الفصل العاشر

الكلمة القالتها لي امي دي.. دخلت في قلبي زي النسمة .. بصراحة انا لمن المراة بتحكي قبيل .. حسيت بي شماتة كدا.. وجواي اقول يستاهلو كل الحصل ليهم .. لكن كلام امي ندمني على احساسي الاناني والجبان الكان جواي ..

انا وامي عايشين برانا.. والحمد لله اصلا ما احتجنا لزول .. يوم ناكلها بي موية.. ويوم نعملا سخينة .. شوربة بصل) نرش بيها العيش .. وناكلها نشرب فوقها الموية .. وحامدين ربنا وشاكرين

وكل مرة .. نقول .. شدة وبتعدي ان شاء الله ..

انا طبعا" شغال باليومية .. وامي اصلا مارضيانة شغلي .. لكن ماعندها حل غير كدا .. مافي طريقة يا اما اشتغل .. يا اما نحتاج للناس .. وحتى في شغل اليوميات ده.. يوم القى ويوم ما القى ..

وصلاح خالي قاعد .. ولا حصل يوم من الايام.. جاء سألنا.. قال انتو حيين ولاميتين.. ولابتاكلو شنو؟..

وانا اكتر شي مصبرني في الدنيا دي .. صبر امي ورضاها بالواقع..

اهاااا طبعا مدير مدرستنا حولني في مدرسة بحري النموذحية ..

قدام موقف الحاج يوسف .. وامي متحيرة تلقى حق الايجار وين .. وانا ذاتي متحير معاها ..

اذا كان نحن الاكل والشراب في تلتلة .. كمان ندخل لينا في برنامج بتاع ايجار؟ .. انا فكرت كتير اني اتراجع من قصة التحويل دي .. لكن امي مصرة عليها .. وحتتصرف كيف؟ ماعارف !!

امي عندها تلفون قديم كدي.. وحالتو تحنن .. زي حالتنا.. جايباهو ليها بدرية .. او بالاحرى هو كان حق بدرية .. واستغنت منو ادتو لي امي .. امي قالت لي شيل التلفون ده امشي بيعو .. وارتاح ليك يومين من الجري والتعب ده ..

قلت ليها اصلا ماتبيعي تلفونك .. وحتى لو بعناهو.. ما حيبجيب لنا حاجة .. تلفون عيان ساي ده ..

وفعلا التلفون ده كان فيهو خير.. وكان سبب لي حاجات كتيرة .. شوف.

بدرية اتصلت فيهو علي امي .. وقالت ليها عايزاك تنجضي الرياضيات والانجليزي بتاعة تامنة .. قالت ليها منجضاهم لمن محرقات .. قالت ليها طيب تمام ..

شوفي المكان العايزة تأجري فيهو في بحري .. وانا بدفع ليك المقدم ويبقى دين عليك .. لاني ح اكلم ناس كتيرين عايزين دروس خصوصية .. عشان تعملي ليهم دروس تقوية في باقي الاجازة دي رايك شنو؟

امي قالت ليها والهك تكوني حليتي لي كل المشكلة ..

اها امي وصت ناس يشوفو ليها نص بيت في الاملاك بحري .. عشان تكون المدرسة قريبة .. وما احتاج اركب مواصلات .. بس طبعا الاملاك غالية معروفة ..

انا قلت ليها يا امي الحتة دي غالية شديد.. وما ح نقدر نوفي حق الايجار .. قالت لي قول يالطيف نتوكل على الله .. وربنا ان شاء الله يقيف معانا .. بس نحن نتفاءل بالخير .. اصلو مابتحصل عوجة باذن الله .. هسي نحن حصل يوم احتجنا؟ حصل يوم جوعنا؟ حصل يوم مدينا يدنا لي زول؟ ربك كريم يافتحي ..

يوم انا طلعت الشغل .. لمن رجعت لقيتها مبسوطة .. وقالت لي الحمد لله يافتحي.. فرجت ان شاء الله ..

ح نرحل بحري.. اتصل علي السمسار .. وقال لقى ليهو نص بيت قريب للمدرسة .. يعني سبعة دقايق بي كرعيك بتصل مدرستك .. والبيت ايجارو ماغالي .. بس حالتو تكون كيف الله اعلم ..

واتصلت علي بدرية وورتها.. قالت ليها لقينا نص بيت بي كدا .. بدرية قالت ليها والله رخيص عديل .. وانا مستعدة ادفع المقدم ..

انا قلت ليها عارفة يا امي المشكلة وين؟ قالت لي اهااااا .. الله لاجاب المشاكل تاني ..

قلت ليها انا هناك مابلقى لي شغل يومية ..

قالت لي ان شاء الله ماتحتاج ليهو .. انا حا اشتغل دروس خصوصية للالاد والبنات .. الناس هناك بهتمو بي دروس التقوية مازي بلدنا دي ..

وفعلا ده الحصل ..

باختصار رحلنا بحري.. والبيت كان شكلو بشع وضيق .. اوضة وبرندة.. والحوش عبارة عن زقاق.. فاتح فيهو حمام بي هنا ومطبخ بي هنا .. زي قفص الجداد ..

لكن الله يهون .. اليوم داك كلو عديناهو ترتيب ونضافة في البيت .. ورصينا عفشنا وقعدنا ..

وخلاص صلاح برعي وزوجتو ارتاحو مننا تاني .. اصلا كنا عاملين ليهم وجع وش .. وقاعدين ليهم فوق نفسهم ..

اها يازول من تاني يوم طوالي.. امي لبست وقالت لي انا قايمة على الشغل يافتحي .. قلت ليها يا امي قولي بسم الله.. شغل شنو؟

قالت لي ح امشي اسلم على الجيران.. واتعرف عليهم .. واوريهم انا استاذة متخصصة في الرياضيات والانجليزي .. لو عندهم طلبة او طالبات انا مستعدة ..

الزول العندو هدف يا فتحي لازم يصر ويحقق هدفو .. وما يأجل ضربة البداية ولا شنو؟

انا طبعا بس بتبسم وبعاين ليها .. حبيبة انتي ياخ .. امي واختي وصحبتي واي حاجة ..

مشت جات قريب الساعة واحدة .. انا نمت وصحيت .. قالت لي ابشرك .. كدا انا عندي خمسة بنات.. وولدين .. ح يبدو معاي من بكرة ..

قلت ليها لكن يا امي هسي انتي ح تشتغلي ليهم وين؟ في الاوضة الواحدة دي؟ ولا في البرندة؟ ..

قالت لي الدراسة في البرندة.. وانت لو عايز تقرا او تاخد راحتك.. تخش الاوضة جوة .. الحياة مجاسفة يافتحي .. احسن ندافر ومانقعد مكتفين ايدينا.. نرجا عطف الناس علينا ولا شنو؟

قلت ليها كلام عقل ..

ومن تاني يوم البنات بدو يجو لي امي .. كل تلاتة مخصصة ليهم ساعة والاولاد اتنين .. والعدد ماشي زايد .. لانها بتتعامل مع الطلبة معاملة صديقة ما استاذة .. كلهم حبوها واتعلقو بيها .. امي بقت تشتغل من الصباح للمغرب .. لمن حسها بروح من الشرح ..

ماحصل يوم شفتها هاجت في طالبة.. ولاطالب ولانهرتو .. ولمن يجي وكت الوجبة.. مابتخلي الواحدة تمشي لو ما اكلت ..

حقيقة انا قلبي ما مرتاح.. امي تكون شغالة .. وانا الاجازة كلها اكون عاطل؟ ..

بقيت من الصباح بطلع على السوق.. بي كرعي السوق قريب .والف كدا واسأل من شغل اشتغلو ..

لفيت كتير .. مالقيت.. لكن بالاصرار الاتعلمتو من استاذة سامية .. بقيت كل يوم بمشي وأسال ..

بعد اسبوع ولا عشرة يوم .. في عمك كبير كدا عندو مكتبة ..

قلت ليهو ممكن اشتغل معاك.. ان شاء الله باليومية .. قال لي كويس.. انا اصلا محتاج لي لي زول يتحرك لي .. وانا بديك بالاسبوع يوم الخميس وبصرفك .. وفطورك غداك علي .. والشغل بنتهي الساعة خمسة .. والله فرحت بالشغل ده فرحة ..

ولمن مشيت كلمت امي مابقدر اوصف فرحتها. ..

وقالت لي انا موش قلت ليك ربنا ما ح يضيعنا؟.. يلا خليك زول هادي وامين ونشيط مع الراجل ده.. واخدمو زي كانك ولده .. واتعامل معاهو معامله راقية .. وحسسو انو الشغل بهمك.. والارباح بتهمك .. ولو زعل منك او هاج فيك.. ما تحاول تتعامل بردود الفعل .. اعتبرو زي ابوك واستحمل .. قلت ليها ابوي منو؟ واتبسمنا الاتنين وسكتنا ..

المهم الامور مشت تمام الحمد لله.. وامي سددت القروش لي بدرية ..

وانا كل اسبوع بجيب مصاريف الاكل والشراب.. وارتحنا الحمد لله وربنا مع المسكين ..

وانا شغال مع الراجل بي نفس الوصية القالتها لي امي ..

لمن فضل للمدرسة اسبوع تقريبا .. وخلاص انا بقيت في اخر اسبوع لي مع الراجل ده .. اتاثر تأثير شديد خلاص .. وقال لي اصلا مابلقى لي زول زيك تاني.. قلت ليهو اول ماتجي الاجازة انا بجيك تاني ..

في اليوم ده قال لي امشي اليلة جيب لينا فطور بي سمك ..

قلت ليهو سمك؟؟؟ احم احم .. قعد يضحك.. ووصف لي المكان.. واداني القروش.. وكنت فرحان الليلة حأكل سمك.. مابتذكر اكلت سمك متين ..

اها انا ماشي علي المطعم كدا .. في الشارع .. في دكان بتاع ملابس

ماعارف الخلاني اتلفت شنو؟.. لاحظت لي زول قاعد جوة الدكان .. بحسب ليهو في قروش .. ياربي ده موش...((ابوي)) ؟؟؟..

وقفت .. وركزت في الدكان جوه .. عاينت كدا شديد.. لقيتو ياهو ابوي اصلا ما بغبى علي.. بس لونو غمق شوية وضعف ..

لكن ياهو ياهو .. والله لمن شفتو فرحت فرحة .. قربت اكورك ليهو.. واقول ابووووي ..

واسمع ناس السوق كلهم الكلمة دي .. واحس اني بقولها من جوااي كدا ..

اها .. بي سرعة دخلت عليهو.. وانا فرحان فرح مايعلم بيهو الا الله .. لمن دخلت جوة قلت ليهو .. السلام عليكم ..

قال لي عليكم السلام .. سلم علي بي عدم معرفة كدا .. معقول يكون ابوي ماعرفني ؟؟

قلت ليهو انت الامين صح؟ .. قال ليهو اي انا الامين .. قلت ليهو عرفتني؟

قال لي ايوة عرفتك.. انت فتحي .. كيفك يافتحي ان شاء الله كويس ..

قسما بالله زي الكأنو .. بسلم على زول من ناس الحلة .. ماعندو بيهو علاقة .. كيف انت؟ وكيف امك؟ .. وشغال يعد في القروش .. قلت ليهو كويسين ..

لمن شفت برودة البشر ده.. في تعاملو معاي ؟؟

قلت ليهو معليش انا مرسل. مع السلامة ..

قال لي الله يسلمك.. تسلم .. ولا كأنه بعرفني .. اظنو قايلني جاي اشحدو قروش .. والله انا اتحرجت احراج.. وقلبي وجعني وجع .. طلعت منو وفي عبرة وقفت لي في حلقي ..

وماقدرت ابلعها كلو كلو .. ودموعي ملن وبقيت ابكي ماقدرت اسكت .. وبقيت اعضعض في اصابعي.. من الموقف ده .. ودموعي جاريات الشارع كلو لمن وصلت محل السمك ..

معقول في ابوات بالطريقة دي .. ؟؟

انا اتخيلت انو يفرح بي.. ويقوم يسلم علي.. ويقول لي متين كبرت وبقيت طويل كدا؟ .. ويقول لي والله مشتاق ليك يا ابوالفتوح ..

انا اصلا عارف الظروف المرت عليهو.. بس علي الاقل كان يوريني مشاعر الابوه .. ولاحتى سألني قال لي مالك هنا؟ ولاقال لي ساكن وين؟ ولا قال لي المرسلك منو؟.. بس حسسني انو هو ما ابوي.. ما اكتر من كدا ..

اشتريت السمك .. ورجعت بي شارع غير الشارع الفيهو هو .. ولمن وصلت لي عمك النور بتاع المكتبة .. قال لي مالك يافتح الرحمن عيونك محمرة كدا ؟؟ قلت ليهو محلات الشطة ..

احكي ليهو شنو؟. .. احكي ليهو خيبة حياتي ..؟ احكي ليهو المأساة الانا عايشها من يوم اتولدت؟؟

ختيت السمك.. وقال لي انت من قبيل مشتاق للسمك.. يلا غسل يديك وتعال .. قلت ليهو والله ياعمي مابقدر اكل .. فجأة كدا بطني .. اكل انت انا باكل بعدين .. قال لي لالا كدا انا بزعل منك .. ان شاء الله لقمة واحدة.. ماتخليني اكل براي ..

قعدت معاهو اطيب خاطرو بس .. بقيت ادخل اللقمة في خشمي.. تابا تنبلع لي.. وقدر ماحاولت اتناسى الموقف غلبني .. شلت لقمتين ودليتن بي موية وقمت ..

وعم النور بقى ملاحظ لي .. قال لي لالالا.. انت الليلة ماطبيعي كلو كلو .. حتى تعاملك مع الزباين ماياهو .. زمان تهظر وتضحك الليلة جادي .. وزعلان من شنو مابعرفك ..

وانا الوكت كلو افكر .. طيب ابوي ده الجابو هنا شنو؟ ياربي الدكان ده حقو؟ ياربي بتعامل مع سيد الدكان ده؟

انا ماعارف عنو اي حاجة .. عليكم الله.. هو العرس والولادة فايدتها شنو؟.. لو كان الناس قلوبها بالطريقة دي؟ .. الحمدلله على كل حال ..

لمن رجعت البيت.. اليوم داك حاولت اكون طبيعي.. وما احكي لي امي .. اترددت كتير احكي ليها.. ولا ما احكي ليها ..

في النهاية قلت لو حكيت ليها يعني ح يحصل شنو؟؟ غير امي تحزن وتبكي وتتألم .. كفاية عليها الالام الشافتها في حياتها ..

وصلت البيت زي الساعة خمسة .. وقلت ليها انا تعبان نعسان عايز انوم .. قالت لي خش نوم جوة .. بصحيك للمغرب ..

دخلت وغمضت عيوني .. وقبلت علي الحيطة وماجايني نوم .. المروحة مقفولة ما اتذكرت اشغلها ..

امي دخلت شغلت لي المروحة.. وفتحت الشباك الشمالي .. يجيب لي هوا .. وقلت باب الاوضة وطلعت ..

الله يخليك انتي يا البتساوي رجال .. بقيتي لي ام وبقيتي لي ابو .. حقك علي يا الغالية ..