الفصل السادس والعشرون
اااايوة نحن كنا متوقعين فض للإعتصام وغدر العسكر بينا بس الما متوقعنو ابداً انو يكون بالطريقه دي،
انا بعد م إنضربته ووقعته م فهمته اي شي تاني غير انو إتضاعف علي الضرب حتى وانا واقع وبضغينه وحقد غريب وم بالعصى لا كان بالدبشك بتاع السلاح بحيث انو كل مرة الضربه بتكون اقوى، لما وعيت وعيت على اصوات ناس كتيرة وجوطه ونقاش وصوت زول بيقول نحن محتاجين اسعافات ي سعادتك المصابين ديل نحن هنا م حنقدر نساعدهم ابدا، وصوتً زول تاني بيقول ليهو ماف اي اسعافات بتجي بتقدر تساعدهم ساعدهم م بتقدر خليهم يموتو هنا بس، وفجأة بقى في رصاااص غريب، فتحته عيوني لقيت نفسي في بركه بتاعه دم عايمين في نصها كميه بتاعه مصابين ودكاترة واقفين في نصنا وبتلفتو يمسكو دة ويخلو دة كل الناس كانت بتستنجد وعايزة الينقذها، محل م تتلفت بتسمع انيييين زول وكلمه اه، وكلنا كنا مرمين بطرق كدة بشعه يعني نحن لو كنا كفار زاتو م حنترمي بالطريقه دي خليك من كوني زول معتصم مطالب بحقوقو بطريقه سلميه بس م اكتر...
رجلي كانت مربوطه وراسي ملفوف عليهو شاش بعد اكتر من نص ساعه من نقاش الضابط الكان مانع دخول الاسعافات مع الدماترة حتى وافق، الغريبه انو الضابط دة م كان جنجويدي تابع لمليشيات الدعم السريع لا كان مرتدي زي مكافحه الشغب يعني اذا صنفنا مليشيات الدعم على انها مليشيات جنجويديه ليس الا حنقول شنو عن ناس مكافحه الشغب اللي هم جزء لا يتجزأ مننا؟خليك من كونك ضابط انت ك انسان كيف بتسمح لنفسك تمنع انقاذ حياة انسان زيك؟
المهم جات اسعافات بعد معاناة والم شالو الحالات الحرجه في البدايه، تخيل انو كان في مصابين بينزفو وبتألمو بيقولو للدكاترة الزول دة حالتو اسوا من حالتي شيلوهو هو اول خلوني انا اصابتي خفيفه، والحاجه دي م حصلت من واحد ولا اتنين كميه من الشباب المصابين كانو بقدمو الناس الاصاباتهم خطيرة على نفسهم رغم الالم الهم حاسين بيهو يعني تخيل شباب زي دة يتغدر بيهو ويموت بالشكل دة
تقريباً نحن الحالات الباردة طلعونا ااخر ناس وكان معانا واحد بس تعبان وحالتو حرجه شويه ونحن طالعين بعد م العربيه اتحركت فجأة الاسعاف وقف وسمعنا صوت السواق بيقول ليهو معي مصابين حالتهم حرجه خليني امر ي سعادتك، الأسوأ انهم كانو بضحكو وبيقولو لبتاع الاسعاف عسكريه ولا مدنيه قول عشان نخليك تمر، وبتاع الاسعاف كان مُصر على قوله في مصابين حالتهم حرجه لازم اوصلهم وهم اكتر إصرار على قفل الشارع وسؤالهم ليهو وهم بيقولو ليهو عسكريهه ولا مدنيهه يلا قول عشان نخليك تمشي، وواحد بيقول ليهو قول عسكريهه لو م قلته عسكريهه يموتو ويعفنو هنا بس وبقو يضربو بعصاياتهم في الاسعاااااااف
الاستفزاز النفسي في اللحظه دي بالذات ولد جوانا كراهيه 30 سنه مضروبه في 10 للعسكر، مستحيل يكونو ديل بشر وبني ادمين طبيعين زينا كدة م كان في يد بتاع الاسعاف الا انو يقول ليهم عسكريااااااو وبعدها ضحكو وقالو ليهو يلا سوق الكلاااااب الصعاليق ديل بنفس اللفظ تماماً
وصلنا مستشفى رويال كانت مكرتنه تماماً بالجنجويد والكجر، كميه الم وصراخ ودم ووجع وقهر وجثث مرميه بالصف في الارض وناس بتصرخ زي الاطفال الواحد فينا م كان بعاين لنفسو كان بعاين لحاله الجمبو بلقى نفسو حالتو احسن بيقول الحمدلله، الواحد فينا يمكن عمرو م بكى بس فض الطريقه الاتفض بيها الاعتصام خلتنا نبكي كبار على صغار نسوان وشباب حتى الدكاترة الكانو بضمدو لينا جروحنا وبعالجو فينا كانو ببكو، م نبكي كيف ونحن لمنشورات مواعيد الصلاة في القيادة جهزناها؟
طلعو لي الطلقه من رجلي وربطو ورجعو فكو الشاش من راسي المضروب وعقمو لي الجروح وهكذا، كنت محتاج دم نسبه لي انو انا نزفته كتير شديد ركبو لي قزازة، وشالو اسمي في اللسته،
لمن جاء المساء فجأة سمعته صوت واحدة بتقول ي جماعه في زول اسمو صهيب سمير هنا؟طبعاً العنبر النحن فيهو ملان شديد، قلت ايوة، بعدها جات قالت لي انت صهيب؟قلته ليها ايوة انا، قالت لي دقيقه طلعت بسرعه م تمت 5 دقايق جات راجعه ومعاها محمد قالت ليهو دة هو؟محمد وشو كان م بتفسر ابداً جا قعد جمبي ودموعو دي نهائي م وقفت، قلته ليهو ي زول بتبكي مالك انا كويس ياخ، انتو كيف احمد وين؟ناس امي م يكون زول فيهم جاتو حاجه؟بعد مساااافه قال لي بصوت منتحب لالا كويسين الحمدلله، قلته ليهو الحمدلله،
فجأة جاتو مكالمه اول م رد قال"اي، اي لقيتو الحمدلله، لالا كويس، قلته ليك كويس ي امي م فيهو اي شي ياهو قاعد قدامي م تجو انتو نحن اسي بنجيكم، اديني امتثال، لسه؟طيب تمام يلا"بعد م قفل الخط، قال لي بصوت مبحوح م عارف اقولها ليك كيف في وضع زي دة بس شهد دي عملت حادث ضربها بتاع بوكس، تعابير وشو على بحه صوتو والحاله الهو فيها اوحت لي بي إنها ماتت، لقيت نفسي بشكل تلقائي بقول ليهو ماتت؟قال لي في المستشفى، م عارف نزلته كيف زاتي وانا حفيان رجل كويسه ورجل بتعرج جسم كلو رضوخ وراسي حاسي بيهو كأني شايل فوق ليهو صخرة بس وسسط دة كلو م كنت شايف قدامي وانا ماشي واحمد ماسكني، طلعنا ببوابه الطوارئ وركبنا العربيه واتحركنا م كان فيني حيل اسألو عن اي شي بس الحاجه الوحيدة العايزها إني اصل المستشفى ف كنت بقول ليهو اسرع اسرع وشوارع الخرطوم كانت اليوم دة م بتتوصف ابداً كميه بتاعه ارتكازات للدعامه منتشرة في كل الشوارع وعنف م طبيعي مستخدم ضد المواطنين، جينا مارين بموقف كدة كان سيئ جداً راجل كبير لامين فيهو اكتر من 5 جنجويدي وبضربو فيه بعصاياتهم.، الحمدلله انو في مجموعه شباب جوهم جارين وكانو برمو عليهم الحجار لغايه م خلوهو، وجرو يعني نشوف ابهاتنا الكبار في العمر بنضربو قدامنا م اعتقد انو كان في استفزاز للرجوله اكتر من كدة خالص
وصلنا المستشفى حالتي كانت حاله طبعاً وانا داخل المستشفى حسيت انو كل الانظار كانت علي نسبه لي حالتي الانا فيها وملابسي الملانه دم، دة غير رد فعل امي وحبوبه لما شافوني قلبو المستشفى بيت عزاء وامي كانت بتبكي وبتقول لي م قلته ليك م تمشي م منعتك انا من المشيه غفلتني ومشيت لييييهه انا عااارفه دة البحصل
جات حبوبه شهد مسكت فيني وتبكي قالت لي م قولته ليك انا شايفه موتها بعيني في البلد دي؟اها خلاص ماتت، بتي ماتت، كلمتها قلته ليها م تطلعي في يوم زي دة ي بتي قالت الا تمشي تشوفك انا عارفه دة البحصل عااارفه دة البحصل لا إله الا الله، حبوبه مسكتها قالت ليها ي عشه اختي استغفري استغفري كدة ماف زولاً بموت ناقص عمر، قالت ليها استغفر الله، ، إتخطيتهم كلهم وبقيت م شايف قدامي نهائي بس سامع اصواتهم وماسك اعصابي بفارغ الصبر قلته لمحمد شهد وين؟قال لي من قبل نجي دخلوها عمليه انت اقعد إرتاح كده، اقعد قعدني في الكرسي وانا بهز في رجلي وراسي في الارض فجأة لقيت دموعي نازله وم عايز ارفع راسي ابداً نسبه للحوالي، وانا منزل راسسي فجأة حسيت بزول قاعد في الارض قدامي وماسك في رجولي رفعته راسي لقيتو احمد وكان ببكي، م اتكلم ولا فتح خشمو بأي حرف بس ببكي، بعد اكتر من ساعه سمعته صوت حبوبه شهد بتقول: اها طلعوها إن شاءالله هي كويسه طمنيني ي بتي عليك النبي، رفعته راسي لقيت امتثال حاضناها وبتبكي، عرفته انو في حاجه غلط محمد قام مشى عليها وانا وراهو، امتثال كانت بتبكي بحرقه، محمد قال ليها اها طلعت كيف؟قالت ليهو دخلوها العنايه المكثفهه م حيقدرو يقولو شي مالم تمر 48 ساعه، قلته ليها وين هي اسي؟قالت لي صهيب، قلته ليها وين سألتك انا!!قالت لي صعب يدخلوك ليها، قلته ليها م على كيفهم، محمد قال ليها خلي انا بتكلم مع الدكتور تعال ي صهيب، مشينا الطابق الفيهو غرفه شهد، كان في دكاترة واقفين قدام غرفه وكانو عايزين يتحركو في الاتجاه المعاكس لينا، محمد قال ي دكتور، الدكتور وقف مشينا وصلناهم كانو بعاينو لي بإستغراب، قال ليهو اهلا ي دكتور محمد، محمد قال ليهو اها وضعها كيف طمني؟قال ليهو والله ي إبني قدرنا نتدارك الخطورة المبدئيه ووقفنا الزيف الداخلي لكن م زال الخطر قائم عليها،
لما سمعته الكلام دة كأني إتخدرته م قادر استوعب ابداً انو بتكلم عن شهد،
الدكتور كمل كلامو ب"لكن حننتظر لمن تصحى وتعدي ال 48 ساعه دي على خير وبعدها إن شاءالله ندخلها عمليه على طول ودي حتكون اخطر من الفاتت دي عشان كدة الناس تجهز نفسها وتتوقع اي شي
محمد بقى يعاين لي، قال ليهو طيب ممكن يدخل عليها زول يشوفها دة زوجها طبعاً من الناس الكانو في القيادة، قال ليهو لا يااااخي الف سلامه عليك م تكون إتازيت شديد بس؟قلته ليهو الحمدلله ممكن ادخل عليها؟
قال لي صعبه شديد ممنوع منعاً باتاً اي زول يدخل عليها لانو وضعها حرج جداً وم بتحمل، قلته ليهو انا م اي زول لكن، قال لي معليش برضو ممنوع، محمد قال ليهو ي دكتور 5 دقايق بس يدخل عليها، قال ليهو ي محمد انت دكتور وعارف القوانين في الحاله دي، محمد قال ليهو معليش ي مستر انا عارف والله، الدكتور عاين لي كداااا قال لينا طيب دقيقة، مشى الغرفه وجا طالع قال لينا تعالو، مشينا عليهو قال لي م تتم اكتر من 5 دقايق تمام؟قلته ليهو طيب،
دخلته وانا متردد من شوفتها، وخوفي كان في محلو اتمنيت اني م شوفتها وهي بالحاله دي خاتنها وسط مجموعه اجهزة ومركبين ليها اكسجين والجهاز البيبن حركه النبض، دة غير جسمها الكان كلو جروح وشاش في راسها وملامحها م باينه اصلا، مً تميت اكتر من دقيقتين في الغرفه دي لقيت نفسي م قادر استحمل طلعته على طول وبعدها إنهرته تماما، عدتً علي ايام ولحظات كتيرة سيئه في حياتي، بس اليوم دة واللحظه دي كانو الأسوأ على الإطلاق، بالحاله الشفتها بيها دي م جاني ولا حبه امل لي انو هي ممكن تعيش زاتو، بكيت وم كان عندي إستعداد اسمع لي اي زول لا لي امي ولا محمد ولا امتثال ولا غيرهم، اسوأ يوم واسوأ 48 ساعه وبعدها إتفاجأنا بي انها داخله في حاله غيبوبه وإهتمام الدكاترة لحالتها بقى اكتر يعني احيانا 5 بكونو في راسها وبتشاورو، حتى امتثال ومحمد م كانو بدو ردود واضحه، إستسلمته للأمر الواقع وبقيت قاعد ومنتظر تحت اي لحظه يقولو لي بقت في رحمه الله، عدة يوم و 2 و 3 وم فاهم اي شي ولا الحاصل في البلد شنو بعد الحصل في القيادة رغم انو بسمع الناس بتتكلم بس م بركز ابداالصباحً اصبح ولا امسى م بكون عارف قاعد ومنتظر وكل الوقت سرحان لو م لقيتني جمب غرفه شهد بتلقاني في المسجد بقرا قرءان وشبه دخلته في حاله نفسيه بالنهار بعيش في الصراع بتاع حاله شهد وحاله الانتظار واول م يجي الليل واغمض بتجيني هلاويس فض الاعتصام صورة الدم والجثث والعسكر والضرب واصواتهم م كانت بتفارقني كنت بفتح عيوني وانا في حاله بتاعه هلع وإضطراب نفسي رغم انو الدكتور كتب لي منوم بس رفضته اخدو، م كان عندي إستعداد اسم لي زول ابداً رغم إجتهادات امي معي
العمليه الدخلتها شهد إستغرقت 5 ساعات، دكاترة داخلين وطالعين ماف زول بتفاهم معاك اساساً
تلف الاعصاب الحقيقي كان بتمثل في الساعات دي وانت منتظر وم فاهم حاجه وم بين شهد حتطلع من الغرفه دي بخير زي م دخلت ولا لأ؟بعد ال 5 ساعات دي طلعوها، عرفته انو طلعوها بس م كان عندي الاستعداد الكافي اسأل اي دكتور من الكانو قدامي من الحاصل، كانو طالعين وعلى وشهم علامات الارهاق، فضلته على الحاله دي لغايه م شوفته امتثال واقفه مع دكتور وليد وسمعتو بيقول ليها الحمدلله عدت على خير، وجو على اتجاهي امتثال ملامح وشها كانت بتبشر بالخير، اول م وصلوني دكتور وليد قال لي ابششر ي جرسه الحمدلله العمليه ناجحه 100c/o ومرتك كلها كم ساعه وتفتح، الف الحمدلله على سلامتها وضربني في كتفي، قلته ليهو تسلم ي دكتور، امتثال حضنتني وقالت لي الحمدلله شايف كنت خايف ساااااي م قلته ليك عمليه فيها دكتور وليد م بتجلي نهايي، دكتور وليد ضحك قال ليها بعد شطارتك ي دكتورة
قلته ليهم ممكن ادخل عليها؟الدكتور قال لي اصبر عليها شويه وم تشفق، دخلوها العنايه فضلته منتظرها لغاايه م صحت، م كانت بتتكلم بس بتعاين للحواليها وهي ساكته وممكن تتجاوب بالإشارات، الدكتور قال شي طبيعي، اليوم التاني طلعوها من العنايه لغرفتها، وممنوع اي زول يدخل عليها غيري، كنت قلقان طبعاً من الحته بتاعه انها بس بتعاين وهي ساكته وكيف كدة دقيت جرس للدكاترة، كانو بشرحو لي إنو شي طبيعي وماف شي بخوف، عدت 3 ايام حتى قدرت تتكلم وأول م فتحت خشمها إتكلمت كانت بتطلع الكلام واحدة واحدة، قالت لي بصوت خاااااافت صهيب، م صدقته لما سمعته صوتها قلته ليها روحو
بقت تعاين لي وهي ساكته، قلته ليها في شي واجعك حاسه بشنو انادي ليك الدكتور عايزة حاجه؟قالت لي أمشي إرتاح وخلي اي زول يجي مكانك كفاك، قعدته جمبها ومسكته يدها وقلته ليها أمشي واخليك وراي؟لا معليش ماف إنسان طبيعي بمشي وبخلي روحو المتعلق بيها وراه، وبعدين دي شنو كفاك دي ي زوله انا يوم متين كنت بكتفي منكك؟...
نتلاقى®