الجزء 8

كوركت طلبت من السكرتيرة تجي بسرعة

وقتها صافي وصلت سمعت الصوت جرت تشوف الحاصل

شذى كانت قاعدة جمب علي دموعا جارية ماقادرو ترد على أسئلة السكرتيرة

صافي طلعت بسرعة نادت شباب رفعوها ..

من حسن الحظ مستشفى قريبة للشركة

ودواهو هناك ..

شذى كمل صبرها من الإنتظار نصف ساعة الدكتور ما طمنهم عليه صحة علي

ولاعرفو شي عنو من وصلوا ..

مشت تشوف الحاصل شنو ـ رجاء وقفتا وهي بتقول :

_ شذى أصبري مالك بترجفي كدا الزول دا لو حاصل ليه شي كان عرفنا ..

_ لمتين يعني قربنا للساعة ولسة مافي زول جا طمنا عليه أنا ماشة أعرف الحاصل ..

_ بت أم علي هنا شايفة المرا الواقفة هناك ديك دي أم علي ..

_ وأنا مالي وومالا ماشة أعرف الحاصل شنو عشان أطلع للبني آدم الكرهني التلفون دا ..

إتحركت صافي ورجاء مشن وراها

فتحت باب الغرفة الفيها علي لاقت الدكتور في الباب سألتو قال ليها :

_ لا أطمئني شكلو بتعب في الشغل كتير

وبعد تطلع نتيجة الفحوصات بطمنكم أكتر بعد ساعة ممكن ترجعوا عشان تشوفو ..

رجعن طوالي ..

والدكتور رجع جو الغرفة وهو بقول :

_ قوم

_ حتى لما الزول يكون في فراش الموت ما بتخلوا

_ يا زفت شكلك صدقت إنك عيان حقيقة

أصبر والله أعملك درس ما تنساه طول عمرك إتمنيت ياخدوك لدكتور تاني أو مستشفى عام تلم فيك ممرضة برلومة تطلع عينك ..

_ هههههههههه أنت صاحب معفن ساي دا رد الجميل ..

_ هههههههههه ياخ قطعت قلب البت والله من دون البنات عرفتها قبل ما أسمع صحباتا ينادوها ..

_ عليك ما لي حق أغمار بحياتي ..

_ البت عادية جدا مقارنة مع البنات المعاها وشكلها من أسرة عادية ماما ناهد لو عرفت بتطلب مني أصرف ليك علاجات الدنيا كلها تموت لو عرفتك عملت كل دا عشانا بت زي دي ..

_ ياخ أنا بتذكر آخر مرة شوفتا فيها مامتك ناهد دي متين فما ح تكون مركز معاي أصلا المهم أهم خطوة ما تخلي شذى تمشي تلاقي الزفت داك أبدا وإلا بقفل ليك المستشفى نهائي ..

_ هههههههههه أها يا وزير الصحة قوم إتخارج ياخ ماتعطلنا ساي بس برضو بساااعدك وبتصرف في ساعة تانية بعدها ما عندي ليك اي شي بجدعك برا بس ..

أسعد يشيل ويتصل على شذى ما بترد

إتصل على أمها سألت عنها قالت ليه لسة ما رجعت والزمن داك المغرب قرب يأذن

قفل منها رجع لي شذى ردت ليه من الجرس االأول قال ليها :

_ أنتِ للزمن دا برا البيت لي شنو ووين كنتي مبتردي علي مكالماتي ومن متين أنت بتتاخري برا البيت أنا قاعد الليلة عشانك ولا على بالك ..

خلتو لمن خلص كلامو حتى ردت :

_ دقيقة دقيقة بتتكلم معاي بالطريقة دي بصفتك منو ومنو الاداك حق أنك تسأل عن رجوعي البيت أو عدمو ..

_ أنا خطيبك من حقي ما أسمح بحاجات زي دي وبعدين أنا مسافر بكرة ..

_ ياخ ما تطير لو داير تطير الطريق قدامك بلا خطيبي بلا بطيخ

دبلتك دي الصباح تعال شيلا مع السلامة ..

قفلت وحظرتا رقمو عشان ما يتصل تاني

جات راجعة لـ ناس صافي عشان يطلعن ..

أسعد إتصل على عمو حكى ليه العملتو شذى