الجزء 11
وبدت الايام تمر وانا ع نفس الحالة وكل يوم اسوأ من القبلو لا بتكلم مع زول ولاعندي حيل اضحك واهظر مع زول حتى امي بقت مهما تعمل م برد عليها كنت ف حالة لا وعي .....بالنسبة لامي وابوي كان الموضوع انو ايمن كان قريب لي شديد ومن صغار مع بعض عشان كدة اتأثرت بموتو بس م عارفين انو الجواي اتجاه ايمن اكبر بكتير....لغاية م جا رمضان وبتذكر كانت النتيجة تقريبا يوم 15رمضان الناس كلها متلهفة للنتيجة الا انا وبعد خلص المؤتمر م بعرف للحظة نسيت كل شي ودخلت رقم جلوس ايمن اللي حافظاه زي اسمي ويمكن اكتر ايمن جاب86.9وانا جبت89.1وكانو ذاكرتي اتمسحت او جنيت ابتسمت وبقيت ازغرد انو ايمن جاب نسبة عالية رغم انو عيان لبست طرحتي وعبايتي وجريت ع بيتهم عشان اصحيه واوريه النتيجة بس اول م دخلت غرفتو اتذكرت انو مات 💔انو ايمن م عاد موجود وانو م حيمسك يدي ونمشي نقدم سوا انو م حنسافر سوا للجامعة ف نفس البص ونجي راجعين سوا اتذكرت انو احلامنا سوا دي مستحيل تتحقق تاني ولاول مرة من تاريخ وفاتو انا ابكي بحرقة واصرخ من جواي واوري الناس وجعتي ع ايمن بكيت وكانو اول مرة ابكي فرغت كل الكاتماهو جواي بكيت وصرخت بقدر وجعي خالتو انتصار جات وضمتني شديد وبقت تبكي بحرقة ماف واحدة فينا قادرة توقف بكا ولاحتى تصبر التانية واحدة فاقدة اصغر اولادها وحتة من قلبها حتة من روحها ويوم نتيجتواللي مفروض يكون اسعد يوم ف حياتها كان يوم نواح وبكاوالتانية فاقدة صاحبها اللي م اتفرقو لحظة من فتحو وحبيبها سندها وضهرها وحب حياتها اللي ضاع منها وم كانت قادرة تعمل ليه حاجة كل واحدة جواها كسر م يجبرو الا رب العالمين
جات امي ومحمد اخوي بقو م عارفين يهدو منو ويخلومنو اما ابو ايمن دي فدي كانت اول مرة اشوفو بيبكي فيها صحي دموع الرجال م هينة لانوكان ظاهر فيه الانكسار وشو مليان حسرة بس مضطر يصبر رغم انو الصبر قاسي محمد اخوي ساقني وبقي يتكلم معاي وانا اكتفيت بس بالبكا
محمد:وتين حرام عليكي البتعمليه دة انتي بتعذبي فيه مش كان احسن لو مشيتي صليتي وقريتي ليه قرآن ......امشي عايني لنفسك ف المراية دة لو عرفتي نفسك اساسا اتغيرتي شديد ي وتين الزعل بدل ملامحك كلها ي اختي التفتي لنفسك شوية وين وتين الكانت بشوشة وضاحكة حتي صوتك م بتسمعيه لزول وعازلة نفسك حتفضلي كدة لمتين .....دي وصية ايمن ليكي ي وتين?تجازيه بالطريقة دي ?فاكرة هو حيكون مبسوط لو كان عايش وشافك كدة
_م بيدي ي محمد ...حاسة روحي بتتسرق مني ف كل لحظة ونار جواي م عارفة اطفيها كيف كل يوم بحلم بيه كل ليلة بكون سهرانة وبتخيلو بيناديني اشتقت لكلامو لهظارو لشكلو والله حتى المشاكل اشتقت ليها انا م عايزة شي من الدنيا دي بس عايزة اموت زيو م عايزة حياة ايمن م فيها
محمد:استغفري ربك اول لانو دة اعتراض ع امر الله قومي غسلي وشك وصلي ليكي ركعتين بترتاحي
رغم انو محمد اصغر مني بس ف اللحظات ديك كان اوعى مني بكتير وفتح عيوني ع حاجات كتيرة م كنت ملاحظة ليها بقيت شوية اتكلم ....بس نسيت كيف ابتسم واضحك من قلبي بعد ايمن بتناقش مع ناس البيت عادي بس اغلب الوقت ف الاوضة ماسكة مصحفي وقاعدة ف مصلايتي بالجد القرآن دوا لحاجات كتيرة وبيخفف علينا اوجاع ممكن عادي تقتلنا من شدتها وامي طريقة تعاملها معاي اختلف بقت بتتكلم معاي بطريقة احسن وتجي تتكلم معاي انو لازم احاول اطلع من الحالة دي هنا اتأكدت انو ماف زول كعب للاخر وماف زول كويس للاخر بالجد وقدمت للجامعة وشالوني ف جامعة النيلين المختبرات بس انا حولت لجامعة الامام المهدي.كلية الصيدلة م كنت عايزة احقق حلم ايمن م معاي فيه وم كنت قادرة افارق المكان اللي فيه حياتي انا وايمن وريحة امي وايمن فيه طبعا مازن كان دايما معاي زي م وصاه ايمن دايما كان بيقيف معاي ويساندني كانت سنتو الاخيرة ف الجامعة وخلصت السنة بدون م نحس بيها ومازن اتخرج ورجع الامارات وكان مفروض يجي عشا يطلع الشهادة ويأدي الخدمة وكدة...............
يتبع ف الفصل الثاني والاخير
من هنا يبدأ الفصل الثاني