الفصل الرابع عشر
الحاجه الوحيدة الانا عايزها منك إنك تبطلي تتعاملي معي بصورة عدائيه لو م عشان الكان بينا عشان كريم
بقيت ابكي واتنهد، وهو بقى ساكت ويعاين لي،
بعد مسااافه قلته ليهو إختصر وقول لي إنتي طالق ي شهد وخلاص،
قال لي انا م عايز استعجل في حاجه زي دي،
قولته ليهو بصوت عالي طيب عايز شنو؟
قال لي عايزك تبطلي الجن والتصرفات الطفوليه الانتي فيها دي، اسمعي كلام حبوبتك، خلي بالك من نفسك ومن ولدك يعني م تعتبريني انا وخلافاتي معاك هي محور حياتك وخلاص، اكيد طبعاً انا م برضيني انو تمرضي حبوبتك او تهملي كريم، او حتى خالك يمد يدو عليك بسببي فهمتي ي شهد؟
قولته ليهو وانت مالك بينا م يحصل لينا اليحصل و...
قاطعني وقال لي لغاايهه اللحظة دي كل حاجه بتخصك بتخصني وحتفضل كدة ي ريت بي تفهمي الحاجه دي
شهد انا بمر الفترة دي بضغوطات من كل الإتجاهات والله م عندي ذره طاقه عشان اتحمل بيها اي نوع من انواع الخلافاات والمهاترات، الله يخليك ي شهد حاولي عقلي امورك شويه بس، بطلي تصرفاتك المتهورة والطفوليه دي عشان م حتخليك تمشي لقدام ابداً فاهماني ي شهد؟
مسحتهه دموعي وربعته يدي، قال لي ولو إحتجته اي حاجه او حصلت معاك اي حاجه إتصلي علي ماشي؟
سكتت م رديت عليهو
قال لي هاااا إتفقنا ي شهد ولا نفضل لافين كدة؟ انا م عندي مشكله على فكرة اصلا م هديتي م هخليك
قلته ليهو بصوت خااااافض "طيب"
قال لي طيب تمام نرجع بعد كدة ولا نفضل لافين م فهمت؟لفيت منو وشي على القزاز
قال لي معناها نفضل لافين...
قلته ليهو لا رجعني البيت!بعد مسافه قال لي طيب افضل نرجع لأنو الزمن إتأخر وإن شاءالله حبوبتك م تكون قفلت الباب بس
سكتت م رديت عليهو، فضل ماشي لغايه م رجعنا م كان في شي في الشارع غير اصوات الكلاب نزل معي لقيت الباب فاتح قال لي يلا ادخلي واقفلي الباب، دخلته وقفلتو اول م وصلته الهول التلفون ضرب حبوبه كانت نايمة في سرير الهول رفعت راسها قالت لي مشيتو وين إنتو من قبيل قاعدة حارساك!!!قولته ليها م مشينا مكان، قالت لي كدة شوفي التلفون دة البتصل منو انصاص اليالي دة كمان إن شاءالله خير، دخلته الغرفه لقيت المتصل صهيب، قولته ليها دي بلسم، قالت لي كدة شوفيها مالها!!! عملته التلفون صامت وقولته ليها فصلت، تاني رجع إتصل فتحته الخط بسرعه اول م فتحته الخط قال لي إنتي كويسه؟قولته ليهو ايوة كويسه، قال لي بطلنا بكى؟
سكتت،
قال لي سكاتك دهه معناها ارجع عندكم
تاني يعني؟
قلته ليهو انا ام
قال لي شهد م عايز اوصيك على نفسك ماشي؟وزي م قولته ليك انا ومشاكلي معاك خلينا على جنب وركزي على اولوياتك كريم، حبوبتك اللي م ليها ذنب في دة كلو ونفسك م تهمليها لأي سبب كان وانا اكيد حيجي يوم حأقعد معاك فيهو علشان نخت حد للمشاكل البينا بس اكيد م اسي و كل شي في وقتو حلو وفي حال إحتجتي اي شي إتصلي علي بس ماشي؟
قلته ليهو إنت طبيعي بتنهي علاقاتك بالمقطع دة ولا المرة دي معدل فيهو شويه؟
قال لي برضو م فهمتيني
قولته ليهو لا فهمتك ي صهيب والله، وابشرك ي سيدي إن شاءالله م حيجي اليوم الحأحتاجك فيهو وشكراً ي سيدي
قفلته الخط في وشو
اللحظهه الوحيدة اللي انا ندمانه عليها انو انا رفعته سماعه التلفون واتصصلته عليهو ووريتو ضعفي علشان كدة اي تصرف بخطر على بالك في لحظه انفعال او ضعف ابعد منو دة الغلط الحتعيش في جحيم وانت ندمان وبتتحسر عليه
اليوم التاني انا في بيت ناس بلسم قاعدة وبتكلم معاها وبقول ليها "تخيلي بقول لي : م تخليني انا ومشاكلي محور حياتك، وشنو ركزي على اولوياتك،
فاكرني انا خاتاهو من اولوياتي ومهمله ولدي وحبوبتي ونفسي عشانو هو؟
بلسم مربعه يديها وبتعاين لي وبتاكل بعد مسااافه قالت لي "دهه هقيقهه"
قولته ليها هقيقه في عينك
قالت لي شهد إنتي شاغله نفسك بيهو اكتر من اللازم، وبعدين كلامو فيهو شي من المنطق يعني هو لو م راجل راجل بجد م كان حيقولو ليك بس برضو م معناها انو انا شايفاهو صح،
قولته ليك عاجباهو فكرة إنو هو معلقني كدة علشان بقدر يتحكم فيني ويمسكني من يدي البتوجعني قدام اهلي، اناني لدرجه انو بقول لي اكيد حيجي يوم واقعد معاك عشان نخت حد لمشاكلنا مع بعض بس م اسي، يعني يمكن اليوم دة بعد اسبوع، سنه، خمسه، عشرة
قالت لي وانتي عايزة تختي حد لمشاكلكم مع بعض ولا عايزة الطلاق حددي؟لانو انتي ي شهد في حد زاتك م عارفه نفسك عايزة شنو دي مشكلتكك
إنتي متناقضهه وهو متناقض اكتر منك يعني انا م قادرة افهمكم
يعني مثلا الزفت صهيب بهتم لأمرك بس م عايزك
وإنتي بتغيري عليهو بس عايزة تتطلقي منو
قولته ليها اغيييير عليهو؟
قالت لي م تكابري واضح إنك بتغيري عليهو والنصيحه هو يستاهل الغيرة دة حتى شلبو حلال "ووووووب منو"
قولته ليها وانا بقلد في صوتها"حتى شلبو حلال ن"
قعدت تضحكك
قولته ليها م تضحكي يعني بجد كلامو مستفز وعلى العليهو قال شنو؟ في حال إحتجتي اي حاجه في اي لحظه إتصلي علي،
قالت لي لا في دي هو راجل صراحه لو م راجل م حيقولها
قولته ليها لا هو قالها لانو عارف إني م حأحتاجو وحتى لو إحتجتو م حأتصل بس بلمع لنفسو
قالت لي يلمع لنفسو لييه هو حميدتي ولا حاجه؟ شهد الزول دة انتي عِشتي معاهو في بيت واحد وفي تفاصيل كتيرة عشتوها مع بعض يعني هو م محتاج يبين ليك هو شنو بالزبط لأنو حرفياً إنتي حافظاه بصمة ودة السبب المخليك م قادرة تتقبلي فكرة انو يبعد منك
قولته ليها برضو م محتاجاه والبعد دة انا إخترتو يعني لو كان هو فعلاً محور حياتي م كنت رجعته اهلي لما عرفته إنو إتزوج رنين انا اصلا م ماليه يدي بيهو
قالت لي طيب اثبتي ليهو العكس وإستغلي طاقتك دي في شي مفيد يشغلك منو ويخليك تبطلي تفكري فيهو وابعدي من اي شي ممكن يزكرك بيهو يعني مثلا مشيتي القيادة إشتغلي توعيه إشتغلي مع الناس في حجات كتيرة ممكن تعمليها حاولي م تمشي الحته الهو فيها سواء الترس او غيرو ولو مشيتي وشوفتيهو م تقيفي وتتنحي فيهو اتصرفي عادي كأنك م شايفاه، فجأة باب الغرفه فتح وسمعنا صوت واحدة بتقول هاااااااااي
بلسم صرخت وقالت ليها "جوجوووو قامت عليها وضمتها، قالت ليها مشتااااقين ي وسخهه
بلسم قالت ليها كتير ي ماسورة اصلا الحضن دة م تستاهليه لانك جزمه وسجم
البت بقت تضحك بلسم إتفكت منها، البت قالت ليها طاااااايب مع نفسكك
جات خالتو بسمة داخله شايله كبايه مويه قالت ليها كيفك ي بتي عليك الله وشنو طولتي كدة مننا؟
بلسم قالت ليها اسأليها يمكن بيتنا فيهو شوك بطعن البت ضحكت قالت ليهم كدة اسلم على الجميل دة وارجع اتفاهم معاكم
جات قالت لي هاااااي ي جميل، قولته ليها اهلين باستني وقعدت قالت ليها ي خالتو انا جعااااانهه اقرب شي في تلاجتك ناوليني ليهو بلسن قالت ليها جايانا جعانة كمان م عندنا ليك اي اكل ي طفسهه البت قعدت تصرخ وتقول "ي خالتو لمي بتك دي ياخ لميها خالتو بسمة ضحكت قالت ليها م تشتغلي بيها ها دي مجنونه ساي،
البت رفعت لبلسم حواجبها وقالت ليها سامعة
البت ماشاءالله حلاتها اللبس وتسريحه الشعر والمكياج تخليهم ليها
بلسم قالت ليها ودي شنو الرهابه الانتي فيها دي ي زولة من متين وإنتي في الحالة دي ي بطه؟
البت قالت ليها قولي ماشاءالله من الله سامحين
بلسم قالت ليها لا هو من ناحيه من الله سمحين سمحين ي زوله لكن في تغير وإهتمام حاصل
قالت ليها ي بت ها الدنيا دي فيها شنو غير كدة
بلسم ضحكت قالت ليها والله؟ قبل كم شهر م كنا بنقول كدة ولا خلاص جو الدراما بتاع الحداد على عصمت خلص؟
قالت ليها تفي من خشمك وم تزكريني اها شايفه م بحب اجيك علشان بتزكريني بتربيهه الوسخهه المعفن المنتن دهه بلسم ضحكت قالت ليها ريلاكس طيب ي بطه م قلنا شي بس م وريتيني رميتي قشتو متين ولا دي دراما منك علشان ياما نصحتك وقلته ليك دة واحد غير النفسنه والنكد م عندو شي بتزكر لمن فصلتيني فترة بسببو ناسيه ولا ازكرك
جوجو قالت ليها ي بت انا م صدقته انو بجد قدرته اطلعو برة حياتي دة كان ماليني فقر ي يمة ومقفلها علي من اربعاتها، اسي جاني واحد في صمة خشمي مغترب في قطر شافني في عرس ود اهلي هو من اهل العروس المهم رسل لي واسطات عشان يتقرب مني وكدة هو شبه جادي لكن صحبتك عامله تقيله م عايزة استعجل واوصلو البيت زي م عملته في موضوع عصمت،
بلسم قالت ليها مغترب قطر مرة واحدة عاااد قادرة ي بطتي، وانا اخر من يعلم
ضحكت قالت ليها إنتي ردي على رسايل الواتسب اول ولا ابقي زول مع الناس ونزلي مسنجر وشوفي كميه الرسايل المرسلاها ليك
بلسم قالت ليها ااااااااا وحكت شعرها، ،
خالتو بسمة جات داخله شايله صينيه الاكل قالت ليها ي بتي كل شي بحصل معاك فيهو خير ليك و حبوباتنا بقولو "الرجال بليلة ام حجار"شان كدة اصلو م تهمي عشان راجل والله اسمعيها مني الدنيا دي بتلف وبتلف وبتلف وبترميك في احسن راجل هم كلهم زي بعض لكن شنو المرة المفتحه بتعرف تضفرو
ضحكنا كلنا، جوجو قالت ليها خالتو ي خبرة
خالتو بسمة قالت ليها عااد بنات الزمن ديل هن زاتهن م محتاجات توصيه الواحدة براها تجيب راس الراجل وتودي يمين وشمال ياخي الواحدة تلقاها عمرها 14 سنه سايقه ليها شايب عمرو 40 سنه
جوجو ضحكت وقالت ليها وكمان بتقول ليهو ي بيبي وهو عاجبو الاسم
خالتو بلسم قالت ليها اها جنس ديل يعملو ليهم شنو؟ غايتو الله يدي العافيهه بس خليكن مفتحات والراجل العديل والدغري وااااضح اووووعى تروحنو قامت طالعن قالت ليها تعالي ي بلسم لاحقاني شيلي العصير
البت قالت لي اتفضلي اكلي معي، قولته ليها شكراً م عايزة والله، قالت لي عليك الله!!!
قولته ليها والله م عايزة
بلسم جات راجعه شايله جك العصير قالت لي شوش يلا تعالي ناكل مع السجم دي، قولته ليها م عايزة والله اكلته في البيت، قالت لي ي زوله بطلي نفسنه وتعالي اكلي ياخ انا اسي كنت باكل قدامك وبرضو حأجاملها
جوجو قالت ليها حلفتها بس كسرت بخاطري واحرجتني
قولته ليها لا م كدة والله بس بجد لو كنت جعانه كنت اكلته وبعدين انا م طفسهه زيك ها
بلسم قالت لي اسحريني اسحريني انا اصلا نفسي اضعف طيب هاك عصير برضو قولي م عايزة شلته كبايه العصير،
بلسم قالت لي جوجو طبعاً ي جوجو شهد دي منفسنه بس درجتها اكعب من درجه نفسنتك الكنتي عليها إنتي قبل شهر لأنو انتي كان منفسن بيك خطيبك وهي راجلها انا كسنقل بحمد ربنا صباح ومساء على النعمة دي
جوجو قالت لي إنتي متزوجه بجد؟هزيت ليها راسي، قالت لي وااااااااااااااااي صغنن شديد ي حليلك وراجلك مالو منفسن بيك يغسي عليهو يعني حاجه حته وحلوته كدة بنفسنو بيها؟
ضحكته ضحكه بااهتهه كدهه
بلسم قالت ليها ديل امورهم جايطه شديد وداخله في بعض وم بتتشرح بسهوله انا نفسي القدامك دي م قادرة افهمهم المهم هم منفسنين ببعض وراجلها مواصفاتو قطعهه ناصيهه فاتحهه في الزلط وبعلي الليله بتدقني والله
جوجو قالت لي طالما قطعه ناصيه معناها مشاكلكم سببها الخيانه نسونجي صح؟
بلسم قالت ليها ي جوجو خليك محضر خير !!!
جوجو قالت ليها م شنووو؟العلاقه طرديه اساليني انا اي ولد سمح واحد من الاتنين ي قليل ادب ونسونجي وشماسي وصايع زيادة عن اللزوم، ي إما بليد وم بعرف يحنك وم بعرف يتكلم اساسا وهطله سااي خسارة السماحه فيهو اها راجلك اي واحد من الإتنين؟
قولته ليها النوع الاول
قعد يضحكو!!! قالت لي شوفتي اختك خبرة كيف؟ حافظاهم بصمه اقسم بالله بس اسمعيها مني اي نعم انا م وصلته مرحلتك و اتزوجته بس مريت بتجارب واهو زي م شايفاني قدامك في النهايه لقيت انو حب نفسي اهم من كل شي، ي بت انا كنت بحب لي واحد او مخطوبه لي واحد عارفه موصلني لمرحله انو انا لو عايزة اتصل إتصال لي واحدة من صحباتي او اخواتي ساااي لازم اتصل عليهو واديهو خبر عشان لو هو اتصل ولقى تلفوني مشغوول القيامة بتقوم وبندخل في موال تحقيقات احيانا بتصل لدرجه انو ارجع اتصل للزول الاتصلته عليهو وادخلو معي في مكالمة جماعيه علشان هو يصدق
ي بت اسألي بلسم من الجحيم الكان معيشني فيهو انا بسببو قطعته علاقتي بكل الحوالي حتى صحباتي وبلسم دي واحدة منهم، بدون مبالغه منعني منهم عديل وخيرني ده غير انو الطلوع والدخول بأوامر وإذن منو ي بت دة عيشني ايام الله لا عادها،
قلته ليها لو كنتي مرتو م كان حيعمل فيك كدة
قالت لي بالزبط كدة، لما فاض بي ولقيت نفسي براي م عندي الاشكي ليهو حتى على طول جدعته ليهو دبلتو اي نفسنته لاني حبيتو بطريقه مجنونه شديد كنت مستعدة اعمل اي شي عشانو بس في الاخير لقيت انو انا في علاقه بتاخد مني اكتر م بتديني،
اسي عندنا تقريبا 8 شهورً من إنفصلنا 4 شهور نفسنه وبكى وكلام زي دة، بعدها نزلته إشتغلته ولهيت نفسي بالشغل وبعدها إتجاوزتو ي ستي وإشتريت دماغي واهو حالي زي م إنتي شايفه لا متت ولا حياتي بعدو وقفت بالعكس ي دوب إتنفسته كويس من كتمه النفس الهو كان مسببها لي،
فجاة جاتها مكالمه رفعت التلفون قالت لينا هششش وقالت الوو، اهلين، الحمدلله وإنت كيفك اليوم الصداع خف؟الحمدلله طيب حاول إرتاح زي م قلته ليك واخد بندول إكسترا ومشيت فحصته ولا لأ؟ليييه انا مش قلته ليك امشي افحص؟ايواااا يعني انا بس مفروض علي اسمع الكلام وإنت لا؟لا تمشي تفحص واليوم إتفقنا؟خبر شنوووو؟بجد ياااااخي ي خالد ولا بتهظر؟ياااااخي شكرا طيب ماشي، خلاص تمام شكراً مرة تانيه، م فاتحه الشبكه، حاضر طيب، قفلت قالت لينا لو قلته ليكم م بتصدقو؟
بلسم قالت ليها شنوووو؟
قالت ليها اخو خالد حيشغلني معاهو في وكاله السفر والسياحه حقتو
بلسم قالت ليها خالد منو كمان؟جوجو قالت ليها مغترب قطر ي ها
بلسم قالت ليها اهااااااا وانا اقول المياعه لزومها شنووووووو في المكالمه جوجو قالت ليها إنتي عارفه اصلا هو كلمني ليهو فترة وانا قولته ليهو لا، وعرفني على اخوهو وكدة بس لقيت المرتب حنين قلته لنفسي ليييهه لا ياخ بلسم قالت ليها حتاخدي كم؟
جوجو قالت ليها 7 الف جنيه في الشهر،
بلسم قالت ليها يعني ي زولتي عزة زي العزة، طيب وشغلك التاني مش شغاله في حته تانيه انتي؟حتخليهو ولا كيف؟
جوجو قالت ليهو هو والله انا طمعانه فيهم الإتنين م اكذب عليك بس شغل اخو خالد دة حنين شويه وم عايزة اطيرو من يدي م عارفه غايتو مفكرة اجيب بت اختها محلي في مكان شغلي الأول م معروف يمكن في يوم افركش مع خالد واتضطر اسيب شغل اخوه نظام البريستيج والكرامه وكدة وارجع عاطله واتسيك
بلسم قالت ليها طول عمرك وسخهه شغاله وين انتي؟
جوجو قالت ليها مع ناس ماكس هنا في فرع مول عفراء
بلسم قالت ليها بجد طيب حلو ياخي وانا اقول البت بقت قشيرة كدة مالها باريتي درب الماركات قولتي لي
ضحكت قالت ليها هههه لا والله ابداً من الله جايه قشيرهه، طبعا نزلته لي زومبا ي بت م وريتك
بلسم قالت ليها لاحظته وعايزة اعلق ضعفتي ي بطه
قالت ليها ي زوله انا زمن نفسنتي في موضوع عصمت كنت شغله بلا شغله بدخل المطبخ عارفه وزني وصل كم؟95، بلسم قالت ليها بتزكر بقيتي بشعه لمن غلط
جوجو قالت ليها اسي وزني بقى 65 زومبا على روجيم قاسي ولسه عايزة اضعف
قولته ليها كدة قوامك حلو ومناسب شديد وم تنزلي اكتر، قالت لي كل الناس بتقول لي كدة لكن انا م بثق في وزني ياخ انا لو إتنفسته نفس عميق ساي بزيد 3 كيلو، اسكتي ي بت امي انا بعاني
فضلنا طول اليوم مع بعض والبت دمها عسل وتتحب وتدخل القلب
رجعته البيت لقيت خالي جا، سلمته عليه وعملته ليهو الجبنه وبقيت اسألو عن احوال ناس البلد وكذا، المهم عدة اسبوع لقيت نفسي فاضيه وم عارفه اعمل اي شي ي مشيت لي بلسم ي قعدته اتونسته مع حبوبه ي حضرنا التلفزيون انا وكريم والتلفزيون زاتو كريم ببكي بقول الا يحضر افلام كرتون، وطول م انا قاعدة براي م بكون في بالي غير صهيب شريط حياتي معاهو كلو بمر في مخيلتي والحاجه دي مؤزيه نفسياً بالنسبه لي لأنو بعدها انا بقلب عصبيهه ومتنرفزة، وخالي في حاله سفر لأنو بقى شغال في الاسبيرات يعني يوم في الخرطوم و 3 في البلد،
بقيت بفكر في موضوع جوجو يعني بجد إشترت دماغها
قعدته مع نفسي كدااااااا وانا سرحانه وباكل في ظفوري، شلته تلفوني واتصلته على بلسم قلته ليها اسمعيني، قالت لي اها،
قولتها ليها اممممممم صحبتك لقت ليها بت تشتغل ليها في محل شغلها الأول؟قالت لي والله م عارفه ي شهد بس لييه السؤال م فهمت؟قولته ليها اممممم لو م لقت انا ممكن اشتغل مكانها لغايه م تحتاجو حأ..قاطعتني قالت لي نعم؟انتي عارفه نفسك بتقولي في شنو؟ي بتي حبوبتك وخالك لو جبتي ليهم سيرة الموضوع دة في الحلم ساي حيقطعوك حتت حتت، قلته ليها عارفه كدة بس خليك منهم كدة انتي شوفي صحبتك حتقول ليك شنو لو وافقت اديني خبر ولو لا كمان خلاص، قالت لي انا م عندي مشكله بشوفها ليك بس برضو ي مجنونه الله واعلم اهلك يخلوك صدقيني، قلته ليها انا بتصرف معاهم يخخ المهم شوفيها وانا منتظراك لانو احتمال كبير خالي اليوم يجي وبكرة م بكون عندو لي زمن برجع نهايه اليوم، قالت لي ظابط اقفلي بشوفها وبرجع ليك، بعد ساعه رجعت لي قالت لي كلمتها ليك قالت إذا انتي موافقه هي م عندها مشكله اساسا كانت كايسه لي واحدة تسد خانتها، انا قلته ليها م تعتمد عليك لأنو يمكن خالك م يوافق وانتي عارفه خالك، قولته انا بحاول غايتو، قالت لي حتقولي ليهو شنو؟
قولته ليها م عارفه بس المهم ححاول وخلاص بلسم انا بجد لو قعدته كدة حأموت من كتر التفكير بس قالت لي طيب
بالفعل في نفس اليوم دة خالي جا بالليل، الصباح ونحن بنشرب في الشاي حبوبه كانت بتقلي ليها في بخور كدة، قال ليها يمة الجابرك علي الشغله دي شنو يمه؟قالت ليهو ها ولد ها احسن من القعدة ساي اسي النسوان بجو يشيلو منو ويقعدو يتونسو معي الحله كلها بقت عارفاني حداث بحدث حداث، ضحك قال ليها والله غايتو إنتي يمة تحيري
سكتته مسااافه وانا باكل في ظفوري ومتوترة وخايفه اليوم دة م يعدي على خير ابدا، فيً قعدتنا ديك دخلته المطبخ اكتر من 10 مرات وخالي يلعب مع كريم كورة ساااي، لما خلاص فاض بي جيت قولته ليهو خالي!!!
قال لي ايوة ي بت
قولته ليهو صهيب جانا الاسبوع المضى
قال لي اي حبوبتك كلمتني،
قولته ليهو اصلا هو كان عايز يفتح لي محل تجاري انا وامتثال خالتو الدكتورة دي لمن اشترى لينا قطعه الارض بس اراد الله وحصل الحصل، يومو الجا قال لي بدل قعدة ساي انا بلقى ليك شغل في محل كويس تشتغلي فيهو،
حبوبه قالت لي شغل شنو ي بت انتي الناقصك شنو اسي؟
قلته ليها حبوبه الشغل دة م للزول الناقصاهو حاجه،
اها ي خالي اسع هو ضرب لي امس وقال لي انا لقيت ليك الشغل انا قلته ليهو م بقدر الا اكلم خالي
خالي قال لي انتي ناقصاك حاجه؟ كان ناقصاك قولي لي وانا بجيبها ليك او بديك حقها كان انتي كان ولدك، قلت ليهو م ناقصني شي ي خالي لكن..
قال لي دايرة تباري بنات الخرطوم طالعه من هنا وداخله هنا إنتي؟قولته ليهو لا ي خالي اباري شنو اسي انا قاعدة امشي وين غير بيت الجيران دة بس؟ وبعدين الخرطوم دي انا كان دايرة اباري فيها كان باريت من وقت قاعدة في بيت راجلي، والشغل دة م جايبو لي زول غريب يعني هو لو م شايفو مناسب وكويس م كان قال لي انزلي إشتغلي،
قال لي ايواااا سمح هو لي م ضرب لي كلمني؟ قلته ليهو ي خالي هو اصلا كان داير يكلمك انت ويكلم حبوبه، لكن لما جا اسأل حبوبه عملت شنو؟
قالت لي عملته شنو انا ي بت ها؟
قولته ليهو شكتني ليهو ي خالي، والله من جا قعد مسكت الراجل شهد صفتها وشهد فعلتها وشهد تركتها، الليله انت كان زولك دة كعب بتقول للناس إنو كعب؟زمان جدي الله يرحمو كان بعمل نفس الشي لي امي بشاكلها وبضربها وبصغرها قدام ابوي عشان كدة ابوي طلع ليها في راسها، اسي انتو دايرين تعملو نفس الشي معي
حبوبه قالت لي هي ي بتي م راجلك ووليك كان م شكيتك ليهو اشكيك لمنو وانتي راسك زي الحجر م بتسمعي الكلام!!
قولته ليها حبوبه راجلي غريب، وطالما هو غريب البخليك تشكيني ليهو شنو؟
خالي قال لي اسمعي ي بت، قولته ليهو نعم ي خالي، قال لي اسمعي كلام حبوبتك فاهمة ولا لأ؟
قولته ليهو خالي والله انا بسمع كلامها لكن هي دايراني كان داخله الحمام ساي اقول ليها داخله الحمام حتى ادخل
قال لي برضو اسمعي كلامها م في النهايه حبوبتك وخايفه عليك ودايرة مصلحتك لو م دايرة مصلحتك بتخلي الوراها والقدامها وبتجي معاك بلد الغربة دي؟اسمعي الكلام سامعه الكلام دة؟
قولته ليهو حاضر
قال لي وراجلك مالو م اتصل لي في موضوع زي دة؟
قولته ليهو خالي هو قال داير يتصل عليك لكن هو تلفونو الكبير داك إتسرق قال لي طلعته الشريحه واي شي لكن م فيها ولا رقم عشان كدة
قال لي م كان تدي الرقم إنتي طيب راسك الصغير دة مالك م حافظاهو؟
سكتت
قال لي سمح امشي عندي جلابيه في شنطتي اتكرفست شويه اكويها لي طالع بيها، قولته ليهو كويس
مشيت دخلته الهول وقفته جمب الباب اتصنت لكلامهم، حسيت انو حيتصل على صهيب وحيسألو ولو اتصل لصهيب الغبي حيقول ليهو الحقيقة وبعدها انا تاني اكبر مستشفى فيك ي خرطوم م حتستقبلني
حبوبه قالت ليهو راجلها دة الا كان مجنون ماف راجل عااااقل كدة بجيب لمرتو شغل ويقول ليها امشي إشتغلي، شغل شنو البتشتغلو محتاجه لي شغل هي؟
خالي قال ليها والله ي يمه إن جينا للصح خليها التشتغل احسن ليها، اي نعم هي م محتاجه شي لكن اخير ليها من قعدة البيت انا متابع تصرفاتها عندي فترة حسيتها ماها طبيعيه وقعدت البيت والضغط الكتير م بجيب راسها، اها اخير ليها تشتغل ولا تدخل في حاله نفسيه وتبقى زي امها الله يرحمها؟حبوبه سكتت
قال ليها اخيرلها تشتغل الشغل بنفس عليها شويه، وبعدين راجلها جايبو ليها اها في حاله زي دي نحن نقول شنو؟نسكت بس،
حبوبه قالت ليهو والله ي ولدي انا البت دي ومشاكلها محنوني في دنيتي دي
خالي قال ليها كمان نحن م بنقدر نقول للراجل تعال سوق مرتك لانو نحن سوقناها بنفسنا وبتنا م تقيلهه علينا يمه الخير راااقد والضراع لسه اخدر اصلو م تقصري منها هي وولدها اي شي إحتجتوهو جيبوهو
قالت ليهو والله ي ولدي م ناقصنا شي زي م انت شايف تلاجتنا دي ملاانه والقروش دي انا زاتي ممسكاها ليها هي بقول ليها كان احتجتي لي شي ليك ولي ولدك شيلي
قال ليها اي اصلو م تخليها تحتاج لي شي
قالت ليهو سمح ي ولدي الله يديك العافيه
انا من الفرحه م قادرة اصدق خالي م عندو مشكله اشتغل غايتو الكذب احيانا بجيب نتيجهه
على طول إتصلته على بلسم قولته ليها خالي وافق لي اشتغل، قالت لي كذابه، قولته ليها اقسم، قالت لي كدة اشرح لي وافق كيف؟قلته ليها بشرح ليك بعدين اسي اتصلي على صحبتك وكلميها علشان م تشغل زول تاني، قالت لي ظابط
فصلته منها وكويت لي خالي الجلابيه بعد م فطرنا وهو طلع لبسته توبي وجري لي بلسم حكيت ليها الحصل، قالت لي غايتو م عارفه اقول ليك شنو لكن كذبتك الشيطان زاتو بكون محتار فيها، لكن لو خالك إتصل على صهيب امورك بتجوط ي صحبتي قولته ليها وااااي اسكتي بس بتجوط شديد والله ادعي انو تطير من بالو فكرة انو يتصل على صهيب وكدة، المهم م قولتي لي صحبتك قالت ليك شنو؟
قالت لي جوجو قالت بكرة الجمعه وانتي مفروض تمشي معاها السبت علشان تعرفك عليهم وكذا، قلته ليها على طول كدة؟
قالت لي مالك إتراجعتي؟
قلته ليها لا طبعاً، قالت لي طيب بكرة جوجو حتجي حتبيت معانا طبعاً علشان يوم السبت تتحركو مع بعض من هنا وكدة
قلته ليها طيب ظريف
بالفعل جوجو يوم الجمعه جات، واتصلو علي مشيت ليهم قالت لي عايني هو شغل عادي يعني بتكوني واقفه في المحل جو زباين داخلين حتلفي معاهم لو محتاجين مساعدة حتساعديهم و...فضلت تشرح لي
بعدها قالت لي خليك شيك وكيوت كدة
قلته ليها فرض عين؟قالت لي لا م فرض طبعا هم اصلاً م بدققو في الحجات دي بس إنتي من تلقاء نفسك يعني تخيلي يوم راجلك لاقاك شغاله هناك وإنتي متشيكه وكدة يعني اقولها ليك كيف الرجال عموما او م عموما الواحد بتلقيهو م بتعجبو المرة الا بعد م تنفصل منو وتتغير وتبدأ تعيش حياتها بالطريقه الهي عايزاها بتحسي انو بتغيرك دهه بتستفزي رجولتو، طبعا ي بلسم قبل يومين رفعته صورة في الأنستقرام ومعي اخو خالد ي بت عصمت عايز يموت، رسل لي في الدايركت وشبكني ليك دة منو و...فتحته الرسايل وبكل برود قلته ليهو دة اخو خطيبي واي كان شوفتي حظرني طبعاً
بلسم قالت ليها م جادة، انتي اصلا م حظرتيه من البدايه مالك؟
قالت ليها ي زوله انا م حظرتو من اي شي قاعد في الواتسب وبعمل seen للإستوريهات بتاعتي وقاعد في الفيس م ححظرو ابداً يموت قهر كدة بس
قولته ليها انصحك م تحظريه، قالت لي اصلا م ححظرو ي زوله خليه يعيش العيشني ليهو،
فضلنا مع بعض لغايه العصر بعدها رجعته البيت خليتهم هم جوني قريب للمغرب كدة قعدو اتونسو مع حبوبه م خلت حكايه حصلت معاها زمان م حكتها ليهم مسكت بيهم زمن لمن غلط بعدها قلته ليهم تعالو وروني بكرة اللبس شنو، فتحته ليهم الدولاب بقو يختارو لي، في النهايه بقو على فستان بدرة كدة لونو حرجلي ساادة فيهو رباط من النص وعليهو ورود صغيرة بالاسود من فوق، طرحه سوداء وشبط اسود،
اول لبسه طبعا لاني في فترة كدة جات كل يوم ماشه السوق مع بلسم إشتريت حجات كتيرة م لبستها
يوم السبت الصباح حوالي الساعه 9 ونص كدة انا جهزته،
حبوبه قالت لي حتمشي مع منو؟براك؟قولته ليها صهيب كان جايني لكن قال عربيتو عطلانه حيوصلو احمد اخوهو بعربيتو قال لي اطلبي ترحال وهو حينتظرني هناك، قالت لي ترحال دة شنو ي بت؟قلته ليها عربيه خاصه ي حبوبه،
قالت لي ايوااا والعربيه دي بتطلبيها كيفن ي بت؟قولته ليها بتطلبها لي بلسم ي حبوبه اسي اتصلته عليها علشان تطلبها لي وكدة، قالت لي لا كان كدي خلاص،
قولته ليها انا ماشه لي بلسم لو بتاع العربيه جا بدق ليك الباب عشان اقول ليك انا طلعته
قالت لي كويس، طلعته مشيت ناس بلسم لقيت جوجو واقفه في المرايه وبتظبط في شعرها، قالت لي شاليومجيتي قولته ليها ايوة، اتلفتت عاينت لي قالت لي تعالي اظبط ليك حواجبك دي، قولته ليها لا هم اصلا ماف اقل شي ببقو اوڤر قالت لي لا م تخافي تظبيطه على خفيف بس تعالي، قعدتني وبدت تعملهم لي جات بلسم قالت لي شوش الله الفستان خراااافي ي ريت لو شلته لي واحد زيو واي قولته ليها م مشكله نلبسو مع بعض انا وانتي واحد قالت لي اموت انا
شويه كدة جوجو قالت لي خلاص دقيقه اعمل ليك حبه روج، قولته ليها لا عندي واحد كبدي درجتو ظريفه وبتجي معي، قالت لي طيب يلا، بالفعل عملتو، وقفته في المرايه سرحته شعري وطلعته لي خصلتين بشقه نص بحيث انو لما اكوز الطرحه يظهرو، بلسم قالت لي وااااي من الفستان انا عايزة زيو وربي حأمشي اجيب واحد، ضحكته قولته ليها م تنفسني خلاص بالحاله انا كلمتك وقولته ليك شيلي واحد وانتي ابيتي، قالت لي م كنت مقتنعه بيهو كدة
جوجو قالت ليها ترى الحين إقتنعتي ي ببا فجأة رقم جوجو إتصل ردت قالت اهلين، ايوة تعال على طول، رابع باب بقع على يدك اليمين طيب ماشي، بعد م قفلت قالت لي شهد يلا علشان هو شبه وصل، قولته ليها طيب دقيقه طلعته بسرعه دقيت الباب لحبوبه مسافه، بتاع العربيه جا وقف بلسم وجوجو طلعو، جوجو قالت لي شهد يلا، فتحت الباب وركبت اول م اتحركته وركبته العربيه بابنا فتح حبوبه طلعت لقت بلسم بتقول لينا يلا باي، نزلته القزاز قلته ليها حبوبه يلا انا مشيت، قالت لي ايواااا سمح ربنا يعدلها عليك ي بتي،
بعد م اتحركنا حسيت نفسي متوترة بعدين قلته لنفسي دي فرصه م بتتعوض ي شهد، اايوة نعم انا م عندي حوجه للشغل دهه ماديا، بسً نفسياً انا محتاجاه، حاسه انو حالي حيكون افضل بيهو، كفايه جداً انو حأكون مشغوله وبعيدة كل البعد عن صهيب وتفاهاتو، إضافه لي إنو خالي حيفضل يصرف علي انا وولدي لمتين، ااي نعم هو م عندو مشكله بس كمان هو عندو مسؤليات غيرنا، عندو مرتو وبيتو وعماتي في البلد واخواني، وحبوبه ولو جاب عيال المسؤليات حتزيد علييه اكتر، انا حرفياً حابه فكرة انو اصرف على نفسي بنفسي، م احوج ولدي لحاجه بس من دخلي الخاص وم اعتمد على زول، تقريباً طول السنوات المضت دي م حسيت بالإحساس الأنا حاساه حاليا، مً عارفه الإختلف شنو بس انا حرفياً الشي الوحيد الحاسه بنفسي عايزاه انو اكون إنسانه مسؤله، صهيب فاكر انو هو محور حياتي وقالها لي بصريح العبارة ودي اكتر حاجه بتوجع وقمة الاستفزاز ف انا عايزة اثبت ليهو العكس واثبت الحاجه دي لنفسي اول
اول م وصلنا قلته ليها جوجو هم حيوافقو على انو انا اشتغل ك بديل ليك وكذا؟قالت لي لي اكيد مالك خايفه؟قولته ليها يعني، ضحكت قالت لي لا م تخافي، دخلنا المول، قالت لي تعالي هنا المحل، دخلنا هي بقت تسلم على البنات الشغالين في المحل وانا بقيت اتلفت يمين وشمال، فجأة قالت لي تعالي، مشيت وراها مشينا محل الحسابات تقريباً سلمت على البنات القاعدات فيه، وقالت لي واحدة دي البت القلت ليك عليها، البت قالت ليها يعني بجد م حتشتغلي معانا قريب؟قالت ليها للأسف والله زي م حكيت ليك ظرفي صعب شديد الفترة دي، قالت ليها ربنا يعينك ويسهل إن شاءالله ي رب هاا اسمها منو قلتي لي؟قالت ليها إسمها شهد، قالت لي اهلين شهد كيفك؟قلته ليها الحمدلله وإنتي!!قالت لي الحمدلله، طبعاً ي هاچر حنتضطر نعمل معاها إنترڤيو علشان إنتي عارفه قوانين الشغل عندنا وعارفه إنو عندنا طلبات كتيرة بتاعه شغل في حال إنو إتوفرت شواغر ف م عايزين نظلم الناس الملفاتهم عندنا ديل وكذا، جوجو قالت ليها طيب تمام، بعدها البت قالت لي شهد تعالي عندي بجاي كدة، عاينت لي جوجو قالت لي امشي، مشيت ليها في كرسي جمبها قالت لي اقعدي، قعدته، قالت لي حأسالك اسئله خفيفه كدة على السريع جايبه معاك مستندات؟رقم وطني او غيرو؟قلته ليها لأ
قالت لي طيب ي ستي جيبهم لي في بعد كدة قولي لي درستي وين وخريجه ولا لسه بتدرسي ولا شنو بالزبط؟قلته ليها م درسته جامعه، عاينت لي عين غريبه قالت لي خالص؟يعني لسه في الثانوي؟قلته ليها لا انا م قاعدة ادرس اساسا، عاينت لي جوجو، قالت لي طيب بتتكلمي إنجليزي كويس ولا لانو زي م إنتي عارفه احيانا بجونا "كاستَمر "اجانب ف بتكوني محتاجه إنك تتعاملي معاهم يعني،
قولته ليها امممم قبل فترة كنت بقرأ في معهد بتاع تطوير ذات وضمن الحجات الدرستها فيهو الإنجليزي يعني شبه متمرسه فيهو، قالت لي طيب ساكنه وين؟
قلته ليها في ال...
سكتت مساااافهه حسيتها م إقتنعت بأجوبتي ليها خصوصا الحته بتاعه الدراسه، والإنجليزي فجأة جاني إحساس انو م حتشغلني خالص هي كانت ماسكه قلم في يدها وقدامها اوراق كتيرة بقت تفتح فيها، بعد مسااافه قلته ليها انا محتاجه للشغل دهه بجد وشديد كمان م صدقته إنو جوجو جابتو لي ممكن تقبليني وإن شاءالله حأكون عند حسن ظنك عاينته لي جوجو لقيتها مشغوله بتتونس مع كم بت كدة من الشغالين في المحل شكلهم صحباتها
فجأة جاتها مكالمه قالت لي طيب بديك خبر، قلته ليها ماشي عن إذنك قمته من جمبها ومشيت على جوجو محبطه وحسيت انو الموضوع م ظبط، جوجو قالت لي خلصتو؟قلته ليها ايوة، قالت لي قالت ليك شنو؟قلته ليها ياها شويه الاسئله السألتني ليها قدامك دي بس، قالت لي انتي بجد م قريتي جامعه او كذا؟قلته ليها شرط يعني؟قالت لي لا بس بسأل، قلته ليها م قريت وبعدين شكلها م حتشغلني ياخ، قالت لي انا كمان حسيت كدة
قلته ليها يلا م قصه، بقيت اقول لنفسي حأكذب اي كذبه لي حبوبه وخالي عشان اقنعهم بيها بما انو موضوع الشغل دة م ظبط وكدة غايتو ي شهد تقول في زول داعي عليك عوارضك اكبر منك ياخ جوجو قالت لي يلا نمشي، قلت ليها يلا، قالت لي دقيقه اديهم خبر بي إنو انا طالعه علشان م امشي ساي، قلته ليها طيب، بعد م مشت مني بقيت اتلفت واعاين للملابس وكدة، شويه كدة جاتني راجعه وكانت بتقول يلا ي بنات بيناتنا تلفونات ماشي
قالت لي يلا نمشي ي شهد اتحركنا ونحن على وشك انو نطلع من المحل في واحدة قالت هاچر، وقفنا وإتلفتنا الإتنين مع بعض، كانت واحدة كن الشغالات في المحل، هاچر قالت ليها نعم، قالت ليها بنادوك تعالي، قلته ليها انا بنتظرك هناك امشي وتعالي، قالت لي طيب، مشت بعد مسافه نفس البت قالت لي شهد بندهو عليك، قلته ليها انا؟قالت لي ايوة، مشيت عليهم، قلته ليهم نعم!!!البت العملت معي المقابله قالت لي ماشه وين إنتي؟عرفنا هاچر ماشه إنتي مالك؟بقيت اعاين ليها بإستغراب بعدها قلته ليها إنتي قلتي لي بديك خبر!!قالت لي بس انا م حددته ليك متين يمكن بعد 5 دقايق، عشرة دقايق ساعه ساعتين صح؟
هزيت ليها راسي بمعنى ايوة، ،
قالت لي طيب ي ستي عندك علم إنو إنتي حتداومي معانا من اليوم...
نتلاقى®