الفصل الأول
انتو دي مش بت سوسن الجايه ماشه دي؟
اااي ياها زاتها والله من مشيتها دي م شايفاها ماشهه تتقدل كيفن؟؟
أجي مالها متكمكمهه بالتووب كده دخلت الاسلام فجأة؟
ههههههههااااي شايفااااها ليها زمن بقت تتكمكم كدهه زي الزول المجرم الخايف من حاجه
هخخخخخ والله لكن حنشووف العجب صحي الله بهدي
ياااا دي انتي م جاده قايلاها متكمكمهه من ايمانها الزااايد يعني ههخخخخخ بتعمل كده عشان تدااري على عمايلها انتي ناسيه هي بت منوو ولا شنوو اجي
هههههههااااااااي اااي والله نسييييت انو جنى الفار بطلع حفار هي وامها من نفس الطينهه على قول المثل المصري اقفل القدره على فمها تطلع البت...تميها؟؟
لأمها طبعا وين ابوها الحتطلع شبهو دة
لأمها طبعا ولسسسه ابوووي شغال يقول لي بت احمد مؤدبه بت احمد محترمهه بت احمد م بتطلع من بيتهم ولا في الشارع م بتتلقي وهو م عارف البييير وغطاه يغسي عامله فيها جايه من الحواشهه وهم م عارفين انو مصايبها وبلاويها كلها بتعملها في الحواشهه ...
ي بتي هيييي الحلهه كلها عارفها هي شنوو بس ابوووك رايحهه ليهو
الكلام الفوق دة كان عني انا من بنات الحله اثناء م كنت جايه من الحواشه حقتنا وراجعهه البيت... احيانا الحياة م بتكون عادلهه معانا ابدا بالعكس بتقهرنا وبتعيشنا حجات يمكن من الصعب انو نقدر نستحملها بس بنعيشها غصبا عننا علشان حياتنا تستمر وعلشان نحن مجبورين وم بيدنا شي نعملو غير انو نستحمل لانو الواقع فااارض علينا كدة، والمصيبهه بتكون في انو احيانا نحن ربنا ببتلينا بإبتلاءات ونحن في عمر ي دوووب ممكن نقول انو جسمنا في مرحلهه التكوين بس مع الضغوطات والمشاكل وكترهه المهاترات البتكون في حياتكك عقلكك حيكون اكبر من عمرك ربنا ببتليك الابتلاءات دي وانتي صغير عمر بس بالمقابل بديكك الحكمهه في التصرف، حيديك عقل بوزن بلد، بديك عقل بيعرف كيف يتصرف ومتين، ووين، لو ملاحظين انو معظم الناس المرت عليهم مشاااكل وضغوطات في حياتهم وهم في عمر صغير ديل بالزات بكون انجح واعقل ناس القصه بتكون في انو احيانا المعاناة والظروف الصعبهه بدل م يكون تأثيرها سلبي بالعكس بكون تأثيرها ايجابي عليكك والايجابيهه بتظهر في طريقه تفكيرك وحكمتكك البتتصرف بيها في المواقف الصعبهه
في ناس بقولو تصرفاتكك بتعكس تربيتك واهلك بس بالعكس اي تصرف انت بتتصرف بعكس شخصيتكك انت وياما شوفنا ناس اهلهم ماشاءالله عندهم مكانه في المجتمع بس هم بتصرفاتهم م كانو بمثلو اهلهم والعكس وزي م بقولو يطلع من ضهر العالم فاسد الخلاصهه انو الانسان هو البمثل نفسو هو البحدد الطريقو الهو عايز يمشي فيهو ماف حاجه اسمها الظروف هي الخلتني امشي في الطريق الغلط بالعكس الظرووف هي البتحدد مدى قوتك ومدى ضعفك ربنا بختك في ظروف صعبه علشان يختبرك
طيب تعالو اعرفكم على نفسي شويهه انا شهد حاليا عمري 21 سنه حأحكي ليكم قصتي دي بدت كيف... من وانا صغيره فتحتهه عيوني على الدنيا لقيت جدي وحبوبتي حوالي انا من وعيت على الدنيا لقيت نفسي عايشه معاهم هم اللي اول خطوات حياتي كانت معاهم، جدي اسمو احمد بقولو ليهو شيخ اللمام اصلا الاسم الصحيح الامام بس على حسب اللهجهه بتاعهه بلدنا بقولو ليهو اللمام وحبوبتي اسمها عائشهه، عايشين في قريه صغيره من ضواحي النيل الأبيض قريتنا صغيره وبسيطه بس بالنسبه لينا جنه طبيعه، وخضار، وبحر، يعني اول م تدخلها تديك طاقهه ايجابيه كدة فظيعه
جدي طبعا مزارع عندنا حواشات بنزرع فيها المحاصيل على حسب الموسم، وكمان عندنا زريبه بقر وبهايم في البيت، طبعا بيت كبييير استاد كوره بس ههه نص ساكنين فيهو والنص التاني جدي عاملو زريبه للبقر والبهايم وكدة بيتنا حلوو بكل تفاصيلو وبساطتو شجره النيمه، راكوبه حبوبه البتشرب فيها القهوة، يعني كل حاجهه فيهو تتحب انا شخصيا متعلقه بي جدي شديد لأبعد الحدود هو الطيبه والحنيه والدفى بإختصار هو كل شي بالنسبه لي مع انو حبوبه بحس تجاها نفس الشي بس جدي بحبو اكتر
لما كنت صغيره كنت شيطانه وشليقهه شلاقه م طبيعيه ياخي قليله ادب عديل زي اااخر العنقود مش دايما بكون قليل ادب وناقص تربيه؟بس دي انا زاتي بتزكر جدي عندو حمار لما يقوم طالع الحواشه الصباح انا بتشعلق فيهو بقول إلا ماشه معاها اشيل واصرخ واتمردغ في التراب بس إلا ماشه مع جدي يووومي انا عامله ليهم طابور خامس هههه...حبويه م كانت بترضى يشيلني في الحمار لأنو الحمار كان كبييير وعالي وبتخاف علي من الوقعهه بتزكر كانت بتقول لي جدي:
ي حاااج هااا انا مليون مره كلمتك البت دي م تسوقها معاك في الحمار، في الحمار م تسوقها معاك، مابتسمع كلامي،
جدي: اها اعمل ليها شنووو ي مره انتي براك شايفه بتك زي القرادة إلا ماشه معي لو مشيت خليتها والله تقوم فيك الدنيا وم تقعدها عارفاها براااك...
حبوبه: والله ي حاج انت براك عودتها المشي وقله الادب مليون مره قولتلك م تسوقها معاك اي مكان بس مااااا بتسمع الكلام البت دي ماف زول خارب طبعها الا انت...خلاص جيبها م تسوقها ولا شي الخلا زاتو بكون شمس زي الزمن دة حبوبه عايزة تشيلني امسك ليك في عراقي جدي واقعد اصرخ
جدي: شايفاها صح؟يلا خليها اسوقها معااي بس م بنفع...
حبوبه: والله ي راجل ترميها تتبالى بيها براك، البت دي خربته طبعها وخليتها تبقى قليله ادب اسي اللبن م شربتو سايقها معاك على لحم بطنها كدة؟جدي يرفعني في الحمار ويركب ويمشي يخليها تهرج وتشاكل ساي وقتها كنت صغيره شديد كل يوم حبوبه وجدي في حاله النقاش دي، جدي مره مشى الجامع علشان يصلي العصر طلعته وراهو وهو ما منتبه لي اصلا انا بتبعو اي مكان
لابسه نعلاتي وعندي جلباب حلااااتو كدة لابساهو وماشه وراهو لما وصل الجامع وبدو الصلاة شايفه الناس بتقوم وبتقع وانا م فاهمه شي اها مع الركوع بقيت احبى بي تحت الرجال هههه طبعا شافوني بس ماف زول اشتغل بي في الركعه التالتهه وهم ساجدين بقيت البع فيهم وطلعتهه في ضهر واحد كدة قام الراجل شالني وختاني على جن بس مع رفعتو دي فكيت ليك الصرخهه ومع صرختي دي المصلين كلهم قطعو صلاتهم واتلفتو علي حتى الامام قطع صلاتو غضبو مني غضب جدي ساقني جابني البيت وصلى في البيت لما حكى لي حبوبه حبوبه الضحك شرطها
قالت ليهو م قولته ليك البت دي علمتها المشي والكواسه تاني م بتنقرع يلا استحمل مش اي مكان ضابيها في طرفك في يوم حبوبه وجدي قاعدين في المظله حقتهم بشربو في القهوة ساااي وانا قاعدة تحت شجرة النيمه حقتنا بلعب وانا اصلا حاجه ثابته لو لقيت باب الشارع فاتح بطلع بطلع
واساسا حلتنا بيوتها متداخله في بعض وناس الحله معروفين يعني لو طلعته من بيتنا الشارع كلو بعرف انو دي شهد بت شيخ اللمام هههه انا لبسته سفنجاتي حبوبه كانت مسرحه لي واحدة المهم طلعته الشارع وبالفعل لاقتني جارتنا رجعتني بس خليتها مشت بي جاي وانا طلعتهه بي جاي لفيت في الشارع كداااا من الساعه 2 ظهرا انا بره البيت لحدي المغرب وجدي وحبوبه ديل قلبو علي الدنيا والبسألوهو كلو بقول ليهم م شوفناها او شوفناها كانت بتلعب مع الشفع في الشارع، م خلو مكان م فتشو علي فيهو
حبوبه كانت واقفهه في الشارع ومقلقهه جاتها جارتنا قالت ليها هيييي ي عشه قالو لي م لقيتو شهد؟حبوبه قالت ليها ااااي والله م عارفنها مشت وين قطعت قلوبنا المره قالت ليها والله انا قبيل لقيتها في بابكم دة بس دخلتها وجريت الباب اظنها طلعت تاني حبوبه قالت ليها حييييي كان تجيبيها لي جوة عديل اسي ي ربي مشت وين البت دي انا عارفاها م بتقعد وم بتعرف شي م يخطفوها بس المره قالت ليها لالا البخطفها منو تكون مشت ليها مكان بس في وقفتهم ديك جات مره شايله ليها طشت ملابس في راسها...قالت لي حبوبه حجه عشه سلام عليك
حبوبه قالت ليها اهلا ي امنهه كيفك انشاءالله كويسه؟المره قالت ليها كووويسهه الحمدلله انتو بتكم دي فاكنها في السهله ساااي مالكم ي حجه عشه؟قالت ليها بلهفهه لقيتيها وين محلها اسي نحن من الصباح كايسنها المره قالت ليها يعلم الله لقيتها في البحر مااااااااشهه ولا هاميها شي والله كان تغرق حبوبه قالت ليها شنوو في البحر؟ ووينها اسي خليتيها وين وووب علي المره قالت ليها بري م خليتها ولا شي ياها رابطاها في ضهري ناااااااااايمهه حلات الدنيا عليها طبعا كنت نايمه في العسل ولا همي
حبوبه قالت ليها عليك النبي شووووف البت دي فكتني وشالتني والله نايمهه في سابع نومهه كل الحصل انو انا مشيت لفيت لمن وصلته البحر لقيت نسوان كتار بغسلو من ضمنهم المره دي وهي بتعرفني اساسا لأنها بتجي تشيل اللبن من ذريبه جدي المهم مسكتني
حبوبه قالت ليها عليك النبي شوفو شقيه الحال دي قطعت قلوبنا ورجلينا بالتفتيش نحن قولنا خلاص شالها الشالها او مشت البحر وغرقت، والله خالها ابو القاسم مرق بإتجاه، وجدها بإتجاه، والله انا اسي رجلي ديل م شايلاتني من الخوف، المره قالت ليها م تخلوها تطلع تاني، حبوبه قالت ليها بتغفلنا غفلان الشقيهه دي، ...
هههه اليوم داك اظن اول يوووم جدي يجلدني فيهو ياخ جلدني جلد زعل الا مسكني منو خالي
طبعا خيلاني اتنين، حمد وابو القاسم خالي دة استاذ لغه عربيه بدرس ثانوي واساس، طبعا قريتنا على حسب انها نائيه وبسيطه بتعاني من مشكله اسمها التعليم والصحهه اول شي مدارس تعبانه ولا ممكن اقول عليها منتهيه عديل وماف مدرسين واساسا اهل قريتنا م مهتمين بي قصه التعليم دي كتير والواحد لو قرى بالكتير بقرى لحدي تامن اهلنا اقصى طموحاتهم انو يربونا يحدي م الواحد يكون عندو حواشه وبهايم يرعاهم وبكدة بكون كون مستقبلو دة بالنسبه للولد اما البت من عمر 14_15 سنه يعرسو ليها واحيانا بعرسو ليهم من عمرهم 10 سنوات ههه اصلا وين هي المدارس البتفتح النفس للقرايهه وين التوعيه للأهل البتمنعهم يزوجو القاصرات؟...واضافه لي كدة م عندنا مستشفى بس عندنا مركز صغير فيهو خدمات طبيه بدائيهه...يعني لو في زول عيااااان ووضعو الصحي تعبان لو ودوهو المركز علشان يعالجوهو حيبقى شبه ميت ولو قالو ينقلوهو مستشفى المدينه لو ربنا كاتب ليهو في العمر باقي غاايتو احتماااال يعيش...
كنت برضو ببكي لما خالي ابو القاسم يقوم طالع الصباح المدرسه بقول الا ماشه معاه هههه يومي بصحى بدري عشان امشي معاه، كل يوم عامله ليهم موضوع بكى وصريخ في الحله لدرجه انو بقى يطلع مني بالدس لما عمري وصل 5 سنوات بقى يسوقني معاهو كمستمعهه ههه كنت اصغر شافعهه في المدرسهه المعاي كلهم اكبر مني وقليلهه ادب اشيل وادق في الشفع واعضي فيهم طبعا شغاله بالمزاجات عادي الاستاذة تكون بتدرس في الحصه اقوم اطلع ولما تمسكني امسك راسي وابكي واعمل ليها موضوع تحنيس وإشترى حلاوة علشان اسكت كانت احلى طفوله ياااخي ...
اكيد كلكم في راسكم سؤال واحد بس شهد دي بت منو او امها وين من دة كلوو؟...
...