الفصل التاسع

المراة بعد شربنا الشاي قامت من كويعتا ديك .. وقعدت على حيلا ومدت كرعيها الاتنين.. وقعدت تتكلم .. قالت ليها طبعا ياحبيبتي .. ماشفتي الحصل الولد الكبير الاهبل الاسمو معاذ ده .. واحد خملة وابوهو مدلعه .. وابوهو بخاف منو موت .. والولد باري ليهو شلة خسيسة .. وبتاعين هلس. امي قالت ليها هلس يعني شنو؟

قالت ليها صعاليق وتافهين.. يا حبيبة امك .. اها شفتي يابت امي الولد.. كل يوم جاي بي مشكلة .. وابوهو طبعا مطول ليهو يدو في القروش .. وعندو عربية كوريلا.. شاحنها اولاد وحايمين الشوارع يكوركو ويصفرو..

كم مرة قبضوهو ناس النظام العام وابوهو يمشي يفكو .. وبعزق قروش ابوهو دي بعزقة .. قالو بدفع للبنات بالملايين .. في البداية كان ابوهو بتكلم معاهو زي الخايف منه .. تاني بقى بنهر ابوهو في الشارع ويشاكله .. في ناس قالو مرات بضرب ابوهو .. لكن ماشفناهو الموت حار ..

لكن الشفناهو بوريك ليهو صبرك علي .. بس الشي المتأكدة منو .. انو بقى يعامل ابوهو زي الهو سيد الحق.. والامين مؤجر عنده ..

الولد ده بكره امو كراهية اصلو انا ماشفتها في حياتي .. وعداوتو كلها بس لي امو.. وابوهو واخوهو ..

طبعا اختهم ديك اتزوجت وساكنة في السلمة.

اها الولد يايمة كل يوم ماشي زايد في البسوي فيهو .. يوم امو اتاخرت ماكوت ليهو قميصو.. دي نحن حاضرنها .. جاها قدام الناس لطشها لطشة السواد والرماد ..

لامن ورم ليها وشها ..

اها يوم كدي قالو حصلت تهمة في بلاغ .. بتاع اغتصاب طفلة في الديوم.

وناس المباحث جو بالليل صحو الولد من نومو ساقوهو ..

وطلع هو المغتصبين .. وحكمو عليهو بي سبعة سنين سن معاهو اربعة تاني وهو خامسهم..

بس من اليوم داك عايدة بقت ماطبيعية .. وتتكلم براها وتسرح .. وكل يوم حالتها ماشة متأخرة .. ودوها للشيوخ ماخلو ليها حاجة .. في النهاية قابلو بيها الدكاترة.. واظنها رقدت مستشفى اكتر من تلات مرات واصلا مابقت كويسة

وبقت تجيها خيالات .. كم مرة تقوم بالليل تمشي تهاجم الجيران وتقول ليهم الامين متزوج منكم .. واتوهمت عديل .. عشرة خمسطاشر يوم لاتستحمى لاتسرح شعرها ..

قام الامين سفرها المانيا .. وهناك قالو ليهو المراة دي عندها مشكلة الجينات الوراثية .. وفعلا المرض ده عندهم في الاسرة موجود .. عندهم خالهم قالو لغاية مامات هو عيان .. وهسي بيني وبينك الولد الاسمو معاذ ده ماطبيعي برضو .. الشي الشفتو عليهو .. شغلة جن عديل ..

بس الولد الكويس الصغير الاسمو ياسر ده ..

طبعا عايدة مسكينة ياسامية.. كترن عليها الهموم الصدمات .. عرسو فوقها مرتين.

امي قالت ليها مرتين؟؟؟

كيف يعني؟؟ الامين اتزوج تاني بعد انا مشيت؟

قالت ليها .. اومال شنو؟؟؟

قالو ليك يا يمة عايدة سمعت بانو الامين متزوج في اللاماب .. والناس بقو يتكلمو .. وعايدة اصلا ابت تتكلم معاهو بس ..

ركبت مشت اللاماب .. معاها اختها ليلى .. قالن يمشن يدقن العروس دي .. لمن وصلن هناك قالو العروس مسكتن الاتنين ودقتن دق العيش .. ومعطت عايدة وسلمتها شعرها في يدها ..

وهم ضربوها في عينها وشقو ليها جبهتها .. وحصلت مشكلة وبلاغ .. والمراة طلبت تعويض دفعه الامين.. وطلبت الطلاق بالمحكمة وشالت منو قروش لا ليها اول لا ليها اخر ..

والامين اتبشتن.. وحالتو بقت تحنن.. اها بعد عايدة طبعا عيت .. والامين باع الوراهو والقدامو.. عشان يعالج المراة لي اولادها .. لكن ما اتعالجت.. وباع البيت ده ..

واشتروهو الناس المقاطيع ديل مابعرفهم جاين من وين ..

والامين مشى اشترى ليهو بيت في السامراب .. وهسي قالو عايدة في السامراب معاها ولدها الاسمو ياسر .. واخواتها .. وحارسنها وبالليل بقفلوها في الاوضة.. عشان ماتمرق ..

اها بعد داك الامين طبعا سمعنا قالو سافر .. لكن سافر وين ولشنو ما اتعرف ..

في ناس قالو مطالبنو قروش.. وفي ناس قالو مرق يشتغل .. والحقيقة مامعروفة .. غايتو ده كل العارفاهو.. والحلة هنا كلها عارفة.

النصيحة لله يابت امي .عايدة كانت زولة مواصلة.. والناس كلهم بعرفوها ومتابعين اخبارها .. هسي عندنا جارتنا (عرفة) دي.. البابها فاتح علينا دي.. قالو اول امبارح كانت مع عايدة في البيت وجابت اخبار لا ليها اول لا ليها اخر.. لكن انا لاهسي مامشيت شفت الشمار شنو؟

امي تسمع في الكلام قامت بكت .. قالت ليها مالك ياختي بتبكي؟؟

بت خالك ولا بت عمك .. انا قلت احتمال امي دي بكت.. لانها حست بانو الله انتقم ليها من الناس ديل .. والمراة شافتها متأثرة. قايلاها حانة عليهم ..

امي قالت ليها لالا مافي حاجة .. بس هسي انا عايزة اعرف الامين وين .. عشان اوصل ليهو ولدو ده.. يشوفو ويسلم عليهو.. الظروف مامعروفة ..

قالت ليها والله ياسامية عاد.. ما بعرفو لكن ان صبرتي لغاية ما يجي ابو اولادي بعدين.. بدينا الاكيدة اصلا كان مع الامين طوااالي وبكون عااارف اخبارو .. بس انا مابقدر اسأله براي .. لكن لمن اقول ليهو دي طليقتو وده ولدو .. بورينا .. رايك شنو؟

امي قالت ليها لكن هو بجي الساعة كم؟ ..؟ قالت ليها تلاتة تلاتة ونص بكون هنا ..

امي قالت ليها مامشكلة بنتظر.. احسن من ارجع ساي .. وقعدنا انتظرنا .. انا متمحن وقاعد بعاين .. في البيت الماخمج ده.. لابس لي بنطلون جنز .. وجزمة بيضاء .. ونضيف زي ولاد الخرطوم ..

المراة دي قاعدة في البيت براها.. مامعاها الا الحبشية دي.. بس من جات الساعة 2 بدو الناس يجو.. جات بتها بتقرا في الجامعة .. وجاء ولدها كان شغال.. وجاء راجلها واخوها .. والناس ديل اتلملمو ..

بس امي قالت ليها اسألي لينا الرال ده من الامين خلينا نمشي .. قالت ليها مابتمشو لو ما تغديتو ..

بعد الغدا انا بسأل ليك الراجل ده من الامين مشى وين؟

الجماعة ختو الغدا .. وانا طبعا دخلت مع الرجال.. الراجل وولده واخو المراة تقريبا.. وقعدنا نأكل .. والراجل بقى يدردش معاي .. زول ظريف خلاص ..

قال لي انت يازول والله بتشبه ابوك شبه التعاريف .. ومن متين ماشفت ابوك؟

قلت ليهو قريب الاربعة سنة ..

قال لي والله الامين ده ماعارف ,, اقول عنو شنو.. قلبو قاسي ولا اقول بخاف من مراتو واولاده .. والله انا لو في مكانه مابفرط في جناي لو القيامة قامت ..

اخو المراة شكلو الكلام اكل معاهو جنبه.. قعد يضحك ضحكة حسيسة كدا.. وقال ليهو ايوة انا متأكد انك ماممكن تعملا لو كنت سكران .. وقه قه قه قه.

قال ليهو والله انا اصلا ماعندي رغبة في المشاكل الزي دي .. اها عاجبك الحاصل ده؟

المهم الونسة كانت ونسة مقتضبة ومسيخة .. وراجل المراة شكلو زول ماعندو موضوع ومستهبل ساي لكن ظريف ..

اها انتهى الغدا والمراة كوركت لي راجلها.. مشى ليها اظنها سألته .. وجات كلمت امي .. امي بعد شوية .. طلعت وكوركت لي.. يافتحي يافتحي .. يلا نمشى مشوارنا طويل. طلعنا ..

في الشارع ونحن طالعين سألتها قلت ليها اها .. قالو ليك شنو؟ ابوي مشى وين؟ بس مايكون مات .. ونحن ماعندنا خبر ..

قالت لي المراة سألت راجلها .. وقال ليها الامين بسافر القاهرة وبجي.. شغال تجارة بين مصر والسودان.. ليهو قريب سنة ..

ولو عايزين تعرفو اخباره اكتر.. تمشي لي اولاده في السامراب .. وصفت لي البيت .. انت يا فتحي عايز تمشي ليهم تٍسأل منه؟ .. علي كيفك .. لكن بالجد انا بخاف عليك من المراة العيانة الفي البين دي .. هي وقت كانت نصيحة عملت معاي ماعملت.. بي حقدها وسوادة نيتها .. فما بالك هسي بقت عيانة وعنيفة .. ومهلوسة ..

فانا ما بنصحك تمشي ..

قلت ليها البتقوليهو يا امي.. خلاص ماماشي.. ارجعاكي اهلنا .. ورجعنا اهلنا ..

في الشاراع قلت ليها يا امي انا عايز اسألك سؤال

انتي قبيل لمن المراة بتحكي بكيتي ليه؟ متأثرة عليهم .. ولا شمتانة ؟؟ قالت لي والله لا دي .. ولا. دي ..

انا بكيت ندمانة .. انا كنت بدعو عليهم وبشكي لله .. وشفت بي عيني دعوة المظلوم عملت فيهم شنو؟ والله لو عارفة ده بحصل عليهم ما كان دعيت عليهم .. الله يمرقنا من الظلم يا ولدي .. لكن ابوك اصلو ما بتعظ ولابفهم ..

هسي من الحصل عليهو ده.. المفروض يعرف انو ظالمك .. ويجي يفتش عليك.. ويسأل منك.. ويشوفك محتاج لشنو؟

حتى لو ماعندو قروش.. نحن ما محتاجين لقروشو.. بس المفروض يكون قريب منك على الاقل .. انت تحس بي وجوده في حياتك ..

لكن يافتحي انا بوصيك .. اصلك ماتدعي عليهو .. وادعي ليهو .. وخلي قلبك مدافن للالم .. ورش المدافن بي موية السماح .. خليها تنبت فوقها زهور السلام والامان ليك ولي ابوك واخوانك ..