الجزء 1

بسم الله نبدا

القدر البتعسنا هو القدر البسعدنا

علينا نعيش الحياة زى ماهى ونحمد ونشكر فضل ربنا علينا

مى دا اسمى شغالة مترجمة فى السفارة الفرنسية ومدرسة لغات فى معهد فرنسى ومعهد انجليزى

بقولو البت بت امها ولا بت ابوها انا بت جدى 😂

جدى احمد ماعندى غيرو ابوى امى هو ماعندو غيرى حبوبة زوجتو متوفية وبتو ازوجت وسافرت اى ياها امى

امى انسانه طموحة جدا دكتورة ودايما بتحب التعليم والتطور بس ابوى كان عكسها دكتور بس كسلان😂

اتخصصت وبدت تحضر للدكتورا وابوى محلك سر وحصل خلاف بينهم وزاد لمن جيت انا لانى كنت عقبة فى طريقا فاطلقت منى ابوى وبعد سنه ازوجت دكتور وسافرت امريكا وبقت دكتورة مشهورة فى الجراحة .ودا الزعل ابوى وخلا يسافر فرنسا ويتزوج فرنسية واتخصص ويبقى مشهور فى العظام

بس فى انا فى النص ما بعرفونى من عمرى سته سنوات انا عبارة عن طفل يتيم برسلو لى مصروف كل شهر

وبقيت مع جدى علم وربى وجدو ما بخل على لا بتعليم ولا تربية اما المصروف فما كنت بعرف عنو حاجة لانو جدى كان معودنى على الادخار وبدنى الحاجة البتكفينى

جدو عندو عمارة ماجرا شقق وكم دكان . غير انو استشارى هندسى ومدرس فى كم جامعة

يعنى ما محتاج انو يشيل من مصروفى

ماعندو حفيدة غيرى فى السودان امى جابت ولد بعد سافرت وابوى عندو اولاد كم ماعارفة ما حصل شفتهم ولا حتى صور

وكنت لمن اتكلم معاهم ابوى بقول لى ما حتعرفى لغتنا

ودا عمل لى نوع من العقدة وخلانى اخش لغات انجليزى وفرنسى وجدى شجعنى على كدا

اهل ابوى خارج الصورة بس بشوفهم الاعياد وابوى بتصل بى اذا حصل ليهم حاجة امشى اعمل الواجب

عمتى وعمى مابسالو منى الا فى الضروريات

ماتسمعو القصة تقولو عايشة ماساة

بالعكس انا من اسعد الناس طفولتى بين الكتب ما لعبت وجريت ولا كنت طفلة شقية هادية

يومى ببدا من 5 صباحا بصحى اصلى واقعد جم جدى يقرا قران وبعدها امشى المدرسة ولحدى الابتدائى كنت فى مدرسة حكومى وارجع انوم واصحى اتغدى واخلص واجبى مع جدى واقرا كتاب من مكتبة جدى وبعد صلاة العشاء النوم

ولحدى ما خلصت الجامعة وكنت من اوايل الدفعة ما كان فى حاجة اسمها سهر

فى خالة كانت بتجى تطبخ لينا وتنضف لحدى ما خلصت الثانوى فى الاجازة بديت اتعلم

جدى كان شخصية صارمة بس حنون نادرا ما اشوفو يضحك بس دايما مبتسم

شقتنا فى العمارة الماجرة وكلها اطفال بس ما كان عندى اى علاقة بينهم

وانا فى اخر سنه اخدتنى السفارة مترجمة ليها تحت التدريب وفى نفس الوقت اخدنى المعهد البرطانى والمعهد الفرنسى مدرسة

يعنى كنت بقرا وبشتغل

اهل امى وين غير جدى مافى غير اخو جدى ودا عايلة كبيرة جدا عندو 5 بنات وتلانة اولاد با ولادهم بمشى ليهم برضو فى المناسبات بس اخو جدى احمد اسمو محمد كان كلو جمعة بجينا

واوقات بجيب معا واحد من احفادو فبعرف جزو من احفادو

كنت متخيلة انو الناس كلهم زى جدى او امى بحبو بس التعليم والتطور والطموح بس الحب والمودة والونسة دى مافى حساباتى

لحدى ما فى يوم جات جارتنا عروس وسكنت فى الطابق الفوق مننا

نتلاقى