الجزء 25
!!
بقلم :
البنزين البينزول Benzene هو سائل عديم اللون،قابل للاشتعال، ، تركيبته الكيميائية ) C6H6 ( ولذلك يكوّن حلقة سداسية . الحلقة السداسية للبنزين هي أبسط جزيء في الكيمياء العضوي العطرية لذالك يمتاذ بأنه ذو رائحه قوية ونفاذه ... حبيت ابتدئ بالمداخله دي عشان حاجتين .. اولا عشان معنى اسم الروايه
وتانيا عشان الرائحه النفاذه دي هي الخلتني استعيد وعيي من آخر لحظة فقدتو فيها ..
فتحت عيوني #ببطء ... سقف من الزنكي الامريكي القديم فيهو فتحات بتسمح لأشعة بالعبوور
عاينت لنفسي لقيتني مبلوله بلل كامل !! ومربوطه بحبل في كرسي !!!
جوري !! صحيتي حبيبتي !!
يمان !! وين انت !! وانا وييين !
انا مربوط وراك .. انا كمان قبل شويه وعيت لقيتك وراي .. ومن جبيل بنادي فيك وما صحيتي لي !!
- الحاصل شنو يا يمان !! ونحن وين !!
عايني بالاتجاه التاني ..
التفتت وهالني ما رأيت ... جمبنا طوالي كان في صف فيهو 34 عربية !!! كأنهم منتظرين دورهم في صف البنزين !!
يمان : شكلو نحن اتكشفنا يا جوري .. شكلو كده
سمعنا الاتنين صوت تصفيق ... وفجأة باب واحده من السيارات اتفتح وطلع منو # شاهين ... وطلع وراه عم صالح !!
شاهين : برافو يا يمان برافووو ... برافو يا يدي اليمين وصاحبي .. برافو يا أبو ولدي ويا عشيق زوجتي برافو
يمان : زوجتك دي حبيبتي وانت عارف كده كويس !! جوري كانت خطيبتي وكانت حتكون مرتي لو ما .....
شاهين : لو ما الحادث صاح ! ؟ الله مرقك من الحادث .. مفترض ( البهم ) الأنا رسلتهم يتأكدو انك سلمت الروح حتى بعدين يتحركو ..
قلت ليهو وانا ببكي : شاهين .. حلفتك عشان زينة ....
قاطعني طوالي : زينة ما بتي .. واظن انك عرفتي المعلومة دي ... وأزيدك من الشعر بيت ... انا ما بنجب .. عقيييييم ...!! وقصة حملك دي هي الخلتني اتأكد من كذبك وخيانتك لي !!
اتزوجت وتميت حكاية بتاعت 15 سنه ما ولدت .. انا وزوجتي زينة السميت شركة السيارات عليها عملنا إجراءات تبني واتبنينا بت .. سمتها زوجتي زاتها بنفس الأسم ... لكن شائت الأقدار انها تتوفى بسبب مرض السرطان ... اتوفت وخلت لي زينة الاكتشفت بعد ما تمت 3 سنوات انها خرصاء
جا قرب علي وقال : من زوجتى ماتت وقلبي ما دق لي أنثي ... إلا بعد شفتك وانا في صف البنزين ... من لمحتك قلبي دق .. وطوالي اتحركت عليكم انتى وصحبتك ..
كنت دايما معاك ومراغبك واظن شفتي الصور ..
يوم الخطوبة كنت عارف ... ويوم محمد اتحرش بيك ويمان اتدخل كنت شايف وعارف ... والشرطه القبضتو كنت انا وراها ..
يوم يمان جاك الغرفه كنت عارف ...
الود النضف ليكم اليخت ... انا الطلبت منو يصوركم لي من بعيد ...
كنت عارف اي حاجه .. وكمان أضيفى لمعلوماتك الحساب اللفي الفيس ( أمير مدريد ) حقي ... يعنى طول الوقت كنت راصد كل تحركاتك .. وعارف عنك أي حاجه !
- ب ب بس انت ما اتعاملت معاي علي اساس انك عارف !! وطيب وقت كنت عارف بكل ده ليي ما واجهتني !!! ليي خليتني أستمر في اللعبه دي !
عم صالح : شاهين .. انور .. امجد نفس الشخصيه طبعا .
عاينت لعم صالح بأستغراب ... قال لي امجد وانور اخوان ايتام .. امهم اتوفت بحادث وخلتهم لي راجلها الكان بعاملهم بقسوة .. لغاية امجد اضطر انو يضرب راجل امو ويهربو منو ..
الحمد لله الراجل ما جاتو حاجه .. لكن أستولى علي البيت واملاكو وخلاهم يتشردو في الشوارع ..
امجد اشتغل ولأنو كان زكى قدر يكون شغل من كرتونة مناديل .. وفي غضون 25 سنه بقى صاحب شركة سيارات
عم صالح سكت وعاين لي شاهين ... شاهين قال والحزن باين علي وشو : كنت زول طايش لدرجه !!! بسببي عملنا حادث انا وامجد ... وامجد اتحرق في العربيه ... وانا كمان اتحرقت وانتي شفتي الحروق اللفي جسمي ..
عم صالح : الضرر النفسي الاتعرض ليهو شاهين كان أكبر من الجسدي .. وبقى عايش شخصيتين في جسم واحد .. امجد .. وانور ولأنو شخصية انور طايشه وما بتعرف تعتني بروحها ... كانت هي الحامياك ... وامجد طول الوقت كان ببحت وراك لغاية خلاص اتكشف المستور ...
فجأة عم الصمت .. يمان كان ساكت وهم سكتو ... حسيت بقشعريرة مرت علي جسمي كلوو ... واطرافي بردو كأني في تلاجه ... ( تماما كالشعور الشعرو إيكموفنا وهو في الغابه قبل ما يموت علي يد أكونكو )
- قلت ليهو : عقابنا شنو !!!
رفع راسو عاين لي بيأس ... قال : انا حبيتك يا جوري .. لي جازيتني كده !!! انتي عارفه لو ما عملتي عملتك دي كنا حنعيش انا وانتي وزينة بأمن وآمان !! ؟؟
قلت ليهو ودموعي بتنقط بعد عملت عملتي دي ...! جزاي حيكون شنووو !!
قال لي تفتكري جزاك حيكون شنو؟؟؟
قلت ليهو ما عارفه ... لكن اظن الموت حيكون مصيري
ابتسم وعاين لي يمان ... قال ليهو حبيبتك شاطرة ..
يمان هاج وكان بتحرك بمحاوله يائسه انو الحبل يتفك ... قال ليهو : فك جوري خليها تمش .. انا الاغريتها اليوم داك !! انت عارف الأنثي ضعيفه
شاهين صرخ في وشو : غلط !!! غلط غلط غلط ! الانثي اقوي مخلوق !! بتتحكم بالراجل
وبتحركو كأنو لعبه بين يديها !!!
يمان : ما تنسى انو الانثي هي الجابتك ... اتذكر امك كان ....
قاطعو : ما تجيب سيرتها علي لسانك اوعك يا يمان اوعك !!
جرى علي واحده من العربات وجاب جالون حق بنزين ... وتاني غرقنا بيهو ... قال لي عاينى 34.. عربيه فداك انتى والخاين ده
قلت ليهو وعلى وشي ابتسامة : ما قصرت يا أبو زينة ..
طبعا اتغاظ غيظ !!! صبه من الجالون وزح مننا مسافة كم كيلو كده ... يعني عمل خط بالبنزين بعدها رجع تاني وفكانى
قال لي تشوفيهو بتحرق براهو افضل من تتحرقي معاو
جراني و وقفني معاو .. قدر ما حلفتو يفك يمان بس رفض .. قلت لي عم صالح يفكو بس هز لي راسو بأسف !!
يمان كان بعاين لي وهو مبتسم ... قال لي سميهو منيب ... عارف حيجي ولد ... واوعه تخليهو يطلع صايع !! ادبيهو زي ما أدبتي ابوهو فاهمه !!
شاهين عليييك الله فكو يا شاهين "! فكو يا شاهييين بترجاك !! ياارب ساعدو يااارب !!!
بس ولا كأني بتكلم ... وشخط الكبريت ورماها !!
اتفكيت منو وجريت سابقت النار .. وانا جارية اتذكرت حاجه قمت ضحكت ... كنت جاريه وبضحك ودموعي في عيوني ... طبعا شاهين وعم صالح حتى يمان استغرب !! . وصلتو وقعدت في رجلو ... قال لي ليي ياجوري !!
قلت ليهو ما عايزه أربي ولدي براي
قال لي ولدك ؟؟؟
ضحكت وقلت ليهو ولدنا ... قال لي فهمنا ده كلو ... بتضحكي ليي وانتي جاريه !!
قلت ليهو ده سر ..
عاين كده وقال : الشي دي قربت ... عاينت والنار كانت خلاص جات ... حضنتو قووووي وهو خت يدو في بطني ...
وا ....
اميي !! انا طالعه
امشى كلمي ابوك طيب انا بتكلم بالتلفون ..
دخلت لي ابوها الكان مسهى كالعاده وبنظر إلى اللا شئ ... باستو في راسو وقالت ليهو انا طالعه بعد ده
قال ليها بعد اتفحص منظرها كويس : جوري .. اوعك تركبي مع زول غريب !! فاهمه يا بتي !!
عيونها دمعت وباستو في يدو .. قالت ليهو ما تخاف علي .. بس انت احفظني بدعواتك
طلعت وهي ماسكه نفسها غصب ..
مرت 15 سنه من اختفت عمتو .. وانت ما قادر تنسى !! ربنا يكون في عونك يا ابووي !!
امها نادتها
: تعالي جود عاوزك في التلفون !
اتكلمت مع اخوها كداا وكعادتو فرق عليها .. قالت ليهو ناوي تجي متين من اسبانيا !!! السودان بدونك مر ياخي !
قال ليها عيد الأضحي لو ما موتنا حأكون بكابس معاك في شية الجمر ... ضحكها كالعاده وقفل منها ..
طلعت ومشت علي الظلط ... في نفس اللحظة ... وفي واحد من الصفوف
كانت نظارة راجل ستيني بتتفحص الماره ...
أ أ أبوي ... س س سبحان الله ع ع عاين هناك !
وقت عاين طلع نظارتو وجحظت عيونو ..
ل ل لو م م ما دي قصيرة و و وصحتها كويسه و و صغيرة ك كان ق ق قلت دي ماما جوري !!
الراجل اتحرك من الصف وما وقف إلا قدام البت .. نزل النظارة حقتو وعاين ليها .. صرت وشها وعاوزه تزح من العربيه بس قال ليها : م تخافي ... معاي بتي .. ارح اوصلك في طريقنا
اطمنت وركبت معاهم .. حتي بتو نزلت وركبت معاها ورا ..
وياللصدف طلعو بقرو في نفس الكليه .. هندسه نوويه القضارف ...
الراجل سألها اسمك منو يا بتي ؟؟؟
قالت ليهو جمان ... جمان خالد ...
ابتسم وقال ليها دي اختك زينة .. وانا عمك شاهين ....
بعدها اتحركت السنتافي الحمراء تشق طريقها ظلط الشعبي ...
**
..!!
اوعاكم ... اوعه تركبو مع زول غريب حتى لو كنتو اتنين .. او الزول الغريب معاهو بت ما تركبو حتى لو كانت البت بتو !!
....
. اوعه ترتبطو بزول انتو ما بتحبوهو ... اوعه !!!
... اوعه من الخيانه !! اياكم !!!
أخر حاجه .. تفتكرو جوري #المرحومة وهي جاريه وبتضحك بتضحك ليي !! ؟ الذاكرتهم قويه حيتذكرو مكالمتها مع منى صحبتها ... اتذكروو ... يلا نتلاقي الصف انتهى خلاص ..