الفصل السابع عشر

ابوي فرك يديهو كدا .. وقال ليهو يامعاذ .. انت بتعرف شيخ مصطفى؟ .. قال ليهو ايوة بعرفو ..

قال ليهو شيخ مصطفى مرة ناداني مخصوص .. وقال لي .. يا الامين .. انا عايز اقول ليك كلام.. والكلام العايز اقولو ليك ده خطير .. وانت لو مازول عزيز علي.. مابقولو ليك .. ولو اتكلمت بيهو.. انت عارف انا ممكن اعمل شنو؟ .. قلت ليهو اتفضل ياشيخ مصطفى .. بدون ماتحذرني .. كلامك مابطلعو الا اموت. قال لي انت عندك زوجة جديدة؟ قلت ليهو نعم ..

قال لي وهسي حامل؟ قلت ليهو نعم..

قال لي حرفها االاول بالسين وابوها حرفو بالباء؟ قلت ليهو نعم. قال لي الجنى الفي بطنها ده ماحقك يا لامين .. وده شي انا شفتو بي عيني جاني في الخيرة ..

وانا صدقتو طوالي الزول من الصالحين ..

وانا طبعا" يامعاذ اشك في عيوني .. وما اشك في شيخ مصطفى .. اها لمن سامية ولدت فتح الرحمن .. وكل ماكبر بقى يشبهني ..

بقيت شاكي. في كلام شيخ مصطفى .. لمن بقى الولد.

عمره عشرة سنة.. بقى بشبهني شبه شديد خلاص .. اهملت كلام شيخ مصطفى.. ورجعت مرتي وولدي .. لكن بقيت مامرتاح وخايف .. يوم شيخ مصطفى رسل لي مشيت ليهو .. قال لي انت يعني مامصدق كلامي ؟؟ قلت ليهو لكن ياشيخ مصطفى

الولد ده بشبهني شديد .. قال لي الشبه ده من الوحم.. لانك مقابل الام طوالي .. وأكد لي كلامو الاول وحذرني من الشك في كلام الشيوخ .. وقال لي انا بدمرك وادمر عايلتك كلها لو بتشك في الصالحين ..

وانا خلاص من اليوم داك تاني ماشكيت في كلامو ..

بس يامعاذ لو مشيت سألته تاني ..

انا وانت بنضيع الشيخ ده خطير وسرو باتع .. وانا مجربو بي نفسي .. اي حاجة بقولها بتحصل زي ماهي ..

معاذ قال ليهو والله يا ابوي اصلا ماكنت متخيل انك تكون جاهل للدرجة دي .. وتصدق كلام الدجالين في عرضك .. وتنكر ولدك بي سبب كلام زول بدعي علم الغيب مع رب العالمين ..

هسي انا قايلو زول شاهد بعينو .. وممكن يشهد في المحكمة يطلع شيخ عراف بفتح الكتاب وبجر السبحة؟؟ ويتهم ليك عرضك بالخيرة؟؟

ياخي اتقي الله .. انا شخصيا مامقتنع بي شيخك ده .. ومابخليهو والله مابخليهو ..

سبحان الله انا طبعا بسمع في الكلام ده.. وبضحك من الجهل الغريب.. الغرقان فيهو ابوي.. ومتحسر على انو ابوي يكون الشخصية الغريبة دي ..

خليت ابوي وقبلتا على معاذ .. قلت ليهو شيخ مصطفى ده منو يا معاذ؟

قال لي ده شيخ الاسرة.. والقديس بتاعهم من زمان.. بمشو ليهو. من انا طفل .. لو جاتني حمى ساي .. بمشو اول شي يجيبو لي منو البخرة والمحاية.. قبل مايودوني للدكتور .. ولو قال ماتمشو للدكتور .. مابودوني ليهو .. فهمت الحاصل؟

لكن اسمع يابوي .. شفت لو السماء ده انهدا انا ح أمشي لي شيخ مصطفى محلو واسأله من الكلام ده قسما" عظما .. نفتح فيهو بلاغ بتاع قذف. واحتمال قبل البلاغ انا اكسرو ليك .. الراجل المعتوه ده ..

قال ليهو اسمع يامعاذ .. انت ح تعمل لي مشكلة وفضايح. معاذ قال لي ياسر .. ياسر سكينك وينها؟ الشيخ ده انا الليلة بكتلو قبل ما يفكر يضر ..

قومو ارح هسي في الحظة دي والله دقيقة مانقعد .. ابوي قال انا بمشي معاكم وانا البتكلم معاهو .. معاذ قال ليهو يلا انت اصلا" لازم تمشي.. ركبنا مشى ليهو في حي من احياء الخرطوم الجنوبية .. وصلنا الراجل لقيناهو راجل كبير اكبر من ابوي ..

وسلمنا عليهو وقعدنا .. ابوي قال ليهو ياشيخ مصطفى ديل اولادي والموت والحياة ما معروف انا عايزك تقول ليهم الكلام القلتو لي قبل اكتر من 24 سنة وانا لاهسي كاتم السر .. لكن الحق حق والباطل باطل ..

شيخ مصطفى قال ليهو والله يا الامين مانا ماعارف اقول ليك شنو؟؟

اول حاجة الكلام ده انا زمان ماحكيتو ليك بالطريقة الصحيحة .. لكن انا برضي بقيت عقاب عمر عايز اقول ليك الحاصل .. الموضوع ده انا لاكشفتو في الكتاب ولا ظهر لي في خيرة ..

انا يا الامين جاتني زوجتك عايدة.. واختها ليلى .. وعايدة لي قالت لي الامين اتزوج ليهو مراة جديدة وسمعتها ماكويسة.. والامين اعمى وقلبو ماابشوف الا يكونو عاملين ليهو عمل البت ماكويسة واهلها ماكويسين والامين اصر يعقد عليها .. ماقلنا شي وقبلنا بالواقع ..

بس يوم المراة حملت والامين عيان .. شهرين مامشى ليها.. لمن رجعت رجعت حامل .. والامين ماعايز يصدق كلام زول .. نحن بس دايرنك تعالج الامين .. ولو اقتنع بالموضوع ده ياشيخ مصطفى ليك هدية نص وقية .. انا قلت ليها الدهب يطير.. انا اهم شي احذر الامين من جنى الحرام .. لاني بصراحة صدقت عايدة وليلى.. وكانن الاتنين بحلفن بالله العظيم ..

وانا عارفك ي الامين بتقتنع بي كلامي.. وعقيدة فينا قوية. قلت اقنعك بالموضوع ده كدا .. لكن والله ياهو الحكيتو ليك ..

ابوي ده قال لا اله الا اشهد ان محمد رسول الله .. الله يلعنك ياشيخ مصطفى .. الله يلعنك .. نوعك ده البخلي الاولاد .. يبقو ملحدين ويكرهو الدين .. نوعك ده البخلي اولادنا يبقو تكفيريين .. في زول بصدق كلام الضرة في ضرتها ياراجل يا جاهل؟

انت ماظلمت المراة المسكينة براها .. انت ظلمتها هي.. وظلمتني في ولدي الانا محروم منو طيلة السنوات دي .. وحرمت الولد وفرقتو من ابوهو واخوانه .. وظلمت اولادي وحرمتهم اخوهم .. انت ح تقابل ربك كيف يارجل؟ .. انت عارف زول بموت سكران افضل منك .. فعلا انا راجل جاهل.. وابو فاشل البسمع كلامك ..

انا بس دخلت في حالة ضحك وبكاء.. هستيرية وماقدرت اقيف منها .. وماعارف الحصل علي شنو؟ انا اصلا" من زمان متأكد اني انا ولد ابوي .. لاني ما حصل عاينت في المراية.. وماظهر لي ابوي قدامي.. في ملامح وشي .. قال وحم قال .. وحم ياوحم؟

وياسر بقى يقول الله يسامحك يا امي.. اعوذ بالله من غضب الله.. اعوذ بالله من غضب الله ..

معاذ زعلان زعل .. والله عيونو ديل زي الشرار.. ويعضعض في يديهو.. مرة يعاين للكهنوت .. ومرة يعاين لابوي .. وابوي ماقادر يعاين في وشي من الخجل ..

الشيخ قال ليهم يا الامين عليكم الله تعفو.. مني الموت من الحياة مامعروف .. الامين قال ليهو انا ماعافي منك دنيا واخرى ..

انا قمت طلعت ياسر حصلني قال لي ماشي وين؟ قلت ليهو خلاص

تاني في شنو؟ مالكم قاعدين متمحنين؟.

الشيخ قال لي انت الولد المقصود؟ قلت ليهو نعم يامولانا .. قال لي سامحني ياولدي ..

قلت ليهو سامحتك وسامحت ابوي وسامحت خالتي عايدة .. ومن جوة قلبي.. وان شاء الله ربنا مايعاقب زول فيكم بي سببي .. وربنا يعفو عننا اجمعين ..

صراحة انا قلبي نازف دم.. ومافي شي ممكن يخفف علي غير المسامحة .. وقلت كدا مخصوص عشان ابوي مايكلف نفسو ويجي يقول لي سامحني .. ومعاهد الله اني ادفن الالم جوة قلبي.. وارش عليهو موية السماح .. واخليهو دايما ينبت زهور السلام والامان ..

معاذ لمن سمع كلامي .. بكى .. لاول مرة اشوف الزول ده دموعو نازلة .. قلت لابوي .. يا ابوي لو سمحت اعفو عن الزول ده .. ربنا يعفو عنا وعنك.. ابوي ابا يعفا منو وطلع على كدا ..

وركبنا امجاد .. مشينا بحري .. وطيلة المسافة مافي زول اتكلم مع التاني .. وابوي ده انا اول مرة اشوفو مكسور ومنهار بالطريقة دي .. انا نزلت منهم .. قصاد السوق .. قلت ليهم انا ماشي البيت .. ابوي قال لي لمن تصل لامك اديني ليها في التلفون .. قلت ليهو رقمك مامعاي .. قال لياسر اديهو رقمي يا ياسر ..

ياسر ملاني الرقم .. وانا داير امشي كدا ابوي قال لي .. فتحي ممكن تجينا بكرة او بعدو .. وبتكلم بي كل انكسار.. يادوب شفت في عيونو نظرة الوالد العطوف سبحان الله.. ماتتخيل احساسي كان كيف .. قلت ليهو حاضر يا ابوي.. انت تامر بس .. انا اصلا بكرة ح اجيكم .. اجيب حاجات اخواني ..

دقيت لامي وقلت ليها انا الصباح بجيك .. قالت لي انت وين؟ قلت ليها في البيت .. والصباح مشيت ليها في الشقة .وقعدت حكيت ليها الفيلم من قولة تيت .. للنهاية .. امي دي اصلا ما حصت عليها ردة فعل.. غير انها بتتبسم وبتعاين لي .. قالت لي انت عارف اكتر حاجة مفرحاني في الموضوع ده شنو؟ .. راحتك انت النفسية. انا اصلا الامين مافارق معاي.. يقول عني شنو؟ دي مرحلة من حياتي واتعدت..

قلت ليها قال عايز يتكلم معاك .. قالت لي ماعايزة لي منه كلام ..

قلت ليها .. عشان خاطري .. قالت لي كويس اتصل عليهو ..

المهم دقيت عليهو واديتو ليها وماعارف قاليها شنو؟ لكن امي رمت ليها دمعتين حاراااات حقات مغسة شديدة خلاص .. وقالت ليهو ربنا يسامحنا يا الامين .. انا ماخلاص ربنا كتب لي حياة تانية .. ابقى عشرة على ولدك .. مع السلامة .. والعفو في العافية .. وقفلت الخط ..

عاينت ليها كدا وقلت ليها .. خلي قلبك مدافن للالم .. قالت لي ورش عليهو موية السماح.. قلت ليها وخليهو ينبت فوقو زهور السلام والامان ..

المهم اتونسنا واتهكمنا فوق مولانا الكهنوت المجرم.. الغشنو الحريم .. وضيع لينا سنين حياتنا في البهدلة ..

امي قالت لي عارف يا فتحي؟ الحصل لينا ده كلو لي خير .. اولا انت لو كنت مع ابوك ده .. ماكنت نجحتا النجاح ده .. لاننا انا وانت كنا في تحدي للفشل .. وانا ربنا كاتب لي حياة سعيدة مع انسان بحبو وبحبني وماعندي ضرة احمد الله .. مع ابوذر لا قوالات ولا حساسات ولامشاكل .. زولي براي .. قلت ليها زولي وحبة بندولي .. المهم ودعتها وقلت ليها انا بمشي باقي اليوم ده .. واحاول اودي الشنط والحاجات حقات اخواني ..

مشيت شلت الحاجات وقفلت البيت وطبلتو تمام .. ومشيت السامراب .. اول ما وصلت قلت ليهم .. انا عايز اسلم على اختي سهير .. سلمت عليها .. وسلمت على خالتي عايدة .. وحالتها كويسة.. لكن ماطبيعية مية المية .. يعني تحس بيها تايهة كدا .. .. لي درجة انها ماعارفة انا منو؟ .. ربنا يكتب الشفا ..

وابوي يعاين لي انا داخل وانا طالع .. وماعارف يقول شنو؟ شكلو الندامة كاتلاهو .. بالجد انا عايز اخفف عليهو الاحساس ده لكن ماعارف كيف ...

قعدت معاهم اليوم داك .. واتونسنا كلنا مع بعض.. بكرة قلت ليهم انا ماشي .. ابوي قال لي ماشي وين يافتحي؟ انا بتمنى تفك ايجار البيت ده وتجي تقعد معانا .. قلت ليهو .. ان شاء الله .. بس انا صراحة نفسيا صعبة علي طوالي كدي اجي اقعد معاهم .. ممكن لي قدام ..

وبقيت يوم بمشي ليهم وتلات يوم بكون في بيتي في الاملاك ..

وهنا انتهت قصة مدافن الالم .. ودفناهو الى الابد .. وكتير من الناس دافنة الام تئن منها الجبال .. ولو الزول مابنسى .. كان ممكن يموت بالذكريات المرة .. الحمد لله ...

بعد عشرة او 15 يوم من الكلام ده اتصل علي محمد حاتم وقال لي جهز اوراقك .. ودخلت في الاجراءات بتاعة السفر .. وكلمت ابوي انو انا جاني عقد عمل مع شركة مقاولات في الخبر في السعودية .. وامي كانت مبسوطة .. والحمد لله ربنا سهل لي وسافرت واشتغلت هنا في الخبر بي راتب ماكنت بحلم بيهو في النوم ..

الان انا في السعودية لي خمس سنوات .. تقريبا .. وفي الفترة دي اصلا مافكرت ارتبط .. بس كان همي اساعد ابوي واقيف معاهو عشان يقيف على حيلو .. والحمد لله ساعدت ابوي كتير ..

وفتحت ليهو مغلق في شارع المزاد .. وهسي هو فتح المغلق التاني. في الحلفايا .. وماشي كويس شديد ..

وعملت لي اقامة لي معاذ اخوي وسفرتو.. هسي هو في الطايف.. ليهو 8 شهور.. وبقينا انا ومعاذ شغالين قصاد البيت.. الحمد لله في امان الله .. وياسر اخوي عمرنا ليهو الدكان الفي السامراب .. وشغال في امن وامان .. وامورنا ماشة باسطة .... وشهريا برسل لي امي مرتبها من اول يوم اشتغلت فيهو .. امي هسي عندها بنيه زي القمر.. اسمها (سجى اباذر) .. اختي بت امي يعني.. عمرها 3 سنة .. وامي تشيل وتشكر في راجلا هههه..

اما ابوي كل تلات يوم بتصل علي .. ويطمن علي .. لمن امش السودان اجازة .. ببطل اي حاجة عشاني .. الحاج بقى بحبني اكتر من اخواني كلهم .. امكن داير يعوضني اللي فات .. او انو عايز يعوض روحو .. اها هسي قبل يومين اتصلت عليا الوالدة وقالت لي .. انا عايزاك تأخد اجازة وتجي. انا رشحت ليك واحدة .. زي الملاك .. خلاص كفاية تعال اتزوج ..

قلت ليها يا امي انا يادوب كملت البيت .. خليني اجهز عفشي .. واجي .. مابنتظروني شهرين؟؟ .. قالت لي راجنك.. دعواتكم معانا انو ربنا يوفقنا .. ويكفينا شر العوارض .. وفتكم بي عافية .. وربنا يسعدكم..

ويوقيكم شر الفتن ماظهر منها ومابطن ..

... النهاية ...