الفصل السابع

الرسالة .. قاعدة جوة خاتة الصاج حق اللحمة وشغالة .. والنسيم جهزت

المرارة .. وكوركت في لي اب خوسة .. هوي .. هاا عوووك ...

طوالي جاها شال المراة .. وقال للرسالة انا جاييك في غرد دايرو منك ..

قالت ليهو حبابك وليك عويناتي ..

مشى اخد معاهم قعدة .. وجاها راجع .. قال لها .. شفتي الراجل القاعد برة

مع ابوي ود دارالزين دهيا الرسالة .. قالت ليهو اي بعاين ليهو ترا شايفاهو

اها شن خبرو ؟؟

قال ليها قبال عرسي بالنسيم .. كان في راجلا" عجوز متشربك فيها ..

والزول ده قال لي انا بفكو منها .. وابقالك سبب في عرسك .. بس عندي

منك غرد تديني ليهو .. اناقتلو اكان درت نوم عيني .. بديك ياهو ..

اها هسع جاني قال لي بدور اخد الرسالة ..

وهسع الكلام عندك شن بتقولي؟ .. قالت ليهو عاد انا عندي قول؟؟ بعد

قولك يا خوي؟ انت راسي وانت كرعي .. البتقولو بسويهو .. اكان قلت لي

ملي راسك ده .. في النار دي بملو ..

قال ليها والله ياها الكنت حاريها فيك .. كلام مافي ..

النسيم قاعدة تسمع .. النسيم قالت ليهو خلاس انت امش .. اقعد معاهم

شوية .. وما تديهو الموافقه .. لامن تجيني راجع ..

قال ليها لشنو يا النسم؟ .. قالت ليهو قت لك كدي بس انت ماتابا كلامي ..

قالها .. سمع النسيم اجيك بعد شوية ..

قالت ليهو لالا اخد قعدتك تب .. لامن الاكل يجهز .. فات مستغرب طبعا ..

وماهو عارف النسيم عندها فكرة في راسها ..

بعد مرق .. النسيم قالت للرسالة .. انتي يا الرسالة الراجل ده شفتيهو

تب؟؟ واتاكدي منو؟ قالت ليها شفتو.. اشوف نبي الله .. ترا بعاين كبير

وقبيح .. لكن عاد اقول شنو؟؟ دي قسمتي وكلمة اخوي .. ورمت ليها

دمعتين زي اللؤلؤ في خدودها الغضة البريئة .. النسيم قامت مسحت ليها

دميعاتها .. وقالت ليها اصبري انا بمرقك وامرق اخوك .. قالت ليها عليك يا

النسيم بتقدري؟ قالت ليها اصبري شوفي براك .. صبرت لامن جاها اب

خوسة داخل في التكل .. قالت ليهو الرسالة ماها دايرة الراجل ده .. لكن

ماها دايرة تكسر بي خاترك .. قال ليها والله يا النسيم انا براي ماني دايرو

ليها .. لكن عاد الراجل مسكني ايدي البتوجعني .. قالت ليهو انا بفكو منك

..اكان مافكيتو منك ما اكون النسيم بت ود دار الزين .. هو اسمو بلا

البامبي .. اسمو العديل منو قلت ؟؟ قاليها اسمو عبدالباقي ودابرق ..

قالت ليهو امشلو وقولهو .. اديناك .. وباركلو وتعال .. وتعال لي راجع ..

وفعلا مشى اخد ليهو قعدة .. وقال ليهو يا عبدالباقي .. نحن اديناك تب ..

ابوي مشى الكلمة والرسالة مشت الكلمة .. مبروك .. وربنا يتم على خير ..

وجا تاني للنسيم قال ليها اها ..

النسيم اتبلمت بي توبا .. ومرقت على الضيوف قالت ليهو .. يا عمي عبد

الباقي بدور لي معاك كلمتين .. وساقتو مشت قريب الراكوبة حقة الحاجة

ام عمر ابخوسة .. وجرت العنقريب على الضل وقالت ليهو اقعد .. وهو

متلفع بي توب .. وشايل ليهو عصاية متر ونص .. قعد في العنقريب وهي

نزلت التبروقة المعلقة (برش الصلاة) وختتها قدامو وقعدت اتربعت فيها ..

قالت ليهو .. انت في مقام عمي اخيييي .. ابوي نعمنك من زمان بسمعبك

عندو .. دحين انا طالباك بي الله طلب .. وغردا بدورو براااي .. بس ماطلبتو

منك قدام الرجال .. عشان عارفاك مابقمحني .. (يعني تردني خايبه) .. قال

ليها قولي يا النسيم البتقوليهو انا بنفذو ليك .. قالت ليهو فوقك نَضُر؟؟؟

يعني (بتوعدني؟؟) .. قال ليها ايا حرم .. قالت ليهو البنية تبكي .. ومي

دايره العرس .. ووافقت عشان ماتكسر كلمة اخوها .. دايراك بس تديني

وكتي معاها .. انضم معاها .. واحولق فوقا بي جاي وبي جاي .. لامن براها

ترضى .. سيد بيتي قال .. العلماء قالو .. البنية كان مارضت عرسها حرام ..

قال ليها دي حقيقة يا النسيم .. وانا طلبك بنفذو .. وهسع تب ماني جاي

عليها ..

قالت ليهو البت هسع صغيرة. وماها فاهمة شي.. ومافي زول علمها ..

وانا براي دابي جيتهم .. داير ابل فيها شوقي .. واعلمها امور الحريم .. قال

ليها اها يا النسيم يابتي.. اديك كم من الوكت؟ قالت ليهو .. كان حولين كان

تلاته (سنتين تلاتة) .. قال ليها لكن ماهن كتار علي .. ؟؟ قالت ليهو ماهن

كتار .. وقول اريتا ترضى ..

قال ليها اريتا ترضى .. سكتت مسافه وقالت ليهو .. بس انت ماتقول لابوي

ولاتقول لي سيد بيتي الكلام ده .. الرجال باركولك ..

انت قولهم داير لي وكت شوية.. وبرجع لكم .. وماتحدد وكت .. عشان الشي

دا مومعروف .. انت راجل ضو قبايل .. وانا مالية يميني منك .. وكت جيتك

عارفاك ..

قال ليها والله يا النسيم بعد قعدتك قدامي وكلامك ده .. ان بقيت قمحتك

يبقى انا ماني راجل .. قالت ليهو واناطمعانة في كرمك اكتر من كدي ..

قال ليها اكتر من كدي اسوي شنو يعني؟

قالت ليهو صاحب العقل يميز .. سكت مسااافة .. وفهم قصدها ..

قال ليها سمح براك بتشوفيني ..

ود دار الزين وابخوسة قاعدين يعاينو ليهم بنضمو لكن مون عارفنها بتقول

ليهو في شنو .. وددار الزين سأل ابخوسة قال ليهو والله النسيم بقت

شديدة ولضيضة .. قلت لي هسع بتقنع فيهو يغير رايو؟

قال ليهو والله مابعرفها .. بتقول ليهو في شنو .. النشوفو بعد يرجع ..

اها النسيم قالت ليهو النقوم الحق الاكل الرسالة براها ..

قامت مشت على التكل .. وبامبي جاء قعد مع الجماعة .. ود دار الزين قال

ليهو قالت ليك شنو البت دي؟؟ قال ليهو شن ليك بيها .. (مالك ومالا) ..

بتي ونضمت معاي .. وانا عمها .. وهي كان دايراكم تعرفو .. ساقتني

براي؟؟

سكت مسافة وقال ليهو يا ابخوسة .. والله ياخي انت راجل ووفيت بوعدك ..

ونفذت طلبي تب ماقصرت لكن انا براي .. الموضوع ده قلبي مادارو .. ان

شاء الله البت تجيها قسمتها .. انا نزلت من ضهرك تب ..

اهااالاكل جاء والجماعة ضربو في اللحم لامن شبعو فضلة خيركم .. وفي

لقمة عصيدة بي ملاح ويكة .. مقلوبة فوق صحن طلس ابيض .. والملاح

كابنو في قرعة .. غايتو حياة لذيذة .. ياسلاااااااااام ..

واتونسو بي الامور السياسية .. وبتكلمو عن مشاكل القصر في الممكلة

والمكايدات الحاصلة في الزمن داك .. وقاموا ودعوهم

وود دار الزين ادى بتو منديل مصرور فيهو شي .. مو معروف شنو ..

بالنسبة لي ممكلة سنار كانت مملكة بمثابة خلافة اسلامية .. باسطة

سيطرتها على نطاق واسع ..

كانت في منافسات شديدة على سلطة الككر والطاقية ام قرينات ..

والدسايس شغالة داخل القصر .. وفي غرف السلطان والاميرات .. والناس

كلها مارضيانة من الوضع الحاصل في البلد .. الملك ضعيف وولدو سفيه ..

وهو الباقي الوحيد من اصل اربعة اخوان سممتهم امهم .. والملك ما داير

يوصي لاولاد اخوه .. وربنا يجيب العواقب سليمة ..

اها يازول مرت الايام والحياة في بيت ناس عمك ود دار الزين ماشة في

امن وامان .. والنسيم جسمها رجع زي ماكان واحسن .. حيث الخلايا الجديدة

انضر والمع .. وبقت بعد العرس اية من ايات الله ..

بعد مرور 8 شهور والنسيم عايشة في بيتها احسن عيشة وناس البيت

بحبوها حب منقطع النظير والراجل الفحل الضو ابخوسة سعيد سعادة

لاتوصف .. راضي بي وضعو وماكل وشارب وعالف وساعي

والنسيم بتحبو حب مبالغ فيهو .. وكل يوم الحب بينهم يزيد ..

ولكن الفرحة لاتدوم كثير اصلا .. وكان الدنيا بتحسد الانسان في الفرحة

والسعادة .. طبعا من الصباح البرنامج انو الرساالة بتمرق ترعي البهايم

لغاية نص النهار كدي وتجي ومابتبعد من الحلة كتير .. واب خوسة بمرق

يجيب الحطب ويوزعو على الحلال .. ويوم يكون في سوق بوديهو السوق

الا السوق اسبوعي ..

والنسيم بتمرق تجيب الموية من البير .. بتشيل صفيحة ومرات تشيل القلة

وتتوقى بي طرحة .. يعني (تلف الطرحة في شكل عمامة صغيرة وتختها

فوق راسها عشان تخت فوقها ماعون الموية .. لانو المسافة من البير للبيت

بعيدة شوية .. وتجي تسوى الاكل وتقوم بي شؤون الابو والام ..

اها يوم من ذات الايام النسيم لبست توبها واتوقت بالوقاية ومرقت على

البير والكلام من الصباح .. شافت لها اربعة انفار جاين راكبين حصين .. تلاتة

حصين سود وحصان واحد ابيض .. الراكب الحصان الابيض جاري قدامهن

واحد بيمينو وواحد بشمالو وواحد وراهو ..

وجو من بعيد قاصدين البير .. النسيم ظنتهم دايرين يسقو حصينهم .. وكت

وصلو هي كانت بتنشل وبتنوني .. وهم وقفو بعاينو ليها ..

مرقت الدلو من البير .. وكبتو في قلتها .. وكانت عرقانة ..

وهم واقفين بالناحية الشرقية .. عاينت ليهم كدا ومسحت العرق من جبهتها

.. وشها ده زي قعة القمر .. الراكب الحصان الابيض نزل جا ماشي عليها ..

لابس لبس رهيب جبة وعليها عباية وفوقها ركامة مشغولة بالرقاش ..

قال ليها انتي منو؟ وبت منو؟ وجاية من وين؟

انتي انسية ولاجنية؟ انتي عايشة في البلد دي وانا ماعارفك؟ قالت ليهو

انت منو؟ قال ليها انا الامير فلان ود الملك فلان .. ملك ممكة الفونج ..

وسلطان سنار .. انا ولدو الوحيد .. قالت ليهو والمعاك ديل؟ قال ليها ديل

حراسي .. قالت ليهو اتفضلو علي البيوت سيد البيت مرق وبجي .. النكرم

مثواكم .. قال ليها لالا انتي تكرميني انا بس وهنا وهسع .. ومسكها من

يدها قالت ليهو هوي هوي .. وحات الخلقني يجي راجلي الا يقطع راسك ..

ماتقول لي ود الملك .. انت ماك عارف انا بت منو؟ انا بت ود دار الزين ..

المابياخد بالدين.. وفي الديوان الملكي عندو رايا" زين ..

قال ليها وانا ماك عارفاني ود منو؟ انا ابوي السلطان.. سيد الديوان ..

ابوك قدامو زي الجعران .. واسمعي انا انا باخد منك الدايرو .. وبمشي

وكت يجي راجلك .. كلميهو خليهو اليجي يشكيني في القصر .. النشوف

البموت منو انا ولا هو.؟

واحد من الحراس قال ليها يابت هوي .. انتي قنعانة من راجلك ولاشنو؟ ..

يابت خلي الامير ياخد الدايرو ويمشي .. ولا ده شاف لا سمع .. والامير

ماسكها من يدها وعرفت انو الوضع فعلا خطير وفيهو موت لي اب خوسة ..

لانها سامعة بالظلم الحاصل في المملكة واستبداد الامراء على الناس ..

قالت ليهو خلاص كويس تعال جاي .. ديل مايسمعونا النقول لك كلام ..

انت ذاتك انا شايفاك راجل تملا العين لامن تفضل .. لكن ماني دايراك

بالحرام. دامني عجبتك ومليت عينك .. خلني ابقى مرتك ..

انت تسعد وانا اكون مراة الامير .. نسبي حر .. وابوي من اهل الشورى ..

انت بس اصبر لي انا اطلق الراجل ده .. وانت تعال اخدني ..

لكن والله تحاول فيني بالحرام .. انا اقد قلبي بالسكين .. واشكيك على الله

يلعنك لعنة لامن تموت بي حسرتك .. اخير لك الحلال .. واكون معاك طول

عمرك ..

قال ليها خلاص موافق .. لكن والله تغشيني ,, انا براي اجي اكتل راجلك

واسوقك قدام اهلك .. قالت ليهو انت مابتخاف من ابوك الملك؟

قال ليها ملك شنو؟ ابوي عجز خلاص .. وانا هسي العندي الكلمة عليهو هو

ذاتو .. انا والله بسوي الدايرو .. وابوي يقول حاضر .. انا ولدو الوحيد .. وانا

وريث الككر .. (الكرسي) اسعلي ابوك من الكلام ده .. انا قبال شهر سقت

لي بت من اهلها وكتلت ابوها وقضيت منها بعد اسبوع بعناها مع الرقيق ..

والنسيم مطيرة عيونا وتعاين ليهو .. قالت ليهو خلاص بعد تعرسني انا تاني

مابخليك تقبل على مراة .. انا يادي. عروس لي تمانية شهور .. قال ليها

خلاص انا بعد دور تمانية يوم .. بجيك وكان لقيتك طلقتيهو بسويلك عرس

ملكي وابوك يكون اسعد مخلوق .. وان لقيتك ماطلقتيهو .. بس اقنعي منو

والله اقطع لك راسو واختو ليك في طرفك .. وركب مشى ..

الى اللقاء