الجزء 3

تاني يوم شذى صحت مخلوعة إتذكرت إنها المفروض تطلع بدري عندها مقابلة شغل , الساعة كانت 9 صباحًا

لِقت ثلاثة مكالمات من بت جيرانهم نهى

رجعت ليها وهي خايفة تكون مشت خلتا لأنهن متفقات يمشن سوا ..

وهي بتتصل سمعت صوت نهى بتتكلم مع أمها وهي بتقول :

_ خالتو حنان البت دي وين نحنا إتاخرنا ما صدقنا جاتنا الفرصة دي وشكلها بتضيعها مننا ..

ردت ليها شذى وهي بتقول :

_ يا بت متين أصبحت أصبري علي شوية وبطلع متكوركي فينا من الصباح ..

_ هههههههههه اي باري لي أصحابك المرطبين ديل ونومي حق الرصيد ما عندك ..

شذى ما ردت ليها مشت صلت وجهزت في الوقت داك أمها جهزت ليهن الفطور والشاي

فطرن بسرعة وطلعن , من الباب لحدي ما وصلن المحطة نهى تشاكل في شذى على التأخير

وهي بتحاول تطمنها التأخير دا لخير ..

وهن في الطريق نهى إنتبهت لي ولد رافع يدو بسلم عليهن لكزت شذى وهي بتأشر بإتجاه العربية . :

_ الولد داك بتعرفيهو شكلو بأشر علينا ?

_ ألف مرة قلت ليك تبطلي حركاتك دي من أيام الثانوي لليوم مافي تغير معقولة ما توصفي بيدك وانتِ بتتكلمي ..

_ المهم عايني ليه غاايتو لو معانا حظنا حلو الليلة ..

_ نهى أرح نركب أحسن ولا بخليك في مكانك وبمشي ..

شذى ما مشت خطوة سمعت صوت زول بناديها

_ شذوية معقولة تتجاهليني كدا أنا لي ساعة بأشر ليك ..

إلتفت عليه وهي متفاجئة ومتسغربة قالت :

_ علي أنت هنا ?

_ أيوا عندي موضوع صغير هنا وهسي راكع على بحري كيف أخبارك بعد سهرت أمس وعلى وين ?

_ بخير الحمدلله ماشة عندي مقابلة شغل دعواتك ..

_ شغل ? انتَ ما شغالة ونحنا قاعدين بتبالغي يا شذى تلفون منك بس يجي الشغل لحدي عندك ..

علي دي فرصتو قال لازم يستغلها لي صالحو حاول بقدر الإمكان يخليها تترجع عن مشوارها بحجة إنهم في الشركة محتاجين مصمم

شذى رفضت بس نهى من شافت علي عقلها طار

كل ما يتكلم بتحاول ترد , شذى زهجت منهم الإتنين وقفتهم طالت وهم عملوا فيها أصحاب من زمان

نهى أصرت عليها يمشن مع علي لو ما عاجبها الشغل ممكن تتراجع ..

وهم في الطريق علي رسل لي مصعب صحبو يجهز عقد عمل لي إتنين في ظرف نصف ساعة لحدي ما يصل ..

ما خلا لي شذى أي طريقة تعترض , بقت تسأل نفسها ليه بعمل معاها كدا وهو أصلا ما بعرفها كويس ..

نهى مبسوطة شالت رقمو أول ما طعن من الشركة رسلت ليه رسالة تشكرو , أما شذى لسة محتارة وما مطمنة ليه ..

إتصلت على صافي سلمت عليها بعدها سألتا عنو :

_ صافي صحبك علي دا مالو ?

_ منو فيهم ?

_ الكان معانا أمس ..

_ أها مالو ?

_ مش كلمتك عن موضوع الشغل داك ?..

_ أها والدخل المجنون دا شنو ?

_ لاقيتو قبل ساعة كدا معاي صحبتي نهى ..

_ ياخ قلنا ليك البت دي ما تمشي معاها ..

_ ياريت لو ما مشيت معاها أول ما شافت علي ما عررفت الحصل ليها شنو وهو كمان عبيط أكتر منها ..

_ الحصل شنو أحكي ?

_ إشتغلت معاهم طبعا بسبب الغبية دي حلف ما يخلينا من عرف وهي ما قصرت ..

_ شذى علي دا ما بنفع تكوني قريبة ليه نهائي بعرفو كويس ..

_ كيف يعني وليه ?

_ بحكي ليك بعدين المهم رجو عازمنا في البيت قالت لي أكلمك حددي موقعك أجيك بس ما تكون صحبتك دي معاك ..

_ ههههههههه لالا فرحانة بالشغل شديد رجعت البيت تحتفل أنا ماشة على العربي ..

_ خلاص أنا خليكِ هناك بجيك بعد نصف ساعة ..

ركبت الموصلات رن تلفونا رقم غريب ما ردت تاني رجع إتصل ما إشتغلت بيه كتير

لحدي ما لاقت صافي سألتا لو بتعرف الرقم ضحكت وقالت ليها دا رقم علي ..