الفصل الثالث
قراري بإنو انا انفصل عن صهيب م كان بتهور على قدر م كان بقناعه انو انا م قادرة ولا بأي شكل من الاشكال اتقبلو بعد العملو دة،
صهيب طلع على ناس حبوبه وقعد في الكرسي وهو ساكت،
خالي التاج قال ليهو اها ي ولدي وصلتو لشنووو؟
صهيب فضل ساكت!!!
جيت انا طالعه من الغرفه شايله ولدي قولته ليهم يلا ي حبوبه وخالي ارح نمشي،
بقو يعاينو لي،
قولته ليهم يلا ي حبوبه وخالي خلونا نمشي...
صهيب وقف على حيلو قال لي شهد لا إله الا الله؟
إتجاوزتو ومشيت على باب الشقه، حبوبه قامت وراي، جا لاحقني مسكني قال لي شهد الدنيا ليل، والشارع م معروف، بطلي جنك البتعملي فيهو وصباح الله بخيرو، قولته ليهو م شغلتك واتفكيت منو،
قال لي حتمشي وين وانتي كدة،
حبوبه قالت لي جهزتي شنطك ي بتي ولا وين مكانها وصفيها لي خالك ينزلها ليك
قولته ليها ي حبوبه انا إبرة شوفتي الإبرة؟ كان جاريه علي من البيت دة تتقبل، شوفتي الجلباب والتوب اللابساهم ديل؟بعد اصل بحرقهم ودة طرفي منك ومن كل حاجه بتخصكك ي صهيب...
فتحته باب الشقه ونزلته خليتهم، حبوبه قالت لصهيب اصلو المسكين لما يتظلم بكون دة حالو ي ولدي، وانت م خليت لينا فرقه ندافع بيها عنك الله يهدي النفوس وابقى عافيه ي ولدي لكن نحن م في يدنا شي خالي التاج قال ليهو بقولو التسوي بي إيدك بغلب اجاويدك، اها نحن شن بنسوي في حاله زي دي؟كدة خليها يومين، او تعدي فترتها والزعله يمكن تروح وبعدها نشوف البحصل شنو يلا ي ولدي في امانة الله
صهيب وهم طالعين مُخلنو دموعو جات جاريه وهو يمسح فيها، م قدر يتصرف اي تصرف يقدر يمنع بيهو شهد، وم كان في يدو شي لأنو عارف حجم الشي العملو، وعارف إستحاله شهد تقدر تتقبلو عادي كدة، في لمح البصر بس حياتو إتحولت لجحيم...
هل شهد كانت انانيه لما اتصرفت التصرف دة وهي على علم بموقفو وعلى علم بالكان حاصل بينو وبين رنين؟هل هي مفروض كانت تتصرف بعقلانيه اكتر من كدة؟وتاثير تصرفها دة على صهيب في فترة زي دي حيكون شنو؟
حبوبه وخالي جو لاحقني ركبنا العربيه وإتحركنا، على وين؟على البلد، البلد اللي انا عارفه ردة فعل الناس فيها تجاهي هتكون كيف، عارفه انهم حياكلو لحمي بالكلام وكتر الأسئله، عارفه نوايا حبوبه كريم حتكون شنو، وعارفه حجم المشاكل الحتواجهني في البلد ديك بس كل الحيلاقيني هناك كان اهون لي من القعدة مع صهيب
حبوبه وخالي فضلو يتكلمو في الموضوع وهم ماشين وانا حاضنه ولدي وببكي، بكيت كدة لمن الله غفر لي وبفكر في الحيحصل لقدام شنو وسرحااانهه في الضلام داك وكميه من الافكار الكعبة بتخطر على بالي اولها انو اهل سعد يقلعو مني ولدي، او يجبرني على العرس من سامي، او، او، او، ، بعدها م حسيت بنفسي جاتني غفوة، وبعدها م حسيت بنفسي الا وحبوبه بتشيل مني كريم، فتحته عيوني بخلعه، لقيت انو نحن وصلنا وخالي دخل العربيه جوة البيت والدنيا صباح، حبوبه قالت لي انزلي ي بتي خلاص وصلنا،
إتلفتهه مسااافهه بعدها نزلته، م عارفه بس المرة دي حسيت انو البلد دي وبيت جدي دة هو في الاخير حيكون ملجأي الوحيد، كل مرة الدنيا بتلف بي وبترجعني ليها، حبوبه قالت لي تعالي ي بتي، فتحت الابواب دخلنا شغله المروحه والمكيف قالت لي تعبانين شديد ي بتي من سفرة امس دي، نومو إنتي وولدك،
وبالفعل رقدته بس النوم غلبني، يعني انا حأنوم كيف وسط كل الخراب الحاصل في حياتي دة؟ااااخر إهتمامتي قول الناس بس همي كلو كان انا حأبدأ ارتب حياتي كيف خصوصا انو انا إخترته الحاجه دي بقناعه م زيها زي مشاكلي القديمة،
حوالي الساعه 12 كدة حبوبه جات صحتني قالت لي قومي ي بتي غسلي وشك وإتسوكي وم تهمي ابداً ي بتي، اي شي جاي من عند الله دة الأرض بتلزمو والبسوي الله دة كلو كويس، قولته ليها كريم وين؟قالت لي كريم مع اخواتك في بيتكم، عماتك جو قبيل لكن لقوك نايمة،
قولته ليها اهاا،
قالت لي دة توب وجلباب طلعتهم ليك اللبسيهم، خالك التاج مرتو جات من الصباح برضو،
قولته ليها بجد؟قالت لي اسي مع عماتك بهناك،
نزلته دخلته الحمام إستحميت وإتسوكته وجيت لقيتها جهزت لي الفطور،
قولته ليها حبوبه م عايزة انا والله، قالت لي لا تاكلي، انتي مجنونه ولا شنو، تبشتني حالك عشان راجل؟خليهو يجيبهم فوقك 6 اوووعك تركزي مع الموضوع كتير اوووعكك ختي اليقين في قلبك ي بتي
م كان عندي إستعداد اسمع اااي محاضرات، قولته ليها طيب وقعدته اكل بالغصب، بعد م خلصته قولته ليها ماشه اسلم على عماتي واخواتي، قالت لي خلي هم يجوك انتي م تمشي ليهم، قولته ليها م فرقت وبعدين شينه م امشي اسلم على اخواتي،
قالت لي سمح،
اصلا كان في باب في النص بين ناس حبوبه وبيت عماتي، لبسته توبي ومشيت، اول م وصلته الباب دة وقع على اضاني صوت مرت خالي وهي بتقول"النصيحه مشاكلها كتيرة والراجل مريحها وم محوجها لي شي لكن البت بدنانهه ساااهي والله"وعمتي هويدة بتقول ليها"لالا البت دي والله والله والله م بتتستر زي اخواتها، اسي فاطمه دي يوم م جاتنا بمشكله مع راجلها، ولا مريم، ولا إسراء، البنات ديل كلهم مستورات في بيوتهم الا هي اليوم واليوم التاني ناطه جايه بمشكله "وعمتي رحمه بتقول ليهم الغلط م غلطها، الغلط غلط خالها الما فارض كلمتو عليها وماشي وراها زي الدلاهه، وحبوبتها دي اصلا معروووفه م بترضى في بت بتها وخاربه طبعها لكن اها لمتين؟هي دايمة ليها؟بكرة نقعد في بت حاج احمد العزبه فعلت والعزبه تركت؟انا كان مشو ضربوها وكسروها وربطوها في بيت راجلها م عندي مشكله لكن يمشو ويجيبوها هي وولدها معاهم؟عاااد النصيحه دة م كلام دة والله، البت يوووومي ناااطه من راجل لي رااااجل دة م كلام دة يخوااااتي واللن
كميه الوجع الإتضاف لوجعي وانا واقفه وبسمع في كلامهم دة، اصلا انا مجهزة اضاني للحتسمعو ودي كانت البدايه بس، جايني كلام اهل سعد، وكلام ناس الحله وهل ابووي و...
بعد سماعي لكلامهم دة ارجع؟لا بالعكس إخترته إني اكمل وادخل اسلم عليهم، دقيت الباب وقولته ليهم السلام ودخلته على طول، شوفتهم لي خلتهم يتوترو، طبعا معروف شكل الزول الكان بتكلم وراك وانت تدخل عليهو فجأة بكون كيف،
كميه النفااااق الشوفتو في ردة فعلهم وهم بسلمو علي بحرارة وبياخدوني بالأحضان و...
قلت في قلبي سبحان الله على كميه نفاق البشر ووشوشهم المتقلبه دي معقوله بس، خلصته سلام سلمته على اخواتي الصغار وقعدته اتونسته معاهم وطلعته خليتهم،
قريب للمغرب كدة ونحن قاعدين جات عمتي فتحيه، كانت. متحمسه وملهووفة لشوفة ولد ولدها الله يرحمو، شالتو وسلمت عليهو وسلمت علي وبقت تسألني عن حالي واحوالي و...
من خلال تصرفاتها معي ببشاشه وكدة عرفته انو هي عارفه انو انا جايه بمشكله، وتعاملها السمح معي دة م ببشر بالخير، ملامح وشها كأنها كانت بتقول انها مبسوطه لأني جايه بمشكله، وعندنا في الخبر م بندسه يعني كان حفرتهة خندق لي سرك م تقول دسيتو لأنو بطلع بطلع
عدت الأيام وانا م بطلع من البيت عشان م اسمع سيرتي على كل لساني، بس للأسف هم ناس البيت زاتهم اسمي على لسانهم صباح ومساء على التوالي، واي زول عايز ينصح براه، دة غير المكالمات الجايه من امتثال، ومرة من احمد، ومرة من غيرو، طبعاً انا م عندي تلفون بس بتصلو على رقم حبوبه، وكل مرة بقول لحبوبه اخلقي ليهم عذر، اخر مرة اتصلت امتثال استقبلتها، بدت تتكلم معي في الموضوع وتبرر لنفسها، قولته ليها امتثال، الحصل حصل وانتهى، وولدكم وانا خليتو والله واخدته طرفي منو وإن بقى قبله تاني م مقبلهه عليهو، قالت لي شهد م تقولي كدة وم تظلميهو والله اتجبر يعمل كدة
قولته ليها اتجبر يعمل كدة عشان مصالحو الشخصيه، عشان المنحة الدراسيهة، سمح خلي رنين والمنحة الدراسيه ينفعوه، قالت لي والله ي شهد والله صهيب لا بتهمو منحة لا غيرها، انتي عارفه هو عمل كدة ليييه بس مشكلتك م قادرة تتقبلي الحقيقه المرة دير، الموضوع كبر شديد اكبر مما تتخيلي وماف زول حكى ليك عشان م...قاطعتها قولته ليها امتثال انا والله م فيني روح ااااسمع اي تبرير لصهيب ولا للحصل دة، وزي م قولته ليك الحصل حصل وانا خلاص وصلته الحد وم طالبة منو شي غير ورقتي بس، قالت لي والله ي شهد م عارفه اقول ليك شي، قولته ليها دة ااخر كلام عندي والله ي إمتثال مع إحترامي ليك...
خلصته مكالمتي معاها على كدة،
في نفس اليوم دة بالليل مرت خالي كانت قالت انها عياانة، لما هو جا جات شالت ليهو مويه بس م شالت ليهو العشاء، انا قمته جهزته العشاء ومشيت على إتجاه بيتهم، سبحان الله كأنو ربنا دايما بكون عايزني اسمع كل البتقال عني، لما وصلته الحيطه الفاصله بينا وبينهم سمعتها بتقول ليهو"انت تربيها وتربي جناها يعني؟سمح انت م عندك مسؤليات غيرها في الدنيا دي؟لمتين يعني تقعد تحاحي ليها كدة؟البنات ديل كلهن معرسات الا هي بس تقعد تخلق لينا في المشاكل والكلام الفارغ؟لا مالها يعني كان انسترت في بيت راجلها؟م يعرس كان عرس هي السيدة خديجة والسيظة عائشه معرسين فيهن هي شنو لمن م بعرسو فيها؟البت خاربين طبعها ومدلعنها زيادة عن اللزوم، اها قول إتطلقت من دة بكرة تاني تعرسو ليها واحد وتطلق منو، البت تبقى بس زي المرة الما كويسه يومي على الله براجل جديد!؟
انا المزعلني انو خالي التاج م فتح خشمو معاها بحرف ولا حاول يسكتها وكان بسمع فيها وهي بتتكلم عني بالطريقه دي، كأنو العرسات العرستها دي كانت بإختياري انا وكأنو هم م كانو السبب في الانا فيهو دة كلو، وصلته ليهم العشاء من سكات ونفس خلعتها حقت المرة الفاتت اتخلعتها، مشكلتها حقيرة وقذره شديد وم بتقدر تنطق قدامي حرف بس وراي بتاخد راحتها
الليله دي اصلي م نمته، بكيت قدرتي، وصليت إستخارة، وقريت قرءان،
الصباح صحيت بدري كنسته الحيشان وغسلته العدة وجهزته الشاي، وعجنته عجين الكسرة لحبوبه، جا خالي صبح علينا، قولته ليهو خالي!!
قال لي ايوة ي بتي دايرة حاجه؟
قولته ليهو ااي دايراك في موضوع،
قال لي في شنو خير؟قولته ليهو تعال اقعد، وناديت حبوبه جات قعدت،
قالو لي خير إن شاءالله، فضلته ساكته وبعاين لي يدي،
خالي قال لي دايرة ترجعي لراجلك؟
هزيت ليهو راسي بمعنى لا ودموعي جات جاريه
حبوبه قالت لي اجي ي بتي في شنوو مالك ي بتي كدة قولي بسم الله !!!
قولته ليهم انا لما عرسته صهيب دة كان عشان انتو قولتو لي العرسه دي عشان مصلحه ولدك، قولتو لي هناك يقرا احسن تعليم ويتربى احسن تربيه، وانا والله دايرة ولدي يقرا ويتعلم ويعيش احسن عيشه لكن م هنا، هناك محل م انتو اقنعتوني ووديتوني،
خالي قال لي اها م معناها دايرة ترجعي لي راجلك!!
قولته ليهو لا م بدور الرجعه ليهو ولا شي، انا كان دايرة ارجع ليهو م بفوتو ي خالي، لكن انا دايرة اربي ولدي بذات نفسي براي، وانا الفترة العشتها هناك م هينه عرفته فيها البلد ديك واي شي،
خالي التاج قال لي سمح اسي انتي دايرة شنو؟يعني بتقولي دايرة تربي ولدك.هناك وم دايرة ترجعي لراجلك كيفن الكلام دة ي بت؟
قولته ليهو خالي المرة دي الا يحرسها راجل يعني؟براها م بتعرف تعيش؟انت قولته لي الدايراهو ببقى، انا دايرة امشي هناك، اشتغل واعلم ولدي احسن تعليم بس م الا اقعد مع راجلي
خالي التاج قال لي بنهرة ي بت هوووي انتي جنيتي ولا شنوو؟دايرة تبقي هامله زي بنات البلد ديك ولغاادي؟تعيشي براكي ديك م بتتسمى عيشه بتتسمى إنطلاقه، وزاتو تعيشي براكي كيفن؟ة م شي بركب في الراس، ولا عشان وقفنا معاك في موضوع راجلك دة دايرة تطلعي في راسنا؟؟اسمعي ي بت هووي 1+1=2 فتحي اضانك دي وختي راسك دة في الأرض اللف والدوران م بنفع،
قولته ليهو وين اللف والدوران في كلامي اسي ي خالي؟
قال لي بس م تكتري وقام مشى
قعدته ابكي حبوبه قالت لي هو لكن ي بتي انتي م بالغتي، تمشي وين براك قولي كلام معقول شويه،
قولته ليها مشكلتكم م دايرين تفهموني القعدة في البلد دي نار والقعدة في بيت راجلي نارين، انا مما جيت البيت دة يومي بصبح بسيرتي وبمسي بسيرتي، عماتي يتكلمة، مرت خالي تتكلم، ناس الحله يتكلمو ويجو يطاعنوني بالكلام في نص بيتنا وقدام عيونك، اي زول بتكلم برااه التقول انا اول واخر واحدة تختلف مع راجلها، ليهه ياخ انا م بني ادمة؟م بشر؟م بحس؟، دايرني اقعد واندفن بالحياة هنا وبكرة تجي عمتي فتحيه تقول دايرة اعرسها لي سامي وخالي يقول موافق لانو متعودين تعملو كدة وشهد دي بالنسبه ليكم عبارة عن اله بتاعه عرس، يوم متين اخدتو راي في شي عايزين تعملو لي انتو؟يوم متين اخدتو موافقتي؟بقيت ابكي بحرقه، واليوم دة كلو لا قعدته مع زول ولا اكلته شي وقدر م حبوبه دي حاولت ترضيني م قدرت،
روحي بقت عدوانيه اكتر من انها تكون حساسه، اقل شي بأثر علي، اي شي عايزاهو يمشي بمزاجي وبحسو صح
الغداء حبوبه جات ختتو قدامي وقالت لي وحاة اسم الله م باكل لو م اكلتي، والله ولا كأنها بتتكلم معي
قعدت مسافه لما م ركزته معاها طلعت الصينيه بقت ماشه وجايه، قالت لي انا عشه التشوفيني دي بميهه راجل، وضراعي دة اخدر وانتي وولدك دة انا م بخليكم الا اخش التراب، قرايه والله يقرا، لبس والله يلبس، احسن تربيه يترباها، زي م لحقتك وجبتك من هناك م بغلبني مش انتي م دايرة القعدة في البلد دي؟سمح انا معاك والخير راقد، انا دي براي القروش دي كان قبلته شرق عندي وكان قبلته غرب عندي جدك م خلاني ساي، والخرطوم دي مش دايراها انتي؟ انا بمشيها معاك إرتحتي؟
فضلته ساكته وبسمعها وانا ببكي، كريم جا داخل بقول لي ماما، شلتو حضنتو وزدته في البكى زيادة،
المساء خالي التاج لما جا بعد م إتغداء وارتاح وكدة، حبوبه نادتو ونادتني معاهو،
قالت ليهو التاج،
قال ليها نعم يمة،
قالت ليهو البت دي من عمرها 15 سنه كان ابوها كان جدها، كان ياسر كان انت عملتو فيها الما بتعمل، بت م اتجاوزت ال 17 سنه معرسه 3 عرسات ودة كلو شان شنو؟شان السترة، وانا ساكته وقافله خشمي وبعاين ليكم، والحصل في امها برضو م كان هين وانا برضو بقول ديل الرجال ديل الوليان وبرضو كنت ساكته
لكن خلاص ي ولدي زمن السكوت ولى، البت دي القعدة هنا مابياها، وابقى واضحه معاك لا مرتك لا عماتها لا اهل الحله مريحنها، انا زاتي لما قعدته مع نفسي وحسبتها لقيت انو مصلحه الجنى دة وعلامو فوق كل شي،
اسمع ي التاج البت دي انا محل م قبلت معاها خطوة بخطوة وم بفارقها، قالت دايرة تمشي الخرطوم، انا معاها، وانا وليها وامها م هينة انا ربيت رجال واظنك بتعرفني كويس،
، قال ليها يمة انا معاك في كل شي قولتيهو لكن الحاجه دي م بالسهولة دي، نحن اشغالنل كلها هنا البودينا الخرطوم شنوو؟
قالت ليهو نحن م قلنا ليك الا تمشي معانا ولا مقيدنك بينا، قال ليها يمه سمح اخليكم نسوان براكم في المدينه؟الكلام دة م بركب الراس لكن...
قالت ليهو البجينا شنو؟انا مرة كبيرة وبعرف الدرب الدغري من العوج
قال ليها المدينه م معروفه والناس نفوسها م زي هنا
قالت ليهو نتوكل على الله بس م لينا غيرو
قال ليها ي امي انا راجل هنا م بتحترمو كلمتي ودايرة تباري كلمة بت بتك؟سمح انا رافع يديمن اي شي بخص بت بتك دي واعملو الدايرنو ي امي عشان ماف اي احترام ولا تقدير لي انا ك راجل البيت الدايرنو اعملو
قالت ليهو جدا، إتصلً لي على ولد الكردي، قول ليهو يفضي لينا البيت من الأولاد الفيهو، شان نحن جاي
قال ليها بزهج وصصوت عالي م بتصل لي اي زفت انا،
قالت ليهو سمح اديني الرقم انا بتصل عليهو، ومشت جابت ليهو التلفون قالت ليهو هاك اكتب الرقم، طلع تلفونو كتب ليها.الرقم وقام ماشي شلت الطربيزة القدامو
حبوبه في نفس اللحظه إتصلت,بعد مسافه اظنو م ردة ليها تاني رجعت اتصلت، ، ردة ليها قالت "السلام عليكم، ود الكردي؟كيفك ي ولدي إن شاءالله طيب؟معاك خالتك عشه ام التاج، الحمدلله والله ي ولدي انت، كويسين والله امان الله، قلته ليك، طبعا ي ولدي نحن دايرين نجي هناك، اي الخرطوم، قلته اتصل عليك واقول ليك جهز لينا بيتنا الهناك دة مش هو فاضي ولا لسه اولاد البلد قاعدين فيهو؟اهااا سمح عليك الله ي ولدي كلمهم يفضو لينا نحن خلال إسبوعين بالكتير بنكون هناك، عافيهه والله، لا م بنرجع طوالي يمكن فترتنا تطول، خلاص كويس، وي ولدي لو محتاج اي شي عليك الله بس كلمني، حتى لو محتاج صيانه ونضافه وكدة جوة وبرة قوم بالواجب ووريني التكلفه كم، الله يديك العافيه ي ولدي واعفي لي تعبتك معانا، تسلم تسلم الله يعافيك، التاج كويس والله بسلم عليك، يصل إن شاءالله، يلا مع السلامه،
قفلت الخط وقالت لي شايفة ي بتي؟ الموضوع هيييين اصلو ماف شي صعب، ود الكردي البتكلم معاهو اسي دة ماسك مفتاح البيت المشتريهو جدك الله يرحمو، انتي عارفه البيت دة والله مشتريهو بسجم وشو، اشتراهو بي 100 مليون مبني جاهز زمن ال 100 مليون كانت قروش قال الدنيا م معروفه لو حصل لينا ظرف مرض او كدة ودانا هناك م نحتاج لزول وننزل فيهو، اها شوفي ربك رب الخير حصل لينا الحصل دة، طبعا اسي قاعدين فيهو اولاد الحله الشغالين هناك كلهم، التاج مقعدهم فيهو مجان لكن اراد الله بعد كدة اي زول يشوف ليهو محل، ...
م عارفه حبوبه كانت بتعمل كدة عشان ترضيني وعشان هي عارفه بصعوبه الوضع الانا فيهو ولا من خوفها من ردة فعلي ورفضي لقعدتي وسط الوضع دة، بس ع العموم حبوبه بموقفها دة سهلت علي كتير واختصرت وقصرت علي المسافه، رقم الخلاف الحصل بينها وبين خالي بس انا ك شهد حاسه نفسي بقيت انانيه جداً مضايقاني فكرة انو يحصل خلاف بين حبوبه وبين خالي بسببي خصوصاً انو خالي التاج دة هو البني ادم الوحيد الكنت بلقاهو في كل إنكساراتي، بس برضو شايفه انو انا العايزاه لازم يحصل حتى لو كان على حساب خسارة حبوبه وخالي لبعض، بقولو الوجع المتراكم بولد القسوة، بس إضافه للقسوة كمان بولد الأنانيه وحب النفس
عدت الايام وحبوبه متواصله مع ود الكردي دة وبدت تجهيزاتها ويومي تتكلم مع خالي التاج في حاجه، وسبحان الله عماتي ومرت خالي وخالي نفسو تعاملهم معي بقى زي الزفت، في بالهم انو انا محرشه حبوبه وانو انا ماليه ليها راسها والكلام دة، ف بقو يلجأؤ لي انو يسمعوني كلام شين في الطالعه والنازله، في يوم حبوبه قالت ليهم لغاايه م يجي اليوم الاتحرك فيهو من هنا كان واحدة فيكم رفعت عينها ساي عاينت لشهد م تلوم الا نفسها، قعادها المضايقكم دة خلوهو اي واحد تقعد في بيتها وم تكوسو دربنا بس
من هنا خلاص اي زول بقى في حالو، عدت الايام، حبوبه لملمت العفش وانا طبعا إتفاجاته بشيلتها للعفش، سألتها قالت لي نحن راحلين رحول عدييييل نمشي نقعد في الارض يعني؟الكلام دة م بجي، ، كل الاثاث حق البيت السمح جهزتو، والعدة حقت القزاز، طبعا بيت ناس حبوبه كبير وكل حته فرشها غير، قبل مواعيد سفرنا بيوم جابت الدفار رفعت العفش وكانت متواصله مع ود الكردي عشان يستلمو من هناك وبتوصي فيهو عشان ينزلو براحه وكدة،
وفي نفس اليوم دة لفت الحله كلها ودعتهم، بالليل جاتنا عمتي فتحيه عشان تودعها وتشرب معاها الشاي، قالت لي غايتو ي شهد ي بتي العملتيها في حبوبتك م عملها زول دة كلام دة ي بتي، حبوبه قالت ليها م عملت شي هي لكن ي بتي نحن م بنشرد عيالنا، محل م قبلو بنتبعهم اخير لي اكون معاها بدل م تكون براها في الدنيا الزايله دي
قالت ليها سمح وراجلها؟
قالت ليها وقت م الله كتب ليهم يرجعو برجعو م بنستعجلهم، بالليل داك جابت عماتي ومرت خالي قعدتهم وبقت تتكلم معاهم وتبكي، قالت ليهم انا دي كان في يوم غلطتو في حقي عااافيه ليكم، وكان غلطته في حقكم اعفو لي، والدنيا م بتستاهل زعل والخصام والحياة دي قصيرة ي بناتي ابقو حنان على بعض وكان الله كتب لي في العمر باقي وحييين كدة إن شاءالله بنتلاقى،
قلبوها حلقه بتاعه بكى، انا دموعي قاعدة على الهبشه طبعا، من غير م احس لقيت نفسي ببكي معاهم، م عارفه انا اتسببته في دة كلو عشان ارضي نفسي ولا شنو بس حرفياً حاسه بكسرة النفس والضيق تجاه الموقف الختيت فيهو حبوبه
الصباح جهزنا نفسنا بدري وحبوبة كانت متفقه مع بتاع عربيه شريحه يوصلنا اصلا هو ود الحله وشغال خط الخرطوم، اجرتو لينا، جا مع الزمن حوالي الساعه 9 كدة، الحله كلها كانت في بيت ناس حبوبه والناس داخله ومارقه تبكي كأنو البيت ميت فيهو زول، ونحن طالعين خالي التاج كان واقف برة جمب العربيه، والله انا م كنت حاسه انو انا عندي وش امشي اقيف قدامو عشان اودعو ابداً
حبوبه قالت لي ودعي خالك، مشيت ليهو ورجولي بتضرب في بعض قولته ليهو مع السلامه ي خالي واعفي لي، عاين لي بي طرف عينو وم ردة لي، جات حبوبه قالت ليهو اديها خاطرك ي ولدي الدنيا م معروفه والموت مع الناس، وانا دي عافيه ليك دنيا واخرة، حبوبه كانت بتتكلم وتبكي، بعدها مسكتو وبكت كداااا وقالت ليهو فتش دربي ي ولدي م تبقى زي اخوك داك، فتش درب امك وكان م فتشتني انا عافيه ليك ليوم الدين، خالي التاج دموعو جات جاريه قال ليها العفو ي امي، قالت ليهو م تبكي ي ولدي، م تبكي، دة حال الدنيا كدة تلم وتفرق
انا ركبته الغربيه وحاسه نفسي م قادرة اتنفس من كميه التنهيدات الحابساها جواي، جات حبوبه ركبت، عايزة تقفل الباب خالي التاج وقف السواق، مشى دخل البيت اخد 10 دقايق كدة جا طالع شايل شنطتو وركب معانا وقال ليها م بقدر اخليكم تمشو تنققطعو في بلاد الغربه ديك براكم ي امي، حبوبه قالت ليهو ي ولدي مرتك في البيت براها، قال ليها كلمتها تقفل البيت وتمشي اهلها يومين كدة وبجي راجع انا زاتي م بطول،
العربيه إتحركت الحله كلها كانت واقفه تعاين لينا وتودع فينا،
إتحركنا وانا حاسه بالإيجابه تجاه الخطوة دي، اول مرة احس نفسي مخيرة م مسيرة، اول مرة احس انو انا كدة صح وانو دي اصح خطوة عملتها بعد قراري بالإنفصال من صهيب، رغم انو الخطوة دي في غيري قدم تنازلات عشاني بس انا معشعشه في بالي فكرة انو انا كمان قدمته تنازلات كتيرة في حياتي عشان غيري، ليه غيري م يفكر بنفس المنطق؟ايوة انا محتاجه لتسلسل احداث من إختياري في حياتي، محتاجه انو اكون مخيرة م مسيرة، محتاجه الناس تفهمني وتحترم قراراتي، محتاجه اللي يقيف معي في خطوة يقيف معي م علشان شايف انو انا صحانو، لا علشان انا بني ادمة عندها كيان وتستاهل تاخد فرص في حياتها، وعلشان انا استاهل اخلق فرص لحياتي واخطي خطواتي الصح واقع واقوم واتمرمط وفي الاخير اصل للعايزاه، محتاجه اكون حرة من غير م اهلي او غيرهم يشوفو انو سترتي فرض عين تكون بوجود راجل في حياتي، حرفياً انا اكتفيت تجارب، اكتفيت وجع، اكتفيت فرص إتفرضت علي من غيري، انا م محتاجه لشي حالياً غير إني الملم اطرافي الاتسببو اهلي وغيرهم في كسرها، محتاجه ارمم ثقتي في قدراتي واكون انا، واول خطوة عشان اعمل كدة لازم اوصل لقناعهه انو الحياة م راجل زي م فاكرين اهلي والمجتمع، واول باب لازم اقفلو في حياتي هو الباب البودي لصهيب ...
إقتباسهه قوهه
قِيل لها كيف تتجاوزين الأمر بهذهه السهولة وكأنكِ لم تُحطمي؟
قالت لا أملك رفاهية الإنهيار، أنا مجبرهه على تجاوز كل شيء
نتلاقى