الفصل السادس عشر

انا وكت شفت ياسر طالع بي زوجته .. وماسك ليهو ولد بي ايدو وفي طفل صغير شايلاهو امه العمياء .. قلت ليهو دقيقة يا ياسر .. انت ح تخلي البيت لمنو؟ والوالدة؟؟ .. معاذ قال لي خلي ابوي يتصرف بي طريقتو.. موش عايز يعيشنا على اعصابنا ؟.. بالمناسبة انت ماقادر تتصور الكلام القالو ده خطير كيف؟

قلت ليهو يعني يا معاذ.. ح تكون حسيت احساس اسوء من احساسي انا .. انا عندي يقين انو الكلام ده كذب .. ومستحيل.. حسب معرفتي بي امي.. لكن متحسر.. انو ابوي يكون عايش عمرو كلو.. وهو مفتكر عني دي .. والله ده اسوء احساس .. بس الحمد لله انو كان بعيد مني .. وجواي ماعندو وجود كأب ..

(ده كلو ونحن لسه جنب الباب .. وابوي هنا يعاين لينا ماسامع لكن ولاقال كلمة .. انا قلت لمعاذ ..

بس انا يامعاذ .. هسي طالب انو ياسر يرجع بي اولادوه .. ياسر اصر .. قال لي مابرجع.. انا معاك .. انت لو ماعايزني ..

سوق معاذ وامشو انا بشوف لي اي جيهة تانية .. انا تاني مابقعد هنا .. والله نفسي كشت ..

قلت ليهم ياجماعة امكم ذنبها شنو؟

معاذ قال لي انت بس ارح وانا بحكي ليك الفكرة .. المهم ركبنا مشينا .. وصلنا البيت لقينا بدرية قاعدة وسلمو عليها .. وقلت ليها ديل اخواني.. انتي مابتعرفيهم صح؟.. ده ياسر وده معاذ ودي زوجة ياسر معزة .. زولة جميلة .. طيبة طيبة غايتو .. ربنا يعوضها في عيونها ..

المهم بدرية في البداية كانت مرتبكة .. ومتوترة .. ومامرتاحة لي جية الناس ديل هنا ..

قامت عملت لينا الشاي باللبن .. وهم كانوا مرتاحين ويتونسو .. بدرية ومعزة دخلن جوة.. ومعاهن الاطفال.. ونحن التلاتة قاعدين برة ..

قلت لي معاذ انت فهمك شنو يعني خليتو الوالدة براها؟؟ ..

قال لي اول حاجة طبعا سهير موجودة في البيت .. ومامحاجين لينا نحن .. خليهو هو يتصرف .. يقوم بالشي الكنا قايمين بيهو وبالاصح الكان قايم بيهو ياسر ..

بعدين كلها يومين.. وبغلبو البسويهو.. وبجي براهو يكوس لينا.. واشارطك ح يعترف بالزول القال ليهو كدا ده منو ؟..

ونحن والله الموضوع ده ما ح نخليهو.. الا نوصله اخره .. ياسر قال ليهو ياخي الموضوع ده بخلق بلبلة .. وبعدين سمعة ماحلوة في حق فتحي وامه ..

معاذ قال ليهو ياسر اخوي.. والله انا ممكن اقسم بالغيب.. انو فتحي اخونا .. ودي حاجة انا بحس بيها وانت حاسي بيها .. وفي النهاية الحق بظهر انت بس اصبر ..

اتاريها في نقاشنا ده.. بدرية خالتي كانت راخية اضانها .. وسمعت كل شي .. جات طالعة .. قالت لينا انا ماشة الدكان ده.. وجاية خلو بالكم للاولاد ..

طلعت اتصلت على امي.. وحكت ليها الرصة من طق طق للسلام عليكم .. وجات راجعة زي الكانو مافي شي ..

كلها دقيقتين بعد بدرية دخلت .. امي طوالي اتصلت علي .. قالت لي ده شنو العلملتو ده يافتحي؟

انت مشيت ليهم في البيت يافتحي؟

قلت ليها انت خليك في حالك يا امي.. انا بتصرف براي .. انتي ليه ابيتي تكلميني بالموضوع ده؟.. انت قايلاني انا مابتحمل؟ انا راجل وعارفك انتي شنو؟ ..

وثقتي فيك بتخليني اتصدى لاي اتهام باطل ..

قالت لي انا بجيكم في البيت .. قلت ليها لالا ..

انا الصباح بجيك هناك يا امي.. واحكي ليك وتحكي لي اصبري بس اصلك ماتتحركي عشان خاطري ..

قالت لي هوي يافتحي .. انت متأكد من الناس ديل؟؟

قلت ليها ايوة متأكد .. والله وقفو معاي وقفة رجال .. وطلعو من البيت زعلانين من ابوهم.. بي سبب الكلام ده ..

قالت لي خلاص خلاص.. انا بكرة لمن اتصل عليك.. اقول ليك تعال لي.. تعال ..

لمن اكون براي واباذر يمشي بديك خبر .. قلت ليها اتفقنا.. وقفلت الخط على كدا ..

المكالمة دي كانت قدام معاذ وياسر.. بعد خلصت قلت ليهم دي امي..

الظاهر بدرية وصلتها خبر انكم هنا ..

معاذ قال لي عليك الله ارجع ليها .. واديني ليها في التلفون .. قلت ليهو جدا .. اتصلت على امي تاني ..

وقلت ليها معاذ اخوي عايز يتكلم معاك هاك ..

سلم عليها .. وقال ليها اول شي مبروك .. وان شاء الله ربنا يجعل ليك فيهو الخير..

بالنسبة لي فتحي .. اصلك ماتشيلي همو .. والله نحن نختو في عيونا .. والله الكلام القالو ليك ابوي ده.. نحن متأكدين انو مجرد افتراء واتهام .. واوعدك انا شخصيا مابرتاح.. لو ما وصلت الكلام ده لي حدو ..

امي قعدت تتكلم معاهو.. وهو بسمع ونحن ماسامعين ..

في النهاية قال ليها .. ده ابوي وانا عارفو.. وعارفو امورو .. اصلك ما تتزعزعي.. بي سبب تصرفاتو المامسؤولة.. وفي النهاية فتحي راجل .. ومامحتاج لي عطف وحنان زي البنات .. ياهو ده ماشاء الله راجل يسد عين الشمش .. بس انتي زي ماقال ليك خليك في حالك.. وحياتك ..

سكت مسافة اظنها سألتو من ياسر .. قال ليها ياسر يهوده .. جنبي هاك ياسر عايزنك ..

ياسر سلم عليها سلام .. كلو طيبة ونقاء وسلامة قلب وضوق واضح .. وقال ليها والله اصلي مانسيتك .. وكل مرة بتذكرك .. وحاسي انك مظلومة .. لاني الحادثة الزمان ديك بتذكرها.. زي البارح ..

اها المهم المكالمة انتهت .. وودعها واداني التلفون ..

قلت ليهو والله يامعاذ .. كلامك ليها ده كان بالجد مهم .. لانها ماكانت مطمئنة.. حتى لي وجودكم معاي .. بسي سبب الخوف من ابوي وتأثيره عليكم ..

قال لي ايوة صح.. وليها الحق ماتكون مطمئنة.. بعد الكلام البقول فيهو ابوي ده ..

انا ذاتي بقيت ما مطمن ليهو.. ممكن يوم يطلع في راسو يقول معاذ ده ماولدي .. وفي زول كلمني قال لي شفت بي عيني.. وتخاريفو البقول فيها دي ..

المهم يازول يومنا داك بيتنا في البيت.. الضيق الفي الاملاك ده .. واتونسنا وانا كنت مرتاح بوجودهم معاي .. ياريت كنت معاهم من زمان.. الله يجازي الكان السبب.. وحرمني من اخواني كل الفترة دي ..

اتعشينا وبيتنا قمنا الصباح .. فطرنا وانا كل مرة بعاين لي تلفوني.. امي تتصل علي .. بعد الفطور وانا البصرف علي البيت طبعا امي خلت لي قروش كويسة .. بتقعدني شهر لي قدام ..

المهم يازول امي اتصلت علي .. وقال لي تعال لي.. انا في المغتربين في شقة .. في الحتة الفلانية ..

ركبت ركشة مشيت ليها المسافة اصلا مابعيدة .. دقيت ليها الباب لقيتها براها .. ومنزعجة شديد .. وبتعاين لي في وشي .. خايفة انو الكلام يكون اثر علي .. قالت لي اسمع يافتحي ..

يهوده المصحف قدامي.. انا هسي بتوضا.. وبحلف ليك.. انو انا مافي راجل قرب مني غير ابوك .. واقسم بالله العظيم انت ولده للاسف الشديد ..

انا قعدت اضحك .. قلت ليها لو انا بطالبك بانك تحلفي لي.. يبقى انا غبي مابفهم .. انا عارفك انتي شنو يا الغالية .. والله لو ناس الدنيا دي كلهم جوني.. وقالو لي شافوك بي عيونهم.. انا مابصدقهم .. بصدقك انتي .. في زول في الدنيا دي قعد معاك اكتر مني؟

وكت سمعت الكلام ده بكت بكا .. وظهرت فوقها اسارير الفرحة.. من جديد .. قالت لي اها احكي لي الحصل شنو؟

بقيت احكي ليها .. من طلعت من البيت لغاية ماجو معاي ناس معاذ..

قالت لي الله يبارك فيهم.. والله اولاد حلال .. غايتو ياسر ده انا من صغير بريدو ريدة ماطبيعة .. وكان بريدني اكتر من امو الولدته ..

انا والله ما دام اخوانك واقفين معاك كدي .. كدا يادوب اطنت عليك ..

واسمعني كويس اعتبريني مافيشة .. وشق طريقك براك .. واثبت حقك ..

انت بقيت راجل .. وشيل حيلك.. انا خلاص.. تاني بقيت في عصمة راجل .. وعندي واجبات واطفال مافاضية .. وانت براك اخترت لي الطريقة ده.. واصريت علي ..

قلت ليها يادوب كدا فرحتيني .. ودي العايزا انا .. بس زي ما اهتميتي بي فتحي.. تهتمي بي اولاد الدكتور .. قالت لي ياسلام على الدكتور.. يا سلام على الادب والطيبة .. تتخيل لغاية الان ماسألني قال لي المشكلة الفي التلفون شنو؟ ولا حتى غير تعاملو معاي .. غايتو انسان ملاك يا فتحي ..

قلت ليها طيب الحمد لله.. تستساهلي كل خير يا الغالية.. ربنا داير يعوضك سنينك الفاتن .. لكن ماقلتي لي ابوي ده في التلفون قال ليك شنو بالضبط كدا؟ ..

قالت لي عليك يافتحي انساني من كلامو .. ياهو اتهامو الماعندو طعم ده ..

قال لي الولد ده ماولدي .. وانا عارف كدا .. ماتمثلي علي .. وانا سكت ليك كتير .. لكين بعد كدا مابسكت ليك .. الولد ده مايقرب من اولادي.. لانك لاقطاهو من حتة.. ما اخوهم .. لو سمحتي تاني ما اشوفو مع اولادي .. ولا اسمع بيهو قرب منهم .. ده كلامو بالنص ..

وسكتت مسافة .. وقالت لي سهير كيف؟ ما لاقيتها؟ .. قلت ليها والله مالاقيتها .. ولا اتذكرت اسأل منها.. انتي ماعارفة الحصل علي شنو .. انا والله وكت قال لي كدا زي الفصلت كهربا من الوجود ..

قالت لي كرعلي يايمة .. ان شاء الله يا الامين.. ربي يفصل كهربتك ..

ويوريك ليهو في الدنيا قبل الاخرة.. شكيتك علي الله .. قلت ليها يا امي.. قولي يالطيف .. انتي موش قلتي تاني مابدعي عليهم .؟

قالت لي لكن قدر ده؟.. تحصل معاي لغاية كلام قدر ده.. حسبي الله ونعم الوكيل ..

قلت ليها كلها امتحانات من الله.. وانتي علمتيني المسامحة والصبر .. نسيتي الكلمة القلتيها لي .. انا كل مرة بتذكرها ..

خلي قلبك مدافن للالم .. ورش عليها موية السماح.. خليها تنبت فوقها زهور السلام والامان لي ابوك واخوانك .. نسيتي؟؟

قالت لي والله صاح.. استغفر الله العظيم .. لكن الحمد لله الامتحان كان علي قاسي ياحبيبي ..

قلت ليها بس انتي اصبري .. نحن هسي العملية العملناها دي.. عشان يعترف بالزول القال ليهو الكلام ده منو؟ .. ونحن بنعرف الحقيقة بأذن الله .. ونغسل ليهو دماغو الوسخان ده .. قالت خلاص ان شاء الله ربنا يوفقكم قلبي معاكم والله ..

المهم اطمنت على امي.. وطمنتها على حالي كويس .. وطلعت منها .. ماقعدت معاها اكتر من ساعة ..

رجعت البيت لقيت خالتي بدرية ومعزة .. واخواني الاتنين مافي .. قلت ليهم فاتو وين؟.. قالت لي طلعو على السوق يجيبو حاجات الغدا قال كدا ..

قلت ليها لكن ده كلام ده ياخالتي؟ قالت لي والله انا اتكلمت معاهم.. لكن قالو لي.. لو انتو عادين الحالة واحدة.. خلونا نتصرف بي راحتنا ..

قلت ليها يازولة فيها خير .. وقعدت بلعب مع محمد ياسر ود اخوي وهو يادوب بتعلم في الكلام .. (اقول ليهو..قول فتحي... دود فتي .. فتحي!! .. فتي... طيب قول بابا.. بابا.. مسافة كدا .. الجماعة وجابو الحاجات المهم ..

عدينا تلاتة ايام في البيت.. زي الماحصل شي.. كان الوضع اكتر من طبيعي .. وخالتي بدرية قالت لي انا بمشي بيتي.. بعد كدي الراجل ده بطلقني .. هسي العرس ليهو خمسة يوم ..

تاني مافي حاجة بتقعدني.. جبنا ليها امجاد.. جنب الباب وفاتت..

بقينا برانا .. نعمل اكلنا برانا ونتونس ..

بعد اربعة يوم بالتمام والكمال .. ابوي اتصل على ياسر .. قال ليهو خلاص تعالو .. انتو موش عايزني اوريكم منو القال لي الكلام ؟؟.. على الطلاق اقول ليكم.. واليحصل يحصل ..

ياسر قال ليهو ح يجي معانا فتحي .. لو فتحي ماجا معانا .. نحن ماجايين .. ابوي قال ليهو جيبوهو .. انا مالي؟؟ ..

انا في النهاية كنت عايز مصلحتكم .. وعشان ما يضايقكم زول ما اخوكم في حقوقكم ..

قال لي يا ابوي هي وينها حقوقنا البضايقنا فيها؟؟ .. ياهو بيتك ده ولاشي تاني ؟؟ فتحي مامحتاج ليهو ..؟

نحن جايين .. قفل مو الخط ونحن نعاين .. قومو ياجماعة ارح طوالي..

معاذ قال .. هاهاها .. انا قلت ليكم شنو؟ موش قلت ليكم الخطة دي ح تنجح وح يعترف .. الله اكبر .. سريع يلا ارح قبل يغير رايو ..

الكلام ده كان زي الساعة 1 ضهر .. خلينا العفش والشنط في البيت. وسقنا معزة واولادها وقفلنا بيتنا.. واتحركنا مشينا ركبنا. وصلنا السامراب .. لقيناهو راجينا وقاعد ..

ياسر دخل مراتو جوة .. ومعاذ قال لي ابوي قبل ما نقعد كويس .. عايزين نعرف الحقيقة .. ولا ح نرجع هسي .. قال ليهو انا ناديتكم عشان اقول ليكم القال منو ..

بس توعدوني .. انكم ماتمشو تسألوهو.. ولا تقومو في الكلام ده .. لانها المسألة فيها خطورة علي وعليكم.. لو عرف اني اتكلمت .. معاذ قال ليهو خطورة؟؟ .. خطورة من ياتو ناحية؟؟ .. وده منوى الانت خايف منو قدر ده ؟؟

ديل ناس الموساد ولا المافيا ؟؟ قول يا ابوي عليك الله وخلي الباقي علينا .. بلاخطورة بلا بطيخ ..

قال ليهو جدا بقول ..