الفصل الثاني
تقريباً معظمكم حاسين انو راسهم جايط بسبب تفاصيل البارت الفات وجواكم تساؤلات شهد وصيب وصلو للطريق دة كيف والحصل شنو بالزبط و... ححاول في البارت دة احصر ليكم تفاصيل الشي الحاصل وحصل متين وكيف عشان الما داخل في جو القصه يقدر يدخل...
نبدأ بعلاقه شهد وصهيب من محل م وقفت، في الحلقه 49 اتكلمنا عن انو هم شبه وصلو مرحله من الاستقرار في حياتهم، وعايشين مع بعض سمنه على عسل، وبكدة حياتهم بقى روتينها العادي، صهيب مع شغلو وتطوير ذاتو وتحمل مسؤلياتو وفي فترة بسيطه حصل تلاشي لمعظم سلبياتو، كل الكان بسعى ليهو انو يحافظ على النعيم الفجأة دخل حياتو دة، وطبعا شهد كان ليها الفضل الأكبر في كل ذرة تغير حصلت لصهيب
ونحن عايشين على النمط دة من حياتنا في يوم صهيب جا داخل البيت وكالعادة طبعاً كل م يجي راجع المساء من الدوام بلقاني منتظراه جمب الباب اصلا بكون مراقبه جيتو بشباك البلكونه بنفضل انا وكريم ولدي قاعدين لغايه م يجي كريم احيانا بنوم بخليني انا صاحيه دة في حاله صهيب إتأخر
المهم لما شوفته عربيه صهيب جريت وقفته جمب الباب وهو طبعاً كالعادة لازم ياخد ليهو مع عمو الغفير عشرة ونسه حتى يطلع البيت اول م فتح الباب بصوت مليون لهفهه "حبيبي خته لي يدو في خشمو إحساس كأنو بقول لي هششش،
م ركزته مع الحركه كتير ولفيت يدي حوالين رقبتو وقولته ليهو"رغم إنك سافهني من الصباح بس برضو مشتاقهه ليك، خته يدو في خشمي قال لي هشششش،
قولته ليهو مالك بتسكتني ها معاك ضيوف؟قفل الباب واشر لي على اضانو كان مركب السماعه في اضانو
قلعته ليهو عيوني بخلعه واتفكيت منو وهتيت يدي في خشمي، قعد يضحكك بعدها بقى يتكلم وقال"لا هو من ناحيه إنها فرصه كويسه وم بتتعوض اكيد انا بتفق معاك فيها لكن ي عمي محجوب زي م قولته ليك الحاجه دي صعبه شديد على زول وراهو مسؤليات، خصوصاً انها سنتين يعني فترة م هينهه ابدا، ايوةً فاهمك انا والله لكن...
صهيب فضل يتكلم وماشي وانا ماشه وراهو لغايه م دخلنا غرفتنا، ملابسو اصلا جاهزة أشرته ليهو عليها وطلعته جبته ليهو المويه وجيت لقيتو لسه واقف في محلو، ادتيتو الكبايه شرب وشلتها منو وجيت وقفته قصادو وكرفسته ليهو وشي وقولته ليهو بصوت واااطي"يعني البتكلم معاك دة زمنو"إبتسم إبتسامه خفيفه وهو رافع لي حاجبو غيااظ خلاص
بديت افتح ليهو في زراير القميص بعد م خلصته قولته ليهو م نفسك تنهي المكالمه دي م نفسك مش م نفسك صح؟
قال لي بصوت خااافض هشششش وهو بضحكك
قولته ليهو بصوت طفولي ومليان زعل طيب لما تخلص من الرقي بتاع الناس المهمين عندك ديل فتشني في المطبخ
مسكني من يدي اتفكيت منو ومشيت المطبخ وانا بتكلم مع نفسي وبقول"يعني م هو طول اليوم في الشغل وناس الشغل م مكتفي بيهم هناك بجي هنا يكمل باقي شغلو معاهم، والله مرحب"
وانا بجهز في العشاء بعد 30 دقيقه جا داخل، قال لي "حبيبي"عاينته ليهو بغييييظ وانا ساكته
ضحكك قال لي م شنو؟م انتي بالغتي لكن انا بتكلم مكالمه مهمه كنت والله
قولته ليهو مكالمه مهمه؟يعني اهم مني صح؟واو
قرب مني ولفهه يديهو حوالي قال لي ي روح حبيبك اكيد م اهم منك لكن شنو! الزول متصل علي من لندن افصل في وشو واقول ليهو لا م تتصل او افصل في وشو؟م منطق صح؟
قولته ليهو طيب ومالك اليوم إتأخرته كدة عارف اناةمنتظراك من متين
قال لي بعد جيت قريب للبيت إتزكرته الأدويه بتاعتك الكان مفروض اصرفها ليك من امس، ف رجعته جبتهم معي وكل حاجه لقيتها في صيدليه مختلفه، المهم طمنيني اليوم كيف؟
قولته ليهو الحمدلله بص مصدعهه من الصباح والمسكن م عمل لي شي
رفع لي راسي وقال لي بجد؟
طيب ليه م اتصلتي علي من قبيل ؟؟
قولته ليهو حتعمل شنو وانت في الشغل يعني!؟
قال لي ي بت انتي هبلهه اكيد الشغل م اهم منكك، دقيقه اجيب ليك الادويه،
قولته ليهو خليها بعد العشاء،
قال لي لا في واحد مفروض تاخديهو قبل العشاء، اتحرك مشى الغرفه وجا راجع شايل كيس الادويه، لقاني جهزته العشاء وعايزة اخبط العصير، مسكني وقال لي خليك من العصير دة وتعالي اقعدي اصلا كان تتصلي اجيب معي عشاء جاهز بس ماف داعي تقيفي في المطبخ اساسا
قعدني وطلع شريط اداني حبه وجاب لي مويه، بعد م شربته قال لي اخدي الادويه بإنتظام وفي مواعيدها م تفوتيها فهمتي!!!
قولته ليهو حاضر
قال لي م تقولي لي نسيت وبتاع
قولته ليهو خلاااااص م تهرشني كدة
ضحكك قال لي الليله ولدي وين نومتي بدري ليييهه؟
قولته ليهو ولدك منتظرك بالساعات لما م جيت نام م نومتو انا
فضلنا ناكل لغايه خلصنا، مشيت على الخلاط عشان اكمل خلط عصير، مسكني قال لي خليك انا بخلطو،
قولته ليهو بجد؟
قال لي مالك مستغربهه انا م كلمتك انو انا قبل كدة كنت عزابي وبعدين انا قاعد اساعدك في المطبخ طبيعي يعني وين الجديد م تخليك ناكرة جميل كدة
قولته ليهو وبتساعدني لييهه يعني طيب م انت طول الوقت في المكتب، شالني قعدني في المصطبهه جمبو وقال لي المرة كان بقت فاس م بتكسر الراس في اي شي محتاجه مساعدة
قولته ليهو ننننننننننننننن بالله قعد يضحكك قال لي اااي راجل بحب مرتو بحب يشاركها المطبخ غير كدة شكليات
قولته ليهو امممممم يعني كلامك دة معناها بحبكك بس بطريقهه مجازيهه حبهه صح
قال لي ي زوله لا مجازيهه لا بتاع نحن بحبكك دي بنقولها بالأفعال وبالألفاظ بكل شفافيهه ها
قعدتهه اضحكك قولته ليهو م قولته لي الزول المتصل عليك من لندن دة عندو ليك شغل ولا شنو؟لو شغل شكلو كبير شديد لانو بتكلم معاك اكتر من نص ساعه
قال لي م لي شغل والله، الزول دة ي ستي ابو واحد صحبي، عايشين هناك في لندن وابوهو بروفيسور في واحدة من الجامعات، كان بتكلم معي في موضوع انو جايب لي منحهه دراسيه اطور بيها نفسي في مجالي الهندسي وكدة وانا رفضته وكان بحاول يقنعني بالموضوع وكدة وانتي عارفه طبعا معطه الناس الكبار الواحد تدخل ليهو بجاي يمرق ليك بجاي
قولته ليهو المنحه دي يعني شنو م فهمته؟
قال لي يعني انا اسافر هناك وادرس نفس مجالي لمدة سنتين بس بطريقه اووووسع وبخبرات ومقومات افضل من الدرسته بيها هنا واكتسب خبرات ممكن عادي بعدها اعيش واستقر واشتغل هناك وم ارجع السودان
قولته ليهو بخلعهه انت جااااادي؟ودي حاجهه تترفض ي صهيب انت مجنون؟
عاين لي بإستغراب بعدها قال لي واخليكم لمنو وراااي؟
قولته ليهو بغض النظر عن كل شي صهيب دي حاجه كويسه شديد بالنسبه ليك وفرصه م بتتعوض، اداني كبايه العصير وقال لي والسنتين الحأقضيها بلاكم كمان م بتتعوض فهمتي؟وبعدين المنح والحجات دي عايزة ليها زول م عندو مسؤليات وراهو يسافر وقت م جاتو بس انا غير، إضافه لي اني رافض فكرة السفر وم عندي إستعداد للدراسه ياخ انا في الجامعه كنت بمشي زمن الامتحانات بس
نزلته ووقفته قولته ليهو اسي الوضع اختلف زمان كنت طايش واسي انت بادي صح
قال لي ي زوله الموضوع منتهي، انا ماشي اشوف ولدي
مشيت وراهو دخلنا غرفه كريم كان نايم في سابع نومه، صهيب شالو وبقى يصحي فيهو وكريم حالف م يصحى، وانا بقول ليهو صهيب وربي يصحى الا تساهر معاهو انت انا م بساهر عديل م تصحيهو ياخ فضلته 5 دقايق بحنس فيهو علشان م يصحيهو !!
طلعنا مشينا غرفتنا لما جينا ننوم انا كنت بفكر في موضوع المنحهه دة وعايزة اتناقش معاهو فيهو بس عارفه صهيب لما يقول على شي منتهي معناها منتهي، بعد مسااافهه قولته ليهو حبيبي!!!
قال روحو
ختيت يدي في لحيتو وانا وشي مقاصد وشو وقولته ليهو"فكر بالمنطق في...
قاطعني وقال لي المنطق بقول انو حبيبكك مرهق ونعسان ونفسو ينوم بس
قولته ليهو صهيب ياااخ خليك جادي شويهه واتناقش معي في الموضوع،
قال لي طيب بكرة إن شاءالله مع انو ماف شي نتناقش فيهو، نعسان ي شهد نعساااان شديد ياخ وبكرة لازم اصحى بدري
قولته ليهو طيب ماشي
جراني ورقدني في حضنو وقال لي يلا النوم تصبح
الصباح صحيت على صوت كريم وهو بصحي في ابوهو، حاولته اشيلو واسكتو منو بقى يعلي في صوتو زيادة، ف بقيت انا زاتي بصحي فيهو معاهو فضلنا نتهابل ليهو في راسو لغااايه م صحى، قال لي كريم عرفناهو شافع، بس انتي ي دوب اقتنعته انك شافعه حرفياٌ
قولته ليهو صح النوم الساعه ماشه ل 9
قال لي بجد؟قولته ليهو ااي، حأجهز ليك ملابسك والشاي انت اجهز مش قلته عندك شغل مهم؟
قال لي ااي اليوم ماشي ازور موقع شغل،
قولته ليهو ماشي، نزلته جهزته ليهو ملابسو وطلعته جهزته ليهو الشاي جيت راجعه على اساس اللقاهو جهز لقيتو لسسسه بلعب مع كريم وصوتهم مالي البيت
قولته ليهو انت م جهزتهه للأن؟قال لي عارفه ولدك انتي قولته ليهو ن هو انا عشان عارفاه بسألك لانو م حيخلك!!!
قال لي طيب حأنزل اجهز، وهو لسه بلعب وبضحك مع كريم!!
جيت شلتو منو قولته ليهو انت لايوق وولدك لايوق منكك
قال ليهو ي ولدي امك دي شكلها بتغير مننا بس
قولته ليهو بغييظ صهيب
ضحكك قال لي طيب طيب شال كريم قال لي حأحممو معي طبعا هنا لقيت نفسي بضحكك من غير م احس غياظين وحيجننوني والله
دخل الحمام معاهو ولدي، قاعدين نص ساااعهه واصواتهم ماليه الغرفه، شويه كدة جو طالعين،
قولته ليهو م بدري
قال لي هاك امسكي ولدك دة وم تقلعي منو البشكير لانو حيلتهب وحتقولي انا السبب
قولته ليهو اساسا انت السبب
لبس ملابسو واثناء م هو بحاول يزرر زراير القميص جيت قولته ليهو اللياقه م مصلحهه وصلحتها ليهو وبقيت ازرر ليهو في بقيه الزراير
بعد م خلصته قولته ليهو صهيب!!
قال لي روحو!!
قولته ليهو امممممم انت عارف إنو انا بحب اشوفك ناجح صح
لفهه يديهو حوالي وقال لي وانا بحب اكون ناجحك في عيونك، عارفك عايزة تتكلمي في موضوع امس، بس ي شهد ي حبيبي انا لو عايزة الحاجه مستعد اقدم عشانها تنازلات كتيرة، بس الحاجه دي انا م عايزها لانو التنازلات الحأقدمها حتكون انتو وانا م عندي إستعداد للحاجه دي، ونجاح الزول م مربوط بحتهه معينه، الزول العايز ينجح دة في اي مكان هو فيهو بنجح!!!
قولته ليهو حبيبي انا عارفه الحاجه دي بس الناس بتستغل الفرص الما بتتعوض دي،
قال لي مشكلتك م عايزة تفهمي دي سنتين ي شهد سنتين، وبعدين مش انتي بتحبي تشوفيني ناجح ومحقق انجازات في حياتي؟بالنسبه لي وجودكم في حياتي انتي وكريم اكبر انجاز في حياتي،
قولته ليهو م تحاول تاكل عقلي بكلامكك دة
قال لي انتي شايفهه كدة؟
لفيت يدي حوالين رقبتو قولته ليهو انا شايفه انو بتهمني مصلحتك اكتر م بتهمني نفسي
قال لي وانا ي ستي مصلحتي في قُربي منكم وبس فهمتي وباسني في راسي مسااافه وبعدها قال نعتبر الموضوع دة بعد كدة محسوم ماشي؟
قولته ليهو بس ديكتاوريه منك على فكرة انا لسه م خلصته كلامي امس عملته نفس الحركه
قال لي الزمن إتأخر
قولته ليهو طيب نكمل بعدين والشاي جاهز،
قال لي حاضر، شرب الشاي وطلع، م تم 5 دقايق اتصل علي، رديت بخلعه، قال لي حبيبي م تنسي الادويه فهمتي، قولته ليهو اوووووف ي صهيب ياخي اتخلعته وافتكرته حاصله عليك حاجهه
قال لي عارفك حتنسي وقولته ازكرك حأتصل عليك بعدين عشان اتأكد منك اذا اخدتيهم او لا م تنسي فهمتي،
قولته ليهو حاااضر،
قال لي عايزة حاجه؟
قولته ليهو عايزاك تخلي بالك من الطريق وانت سااايق وسواقتك ديك خليها
قال لي م تخافي م بجيني شي إن شاءالله
قولته ليهو إستنى م تقفل
قال لي عايزة شنو قولي
قولته ليهو بحبك شديد
ضحك قال لي لو بتحبيني م بتقولي لي سافر،
قولته ليهو م تربط المواضيع ببعض وبعدين البحبكك بتهمو مصلحتكك فهمتهه
قال لي وانا بموت فيك عشان م نرجع نتناقش تاني في الموضوع دهه
قولته ليهو حيوان لما ترجع البيت حنتناقش فيهو كتير لمن تواافق اصبر بس
قال لي طيب ماشي يلا خلو بالك من ولدي ماشي
قولته ليهو امممممم ولدك بس؟
ضحك قال لي ااايوة ولدي بس عندي منو اهم منو هو؟
قولته ليهو حيوان غيااااظ سخيف ثقيل وانا م بحبك، بكرهكك يلا ضحكك ضحكهه شماتة وغيااظهه قفلته الخط في وشو من الزعل والغيظ ...
عدت الايام وانا بقيت كل يوم انق في راسو بخصوص الموضوع بتاع المنحه، يوم خميس كدة جا من الشغل اظنها قافله معاه بسبب الشغل وفي خلاف حاصل في الشغل، لما جينا ننوم قال لي انتي شايفة إنو احسن اوافق على المنحة دي؟
قولته ليهو اايوة
قال لي الموضوع صعب ي شهد، قولته ليهو ماف شي صعب في شي عايز عزيمة وإرادة!!
قال لي انا م بتهمني المنحه ولا الشغل ولا القروش ولا غيرها، انا بتهموني انتو بس، انتو المكسب الوحيد في حياتي ي شهد!!
فضلته اعاين ليهو م عرفته اقول ليهو شنو، بس الحاجه الانا عارفاهو انو صهيب جواهو كسرهه انو ابوهو ظلمو في كل مراحل حياتو وهو دايماً حاسي بالفشل والاستصغار قدام نفسو، واخوانو، واهلو حتى ودة كلو بسبب ابوهو، الحاجه المتأكدة منها انو المنحه دي ممكن تكون اضافه حقيقية لحياتو، اي نعم انا الحاجه دي بالنسبه لي م سهلة بس انا بتهمني مصلحتو اكتر م بتهمني نفسي
يوم الجمعه بعد الفطور جاتو مكالمة، اتكلم كدا، بعدها قعدني جمبو ومسك يدي مساافه وقال لي انا وافقته على المنحة حقت ابو مروان،
قولته ليهو بخلعه بجد؟احلف
قال لي جادي والله
قولته ليهو اااحلى خبر وربي، شوفته لما تحسبها صح بتلقى دة الصح
"حاولته ابين انو انا مبسوطه بالخبر دة لكن في الحقيقهه انا حسيت بضيق وكتمة نفس لما قال كدة، وبدون مبالغه مو قدرته امسك دموعي"بكيييت وهو كان بحنس فيني وانا م قادرة اوقف بكى، لغااية م قال لي ابطل؟ اكسر حنكها؟عارف انا دة الحيحصل عشان كدة رافض فكرتها، قولته ليهو انا ببكي عشان مبسوطهه ها
قال لي طيب اليوم نمشي على ناس امي نسلم عليهم وكدة رايك شنو؟
قولته ليهو طيب ماشي نمشي على طول...
عدت فترة إسبوعين، صهيب جهز ورقو وخلاص اعتمدوهو واي حاجه، في يوم مشينا اهلو نسلم عليهم، ونحن قاعدين و بنتونس كلنا مع بعض عمتي عواطف قالت "اها ابو مروان تاني م إتصل عليك؟
صهيب قال ليها والله ي امي إتصل علي قبل كم يوم كنت بتكلم معاه شايفو مستعجلني وانا جني وجن ألإستعجال دة، الراجل معاط ياخ
إمتثال قالت ليهو النصيحهه معاط اتصل على امك دي بتكلم معاها اكتر من ساعه تقول بالع ليهو رادي
صهيب قال ليها اتصل عليك متين ي امي؟
امتثال قالت ليهو يوم واليوم التاتي بتصل لصقهه زي بت اهلو
عمتي عواطف قالت ليهو والله هو اتصل علي قبل فترة شال رقمي من رنين واسي بقى يتصل علي بسلم وبسال من ابوك وبسالني عن وضعو من الاحداث الفوضويه الحاصله في البلد دي وكدة
لما قالت رنين انا قلبي عمل شح، من جواي بقيت اقول"رنين؟ورنين علاقتها بيهو شنوو؟
راسي بقى يودي ويجيب حتى الحاجه دي ظهرت على ملامح وشي وبينت في سكاتي
ونحن راجعين على البيت فضلته ساكته مسافه وصهيب بتكلم معي وانا سرحانه ومطنشاهو،
لما وصلنا البيت قال لي مالك انتي؟
قولته ليهو بنرفزة مالي؟
قال لي انا بسألك، من قبيل صارة وشك وزهجانه في شنوو؟
قولته ليهو ماف شي،
قال لي طيب، رقد كريم في السرير ومشى رقد في الكنبة وشغل التلفزيون وهو زاتو مكرفس وشو وانا بزعلني تعاملو معي ببرود لحظات عصبيتي،
فضلته راقدة في السرير وانا عيني فيهو، وكل شويه اغير إتجاه وشي واتحرك وكدة
والتفكير في الموضوع حيشق راسي، وانا عامله نفسي م عايزة ابين ليهو انو انا شغاله بيها كتير بس بجد غلبني،
نزلته من سريري ومشيت وقفته ليهو في راسو وقولته ليهو م نفسك تقول لي علاقه ابو صحبك الجاب ليك المنحة دة بي رنين شنووو؟
رفع راسو عاين لي وضحك قال لي من قبيل منفسنه عشان الموضوع دة؟طيب م تجيبي من الاخر وتسألي كنتي بدل الحركات دي!!
قولته ليهو جاوبني ي صهيب وم تكتر، جراني قعدني جمبو قي الكنبه وقال لي ي ستي هو راجل عمتها بس م عمتها على طول يعني عمتها من بعيد!!!
قولته ليهو بضيق وليه م كلمتني من البدايه؟
قال لي م حصلت مناسبه عشان اكلمكك
قولته ليهو انت شايف كدة؟؟
جراني ورقدني في حضنو وقال لي انا شايف انو تحضري معي المباراة دي احسن
قولته ليهو صهيب انا جادة معاك، يعني في النهايه الراجل طلع قريب رنين، وكان متواصل مع خالتو عواطف اللي هي اساسا عايزاك لرنين افهم شنو انا يعني؟
قال لي افهمي انو انا م عايز غيرك وراجلك م بشتروهو بالمنح والكلام دة، وانا م عايز منك غير حبه ثقه فهمتي
سكتني بكلامو دة، وم قدرته اكتر كلامي معاهو تاني لاني انا الأصريت على موافقتو وقبولو للمنحة دي، م لقيت رد غير حاضر
قال لي بضحكهه عارفهه؟انا بحب غيرتك البتخلي عندك إنفصام في الشخصيه دي
قولته ليهو يعني شنو إنفصام؟
قال لي يعني ارواح شريرة بتكون في وشك زي م كنتي قبل شويه
ضربتو في كتفو وقولته ليهو ارواح تجيب اجلك
لغايه هنا انا كنت في الصورة، رغم قلقي وخوفي وصراعي النفسي من وجود اسم رنين في القصه دي بس كنت مطمنهه وانا حاسبه حساب لصهيب، وواثقة ومتأكدة من الحتة بتاعه انو انا م حأتخزل فيهو، انا عارفه عمتي عواطف وتفكيرها، كل م افكر في الموضوع بلقى انو إستحاله م تكون هي العايزة صهيب يسافر ويبعد، بس تاني برجع وبقول لنفسي صهيب عايزك ي شهد حتى لو سافر ودة المهم !!!
كنا كويسين وعلاقتنا مستقرة وكل حاجه حلوة فينا ماشه في زيادة لأخر لحظه م حسيت ابداً بي تغير في تصرفات صهيب او حاجه غلط فيهو، بالعكس تعاملو معي بلطافه ابداً م اتغير، ولا مع كريم، في يوم اتصل علي من الشغل وقال لي جهزو نفسكم عشان حنتعشى برة،
قولاه ليهو حاضر، وبالفعل دة الحصل طلعنا وإتعشينا ونحن جاين راجعين قال لي بالنسبه لمشروعك انتي وامتثال م نفسكم تبقو جدين شويه وتناقشونا فيهو عشان نبدأ ليكم فيهو؟
قولته ليهو مفروض، امتثال كسلتني يخخ
قال لي م تكسلي، بتكلم مع امتثال انا ونشوف البحصل شنو، قولته ليهو طيب ماشي،
وصلنا بيتنا قال لي بالمناسبه يخخ انا جايب لي معاك حاجه،
قولته ليهو شنووو؟دخل يدو في جيبو وطلع سلسل فضهه على شكل فراشهه رفيع كدة قال لي مشينا نشتري هديه لزوله صحبي وعيني وقعت عليهو وحسيتو بشبهكك شديد
قولته ليهو حبيبي يخخخ خرااااافي خراااافي م عارفهه اقول ليك شنو اترميت في حضنو قولته ليهو م اتحرم منك ي رب ي رب ي رب
قال لي طيب خليني اللبسك ليهو ياخ بطلي هبل ها
ضحكته قولته ليهو طيب اها، لبسني ليهو وقال لي م يستاهل غيركك والله اتشاكلنا فيهو انا وصحبي
ضحكتهه قولته ليهو م جادي؟
قال لي والله
وقفته قدام المرايه وانا بعاين فيهو قولته ليهو خرافي خرفنهه م عاديهه حبيتو حبيتو شديد رجعته لفيت يدي حوالين رقبتو وقولته ليهو عارف م هو البشبهني انا البشبه ذوقكك بس
قال لي والله؟طيب معناها انا ذوقي دة حلو شديد يخ
تقريباً اي يوم عدى علينا مع بعض كان بحببني فيهو، م بقدر عليهو كااامل والكمال لله، بس هو حرفياً الراجل اللي بتتمناه كل بت، لأنو مثل ولعب كل ادوار الناس الانا فقدتها في حياتي انتشلني من جحيم انا كان ممكن اعيش عمري كلو وم اللقى لي مُنقذ، انا فقدتهه الثقهه في الدنيا كلها قام هو رجعها في لمح البصر حرفياً زي م قولتها قبل كدة صهيب هو العوض المُرضي الممكن يجيك من ربنا سبحانه وتعالى...
اليوم التاني بعد العصر بالزبط انا كنت طول اليوم بدردش معاه وهو في الشغل وقت م لقى زمن بتكلم معي، اخر محادثه لي معاه قولته ليهو انا عندي شغل يلا اقطع وشكك وجدعته تلفوني ومشيت المطبخ خلصته نضافه وطبيخ وكدة، جاني كريم شايل التلفون، قولته ليهو ي كريم م تجيب لي التلفون دة ابوك م حيخليني اشتغل لو شلتو،
قال لي ابووي؟؟
شلتو منو قلته ليهو كدة خلاص جيبو اشوفو رسل شنو اخر حاجه؟
فتحته الواتسب لقيت هو مرسل رساله واحدة وهي عبارة عن إيموشنات ضحكك بس م اكتر، رديت ليهو بي ايموشن كدة" "
طلعته من الواتسب قبل م اخت التلفون في الطربيزة نزلت رسايل، وإشعاراتها كانت كتيرة لا واحدة لا إتنين، قولته خلاص معناها دة صهيب ردة كدة اشوفو مرسل شنووووظ
فتحته الواتسب لقيت الرسايل من رقم غريب م من صهيب، قولته ي ربي دة شنو الرقم دة؟
فتحته الرسايل وهنا كانت مجموعه صور خرافيه ومعاهم فيديوهات، لمنو؟لصهيب
متخيلين معي صور لصهيب في حفله بتاعه جرتق وفي صاله ومعاهو رنين، انا الدنيا ضاقت بي، بقيت م حاسه بنفسي برجف من فوق لتحت، م قادرة استوعب الحاصل دة كأنو خيال،
قعدته في الكرسي وانا راسي لافي وكريم بتكلم معي وبقول لي ماما وانا سامعه صوتو كأنو بتكلم معي من اخر الشارع
عاينته لصورة بروفايل المرسل الصور والحجات دي، تتخيلو لقيتها صورة هيا؟اايوة هيا اخت صهيب وصحبه رنين، عملو العايزين يعملوهو زي م قالو، بقيت بسأل نفسي صهيب كيف قدر يعمل فيني كدة؟ليه ختاني في الموقف دة؟لغايه اللحظة دي هو كان معي كويس طيب الصور دي والحاصل دة كلو كان متين؟
بكيت بأعلى صوت عندي م خليت دمعة م نزلتها كأنو مات لي زول، وكريم ولدي من الخلعه والحاله الانا دخلته فيها بقى هو زاتو ببكي معي، قولته اطلع اخلي البيت؟قولته لنفسي م تستعجلي ي شهد يمكن الكلام دة كذب وهيا عايزة تفتن بينا،
اصلا م خليت مجال لي عقلي يصدق الصور ولا الڤيديوهات دي مع انها واضحه، وفضلته قاعدة لغااايه م صهيب جا راجع البيت، اتصرف معي عاادي ولا كأنو في شي زيو زي كل يوم اول م دخل باسني في راسي وسلم علي وشال كريم ولظو وبقى يلعب معاهو والكلام دة،
دخل غرفتو إستحمه وغير ملابسو وفتح لابتوبو وكان شايل ليهو ورقة وقلم، اثناء م هو شغال جيت ختيت ليهو تلفوني قدامو، وانا فاتحه الڤيديو الرسلتو لي هيا،
رفع راسو عاين لي بخلعه ودهشهه
قولته ليهو بصوت مبحوح من غير م تلف وتدور ي الڤيديو دة حقيقي صح؟
هو من الخلعه م قادر يقول شي ولون عيونو زاتها إتغير
دموعي جات جاريه قولته ليهو ليه؟ليه ي صهيب؟قام على حيلو، قال لي شهد ومسكني، لزيتو وقولته ليهو بصرخه م تمسكني م تقرب مني، حتى انت ي صهيب؟حتى انت؟بقيت ابكي واصرخ بأعلى حس عندي وانا بتكلم معاه وكريم صحى من نومو بسبب صراخي وشافني وانا على الحاله دي وصهيب بحاول يهديني هو زاتو بقى يبكي، انا كنت ببكي حرقه على ثقتي الاديتها ليهو، حاله الاطمئنان العمري م حسيتها غير معاهو فجأة اتحولت لي رعب
قولته ليهو عملته ليك شنو ي صهيب؟ليه كذبته علي وإستغبيتني كدة ليه؟قال لي شهد خليني افهمك الله يخليك اهدي بس عشان اشرح ليك!!!
، قولته ليهو م تشرح لي شي ي صهيب الصور والڤيديو م محتاجين شرح اتفكيت منو وشلته تلفوني وطلعته بسرعه طلع وراي عايز يمسكني دخلته غرفة كريم وقفلتها علي بالمفتاح وبقيت ابكي، بكيت وهو واقف جمب الباب وبقول لي"شهد بطلي البتعملي فيهو دة واسمعي انا عايز اقول شنو بالزبط، افتحي الباب عشان نحل الموضوع دة،
انا ببكي وبتنهد، قولته ليهو نحل الموضوع؟انت م خليت فيها حل للموضوع ي صهيب م خليت فيها حل،
فتحته تلفوني وإتصلته على حبوبه، م كانت بترد، فضلته اتصل واتصل لغااايه م ردت اول م فتحت الخط قالت الوو؟
قولته ليها حبوبه وبقيت ابكي...
قالت لي بخلعه شهد؟ ي بتي في شنو بسم الله ولدك كويس؟راجلك كويس في شنو ي بت اتكلمي م تحرقي حشاي، .فضلته ابكي وهي بتتكلم معي وبتحاول تفهم مالي وبقت تتكلم معي بأخر نفس وبتقول لي ي بتي الله يرضى عليك م تهدي حيلي من الخوف والرجفه قولي لي في شنو كريم مالو، ااوعى تقولي لي مات اووووعى ي بتي...
قولته ليها حبوبه اللحقيني ي حبوبه عرس فيني ي حبوبه جاب فوق لي مرة ي حبوبة
قالت لي عرررس؟كيفن عرررس؟الليله وووووووب من الجاتك ي بتي عرس كيفن؟
قولته ليها عرس وحرق حشاااي ي حبوبه، انا حاسه بنفسي م قاعدة في بيت قاعدة في نار ي حبوبه اللحقوني تعالو سوقوني من هنا قالت لي لا حول ولا قوة الا بالله ي بتي، استغفري ي بتي استغفري كدة، قولته ليها حبوبه انا م قادرة انا كان قعدتهه للصباح هنا بموت والله بموت
بقت تتكلم معي وبتقول لي ي بتي م تقولي كدة واستغفري نحن كان لقينا طريقه باقي الليل دة بنكون معاك اووووعكك تتجنني خليك عاقله لمن نجي، بقت تتكلم معي وانا كأني م سامعاها رميت التلفون من يدي ورقدته في ارضي ديك وبقيت ابكي، انا كنت ببكي بحرقه وصوت زي الطفله الاتقلعت منها حاجه حقتها، انا اتعودته على الخسارات في حياتي ومفروض الموضوع يكون بالنسبه لي عادي واكون مجهزة نفسي للحاجه دي لكن لقيت انو م عادي ابداً، كيف اتقبل فكرة انو زول كان هو مخرجي الوحيد من دوامة الوجع يبقى هو الوجع دة نفسو؟هو ملجأي الوحيد، ومأمني اللي إعتبرته م حيكون في مكان ممكن يحتويني غيرو، هو الحاجه الوحيدة الكان املي فيها كبير بعد ربنا في الدنيا دي، هو كان اخر حاجه لكل حاجه بتخصني وكان المعنى الحقيقي ل"ختامهه مِسك"طيب ليه ربنا إختار انو يختبرني فيهو؟ ليه في صهيب بالذات؟لييه الجانب السيئ في الناس البنحبهم بظهر لينا بعد م نتعلق بيهم؟ليه بكسرونا بعد م يضمنو وجودهم في حياتنا؟لييييهه بتحولو من مضادات حيويه ومسكنات للوجع لي امراض خبيثهه بتاخد حيز كبير في حياتنا وبتتمكن مننا حد اليأس؟السؤال البفرض نفسو هل الغلط غلطهم هم عشان خزلونا واتلاعبو بمشاعرنا؟ولا غلطنا نحن عشان بنسمح ليهم يستغبونا وبنأمن ليهم وبنمهد ليهم الطريق انهم يغلطو في حقنا عشان ضامنين وجودنا في حياتهم؟
إقتباسهه وجع...
لم أُسرَّ بمعرفتك ولم يحصل لي الشرف ولا أتمنى الخير لك.. ولا وداعاً ولا لقاء ولا تمسك ولا حزن ولا دموع فالخير كله في أن تغيب، إلى الهاوية...
نتلاقى