الفصل الثامن

النسيم مشت البيت .. وكانت خايفة خوف شديد .. وبترجف من راسها

لاكرعيها .. ومتوترة .. وماعارفة تعمل شنو؟

وتقول انا كان سكت .. ياهو الزول الملعون جاي دور الليلة .. واكان كلمت

سيد بيتي .. مابسكت .. ياهو الشال سيفو ومشى على القصر .. ويموت

على امو وابوهو .. وانا اتهمل .. والرسالة تتهمل .. وبعدين الملعون ده يجي

يسوقني ويمكن يقتل ابوي. واكون ماسويت اي شي .. غير كتلت الغالي

وحرمت منو اهلو المحتاجين له. وفقدت ابوي ..

وبقت تدخل من هنا وتمرق من هنا .. وحايمة بالسهلة حفيانة زي الزول

الرايحالو حاجة .. نسيبتها ام اب خوسة لاحظت ل .. يها قالت ليها انتي يا

النسيم .. من جيتي من البير ماك عديلة .. مالك يابتي؟ ..

قالت ليها والله ياخالتي ماني عارفة .. انا طيبة. ولاماني طيبة. مخي ده

مزوزو .. الا يكون ضربني شيطان .. من شواطين الخلا ديل ..

انا ماشة اهلي ياخالتي انا ماشة اهلي ..

قالت ليها قولي بسم الله يابتي .. وختي اليقان في قلبك .. اليجي عمر

ولدي .. قالت ليها ولدك مابدورو .. تاني مابدورو ..

ام ابخوسة قالت ليها .. ياربي لاتمحنا ولاتبلينا .. كيفن الكلام ده يا النسيم بت

التاية ؟؟

قالت ليها ياهو الكلام العديل .. انا تاني ماعندي قعاد معاكن هنا ..

النسيم قعدت في الضل .. واتمددت في الواطة .. وبقت تبكي تسكل ..

ودموعها ديل يشتتن اربعة اربعة .. تقول ..

الليلة وافليلك يا النسيم .. الليلة وا رحيلك يا النسيم .. الليلة ياحليلك يا

النسيم .. ياها قسيمتك يا النسيم .. يا القليلة بسيمتك. يا النسيم ..

اها المراة ديك جات وقفت تعاين ليها .. وغزت كيعانها .. قالت ليها .. النسيم

يابتي انتي بصح والله ماك طيبة .. اليجي عمر ولدي نوديك للفقير يعزملك

قالت ليها مرضي مو مرض عزيمة .. حياة الدنيا على فقدت طعيما .. .. اريتو

كان شال روحي .. ارويتو كان كتلني ..

قالت ليها هو منو يا النسيم؟ .. قالت ليها مابعرفو ياخالتي وشن خبرني

بيهو؟ ..

قالت ربي يشفيك يابتي .. ياربي تخفف المحن وتزيل البلا ..

والنسيم قاعدة في محلها داك .. تبكي وتوصف .. لامن جا اب خوسة .. من

بعيد عاين للنسيم متمددة في الواطة وتبكي .. قال خلاص ابوي ولا امي

واحد فيهم مات .. وبقى يصبر في روحو ياربي تصبرني على المصايب

يارب ..

وجاها نا نزل وجاري .. خلا الحمارة ماشة براها بي وراهو ..

جا قعد جنب النسيم قال ليها .. النسيم المات منو؟ هوي النسيم ..

قالت ليهو مافي زول مات المت انا .. انا الميتة يا سيد البيت ..

قالت ليها النسيم قولي بسم الرحمن الرحيم .. ابوي كويس؟ قالت ليهو ابوك

نايم جوة .. وامك تراهاديك .. تجاوب فيهو وشغالة في بكاها ..

قام جاري شاف ابوهو .. وعاين لي امو .. قال ليها الرسالة ماجات؟ قالت

ليهو لاهسع ياولدي .. لكن النسيم دي ماعرفتها مالا .. مسويالا مناحة قدر

دي؟

قال ليها اي انا هسع بمشي اسألها ..

اول من جا قعد جنبها داير يسألها قالت ليهو .. ودني لي اهلي يا نور عيني

.. ودني لي اهلي يا ضو القبايل ..

قال ليها حاضر حاضر يا النسيم .. جا قال لي امو انا ماني داير اكل .. النسيم

بتكون دايرة امها مشتهياها .. النوديها ليها وباكل عندهم هناك ..

نزل الحطب من الحمارة وسقاها موية .. وشرب ليهو قرعة موية من القربة

المعلقة في الراكوبة ..

النسيم سكتت من البكاء .. وقامت تتنهد زي الشافع .. قالت ليهو والله

مابتمشي بي ريقك .. ان شاء الله تشرب لك لبن رايب .. انا ماقدرت سويت

لي اكل .. علا اللبن الرايب قاعد ..

في باقي عصيدة النجيبو لي عمي. واملحها ليهو .. اب خوسة قعد محتار ..

قال ليها انتي يا النسيم مشتهية امك؟؟ .. قالت ليهو لالا يا الغالي .. انا

امي كانت معاي الخميس الفات ده ..

الزول طبعا" حيرتو زادت .. وماعارف البقولو .. قال كدي النمشي اوديها

اهلها .. اشوف البحصل شنو .. شرب ليهو كورة لبن رايب

وقام شدا ليها الحمارة .. وقال ليها اركبي وتعالي وراي .. غشى ليهو

جماعة كدي من نفس الحلة .. وركب حمار منهم .. ومشو الاتنين مع بعض ..

كل واحد فوق حمارة .. وفي الشارع يسأل فيها وهي بتقولو بس لامن

نصل اهلي .. وبقت ساكتة. لامن وصلو البيوت بتاعة ناس ود دار الزين ..

وكت وصلت البيت زادت زيادة في البكا .. وكلو كلو ماقدرت تمسك روحها

من البكاء .. التاية قالت ليهو انت يابخوسة؟؟ النسيم شن سويتلها؟

قال ليها والله تراها قدامك .. أساليها .. النسيم قالت لي امها .. وحات

الخلقني يمه .. ها الراجل القدامك .. سوا لي شيتا" الرجال مابقدرو

يسووهو لي حريمهن .. احترمني .. وعزاني .. ورادني .. وختاني فوق

راسو .. ولابكسر لي كلمة .. ولا بفضل روحو علي .. ودعتو لي الله .. محل

مايقبل ..

علا يمة .. انا بدورو يطلقني الليلة قبال بكرة ..

قالت ليها يابت يابت اسكتي خشمك بالتحشا ليك واطا .. ابخوسة وكت سمع

كلمة (علا بدورو يطلقني) ترتح كدي لاورا .. وقال لالا يا النسيم .. قولي

كلام غير البتقولي فيهو يا النسيم .. انا كان فارقتك تاني مابعيش ..

قالت ليهو لا لا بتعيش .. وان شاء الله ربنا يديك بت الحلال .. ويديك طولة

العمر وتقعد لي امك وابوك اخيتك الرسالة .. طوالي مرق من باب الحوش

الكبير .. والتاية تنادي فيهو .. هوي يا ابخوسة .. تعال ماتسمع كلام

المطرطشة دي .. وهو مارق كدي .. لاقاهو ودار الزين داخل لاجوة ..

قال ليهو ابخوسة؟؟؟ حبابك حرم .. اازول نعل مافي عوجة؟؟ جيتك نصت

نهار دي .. ومالك مطير عيونك كدي ومخلوع؟؟ ..

ابخوسة قاليه. ادخل لاجوة شوف بتك بتقول في شنو؟

قال ليهو بتي مالا كمان؟؟ ..

ادخل انت لاجوة يابخوسة اتفضل اتفضل بتي خلها علي .. دي مبوجناها

امها .. (مدلعاها) ..

اول مادخل وسلم عليها النسيم قالت ليهو يابا .. الراجل ده ماهو فاطر ..

النسويلو فطور وانضم معاك .. امها قالت ليها بسويهو ليهو انا اقعدي

انضمي مع ابوك .. قامت التاية تسوي الفطور .. والنسيم قالت لي ابوها

يابا .. انا بدور اطلق ..

قال ليها يابت انتي مهوسة؟؟ ولاعندك شيطان في راسك ده؟؟ .. التاية

من جوة قالت ليهو بس ياهو كلامك يا الحاج .. سوقها وديها للشيخ ده ياهو

العمل النجس .. مسوين لها عمل .. ياهو ذاتو الكان عند نعمة الله بت

محمدين .. داكي الليلة كانت مابيه العبيد.. واتعالجت والجن الفي راسها كلو

مرق .. ورجعت متل المافي شي ..

ود دار الزين قال ليها عليك الله يا التاية اسكتي .. خليني النفهم من البت ..

وقبل على النسيم .. قال ليها انتي يا النسيم .. الراجل ده قعدتي معاهو

كم ؟؟؟

قالت ليهو تمانية شهور والبهل ده التاسع ..

قال لها اها شفتي منو شين؟؟ .. قالت ليهو حاشاهو .. والله ماشفت منو

غير الخير الطيبه ..

قال ليها طيب مالك يابتي؟ .. قالت ليهو بس اختار واحد في الاتنين .. يا اما

يطلقني هسع .. ولا بقوم اطش من البلد ليلا" دامس ..

قالها والله عاد .. كمان دايرة تسويلك فضيحة لي ود دار الزين .. بعد الحال ..

قالت ليهو خلاص .. بغز السكين دي في قلبي .. وحات الله انا مابكضب ..

ود دار الزين سلا ليها السكين من ضراعو .. قال ليها هاك غزيها في قلبك

النشوف .. مسكت منو السكين .. من هنا ابخوسة جا جاري .. وخطف

السكين من يد النسيم لامن انجرح .. وقال ليهو ياود دار الزين .. ماتسوي

لك ندامة لي عمرك .. النسيم مابتكضب وبتغز السكين بصح بصح .. انت كان

شفت بكاها الصباح بتعرف ..

وابخوسة عاين للنسيم كدي وقال ليها اسمعي يا النسيم انتي طلقانة ..

اشهد يا ود دار الزين انا النسيم طلقتها .. وعفيت منها لوجه الله ..

وحرمانات علي الحريم بعد يا النسيم .. ودعتكم الله ..

ابوها قال ليهو خير يا ابخوسة .. لكن انت اتعجلت قبال انا افهم شي .. قال

ليهو مابتفهم منها شي .. شيتا" ماقالتو لي انا ما بتقولو ليك انت ..

انا بحنس فيها طول الشارع .. توريني الحصل عليها شنو؟

النسيم قالت لي اب خوسة والله يا الغالي .. انت حريم الدنيا ديل قاسي

عليهن يجيبن متلك .. وانا كان ماها قسمتي .. اعيش عمري كلو خدامة تحت

كرعيك ..

ود دار الزين خاتي ايديهو فوق راسو .. من الشي الشايفو قدامو .. وماهو

قادر يفهم الحاصل شنو اصلا ..

ولو في زول حكى ليهم انو النسيم عملت كدي عشان كيت كيت

مابصدقوهو .. ليه؟ لانو اصلا الامير مابجي في المناطق دي ..

لكن بس الليلة جا قاصد الصيد ..

ابخوسة طوالي طلع وطلق الحمارة .. وربطها في السرج بتاع الحمار حقة

الجماعة .. وركب فات وودار الزين يحنس فيهو .. يازول ماتفوت الزاد جهز ..

وهو ماقادر يتكلم ولاقدر يتلفت علي ود دار الزين .. وود دار الزين عرفو

متأثر ومتالم ... ابخوسة مشى بي جوعو .. ولاعندو نفس يدلي ليهو لقمة ..

اول من مرق من حلة ناس النسيم .. قال

الليلة البلد مسخانة قالبه عيونا.

كاتماهو الوجع جابت سموم قهبونة.

سكين صالتة هردت كبدي ساويه فنونا.

من فرق الحشيمة الفي قفاي مضمونة.

.. انا ياربي ماباريت خمالة الخمله ..

ولا همبته يوم حق الرجال بي حمله ..

ماشال قلبي من شر كان قدير النمله.

غطيها النسيم بي توب ضراك موشمله ..

وصل البيت وهو في اسوء حال .. ده اليوم الاول .. انتهى على حسب عداد

ايام الامير الجاي بعد سبعة يوم .. ومافي زول عارف السر ده .. غير الامير

وحراسو والنسيم براها .. وابخوسة محتار في السبب الخلا النسيم تاخد

الموقف ده شنو؟ .. بس شغال يدوبي وينوني ..

اها وكت وصل البيت امو قالت ليهو .. وين النسيم ياعمر؟ .. قال ليها

.. النسيم خلاص يمه .. عيشا معاي اظن تمه .. خلتني ومجافيه ومابيه لي

ضمه. .. النسيم طلبت الطلاق واديتا ياهو ..

قالت ليهو .. اظن البت تكون مسحوره .. بلحيل النسيم منظوره .. عين

الحاسدين بتزورا .. مالك ماصبرت وجيت .. وخليت الامور مستوره ..

قال ليها لالا يمة النسيم قالت ولا الطلاق ولا الموت .. وانا خليتا وماسك

في الله .. يصبرني ويجبرني .. يعظم اجري ويجبر كسري ..

الرسالة سمعت الكلام من جوة جات مارقة .. وقعدت تبكي .. قالت ليهو ولا

تجيب لي النسيم زي ماسقتها .. ولا توديني ليها اقعد معاها ..

انا بعد الله اداني اخت .. شلتوها مني؟؟ ..

ابخوسة مسك الرسالة .. وقعدها جمبو .. وقال ليها ياولادة الكبر .. يا

المفطومة على الصبر .. انا جرحي اوجع من جرحك .. وماعندنا غير الرضا

بالمقسوم ..

.. وكلم ابوهو بالحاصل .. وابوهو قال ليهو البسويها الله علينا كلها مرضية

.. بالاختصار ابخوسة كان محطم بي طريقة اصلو مامعقولة ..

ومرت السبع يوم دي زي السبعة سنين .. وابخوسة لابنوم ليل ولانهار ..

والنسيم بي غادي قالبة البيت مناحة .. وبكت فوق ابخوسة جنس بكا .. من

عجايب مابكت النساء ازواجها ..

ونضمت جنس كلام .. وعنت جنس غنا .. الناس لاقريب ده حافظنو .. قالت ..

واوجعي الدفين يا دود مراقد القيف ...

ياابعاج الاصم هيبه وامان للضيف ..

اكان مو حظي يمشي وتاني عادتو يقيف ..

دحين بختر وافوت دار (اب جلاجل) كيف؟؟.

اب جلاجل ده الثعبان ابوجرس ..

وقالت .. ياوجعاتي المابتحوّل .. انا شايلاك بالسيح واتجوّل .. وينو اب كم

المابتقوّل؟ .. حتى الموت جافاني وطوّل .. ..

مرت الايام .. يا الله .. حسبنا الله ونعم الوكيل .. فعلا طعم الظلم مر .. بعد

اسبوع تمام .. من الصباح الامير وصل لي بيت ابخوسة على حسب

مواعيده بالدقة والقية .. وسايق معاهو جماعتو التلاتة وراكبين حصينهم ..

مالقى اي زول غير الحجاج الاتنين .. المراة وقفت ليهو علي حيلا.. وعرفتو

ده من الاسرة المالكة ..

قالت ليهو حبابك حباب الملوك اهل الدار واسيادنا .. قال ليها دي دار منو يا

وليه؟ قالت ليهو دي (وشاش الحداد ابوعمر) .. قال ليها وينو وشاش

ده؟ قالت ليهو ياهو الراجل الكبير الراقد قدامك ده ..

الامير نزل من حصانو .. وواحد من الحراس نزل مسك منو طرف اللجام ..

وهو مشى على الحاج لكزو بي كراعو كدا .. قال ليهو قوم يا عجوز؟ وين

عمر ولدك؟؟ .. الراجل فتح عويناتو .. اظنو كان مدومس .. قال ليهو عمر

ولدي مرق على الخلا؟

قال ليهو وينا النسيم؟ قال ليهو النسيم؟؟ النسيم شن بدور بها .. وانت

منو وبتعرفها من وين انت ..؟ قال جاوب قبال اكمل لك رويحتك دي ..

المراة قالت ليهو جاوبو ياب عمر ده من السلاطين .. قال ليها اي شايفو

ومنو البظلم الناس ويقل ادبو على الكبار غير السلاطين .. الامير قال ليهو

.. يا جنازة ماتجاوب ..

قال النسيم عند اهلها ولدي طلقها .. وخلاص بقت ماها مرتو .. ان بقى

عندك معاها اتفاق .. امش لها عند اهلها ..

طبعا" هنا الام والاب .. فهمو انو الامير لاقى النسيم في حتة .. واتفق معاها

تلق راجلا .. لكن وين ياربي ؟؟؟

والامير ركب ومشى على بيت ناس ود دار الزين ..

بعد مافات بي اقل من نص ساعة تقريبا .. ابخوسة جا من الخلا وجاب

حطبو .. امو وابوهو حكو ليهو الحصل .. قالها خلاص يمة معناها النسيم

لاقاها الرمة ده .. ومابخليها تاني الا بالدم .. انا بعرفو من زمان .. ده لعنة

القصر .. لكن انا وحات الله الخلقني اكان ماطلقتها .. الا اموت حتى يسوقها

مني .. لكن هسع خلاص تاني ماعندي خشم انضم .. بعد اديتها حبلها ..

امو قالت ليهو داير بيها شنو؟؟ .. طلقتك عشان تعرسو هو وتبقى اميرة ..

انت عندك شنو يا الحطابي المقطع .. قال ليها لالا يمة النسيم مابتسوي

كدي .. الملعون ده بكون جبرها جبر .. لكن الله في .. وانا والله ان بقيت حي

في الدنيا .. الكلب ده مابخليهو .. بكتلو وبريح الناس من شرو .. وبعدين

البحصل يحصل ..

وهسع مشى لي ود دار الزين؟؟ .. امو قالت ليهو اي ظنيتو .. لكن ماني

عافية منك كان لحقتو .. قال ليها ابدا يمة الحقو لي شنو؟ وبياتو حق ؟؟

ود دار الزين راجل وبتو عندو .. تاني انا مافي يدي حاجة .. ولاعندي حق

الحقو بيهو ..

بس قولي ان شاء الله النسيم ربنا يحفظها .. بماحفظ به يونس في بن

الحوته ..

هناك الامير وصل الحلة .. وضرب الباب بتاع ود دار الزين .. ضرب بتاع

سفاهة وقلة ادب .. وتعال شوف ..

الى اللقاء ..