الجزء 4

4

الاكل كان تحفة شوربا وسلطات ومكرونة ومشويات يعنى اكل شفتو فى الصفرة تشبع

جدى طبعا بعشق الاكل حسيتو مبسوط باللمة وكان كل شوية يعاين لى ويبتسم كانو بقول لى انبسطى

نهى كانت قبل تاكل بتدى امجد فى صحنو اكبر نصيب 😂

حتى بتشيل من صحنها لحاجة البحبها

اما امها كانت مهتمة ب فارس وكان مضايق من التعامل دا لحدى ما قال ليها امى كفاى بزيد براى

الفكرة ما قصة اكل ولا منو يدى التانى الفكرة فى الاهتمام فى عيونهم

العائلة كلمة تتحس فى اللحظة دى اتمنيت لو امى وابوى واخواتى معاى

دموعى قربت تنزل لكن سرعة اكلت شطة او زول لاحظ لى نهى قالت لى نسيت اقول ليك الشطة حارة 😕 شربت موية وقلت ليها ولا يهمك

الشطة انقذتنى بس حسيت فى عيون بتاعين لى من تحت فارس شكلو ما اقتنع بحنك الشطة 😂

اتبسطنا فى الاكل وقمنا كان العصاير مختوتة فى طاولة براها وكل زول يشيل الحاجة العايزا

نهى قالت لى مى انتى ما سهمتى فى حاجة لمى معاى الصفرة

امها قالت ليها عيب يابت

قالت ليها انا ماعندى ضيوف بتقعدو 😂

قلت ليها عادى ياخالتو ولميت معا الصفرة

مطبخها كلو بالالوان فرايحية ابيض و وردى ومرتب اكتر من حياتى😂

قالت لى الون اختيار امجد

قلت ليها جميل تتهنى بى

امجد جا وقال ليها التحلية قالت لى مختوتة فى التلاجة جاهزة شيلا

وهى طلعت بالصحانة انا بقيت زى الهبلة ما عارفة اطلع ولا اقعد

متوحدة 😂

لميت الصحانة وبديت اغسل المعالق وسرحت ما انتهبت للزول الدخل وقال لى احم احم

انا اتخلعت والمعلق وقعت منى

واتلفت لقيتو فارس دنقر ورفع المعلقة وقال لى اسف .. تحبى اساعدك

قلت لى لا شكرا ما بحتاج

قال لى طيب سيبى الفى يدك وتعالى التحلية وبعدها العدة ما حاطير😂 نهى حتتبسط منك

قلت لى مالى فى الحلو

قال لى احسن مضر بليل

قلت لى ولا بالنهار ما بكل حلو

سكت مدة وقال لى طيب تعالى اتونسى معنا انا مرسلنى عشان اجيبك

غسلت يدى وطلعت قدامو وقعدنا كلنا والونسة جرت لحدى 11 جدى الكان بنوم من 8 بساهر😨

بس انا حلقى اتشرط من السياب

واخيرا جدو قال لى يلا نمشى

ودعناهم وجدى قال لى ابو نهى بكرة الساعة 5 مواعيدنا

طلعنا وانا جريت على سريرى نمتا بس كنت مبسوطة

الصباح نهى رسلت لى صباح الخير ان شاء الله ما تعبتى فى السهر

رديت ليها لاول مرة زول يهتم بى او يحس بتعبى غير جدى

نتلاقى