الفصل الثالث

صالح لمن طلع من بيتي كان مقلق ومرتبك اكتر من الاول .. قلت ليهو يا صالح ماتشيل هم .. ان

شاء الله ربنا يمرقها من النزيف ده وتقوم بالسلامة ..

قال لي انا بمشي المستشفى لازم.. حتى لو حاولت اتخفى من ابوي ..

اناقلت ليهو طيب ياصالح .. انت امشي انتظرني في كوبر. انا بمشي الشركة وبجي القاك اسوقك

معاي. ومايحصل الا الخير ..

انا ملاحظ حاجة .. ماعارف دي وسوسة مني ولا حقيقة .. طول المشوار الانا ماشي مع صالح ..

صالح بعرق وبجف .. ويطلع المنديل يقش جبهتو .. ويتنحنح ..

انا يتخيلي الزول ده اتخلع من شوفة نادية .. لانو بالمنطق كدي. اذا كانت الحالة دي من وضع

سارة .. يعني شفقان عليها وكدا. المفروض يكون من الاول .. قبل مانجي بيتي حتى .. صح؟

المهم ماعلينا ..

احسن ما اقعد اسوس في الفاضي .. واتشكك في اقل قليلة. اتخيلي دي غيرة ساي .. لاني بحب

زوجتي جدا .. وعاجباني شديد بتخيل انو الناس كلها بتعجبها ..

المهم مشيت الشركة .. واخدت الاذن.. وجيت راجع وصورة نادية مابتفارق مخيلتي .. بالجد انا

متيم بي نادية شديد .. لكن انا زول اهبل. ومابقدر اعبر ليها عن الجواي .. وما مديها وقتها

الكافي ..

والغريبة في الموضوع.. اني لمن اكون في البيت بكون عادي. وتلقاني بعاين للتلفزيون. وللا

ماسك لي جريدة. ونفسي اطلع لي اصحابي. اوالميدان والفرن والنادي. لكن لمن اكون بعيد

منها بشتاق ليها شديد .. زي ماقالو البعد حن ..

اها لقيت صالح منتظرني في كوبر .. جمب السينما القديمة. مع واحد من معارفنا كدا.

نزلت ليهو .. وسلمت على الزول وركبنا انا وصالح ومشينا المستشفى .. الكلام ده زي الساعة 12

الا شوية نهار.

الحمد لله لقيت سارة وعت شوية .. بس لسه ما مجمعة .. ومدروخة كدا بطريقة مخيفة. انا

شخصيا اطمأنيت عليها جدا ..

طبعا صالح واقف برة.. انا قبل ما ادخل قلت ليهو دقيقة .. اكلم ابوي اشوف مويتو كيف .. اها

وكت دخلت على ابوي.. وشفت سارة وحمدت ليها السلامة .. وكت شافتني بكت .. سارة بتريدني

اكتر من اخوانا الاتنين .. انا مع اني زول سخن.. لكن حنين على اخواتي .. وما برضى فيهم حاجة

.. ودمعات سارة كانها بتشتكي لي من صالح ..

اها قلت لي ابوي يا ابوي صالح جا معاي. سألتك بالله يابوي ما تسألو

هو هسي ندمان وماعارف يقابل سارة كيف.

عليك الله ما تتكلم معاهو .. ابوي مربع ايديهو .. وصرا وشو وقبل غادي. انا حسيت بي انو

ماعندو مانع .. مشيت ناديت صالح من برة يجي يشوف سارة .. وسارة لسه راقدة .. وفي عيونها

في زي دم متقطع كدا .. وعيونا من تحت مورمة شوية وفيها سواد كدا .. ..

بالله التقول ضربتها كراكة .. يعني دي ماكانت بونية دي .. صالح زول فقر ..

اول من صالح جا داخل .. قال السلام عليكم .. لا امي ولا ابوي ولاسارة مافي زول رد عليهو

نهائي .. جا ماشي على سارة كدا داير يشوفها .. سارة قبلت بي وشها على الحيطة.. وابت تعاين

ليهو نهائي.

طوالي بقى متخارج ..

صالح اخوي عمرو زي 34 سنة. وهو اكبر زول في البيت .. واكبر مني كتير يمكن بي ستة سنة

وهو كان متسلط فينا نحن تسلط شديد .. لكن انا بعد كبرت بقيت بشخت ليهو عادي.. بس بحترمو.

حنك اخوي الكبير وكدا ... لكن لو داير اقصقصو بقصقصو .. نحن الاتنين بي نفس الطول والحجم.

والكتوف اتلاحقت زمان ..

عشان كدا لمن يعمل حركات .. ناس البيت بستنجدو بي ..

تلفوني ضرب. عاينت لقيتها دي نادية. قالت لي انت وين ياشمسي؟ قلت ليها انا في

المستشفى .. قالت لي انا دايرة اركب اجيكم رايك شنو؟ انا عايزة اشوف سارة ..

قلت ليها اصبري ماتجي .. سارة بقت كويسة احتمال للمساء كدا يخرجوها ونمشي ليهم في البيت ..

قالت لي عيب اليابا ياشمس الدين.. هسي ناس امك يقولو شنو؟ عليك الله خليني اجي ..

قلت ليها عليك الله يانادية سيبي اللياقة .. انا هسي مافاضي .. انا بكلم امي .. بقول ليها نادية

كانت جاية وانا حميتها..

قالت لي خلاص .. بس جنك تقول لي سيبي اللياقة .. انا اصلا" ماشة وين؟ موش لي اختك؟ .. يلا

مع السلامة ..

انا كلمت امي .. قلت ليها يا امي دي نادية .. كانت جاية براها وانا حميتها .. امي قالت لي عملت

كويس .. سارة هسي ماعندها عوجة

انا رجعت طلعت بره .. لقيت صالح قاعد وتاكل ضهرو على الحيطة ومحتار .. وموعارف يرضي

الناس ديل كيف .. لكن هو زول شوم اصلو مابتعترف بي غلطو ولا بعتذر ..

بعدين الحق يقال .. صالح زول دوغري اكتر من اللازم.. وجنو صلاة .. وماعندو علاقات مع البنات

ولا فاضي .. ماعندو نفسيات اساسا لي تسلية وكلام فاضي .. يعني اصلا عايش في حالة نفسية

جاي بيها من بره .. وهسي مشكلتو مع ابوي بي سبب سارة تمت الناقصة ..

انا قعدت جمبو .. قلت ليهو غايتو الحمد لله جات على خير .. سارة كويسة .. وابوي زاتو كونو ما

اتكلم معاك.. ده تنازل وتقدم ملحوظ

بس انا كنت دايرك تعتذر لي سارة ..

عاين لي كدا .. وقال لي اعتذر ليها؟؟ اعتذر ليها ليه ؟؟ انا غلطان ولا غلطانة هي؟

هي الارتكبت الغلط .. وتستحق العقاب .. فهمت ولا اوضحك ليك الفهم.

انا قلت ليهو ماعايز اتجادل معاك.. لكن اسلوبك في معالجة الغلط كان غلط. قال لي اسمع انا

ماشي الخرطوم .. عندي اصحابي ديك الفي جبرة ماشي ليهم .. ولا انتظر ردي .. قام على حيلو

ونفض بنطلونو وفات .. انا بقيت بطمش واطفش من هنا لي هنا .. غايتو العصرية كدا زي اربعة

ونص خرجونا ورجعنا البيت .. وانا مشيت لي بيتي ..

لقيت نادية قاعدة في الحوش برة وبتعمل ليها في فوطة بتاعة طربيزة

اصلا هي بتعمل النقوش فوق القماش.. دي هوايتها من زمان ..

ولابسة احسن لبس.. وفي كامل الشكل المطلوب دوليا واقليميا.

اول من شافتني اتبسمت .. وقالت لي عارفاك الليلة حتجي بدري ..

مشتاقة ليك موت .. قلت ليها عليك الله هسي خليهو الشوق .. نحن ح نطلع بعد شوية اوديك لي

ناس بيتنا ..

صالح ماجا هنا؟ .. قالت لي ابدا من طلعة الصباح معاك.

هو مشى وين؟؟ ياحليلو والله .. صالح ده مسكين.. وانتو ماحاسين بيهو ..

المفروض الناس تقدر ظروفو .. والله كان بتكلم قبيل .. وظاهر عليهو التاثير والندامة ..

قلت ليها عليك الله يا نادية قومي اعملي حاجة اكلها .. عشان نطلع سريع ..

قالت لي في مكرونة باللحمة المفرومة تاكل ايدك وراها .. دقايق بس حبيبي .. قامت تسوي

الغدا وانا طبعا بعاين ليها من فوق لي تحت .. ولمن تتلفت علي .. بقبل على جيهة تانية ..

ماعارف ليهانا بعمل كدا ؟؟ .. جواي احساس بقول لي .. ما توريها انك مكسر فيها ..

واحساس تاني بقول لي.. لو المراة عرفت انو راجلها ميت فيها .. بتستبد عليهو وبتطغى .. بس

معارف المعلومات دي جاياني من وين .. يعني بس حياتي كلها معاها اوامر ونواهي .. وكلام

رسمي ..

الكلام الحلو الكان قبل العرس داك كلو .. بقيت مابقدر اقولو خالص ..

مرات كتيرة بقول لي نفسي انا محظوظ بوجود نادية في حياتي .. وكتير بقول انا مابستاهل نادية

لاني مابشبها لافي شكلي لا اخلاقي.

بصراحة عندي علاقات مع بنات مابساون ضفرها. ولا يبقو خدامات ليها ..

وجوه احساسي انا ماراضي من روحي. ..

بس تقول شنو. طيش وكلام فاضي .. مع انو علاقات بتاعة ونسات ساي. الحمد لله انا مابعمل

حرام نهائي. لكن بتونس. وبكضب عليهن زي بقية الشباب ..

والله مرات بكون بتكلم مع الواحدة في التلفون .. لمن اتذكر نادية بكره روحي .. وكم مرة

بتشاكل مع الواحدة بدون سبب عشان اقطع علاقتي بيها .. عشان ريدة نادية ..

والغريب في الامر .. ولا يوم ماحصل نادية شكت فيني .. ماحصل يوم قالت لي الرسالة دي من

منو؟ ولا فتحت تلفوني بالغلط ..

يعني المشاكل البسمعا عند اصحابي بتعملا ليهن الحريم .. حكايات تحنن .. انا ماعندي نهائي ..

اها بعد المغرب طلعنا انا ونادية ومشينا بيت ناس ابوي .. ولقينا سارة كويسة ..

ونادية مسكتها واتقالدن يبكن .. وقالت ليها انتي ياسارة ماعارفة صالح احمق .. كان تكلميهو قبل

تطلعي .. بعدين تمشي تجي الساعة واحدة ليه يعني؟ .. اي زول في محلو بفقد اعصابو ..

قالت ليها والله يانادية عارفة نفسي غلطانة .. بس تقولي شنو؟ ما انتبهت للبحصل. ونحن اصلا

كان المفروض نجي بدري .. لكن العروس اتأخرت .. وصاحباتي اصرن ينتظرنها لمن تجي .. المهم

الحصل حصل انتي كيف؟

ومالك يادي ما بتجينا؟ طولت مننا طول شديد. يعني هسي ليك اكتر من اسبوعين ماجيتينا ..

طبعا انا بعاين ليهن الاتنين بتكلمن مع بعض ..

نادية قالت ليها .. عمي احمد وينو ياسارة؟ قالت ليها طلع المسجد صلاة العشاء بجي هسي ..

قالت ليها انا عايزة اتكلم معاهو .. واتوسط لي صالح عشان يرضى عنو.. ويخليهو يجي البيت ..

قالت ليها والله مااا أظنو .. لانو ابوي من ما جاء البيت.. بتحلف ويتجزم .. قال والله تاني مايعتب

البيت ده ..

طبعا " انا حاسي انو نادية ما مرتاحة لي قعدة صالح معانا في البيت.. لانها حتكون مقيدة .. في

بيتها. ولو ابوي رضا منو .. وخلاهو يجي البيت. بتكون نادية ضربت عصفورين بي حجر .. واحد

نالت شرف الاصلاح بين الوالد وولدو .. وتانيا ارتاحت من ضيق صالح معانا في البيت .. ده طبعا "

المنطق بقول كدا ..

اها يازول ابوي جا وسلم عليها بي كل ترحاب .. وقالت ليهو الف سلامة عليها ياعمي ..

قال ليها الله يسلمك يابتي .. مصايب الدنيا تقولي شنو؟ قالو التجي من السماء تتحملا الواطا ..

نسوي شنو عاد قدرنا كدي ..

قاات ليهو ياعمي انت كلك نظر .. عارف انو صالح ماكان قاصد يأذى اختو. بس ايدو فلتت .. انت

لازم تبقى قلبك كبير .. وما تفقد ولدك الكبير بي سبب غلطة هو ما قاصدها.

قال ليها ماقاصدها كيف يا نادية؟؟ الولد بضرب في البت قدام امها وابوها .. يعني انا ميت مثلا؟؟

نادية قالت ليهو بس ياعمي هو مازول غريب .. هو اخوها الكبير ..

قال ليها اخوها الكبير لمن اكون انا مافي ..

المهم بقو يتناقشو هي وابوي. وانا عرفت انهم ما حيتوصلو لاي نتيجة .. لانو ابوي مقوي راسو

اخدنا قعدتنا معاهم .. وشربنا الشاي .. ورجعنا البيت .. في الشارع

نادية قالت لي انت قلت لي صالح مشى وين؟

قلت ليها قال ماشي لي اصحابو في جبرة .. واصحابو ديل وكت يمشي ليهم .. بقعد معاهم 3

اربعة يوم .. يعني مابجي الليلة ..

نادية قالت لي يعني الليلة عندنا برنامج؟ قلت ليها ياريت.

قالت لي بس بشرط.. انت الليلة ماتطلع تاني.. هسي بتقول لي ماشي لاصحابي .. وتجيني

الساعة مية بالليل تلقاني دايخة ..

قلت ليها لالا الليلة ما ماشي اي حتة .. ولاعندي اخلاق اطلع.

نادية صلت البيت .. وولعت الحفرة .. وقجت البيت كلو زي كمينة الطوب. وقامت اتزينت .. بي

كامل زينتها .. واتعطرت ولبست ملابس النوم .. والحوش ده كلو بقى عطور. انا اشك انو الجار

الرابع شامي الريحة بتاعة الخمره ..

وجهزنا السراير برة ..

اول من جات قعدت جمبي ... الباب كوكو .. كوكو ..

وصوت صالح من برة يكورك .. يا شمس الدين .. افتح الباب ..