الجزء 13

ي بنات انتو بتعرفو تطبخو ! ؟

نون عاينت لئ آمال وآمال عاينت ليها والاتنين قالو : اااي

المرة : طيب تعالن ...

مشو عليها وقالت ليهم : اسمي هناء .. والليله عندنا عزومه لي ناس مهمين .. عايزأكم تساعدوني

نون وآمال : ما عندك اي مشكله ..

دخلتهم المطبخ واتخلعو خلعه عجيبه لمن شافو المطبخ !

ياخ شنو الما فيهو ! ؟

مسرمك ونضيييف ! آمال لمن ريلت لما شافتو

نون : امسحي الرياله دي وم تفضحينا يقولو نحن خمجأنات ...

آمال : انتي م شايفه ي جن !"

نون : شايفه بي اعمل شنو غير اعاين واسكت

مع انو خبرتهم في الطبيخ قليله بس كمان بعرفو لحاجأت الاكل كويس .. واكتر حاجه نفعتهم قعدتهم مع دنيا خلتهم يتعلمو حاجأت كتار ..

هناء اتكيفت منهم ... وهي طالعه من المطبخ سمعو صوت واحد بقول : ي سلاأاااام " الليله خالتي حسينه خطفت الانوف والعقول ... وطوالي توووشك دخل المطبخ وهو بقول : الليله القارض هجم ي حسونتي ..

كلهم اتفاجأو لما شافو بعض !

لانه الواحد دأ كان خالد !

خالد اتفاجأ واتخلع ...

بس م قال حاجه غير كلمة السلام عليكم ..

بي وراهو طوالي وقبال ما يردو السلام تاني واحد جأ جأري وهو بقول : حسونتي قلبي الكنترول هجججم ! لملمي مواعينك حأنتهي منو ...

نون اتفأجأت بي شوفتو لانو ما كان الا عمر !

الحكايه وضحت للكل ...

نون م قدرت تتكلم ... عمر نطط عويناتو وكان عايز يقول حاجه بس خالد مسك ليهو يدو

عشان كده سكت ..

هناء : حسينه عيانه والبنات ديل جأراتها جو يساعدونا عشان العزومه ...

خالد ساق عمر وطلعو من الغرفه ..

بعد اليوم خلصو الطبيخ هناء طلبت منهم يساعدوها في التقديم وكده . المهم خلصو معاها اليوم وطلعو قريب للمغرب ..

وهم في الطريق مافي واحده اتكلمت مع اختها .. صمت رهيب قطعو صوت العربيه الوراهم ... زحو ليها من الطريق بس هي وقفت قدأمهم ..

القزاز نزل و كان خالد : اركبو اوصلكم

نون ولا لفتت عليه

خالد : اركبو قلت ليكم عايز اقول حاجه مهمه ...

بي الله وجلاله نون وآمال ركبو معاهو ...

خالد بعد مسافه من الصمت بدأ يحكي : عمر بكون ود عمي .. امو وابوهو ميتين ... يعني يتيم ...

قبل 18 سنه كده عمر كان عمرو 5 سنه وكنا في رحله في النيل .. عيلتنا كلها كانت في يخت العيله ...

عمر كان هو واختو سبا العمرها

7 شهور وامهم وابوهم ..

المهم ... كان عاملين هيصه وكده ... سبا كانت عيانه ... عشان كده م كانت عايزه جوطه ... فااقعدت بعيد من الناس ...

عمر مشي عليها لانو كان متعلق بيها شديد ..

كانو قاعدين جمب الحافه المكان م خطير بالذأت للشفع لانو عالي ..

ما عارف في زول نادأها لي خالتو ندي ... جرت تشوف الحاصل .. بس لمن رجعت لقت سبا مافئ ... فتشنا اليخت كله م لقيناها ... حتي البحر فتشوهو القواصين م لقوها ...

المشكله انو اصابع الاتهام اشيرت لي عمر ... الناس بقت ترميهو بالكلام من لمن كان طفل ... والشي البحرق انو امو جنت و بعد خمسه ولا سبعه سنه كده انتحرت ... هو ما انتحار بس اظن كانت بتفتش لي بتها ...

وبالسبب دأ عمر راسو بقي كيف كيف ... ابوهو عشان عمر م يحس كان بدلعو دلع شديد ...

هسع ابوهو مات قبل سنه تقريبآ .. بس خلا وراهو طأغيه اسمها الكنترول ...