الفصل الثاني عشر

جاني واحد من زملاي .. قال لي في زول بسأل منك .. قلت ليهو يسأل مني انا؟ منو ده طالب ولا طالبة؟ .قال لي لا شكله زول من برة الجامعة .. راجل ..

انا قلت احتمال يكون ده خالي صلاح.. قلبو حن وجاني المهم لمن مشيت لقيت ليك ياسر اخوي .. ملامحو ما اتغيرت كتير .. غير انو ظهرت عليهو اثار السنين. شوية كدا .. اول من شفتو فرحت فرحة .. لكن كانت جواي في خوفة .. ماعارف من شنو؟ احتمال الاحراج اللاقيتومن الوالد .. يكون سبب في العقدة دي ..

ياسر كان قاعد لمن انا جيت عليهو.. قام علي حيلو.. وبتبسم بي طريقة جميلة خلاص ..

وشكله مبسوط لمن فرحان .. ويعاين لي منو فوق لي تحت .. يازول وسلام ومرحب .. واحساس جميل خلاص .. والله الزول ده سلم علي سلام .. اصلو ماكنت متخيلو ..

وبقى يهظر معاي .. قال لي اول انا متخيلك كبرت.. لكن ما كنت متخيل انك تكون كدا .. ماشاء الله بقيت اطول مني .. لالا انا كدا بغير.. شنو الوجاهات دي ياولد؟؟ .. لع لع ..

انا بعد ماكنت متوتر.. ومقلق من الزول ده .. لكن بي مقابلته والله اطمأنيت واتبسطت .. سبحان الله فعلا زي ماقالت البت التقول الامين ما ابوهو .. زول جواهو نضيف وبرئ شديد ..

وبقى يسأل فيني من امي واهلي .. ودراستي ..

صحتك وامورك والجامعة معاك كيف .؟

قلت ليهو والله الحمد لله كويس مية المية ..

وانا سألته قلت ليهو كيف ابوي .. وكيف خالتي عايدة .. وسهير ومعاذ ..

وبقى يفصل لي ابوي والله كويس ماعنده .. والوالدة كويسة .. والله

طبعا عندها حالة اكتئاب كدا.. بتجيها كل فترة .. تبقى كويسة مدة من الزمن وتاني تتلخبط .. انا طبعا" عملت فيها ماعارف اي حاجة ..

وسهير حاصل حاصل .. ومعاذ حاصل حاصل .. حكى لي بي كل شفافية وصدق .. لاكذب ولازور ..

قال لي ابوي ماقاعد يجيك؟؟ .. قلت ليهو ابدا والله .. شفتو مرة واحدة قبل سنين في السوق اتلاقينا بالصدفة ..

قال لي اها والحصل شنو؟ قلت ليهو مافي شي حصل .. اتسألمنا واتفرقنا ..

قال لي ماقاعد يرسل ليك مصاريف وكدا؟ قلت ليهو ابدا والله ماحصل ..

وفجأة غير نغمة كلامو.. وقال لي هسي انت البصرف عيلك منو؟ ودراستك .. قلت ليهو الله كريم يا ياسر .. والله اصلا الله ماحوجنا .. والحمد لله مستورة .. ربي يبارك لي في الوالدة ..

قال لي والله ابوي ده ربنا ما ح سامحو .. قلت ليهو ماتقول كدا عليهو يا ياسر اخوي .. في النهاية ده ابونا وربنا امر بالبر ..

قال لي لكن موش الوالد بكون قدوة حسنة لاولاده .. بصراحة يا فتحي ابوك قدوة سيئة .. بس انا ماعارف انت عملت ليهو شنو؟

والله لو انا جبت سيرتك ساي.. بقوم يشاكلني .. وكم مرة كنت عايز اجيكم هناك في بلدكم .. هو منعني ..

والله انا مشتاق لي خالتي سامية .. وكان نفسي اجيكم من زمان .. بس هو مانعني والله ..

وهسي لو عرف اني جيتك هنا حيمسح بي الارض ..

اصلو ما بعمل لي اي حساب.. بخاف من معاذ موت .. عشان معاذ مابحترمو وبديهو على راسه ..

قلت ليهو يازول الدنيا دي كلها كمها؟ وفيها شنو؟ عشان الناس تشيل في قلوبها .. اتعامل بي طيب روحك.. وبي اصلك ..

قال لي يازول نحن ح نتواصل.. وانت اصلك ماتعتبر نفسك براك.. انا اخوك .. قلت ليهو ان شاء الله خير.

المهم انا اتفاجأت عديل من شخصية ياسر .. يعني فعلا قالو لي الزول ده ممتاز.. لكن الشفتو اكتر من كدا بكتير ..

سبحان الله انا .. لو الزول ربنا موفقه وهاديهو .. حتى لو اتربي بين ام واب ما عندهم اهتمام بالتربية الصحيحة .. بقوم وهو مختلف .. وصادم لكل التوقعات .. ياسر اخوي كدا ..

انا قررت اكلم امي بزيارة ياسر .. اشوف ردة فعلها .. واشوفها بتقول شنو؟

قلت يا امي في بنت معانا في الجامعة .. وساكنة قريب لي ناس ابوي ..

وشكلها اتكلمت عني.. وياسر اخوي عرف انو انا في الجامعة .. وجاني هناك .. وحصل حصل ..

امي قالت لي فيها خير يافتحي .. في النهاية ده اخوك .. وما مشكلة انكم تتواصلو .. حتي لو عايز تمشي لابوك .. من حقك.. وانا لا بامرك ولا بنهاك .. انت بقيت راجل وتقرر في حياتك زي ما انت عايز .. وديل اهلك وانا ما الانسانة البمنع الزول من ارحامو ..

قلت ليها لي علمك .. انت اهلي وانتي كل دنيتي .. العايزك انا عايزو .. والماعايزك مابلزمني .. حتى لو جاني هنا .. وطلب مني امشي معاهو ..

طبعا احساس انو امي اتضايقت من القصة.. وقلقت كان واضح شديد ..

حتى قالت لي كلمة لاهسي متذكرها ..

قالت لي نحن كل ما نفقل باب الريح .. يجي الهو باعاصيرو ويفتحو

.. كل ماننسى الجروح تجي من جديد وتتفتح ..

قلت ليها ولايهمك.. انسي كانو مافي شي حصل .. طبعا سمعت في مابعد.. من البت الفي الجامعة.. انو ياسر اخوي حكى لي سهير .. وسهير شاكلتو.. وقالت ليهو البوديك ليهو شنو؟.. هو ابوهو ماعايزو ولا مشى ليهو .. وشنو وشنو ..

المهم هي كلمت ابوها ..

وابوي قال ليهو انا كلمتك قلت ليك لو مشيت للناس ديل.. ما عافي ليك .. وانت كسرت كلامي .. المهم منعو تاني من يلاقيني..

وانا اساسا الحكاية مافارقة معاي كتير .. اصلا ما متعود على وجود اخو في حياتي.

ما اخفي اني لمن شفت ياسر.. وطريقة تعامله معاي .. جاني احساس بتاع دفء وحميمية كدا.. اول مرة احس بيهو ..

لكن كان احساس لحظي طبعا .. وراح من وقتو .. وتاني ياسر اخوي بقى بالنسبة لي ذكرة طيبة .. ونقطة ضوء في نص العتمة ..

وتاني لاشفت ياسر.. ولاسمعت بيهو.. لانه البت الاسمها نون .. خلت الجامعة .. وماحاولت اسأل اي زول .. وبقيت منغمس في دراستي ..

ومرت السنين .. زي الكانها اسابيع ..

لغاية ما اتخرجت .. وعملت الخدمة الحمد لله .. وكل الوقت ده امي صامدة زي الجبل الاشم ..

وبقيت بفتش لي شغل .. وامي مبسوطة وفرحانة .. زي الكانها فازت في كاس العالم .. وربنا نصرها ونصرني معاها ..

يوم انا كان في زول صاحبي اخوي شديد .. ح يتزوج في الحاج يوسف .. كلمت الوالدة .. وقلت ليها انا الليلة احتمال اتأخر ..

وطلعت مشيت الزواج هناك من النهار .. وحضرت العقد .. في المناسبة دي شفت زول ..

وكأني الزول ده انا بعرفو .. وبقيت بعاين فيهو .. وهو بعاين فيني .. ياجماعة الزول ده والله انا بعرفو ..

كدي دقيقة.. شلت الكرسي.. ومشيت قعدت جنبو .. قلت ليهو السلام عليكم .. ياخي انا شايفك .. قال لي انت فتح الرحمن الامين؟

قلت ليهو ايوة نعم انت منو؟

قال لي والله سبحان الله .. يازول انت كبرت وبقيت طويل وعريض ماشاء الله.. لكن ملامحك الطفولية فوق وشك اصلا ما اتغيرت ..

انا محمد حاتم .. من الدويم.. كنت بقرا معاك في كوبر ؟..

قلت ليهو ايواااا .ياسلااام.. ياخي وقمت تاني سلمت عليهو.. من جديد..

قلت ليهو والله انا المفروض اصلا ما انساك .. وقعدت اضحك براي .. اتذكرت يوم قلت انا عايز اهرب الدويم .. بلد ناس محمد حاتم .. ههه

انت وين يازول؟ .. قال لي والله انا طبعا اتخرجت وسافرت السعودية ..

بي عقد عمل .. شغال في بنك هناك .. والحمد لله الامور ماشة .. انت اخبارك شنو؟

قلت ليهو والله انا اتخرجت لي فترة .. وكايس لي لي شغل ..

قال لي يازول شغل شنو في البلد دي؟ .. انت لازم تتخارج تشتغل برة لو اصلا عايز ليك مستقبل .. البلد دي هنا والله مقبرة الاحلام .. اصلك ما تفكر تبدا ليك شغل هنا .. لو بديت شغل هنا بتمرض وتاني مابتقدر تتخارج وبترضى بالوضع المزري ..

انت والله مجالك ده .. بره يعيشك ملك .. اسمع كلامي .. انا داير ليك الخير ..

قلت ليهو والله جزاك الله خير يا محمد .. وفعلا كلامك حاصل.. بس انا ظروفي الخاصة ما بتسمح لي اسافر .. انا والدتي براها .. مابقدر اسافر واخليها.. لازم اشوف لي شغل هنا .. عشان اكون قريب منها ..

قال لي المهم ده رقمي .. لو احتجت لاي مساعدة انا معاك .. وبساعدك والله ..

خلصت الزواج ورجعت بدري .. قعدت حكيت لامي .. قلت ليها لاقيت محمد حاتم.. الكنت عايز اهرب لي بلده .. قعدت تضحك .. قالت لي اوعة يكون داير تهرب معاهو تاني؟ .. قلت ليها والله شكلي كدا .. شوفي المرة دي .. عندي فرصة لي هروب منطقي وكل خير .. لكن ماح امشي .. عشانك ..

والمرة الفاتت برضو كنت ح اهرب الدويم هبالة وبرضو عشانك .. قالت لي كيف؟ احكي لي ..

حكيت ليها كلام محمد حاتم القالو لي عن السفر.. والعمل في الخارج ..

قالت لي .. ومالو لو سافرت وشفت مصلحتك .. ؟؟

لو كلامو صاح انا ذاتي بساعدك تسافر .. قلت ليها يا امي اخليك لمنو هنا براك؟؟ ..

وانتي زولة وحيدة .تسكني براك .. الناس ذاتها مابتريحك .. وعارفة المجتمع ونظرتو ..

قالت لي انا ما عندي غرض في زول البتكلم والبسكت .. اصلك ماتشيل لي هم.. لو لقيت ليك فرصة زي دي امشي ولا تتردد .. قلت ليها مستحيل ..

قالت لي انا مامشكلة .. ممكن امشي اقعد مع صلاح اخوي .. قلت ليها تمشي تقعدي مع صلاح عشان مراتو تشغلك خدامة؟ لالا مستحيل..

قالت لي بمشي اقعد مع بدرية اختي؟ قلت ليها انا مابقبل تقعدي ليك في بيت راجل غريب.. وانا حي ..

قالت لي يعني انا هسي بقيت ليك عارض في مصلحتك؟

واحسرتي يا فتحي!!! ..

طيب انا اعمل شنو يا اخوانا؟ انا دايراك انت تسافر.. وتكون نفسك ومستقبلك .. انا اعمل شنو؟؟ انا ان شاء الله اموت..

انا اصلا وجودي مافي ليهو اي طعم ..

انا طبعا التالمت شديد من كلامها و قمت علي حيلي .. وقعدت جنبها في السرير .. وسلمت ليها في راسها.. ومسحت ليها دمعتها .. وقلت ليها خلاص انا عندي ليك حل.. لو بتقبلي بيهو بسافر ..

قالت لي قول بقبل بيهو.. بس ماتقول لي ارجعي لابوي ..

قلت ليها ابدا.. لو ابوي بقى اخر قبلة .. مابخليك ترجعي ليهو .. انا عايزك تتزوجي .. وتقضي باقي حياتك دي من اجل نفسك وبس .. رايك شنو؟

سكتت مسافة .. وسرحت هناك.. قالت لي جدا انا موافقة .. بس لمن اتأكد انت مسافر وامورك جهزت .. طوالي انا بعمل الانت عايزو ..

قلت ليها انتي هسي الزول البسمعك.. يقول عندك عريس في يدك وضامنهاهو ..

قالت لي والله انا يافتحي .. انا في الشهر بتقدمو لي نفرين .. وبرفض .. والله لو وريتك الناس الرفضتهم .. ما اقل من 15 نفر .. وكلهم رجال بمعنى الكلمة ..

بس دكتور ابوذر ده .. ليهو سنتين واقف لي ومكرهني حياتي .. قال عايزني وما بتخلا عني الا يموت ..

قلت ليهو لمن يتخرج ولدي .. لمن انت اتخرجت جاني .. قلت ليهو لمن يعمل الخدمة.. بعد انت عملت الخدمة جاني.

قلت ليهو لمن يشتغل قال لي انا منتظرك .. دكتور ابوذر ده يافتحي

واحد من الدكاترة المعانا في المجمع .. وزول بحترمني احترام شديد

زوجته متوفية. وعندو منها طفلين.. ولد وبت وقال لي اطفالي مافي زول في الدنيا دي بربيهم لي غيرك ..

وانا والله شايفاهمو زول كويس .. بس انا مستحيل اتزوج واخليك

.. قلت ليها خلاص اتفقنا.. انتي هسي اتصلي علي دكتور ابودذر .. وقولي ليهو وافقت .. وكونك تهتمي بي طفلين فاقدين حنان الام.. انا بعتبرهم ديل اسعد طفلين في الدنيا ..

بس ارتبكت .. وبقت تدعك في يديها.. وعرقت عرق .. قالت لي والله عشانك انت انا اعمل المستحيل ..

بدت تفتش في الاسماء .. انا طبعا امنيتي انو امي تشوف حياتها .. انا بكون مرتاح نفسيا والله .. لانها ضحت معاي بسنين صباها .. المهم يازول ضربت ليهو للدكتور ..

وانا بسمع فيها .. قالت ليهو كيفك يادكتور .. انت ان شاء الله طيب .. انا عايزة اديك بشارة .. انا قبلت اكون ام (معمر ولجين) .. ديل اطفاله ..

وبقت تقول ليهو خلاص خلاص يادكتور.. عشان خاطري ماتبكي .. الله يخليك انا كدا بنهار .. الحمد لله .. والله ممايسعدني انا اكون ليك .. انت انسان ممتاز والله.. زيك قليل في الرجال ..

امي بتتكلم مع الدكتور وانا بعاين ليها مبسوط لمن دمعت ..