الجزء 13

حنان النوم طاار من عيونا مرة تقعد ومرة تقوم تلف شوية ..

ياسر يعاين ليها ساي عارف إنها زعلانة أو في كلام دايرة تقولو بتفضل مقلقة لحدي ما تطلع الجواها

مسك يدها قعدها في السرير بعدها سألا مالا قالت :

_ ما بعرف أكلمك ولا أسكت ?

_ سكاتك بعني نساهر الليلة كلو قولي في شنو يا حنان ..

_ سمعت بتك بتحكي لي صحباتا إنها بتحب ..

_ هههههههه ياحنان نومي الله يطمن قلبك . البت دي مخطوبة يعني عادي تكون بتحب خطيبا تصبحي على خير ..

طفى الأضاءة ورقد ..

حنان لسة قاعدة تفكر في السمعتو زعلانة شديد زوجها ما أداها فرصة توضح ليه هي قاصدة شنو ..

تاني يوم الصباح شذى وصافي طلعن بعد الساعة تسعة يلاقن رجاء بالأول بعدها

بجينهن علي ..

حسب الإتفاق إتلاقن عند خالة بتاعة شاي وهو المكان المتعودات يقعدن فيه لما مزاجن يكون رايق .. علي جاهن بعد ساعة قعد شوية بعدها إتحرك مع شذى للشركة ..

لما وصلوا الشركة نزل بسرعة إتحرك للإتجاه التاني يفتح الباب

شذى كانت مشغولة ب تلفونها ..

وهو بفتح الباب

حسا بزول خاتي يدو في كتفو إلتفت يعاين ليه

كان شخص غريب أول مرة يشوفو عاين ليه من فوق لتحت وقال :

_ أنت منو يا زول نزل يدك .

_ هههههههه بتعرف أنا منو هسي ..

أداهو بنوية لمن وقع في الأرض وقتها إتتبهت شذى لأمن الشركة جاي جاري

قلبها وقف لما نزلت عاينا وقعت في عين أسعد

بدون يقول كلمة أداها كف , علي حاول يدخل شذى وقفتو وهي بتقول :

_ يا مدير بعتذر بس دا موضوع بيني وبين خطيبي ممكن تخلينا شوية ..

علي طلب من بتاع الأمن ما يدخل , مشى خلاهم

وقتها إتمنى لو يقدر يقطع يد أسعد , كف شذى وجعو أكتر بس لأنها طلبت منو يخليهم مشى وهو بفكر في عقاب مناسب لي أسعد ..

شذى بتعاين ليه بغضب شديد وهو كأنو ما عمل شي

طلع تلفون إتصل على أمو بعد سلم عليها وطمنا عليه قال ليها :

_ مش الحاجات جاهزة كلها يلا شوفو ليكم أي سواق يجيبكم باقي اليوم دا

بت البندر دي كافيه عليها القاعد فيها خلاص ..

شذى بقت تبكي وهو ولا على بالو تم كلامو مسك يدها عشان يسوقا

فكت يدها منه بقوة قالت :

_ أنت واحد مجنون دا شنو البتعمل فيه دا وأخدتا راي منو عشان تجيب حاجاتك ..

_ بت العم ما محتاج راي زول أنا عشان أعمل الفي رأسي ويلا قدامي ..

غضبت منو شديد ما صدقت تلفونو رن خلتو واقف دخلت الشركة إتصلت على أبوها حكت ليه كل شي

طلبت منو يجي بسرعة قبل ما تتصرف معاهو تصرف ما يعجب اهلو ..