الجزء 17

يوم العرس كان يوم الجمعة بعد فطرنا انا وجدى جريت جرى مسحت كريمى عاد بقيت بت 😂

وجريت على نهى معها ايلاف عملتا شى بيض ب بن شى كستر بزبادى الوش نعم وشلت داك الوش

ايلاف ما كان جتمشى معنا بس انا حنستها ومن المغرب بدينا تجهيز مشيت كويت لى جدى جلابتو وعمتو والشال والعباية الما خمج 😌

وهو يعجبكم ديك الحلاقة والساعة والعصاية

بعد لبسنا انا عباية الاشتريتا ونهى توب بالاناناسى و ايلاف عباية وجونتان حركات العروسات

امجد لبس زى مرتو بنطلون بنى وقميص اناناسى عجبتنى الفكرة وببنى وبين نفسى قلت لو عرستا الا اعملا .. احلام البايرات كلو ما تعجبهم حركة يقولو يعملوها

انا كنت محجبة بالعباية الخليجية لونا اوف وايت والشغل العليها بالدهبى وايلاف عملت لى مكياج رهيب لمن ما عرفتا روحى

خالتو ام نهى مشت مع عمو فيصل وانا وايلاف مشينا مع جدى و نهى مع امجد ودخلنا الصالة وكانى اول مرة اخش عرس الكم عرس المشيتهم كنت بمشى مع اخر الحفلة اقول مبروك وامشى

وجاتنى رهبة من الصالة ومن غير احس مسكت يد جدى هو زاتو مسكنى ويمكن لاول مرة احس بالاطمنان 😍 ودخلت رافعة راسى وكانى العروس لقينا العرسان جو وشفناهم برقصو اسلو انا عاد خجلتا خجل 🙈 تقول برقصو انا مع فارس 😳

فارس شنو الجاب سيرتو .. مى اعقلى ما وقتك

لقينا جدى محمد ومعاو ابو العروس وابو العريس وجدى واحنا ماشين سلمى على فلان وعلان وفلانة وعلانه وانا ما مزكرة اسم زول واحد من القالهم

وقعدنا ولقينا عمو فيصل وخالتو وصلو سلمنا عليهم وحضنتنى وقالت لى انتى احلا من العروس حلاتا بتى مى انا دموعى نزلت من الفرحة كلام نفسى اسمعو من امى

امجد قال ليها الليلة مى متالقة

نهى قالت لى والله عسولة

ايلاف قالت ليهم من اخرجى الكلام دا

وضحكنا وجا الاكل والحفلة اشتغلت والناس دى مهججة والعروس مبشوشة وهجاجة

فى نص الحفلة ظهر على😒 سلم علينا وقال لى قومى ارقصى خلى الخمالة دى

اجى يا كدى قلت لى شكرا ما عايزة

قام جرانى بالغصب وقفتا مع كمية من الاولاد والبنات قال لى ديل اصحابى وصحباتى ورقيص كيف كيف ماعجبنى الحال وبقيت ادعى يارب تنقذنى اعاين ل ايلاف تتبسم لى قايلنى مبسوطة

اشر على جدى يبشر لى

دى مصيبة شنو يا خوانا

واحد من الاولاد وقف قصادى وبقى يرقص معاى ويدنقر قريب لى وريحة السجاير من خشمو خنقتنى وانا ارجع هو يقرب لحدى ما قربتا اكشو كف

وفجاة من غير مقدمات القى يد جرتنى وقعدتنى فى طربيزة

بعد ما خدت نفسى عاينت لقيتو فارس وكان بحمر لى وقال لى اوعى تتحركى من هنا دا ما رقيص دى قلة ادب 😡

وقبل منى بقى بتكلم مع جدى وانا لا عارفة اضحك لا ابكى لحدى ما الحفلة انتهت جدى ساقنى مشينا باركنا لى العروس والعريس اصرو نحضر الجرتق جدى قال لى اقعدى انتى مع نهى وايلاف وخالتك انا وعمك فيصل بنرجع

اها صحبات العروس غيرو كلهم بالاحمر طوالى ايلاف عجبتا الحركة وقالت الا نعملا فى عرسها 😂

و تورتا حقت الجرتق والفنانة بالدلوكة بعد شوية وزعو الفال كان واحد للمزوجات واحد للبايرات 😂

انا شلتو وختيتو فى الطرييزة

ومشينا صفقنا ورقصنا مع العروس لمن خالتو جات شاكلتنا وامجد يضرب فى التلفونات وطلعنا

فى الاول وصل ايلاف وخالتو

حتى احنا

جيت البيت منتهية لا فتحت نت ولا حتى طلعت تلفونى شحنتو

نتلاقى ...