الجزء 10
محمد قلع عيونو وبدا يتم تم ... الراجل قال ليهو : شفت جوري ... تاني لو ساي عاينت ليها نظره ما ياها المسدس ده بفضي طلقو في راسك !!! يلا غور من قدامي !!
رجعو لي الواقع صوت صفيه : يا راجل انت جنيت ادوك شنو في السجن !!
محمد اتخلع وقت شاف صفيه وقرب يصرخ ...
صفيه : لالالا الا يودوك لي شيخ شكلك جنيت !
محمد : انتي بس اطلعي خليني في حالي ياخ ! وإلا قسمآ اهج بره البلد وخليكم انتي واولادك
صفيه هزت راسها وطلعت خلتو ..
****
تكبيرات يوم العيد بالجد مافي زيها .. ولا العجب الصلاه !!! والخطبه !!! سبحان الله !!
إلا عدم الموضوع البجي داك ما حبابو ... صبا مشت لي أهلها معاها العيال ... اما خالد قضاهو نوم بس !! لأنو ساهر في السوق
وانا عدم الموضوع قتلني ... فتحت الشبكه وماف الا رساله واحده وشوية إشعارات ... لقيت الرساله من أمير مدريد
مرسل رسالة عيد عاديه .. رديت ليهو وانت طيب
بعد 34 ثانيه رد لي : كيف مع الملل !
ضحكت طوالي .. وآخيرآ لقيت لي زول يشعر بالملل ... قلت ليهو : أحلي شي في اليوم ده صلاة العيد وشراب المويه
قال لي : اي والله .. اها ان شاء الله مشيتو تعيدو بس ...
قلت ليهو في البيت ... رد لي : لكن اكيد حتطلعي المساء مع سيد ريدك !
م عارفه لكن حبيت افضفض ليهو ... وبدينا نحكي عن مشاكلنا ... حكيت ليهو عن يمان وعن الشئ العملو فيني
وعرفت منو انو يتيم ام وأب ... وكان عندو أخو اكبر منو وبسبب الظروف انفصلو وحاليآ ما عارف عنو اي حاجه .. يعني شوية حسينا بالراحه
بعدها شالتني نومة ما صحيت إلا بصوت تلفوني .. عاينت لقيتو شاهين
رديت عليهو وانتبهت لصوت زينة الكانت بتبكي .. قال ليها هاكي ماما جوري
قلت ليها زينو نور عيوني مالك بتبكي !!
كانت بتهمهم لي ما عرفتها عاوزه شنو ... المهم فضلت اتكلم معاها لغاية هدآت وادتني ابوها ..
شاهين : ما عارف لولاك كان انا حأعمل شنو !! البت غلبتني ياخ !!
ضحكت وقلت ليهو كل عام وانت بخير
قال لي كل عام وانتي معانا
خجلني ما عرفت اقول ليهو شنو ...
قال لي جوري
قلت ليهو نعم ... قال لي : عاوزك في موضوع ضروري .. لو بتقدري ممكن نتقابل الليله؟؟؟
قلت ليهو ما عارفه والله ...
قال لي ارجوك حاولي .. عشان خاطر زينة ...
قلت ليهو طيب .. المساء حأمشي لي مني اعيد عليها .. بسرق من وقتي خمسه دقايق لاغير
قال لي ربنا يخليك ...
قفلت منو و قمت عشان أصلي الضهر .. لقيت خالد بكابس في المطبخ قال عاوز يعمل قهوة لأنو مصدع ... عملت ليهو القهوة وكلمتو اني ماشه لي مني
قال لي امشي طوالي لكن ما اتأخر .. وعرفت منو انا صبا حتبيت مع أهلها ...
جهزت وركبت لي ركشه مشيت لي مني .. الساعه كان 4:34 م ....
اتونست معاهم كدااا ... امها ظريفه ضحكتني ضحك !!! زكرتني بي امي ربنا يرحمها ... قدر ما حاولت اطلع ما خلوني الا وقت اتغدينا ... طلعت قريب للمغرب كده مني قدمتني .. وطبعآ مني عارفه بحنك شاهين ... وقفت معاي لغاية جانا سلمت عليهو وعلي زينة ورجعت
قال لي : تحبي نمشو وين؟؟؟
قلت ليهو زمني ضيق والله .. اتكلم هنا
قال لي خلاص خلينا نلف القضارف حبه .. زينة وابوها مشتاقين ليك
عملت رايحه طوالي وغيرت الموضوع قلت ليهو : تنوير كيف؟؟ !
ضحك طوالي وقال لي : تنوير ! ؟؟؟تنوير كويسه والله
صف البنزين