الفصل الخامس

ابخوسة وصل لي البشير .. وبسأل فيهو من صحتو واخبارو .. قال ليهو

والله الشباك الله يديها العافية .. انا يازول اكتا ضايع ساكت .. لكن انت

السويتا فيني انا مابنساها .. الا اكون جاحد نعمة .. سلامتا العروس بت ود

دار الزين .. قال ليهو الله يسلمك يا عم البشير .. والله البت انضربت عين

زول ماذكر الله ..

قال ليهو يازول عين شنو؟ .. انا ناديتك مخصوص عشان اكشف لك الحقيقة

.. شفت الحجل الشايلو ود دار الزين ده .. ده شي فيهو لعنة غريبة .. اول

حاجة يلبسو ود الحلال يكب عليهو القروش والصحة ..

يلبسو ود الحرام يمرضو .. وهسع ود دار الزين لبسو البت .. قام الحجل

مرضها .. معناها البت شنو؟ ..

قال ليهو شنو؟ يعني النسيم بت حرام؟؟

قال ليهو صاحب العقل يميز .. زمان ود دار الزين ده صغير .. سقناهو انا

وابوهو .. مشينا لي فقير في سنار .. قال الولد ده ماعندو جنى .. يعني

ماعندو ذرية ..

اها نحن بقينا عارفين انو ودار الزين اكان اتزوج مابيلد .. اها وكت اتزوج

التاية وجابت البت .. نحن نضمنا معاهو .. قال لنا ياناس انا والله مرتي

مافارقتها من عرستها لامن حملت .. يعني حملت من الحيطة؟ ونحن شكينا

في كلام الفقير .. وخلاس سكتنا .. الكلام ده عارفنو نحن التلاتة .. انا واخوي

وولدو بس .. اها هسع اظنو يا اما شكا في البت .. يا اما داير يسعدها ..

غايتو هسع انا كدي اتاكدتا من كلام الفقير الزمان داك ..

والبت ياخوي ماها بت ود دار الزين .. واحسن تعرف من هسع ..

ابخوسة .. قال ليهو اسمع يا البشير .. انا والله اصلو ماكت قايلك باري لي

كلام الفقرا والدجالين ديل .. يازول انت اظنك ماقعدت مع العالم القراني.

العالم قال ماتسمعو كلام ناس الكشف .. مافي زول بعلم الغيب غير ربنا ..

وقال البصدقهم صلاتو باطلة اربعين يوم .. البلد كلها اتملت شيوخ وفقرا

وكشافين .. ياناس ماتخافو ربكم ..

بعدين كيف يعني شيخ يعلم الغيب؟؟ ويقول ود دار الزين ماعندو

جنى؟؟ .. انتو هسع خليتو لي الله شنو؟ .. مافضلكم الا تقولو الشيخ ربنا.

البشير قال ليهو انت اظنك من تبع الشيخ اب كف المنكر ..

قال ليهو انا اصلا ماتبع زول انا تبع الحق. والحق واضح وبين يا البشير ..

ماتتهمو اعراض الناس .. بي سبب كلام الشيوخ الكضابين ..

بعدين حجل شنو البجيب ليهو قروش وعافية لي ود الحلال؟؟ .. ويجيب

ليهو مرض لي ود الحرام؟؟ .. ياناس اعوذ بالله من شركم .. تب علي جهلكم

اعوذ بالله .. هسع البت دي وامها كان سمعن بالكلام ده ..

دي ما بتجيب حرب بين القبايل .. انتو قايلين اولاد مختار ود اب كوع بسكتو

لكم ؟؟ .. والله يجوكم الضحى الاعلى راكبين خيولهم وشايلين سيوفن ..

يعدموكم نفاخ النار ..

والله ياجماعة الحقيقة اب خوسة طلع راجل واعي .. في زمن الجهل

والغباء .. طبعا" الفترة ديك فيها الوهم والشعوذة بي طريقة غريبة ..

والخرافات وكرامات الاولياء الغير منطقية .. البتشبه الاساطير .. والكلام

موثق في الكتب لحدي هسي .. والناس على حسب جهلا تصدق سااااااي ..

الشيخ فلان طار .. والشيخ فلان بصلي الضهر في سنار وبصلي العصرفي

مكة .. والشيخ فلان بلع الشيخ فلان .. ياخي قالو الشيخ كان قال ليك .. طلق

مرتك تطلقها ..

كان قال ليك اقطع راس ابوك بالسيف تقطعو .. بدون اعتراض .. ويقولو ليك

.. من اعترض انطرد .. ومن قال لشيخه لا فقد كفر .. وكتاب طبقات ود ضيف

الله مليان بالعجائب والغرائب. من شيوخ ذلك الزمان المنقرض ..

بس كان في العلماء زهاد .. من اهل الوعي والادراك والتوحي .. د امثال

حكيم السودان. الشيخ فرح ودتكتوك رحمه الله .. في نفس الزمن

والمنطقة .. وكان عندو ضدية شديدة للامور الشركية والظلم .. ودي سببت

ليهو عداء من معظم المدعين للصلاح والتصوف .. واجه الشيخ فرح

الانحرافات العقائدية الكانت سائدة في الوكت داك ودخل في مناظرات

كتيرة منها مناظرته مع الشيخ " عبد القادر ود هجو" والشيخ " محمد ود عبد

الحي" .. وواجه الفرق الضالة التي حرفت الدين باسم الفقه .. مثل جماعة

" الزبالعة" وزعيمهم " كرين ود عبد الله" ونظم فيهم قوله:

يا أبَّان طريقة"ً مضلة .. يا أبان عملاً ما هو لي الله

وقت العنقريب فوقكم انبله .. ما بينفعكم كرين ود عبد الله

بس الشيخ فرح اتوفى قبل زمن ناس ود دار الزين .. لو كان حاضر كان حلا

ليهم القصة دي .. لانو مسمنو حلال المشبوك .. بس برضو علمو موجود ..

وبصمتو ما بتتمحي. لحظات تابعو معاي ..

طيب نرجع للقصة ..

طبعا ابخوسة .. ادى البشير درس في العقيدة. وأصلا ما اتهم التاية

ولاشكا فيها .. وداير يقوم يمشي .. البشير قال ليهو يعني بتعرسها؟

قال ليهو ايا بعرسها .. حتى ان بقت ماها بتو بعرسها .. يهاديل الناس

بياخدو الفرخة (الخادم من الرقيق) بالقروش .. ما معروف ابوها منو ..

وبعرسوها وبلدو منها ..

انا اخلي النسيم البهية وتقيه ؟؟ ارقد يا البشير في رقادك ده .. كلامك

لاجاب لا ودا .. لكن انا بمشي لي ود دار الزين وابلعو كراعو متنيه.

مشى طوالي لي ود دار الزين .. قال ليهو والله ياود دار اتاريها القروش

والسلطة مابتجيب الفهم .. ياخي ماتكلمني بي قصة الحجل مع النسيم الا

يكلمني البشير؟ ..

قال ليهو هو كلمك الله ياخدو المابعرف يمسك الكلام ..

ابخوسة قال ليهو وانت هسع في فهمك يعني .. داير تعرس لي بتك

المامعروف اصلا من فصلا ؟؟ .. كدي النجيك على رايك .. قال ليهو والله يا

ابخوسة انا براي مانعارف اسوي شنو؟

قال ليهو يازول دي خرافات ساكت .. انت بتقتنع بالاساطير الفاضية دي؟

انت ماقعدت مع العلماء؟

قال ليهو والله انا هسع في مشكلة .. لا ليها اول ولا ليها اخر .. واظني

مرضت عديل .. والتاية بت مختار متحجزة علي تب .. بعد العرس قالت تاني

مابتقعد معاي دقيقة .. وبتمشي تكلم اخوانها. وانا ماني خايف منهم لكن

المشاكل دابها جاية ..

قال ليهو خلي لي الموضوع ده علي .. انا بعد باكر قبال اسوق النسيم لي

بيتي بنضم لك معاها .. بس الكلام الزي ده عليك الله تاني ماتجيبو فوق

خشمك.

قال ليهو لكن يابخوسة الشك الشك .. اسوي فوقو شنو؟ قال ليهو بس

اصبر لي يومين وانا براي بجيك .. واغسلك الشك من قلبك ..

هسع انا ماشي اهدي التاية بت مختار ..

اب خوسة شاب عمرو في السبعة تلاتين .. لكن عقلو يوزن قبيلة .. شوف

الزول ده بالله واعي كيف ..

اها ابخوسه فات من ودار الزين .. ومشى لي التاية بت مختار ام النسيم

.. قال ليها .. انا عرفت بالكلام الفارغ البسوي فيهو ود دار الزين .. الراجل ده

باري الاوهام والطيلسان .. وانا هسع جيت داير اطلبك بي الله .. ما تكلمي

اخوانك ولاتسوي شي ..

لامن انا اجيك راجع .. قالت ليهو سمح اعشاي ..

المهم يازول غايتو العرس تم .. والوضع ما مطمن ابدا .. والنسيم لسع

جسمها مارجع طبيعي ..

ووصلت بيت ناس اب خوسة .. وبقت مرتو على كتاب الله وسنة رسوله ..

ابخوسة كان فرحان بالنسيم فرح شديد .. وهي كانت نفسياتها تعبانة .. من

اثر الحكيك الفوق جسمها .. وابخوسة كل مرة بطمنها .. انو دي جروح عادية

وبقول ليها ده سليخ من بره لابره .. وببرا .. وفعلا الجروح مازي اول ايام ..

اها يازول .. ام ابخوسة وخالتو .. شغالات مع النسيم علاجات .. بالقرض

والقطران وزيت السمسم وطين البحر .. طبعا دي كانت افضل صيدليه في

الزمن داك ..

بعد خمسة يوم من الزواج .. ابخوسة مشى لود دار الزين وبقى يقول ليهو

في نفس الكلام الكان بقول فيهو للبشير ..

ويوضح ليهو في الخزعبلات والخرافات الماشي وراها ..

المهم شكلو ود دار الزين ابا يقتنع ليهو ..

قام ابخوسة قال ليهو .. طيب انا طالبك طلب ما تحيب رجاي ..

دايرك تمشي معاي للشيخ اب كف .. الشيخ اب كف شيخ مشهور .. وعالم

علامة .. وهو من تلاميذ الشيخ فرح ود تكتوك .. وماسك الطريق السني ..

وبدرس الناس الفقه والتفسير والعقيدة .. وحتى الملوك بياخدو منو

الفتوى ..

ود دار الزين قال ليهو شيخك ده منكر .. انا مابمشي ليهو .. ده مابقتنع بي

كرامات الاولياء .. قال ليهو ابدا يا ود دار الزين .. اولياء الله لاخوف عليهم

ولاهم يحزنون .. لكن شيوخكم البشربو الخمرة ديل .. والواحد يعرس تمانية

حريم .. ويقول لك انا مالي بالشريعة ؟؟ ديل هسع بتقول عليهم اولياء؟؟ ..

(ووفعلا ده كلو كان حاصل ياجماعة .. حتى

ياخي قالو يوم ملك اسمو الملك " تيرا" رسل للشيخ فرح قاليهو لازم ترسل

لي فتوى مكتوبة تسمح لي فيها اني اتزوج بنتي الكبيرة !!..

الشيخ فرح رحمة الله عليهو رسل ليهو الفتوى وكان نصها:

قول للملك تيرا .. زوجنالك بنتك الكبيرة ..

بي سنة البغال والحميرا .. ههه

اها هسع ابخوسة بحنس في ود دار الزين .. يمشي معاهو للشيخ اب كف

الماخد العلم من ودتكتوك حلال المشبوك ..

قاليهو انا دايرك تمشي معاي ليهو .. ونسوق معانا التاية بت مختار ..

ويفتينا في المشكلة دي .. ولازم يوصلنا لي حل .. قبل ماتجيك مشكلة

تخسر اهلك وسمعتك .. وتجيب لها دم يغرق البلد ..

المهم في النهاية مع الاصرار .. ود دار الزين قرر يمشي معاهو باكر الصباح

.. ويسوقو معاهم التاية بت مختار ويمشو للشيخ .. والنسيم العروس قاعدة

في بيت نسابتها .. ماجايبة خبر للحاصل بي وراها ..

اها يازول كلهم التلاتة الصباح .. شالو معاهم الحجل .. وركبو مشو سنار ..

ومشو للشيخ اب كف .. الشيخ كان فعلا من الصالحين واولي الفطنة

والنباهة ..

سلمو عليهو .. وعرفوهو وروهو اساميهم واهلهم وعرفهم كلهم .. بدت

الكلام التاية بت مختار .. ممغوسة لامن بتبكي .. قالت ليهو ياشيخنا اناجاياك

متظلمة .. وما دايرة اسوي لي كلام يجيب الدم بين القبايل .. الراجل ده

جاب حجل .. وجا ركبو في كراع بنيتو ..

والبت حصل ليها وووو .. المهم حكت ليهو المنظر كلو .. لغاية حتة اتهمها

واتبرأ من بتو .. دحين ياشيخنا افتح كتابك .. ان لقيتني البت دي جايباها من

راجلا" اخر .. وحات الله الا اركب السكين في قلبي هسع ..

الشيخ قالها انا يابت مختار ماعندي كتابا" بفتحو .. لكن بترجعو مني

بالنجيضة ..

الشيخ قبل على ود دار الزين .. قال ليهو الكلام القالتو بت مختار ده

حاصل؟؟ .. ود دار زين قال ليهو اي حاصل .. والنبدالك القصة من اولا ..

انا اصلا ما بجيب جنى .. والفقير زمان قال انا مابلد .. لكن وكت المراة دي

حملت مني .. قلت الحمد لله ربنا من جودو قسم لي .. لكن بقيت شاكي في

قلبي .. وكلام الفقير محسكن لي .. اها بقيت كايس للحجل ده .. عشان ياكد

لي شكوكي .. ولا يشيلا لي من راسي .. ووووو .. حكى ليهو الحصل ..

الشيخ قال اشهد ان لا اله الا الله واشهد ان محمد رسول الله .. ده كلام

شنو يازول البتسوي ديهو ده؟؟ ..

يعني الفقير شاف اللوح المحفوظ الفيهو اقدار الخلايق وعرف

المستقبل ؟؟ وربنا جلا في علاهو بقول (وما تدري نفس ماذا تكسب

غدا") .. عارف يا ود دار الزين .. يوم الرسول كان قاعد وفي بنيات بغنن

وهو بسمع فيهن .. واحده فيهن قالت .. وفينا نبي يعلم مافي غدٍ ..

سيدنا النبي قال لها دعي عنك هذا .. وقولي بالذي كنت تقولين. لايعلم

مافي غد الا الله .. يعني لو كان سيدي النبي عليه الصلاة والسلام مابعرف

مافي غد. الا بالوحي .. يبقى فقيرك ده افضل من سيدنا رسول الله؟؟ ..

عليه الصلاة والسلام؟؟ يازول ماتخاف من الخلقك ..

بعدين ده حجل شنو البعرف ود الحرام من ود الحلال؟ .. وكمان يجيب

السعادة والمرض؟؟ .. استغفر الله العظيم ..

كدي ناولني الحجل ده جاي .. انت شكلك يا ود دار الزين مابتقتنع بالكلام ..

لكن انا بقنعك بالفعل .. الشيخ مسك الحجل وبقى يقلب فيهو .. وكورك لي

واحد من الحيران .. ياود فاضل؟ يا ودفاضل .. ود فاضل جا جاري حفيان ..

قال ليهو نعم يا شيخنا .. قال ليهو عليك الله امش لي بابكر ود حسب الله ..

قوللو شيخنا قال لك رسل لي خمسة فرخات (خدم رقيق) من بنات

السفاح .. يعني بنات حرام عديل شيلة ودقة .. مافيهن اي نقاش ..

بابكر ود حسب الله من اعيان سنار .. وكان عندو كمية من الرقيق ..

وبشتري وببيع .. وطبعا" الخدم زمان يلدن ساااكت .. يحملن ويلدن لاعرس

ولاغيرو .. والجنى ذاتو ابوهو مابكون معروف منو .. .. المهم ده الحاصل

في الزمن داك ..

اها يازول الخدم الخمسة فتيات لقيطات بنات سفاح حضرن قدام الشيخ ..

وودار الزين .. والتاية .. وابخوسة ..

الشيخ نادى الاولانية قالها مدي كراعك .. ولبسها الحجل .. مسافة .. و طلعو

منها .. ونادى التانية .. ولبسها الحجل .. وطلعو منها .. الاتنين ديل ماحصل

ليهن شي .. ولا انكرشن ولا اتحكن .. التالتة ناداها .. بس دخلة الحجل في

كراعها .. بقت تنكرش .. طلعو منها .. وركبو للاتنين الاخرات ماحصل ليهن

اي شي ..

وود دار الزين يعاين ... محتار وخاتي ايدو فوق خشمو ...

والبت المسكينة البتنكرش وتتلوى .. الشيخ قال للحوار جيب لي موية ..

جاب ليهو موية .. قرا ايات في الموية وكشحها بيها البت هدأت .. وبقت

طبيعية والشيخ قاليهن امشن .. خلاص ..

الشيخ عاين لي ود دار الزين .. وقال ليهو مالو ياخوي الحجل ده ماكشف

الاربعة ديل؟؟ .. وخبارو اتسلط على البنية المسكينة دي ؟؟

قالليهو والله ياشيخنا انا براي هسع احترت في الموضوع ده .. وندمت لامن

سفيت التراب ..

قال ليهو اسمع يا ود دار الزين .. الحجل ده فيهو سحر شيطاني .. معمول

لي زول طبيعتو نارية .. وبأثر في اي زول طبيعتو نارية .. ومابأثر في زول

طبيعتو .. ترابيه ولا مائية ولاهوائية .. فهمت الكلام ده .. ود دار الزين قال

ليهو والله مافهمت .. قال ليهو ده كلام كبير عليك .. لكين خليك عارف .. قصة

انو حبوبتك شافت الحجل في النوم ده كضب .. ده سحر شيطاني .. وكان

مشيت سعلت بتتكشف ليك اسرار الزمان .. الكلام ده كلو كضب في كضب ..

تعال يا ود فاضل (الحوار) .. شيل الحجل امشي ارمو في البحر وتعال ..

ياود دار الزين .. قوم اعتذر للمراة دي .. واطلب منها العفو .. المراة دي كان

رفعت ايديها وشكتك على الله بتغس حجرك ..

ود دار الزين برك في الواطة .. ومسك في كرعين التاية .. ويبكي زي

الشافع ويعتذر .. وابخوسة واقف هناك يبكي ويقش في دموعو .. والشيخ

رفع ايديهو يحمد في ربنا ..

ديل الصالحين الجد ..

الى اللقاء