت مسؤليتي .. وما وفيت الامانة ..

اها فعلا انا اتحيرت .. قلت ليها طيب ح تعملي شنو؟ قالت لي بتصرف .. ان شاء الله. ح اتعامل معاهم بالحب والنفسيات .. ولو وصلت لي طريق مسدود .. بستعين بي ابوهم ان شاء الله ..

قلت ليها والله ربنا يعينك يعني انت من مسؤولية لي مسؤلية ...

المهم يازول انا اتصلت علي محمد حاتم وقلت ليهو .. اها يامحمد كلامك مايبقى ونسة يا عمك .. انا جاهز لي الهجرة ..

قال لي بسس ماتشيل هم انا عمي في السعودية .. ماعندو شغلة غير يسفر الناس .. هه ..

قلت ليهو خليهو يبدا لي الاجراءات ..

قال لي خلاص انا برجع ليك واوريك المطلوب منك شنو .. وجيت كلمت امي بالحاصل وامي اتفاءلت شديد.

وهي طبعا" بدت تجهز في نفسها وحددو الزواج بعد شهر .. وكلمت بدرية وكلمت صلاح .. واي زول ببقى لينا ادوهو خبر .. وبدرية قبل اسبوعين من العقد جات قعدت معانا .. جات قعدت معانا في البيت انا كنت بتمنى ابوي يسمع انو امي ح تتزوج .. عشان اشوفو ح يتصرف كيف ويكون شكله شنو؟

كمان قال يجي يسوقني .. والله كويس .. طبعا" انا ما مصدقو في حكاية يجي يسوقني دي .. لانه هو اصلا بكرهني وماعايزني .. يجي يسوقني كيف.؟ كلمة بجي اسوق ولدي دي قالها لي امي. عشان ماتتزوج .. بس حساده وحقد منه .. انا فهمتو اخيرا" ..

لكن كان الله سهل عليهو وجاني قال لي ارح انا عايزك .. بتصرف معاهو ان شاء الله ..

ياخي انسى .. استاذة سامية قالت لي ادفن الالم..

حصلت حاجة في النص كدا ما كانت في الحسبان قبل انا اسافر وقبل الزواج

حاجة اصلو مافي زول بتخيلا .. يوم كنت ماشي مع اصحابي بي شارع الميرغنية بي ورا .. لقيت ياسر اخوي واقف في الشارع .. وقفت الحتة كانت العصر .. جيت سلمت عليهو .. قلت ليهو مالك بي جاي قال لي والله الوالدة عيانة وجبنا لي العصبية هنا .. قلت ليهو وين ممكن امشي اشوفها .. قال لي لالا حالتها مابتستحمل .. ومدينها منوم بالوريد .. لكن تعال سلم على الزول ده ..

قلت ليهو الزول منو دقيقة .. انا طبعا" قايلو داير يسوقني لابوي .. كنت ح ارفض طبعا" لاني عارف الحاصل ..

قال لي اخوك معاذ طبعا طلع من السجن خلينا نعمل ليهو مفاجأة ..

طبعا بصراحة قلبي ده دق دق دق .. لاني عارف الزول السمو معاذ ده واجرامو. قلت ليهو جدا ارح وينو .. مشيت لقيتو قاعد في ضل شجرة وشايل ليهو سبحة .. اول من شافني قال ليهو.. اوعك تقول لي ده فتحي اخوي ..

وابتسم وجاني سلم علي سلام عجيب .. قال لي والله اصلك ما اتغيرت .. وليه مابتجي البيت .؟ انا طلعت لي كم انت ماجيتني .. ولاعارفين جيهتك وين .. وين ساكنين ؟؟

قلت ليهو ان شاء الله بجي .. ياسر قال ليهو والله يا معاذ ابوي ماعايزو يجي.

قال ليهو ليه؟ مالو عمل شنو؟ ابوي ده اكيد ماطبيعي .. طيب هو ماقاعد يمشي ليهو؟ قال ليهو ابدا .. طبعا" ياسر قصد يسمعني حكاية انو ابوي ماعايزني اجي البيت .. ليه ماعارف ..

انا قلت ليهو والله يامعاذ انا ذاتي ماعارف مشكلة ابوي معاي شنو ...

اصلو نهائي لاجاني ولابسأل مني ومرة لاقاني في السوق زي الكأنه مابعرفني .. انا ماماشي ليهو.. وماعندي رغبة اقابلو.. مادام هو ماعايزني.. لكن ياريت تسألوهو انتو من السبب .. معاذ قال ليهو انت ياياسر مأسالت ابوي من الكلام ده؟

قال ليهو هو بقبل زول يتكلم معاهو؟ انا مرة مشيت لفتحي في الجامعة .. لمن عرف كان عايز يقلب البيت .. من الهيجة والكلام الفاضي ..

معاذ قال لي.. ابوي ده بعرف ليك ليهو انا.. اصبر والله ما اخليهو .. هو قايل روحو شنو الزول ده؟؟ والله كرهنا بي تصرفاته الغريبة دي ..

ياسر قال ليهو .. هسي من الوالدة تعبت هو سافر.. على وين مابعرفو.. ومابجي الا يحس بيها بقت كويسة .. بقى يعمل الحركة دي كتير ..

معاذ قال والله قدر ما الزول يحاول يحسن تصرفاته معاهو مانفاع .. لكن بعد كدا انا مابسكت ليهو ..

الشي اللاحظت ليهو انو معاذ ده اتغير من الشخصية الحكو لينا بيها زمان .. امكن السجن ادبو وخلاهو يعرف طريق ربنا .. لكن برضو زول شكله صعب والله وجهامة كدا والله يضرب الحيطة يرميها .. ما زي ياسر ياسر نفس شكل ابوي في الطول والعرض .. انا اي طويل لكن ما عاتي زي معاذ ..

قال لي يازول انت اخونا ونحن مابنخليك عشان كلام ابوي لو ماراضي خليهو مايرضى .. حاجة مابترضي ربنا نحن مابنسمع كلامو فيها .. اديهو ارقامنا يا ياسر خلينا نتواصل يا فتحي .. بصراحة انا حسيت انو اخواني ديل واقفين معاي لكن بعد شنو؟

بعد ما كلمنا سنين العذاب والضيق والمجابدة انا وامي .. لكن الحمد لله ربنا اصلا ما اتخلا عننا ولافرط فينا ..

طبعا" لمن رجعت البيت برضو حكيت لامي وقلت ليها اخيرا الجماعة تاني ظهروا ولاقوني وحصل كيت كيت .. امي قالت لي خلاص معاذ مرق من السجن وابوك جاهو السم القدر غداهو ..

اوع تكون كلمتهم بي زواج امك او سفرك .. قلت ليها ابدا والله ولا اتذكرت ولاهم سألوني ولا اتخاصصو معاي .. كل الموضوع كان عن ابوي وشكلهم همهم الكبير عايزني اكون معاهم ..

قالت لي يازول الفيها خير ليك ربنا يسويها ..

لكن انا في راي ليك تحاول تتخارج تسافر سريع سريع قبل مايحصل اي شي ..

وقبل ما يمشي معاذ يضغط على ابوهو .. والقصة تبقى مافي صالحك وتمشي ليك لي زول اصلا ماعايزك من قلبو انت فاهمني؟ قلت ليها اي نعم فاهمك تمام التمام ..

قالت لي المهم انت اي خطوة تقوم بيها في الموضوع ده اديني خبر

انا

والايام مرت والمواعيد بتاعة العقد قربت وانا جماعتي بتاعين السفر مامنهم اي خبر .. ومحمد حاتم سافر السعودية وكل ما اتصل تلفون عليهو يقول لي اصبر .. وانا ترا صابر ..

شكلها امي ح تتزوج وتسكن في بيتها وانا اكون قاعد براي ..

مامشكلة المهم انا كدا بكون مطمن عليها وبكون مرتاح نفسيا ..

يوم امي نادتني قالت لي تعال توريك الهدايا الجابن لي دكتور اباذر

والله الزول ده عزاها عزة .. ياخي الدهب براهو يجيب الخلعة .. والملابس والحاجات دي كمية .. والقروش دي ربط ربط ..

قالت لي الشي ده ابوك ماجاب لي ربعه .. شوف السعد الجاني على كبري قلت ليها والله يا امي تستاهلي كل خير ..

والله لمن لبست الدهب كدا .. تشبه الملاك .. تشبه عروس في العشرين والله .. اصلا امي الزول البشوفها مابصدق انو انا ولدها بس بقول اخوها .. الكبر اصلا ماظهر فيها سبحان الله ..

قعدنا واتشاورنا في انو البيت ضيق على المناسبة .. واحتمال يجونا ناس كتيرين .. اتفقنا على انو نحتفظ بالبيت ده ونأجر بيت لمدة شهر بس نعمل فيهو المناسبة وكدا ..

امي قالت دقيقة .. اشاور خطيبي ه .. شاورت الدكتور قال ليها لو بتقبلو اعمل المناسبة في بيتي هنا في الصبابي.

وناسكم كلهم يجو يتغدو عندي.. ونعمل العقد عندي .. وانتي تكوني قاعدة في بيتك ده ..

وبعد المناسبة اجي اسوقك رايكم شنو ؟؟ قالت ليهو طيب القروش الكتيرة الجايبها دي نعمل بيها شنو؟..

قال ليها دي مهر ليك انت .. ماعندها علاقة بالمناسبة .. امي قبلت وشاورتنا ونحن قبلنا ..

امي قالت لي ابشر يا فتحي .. حق السفرية بي تذاكرها .. طلع ايويووي.. والله تصدق انا فكرت ابيع دهبي ده واسفرك بيهو.. كنت مفتكرة دي قروش العزومة هه .. لكن الله كريم .. انا مرق لي قريشات ولدي براحة .. عليك الله الام دي في زيها؟؟

المهم فعلا المناسبة اقيمت في بيت دكتور اباذر .. وانا وخالي صلاح واهلنا ملينا عربيتين ومشينا ليهم .. انا من الصباح اتصلت على معاذ وياسر اخواني .. وقلت ليهم الليلة زواج الوالدة .. وانتو مدعوين .. ه وطبعا اصلا ماكلمت امي بالعملية دي .. والاتنين جو حضرو العقد في بيت الدكتور وشافو الدكتور وشافو بيتو وشافو العز الح تنتقل ليهو سامية .. وقلت ليهم انا ح اسكن معاهم في بيتهم ده بيت كبير تلاتة طوابق .. وجنينة يجري فيها الحصان ..

انا مابفارق امي نهائي. وانا طبعا مستحيل اسكن مع زوج امي .. لكن هدفي كله يشيلو الكلام ده يودوهو لي ابوي ..

ومافي اي زول من ناس المناسبة عارف ديل منو ولاصلاح خالي مابعرفهم عليك الله دي حالة دي .. لغاية ما اتغدو وحضرو العقد ومشو ..

اها بعد المناسبة مباشرة .. الدكتور وقف عربيتو معاهو اخواتو اتنين..

وناداني انا وخالي صلاح .. قال تركبو عشان تمشو تسلموني مرتي وماشين على البيت نسلم الراجل عروسو ..