الجزء 13

رهف وملامح وشها متغيره من الغيره والغضب : رد عليها ساكت لي كمان م ممكن

تسكت بعد الكلام المعسول دا .

مراد قرب من رهف : دي ٱريام زميلتي في الجامعه كانت .

ٱريام اتفحصت رهف وردت : عروستك م بطاله ..

رهف عاينت ليها في كراهيه من فوق لي تحت.. م بطاله !!!

مراد ساق رهف وودع ٱريام لكن هي بكل جرآءة : قاعدين هنا كتير .

مراد برد في توتر : ايوه قاعدين .

ٱريام : هههههه اوك اكيد ح نتلاقي تاني .

مشي مراد بدون م يرد وكمان بدون م يعاين لي رهف الكانت بتغلي من الغيره

ومنتظره بتين تنفرد بي مراد واول م قعدو في مطعم حق سمك جميل مصمم علي

الطريقه البدويه اتفجرت في مراد : دي شنو ي مراد البت دي وعلاقتك بيها شنو .

مراد في ارتباك : م قلت ليك دي

قاطعتو وهي م شايفه قدامها من الغيره : اكيد م حتقول لي زميلتي وخلاص والحنك

دا ..

مراد بحاول تخفيف الضيق من رهف : هههههههه كمان بقيتي تقولي حنك .

رهف : البت دي شكلها م مريحني لابسه خليع وخاته الطرحه في الرقبه بس وبنطلون

ضيق دي شنو الاشكال البتعرفها دي .

مراد في حنان : انا عارف مافي ذول حشمه زي حبيبتي هوفا دي .

رهف اتجاهلت كلامو وبقت تعاين بعيد وبعدها : يعني كانت حبيبتك ولا شنو يعني

عايزه افهم .

مراد بدت عليهو مظاهر الضيق : يا روحي انتي مرتي يعني الفات ماضي وانتي

حاضري الآن والمستقبل الآتي .

رهف حاولت تبتسم : يلا نمشي انا تعبانه عايزه انوم .

مراد في دهشه : طيب كملي عشاك .

رهف وهي واقفه : بمشي قدامك الشقه .

مراد : انتظري اوصلك طيب .

رهف : الشقه قريبه بس م تتأخر علي .

مراد في حنان : حااااضر ياروحي .

مشت رهف الشقه واخدت حمام ولبست فستان جميل وفتحت التلفزيون لما مراد

يجي.. مراد حاسب ومتجه للشقه فجآة لقي ٱريام علي الشط وحاول يمشي بدون م

تحس بيهو لانو رهف منتظره وفجأة اتلفتت ٱريام وشافتو وجات عليهو وقفت قدامو :

مرتك حلوه .

مراد : شكرا

ٱريام : لكن قصيره حبه علي م اظن .

مراد يحاول تغيير الموضوع : عملتي شنو في اوروبا .

ٱريام تقرب منو .. علي فكره. انا شلت رقمك من حازم .. وقربت منو اكتر لحدي م حس

بشعور غريب .. عليك الله م اشتقت لي ايامنا الحلوه مع بعض لما كنا بنتلاقي في بيت

حازم

مراد يبعد منها .. لكن انا عمري م عملت معاك حاجه حرام كنت محافظ عليك .

ٱريام : طيب المخليني م قدرت انساك شنو ورجعني من اوروبا لي افريقيا .

مراد : آسف ٱريام لكن رهف قاعده براها وبتخاف لازم ارجع ليها نتلاقي مره تانيه ان

شاء الله.

وبسرعه مد يدو وودعها وانصرف بدون م يسمع ردها وطول الطريق قلبو بخفق

خفقات سريعه ومتوتره وخائفه وما وعي بي نفسو الا وهو بفتح في الباب .

لقي رهف نايمه زي الملاك والتلفزيون فاتح والصوت عالي وبراحه قفل التلفريون وقعد

جنب رهف في حافه الكنبه وبقي يداعب في خصلات شعرها في رقه وحست رهف بي

حركتو وفتحت عيونها

مراد : احلي ملاك والله رهف في عتاب : اتأخرت مالك .

مراد : لاقيت ناس اصحابي في القريه

رهف اتغيرت ملامح وشها : دي البت الاسمها اريام صح ؟

مراد : بصراحه ايوه لكن صدقيني م قعدت معاها .

رهف دخلت الغرفه وبقت تبكي في صمت ..مراد قرب منها ومسح دموعها : حبيبتي

دموعك غاليه علي ارجوك م بتحمل .

رهف : حاسه انو ٱريام دي حتاخدك مني.

مراد في حنان : انا الموت بس ممكن ياخدني منك و

قاطعتو رهف في حنيه : بعد الشر عليك .

مراد : عارفه اكتر حاجه كاتلاني فيك بعد عيونك الفتاكه دي شنو .

رهف مسحت دموعها ورسمت شبح ابتسامه علي وشها : شنو

مراد : حنيتك وخوفك علي وغيرتك الجميله دي .. وجمالك الفاتن وقوامك وشعرك

وكلامك واسلوبك واي حاجه وكل حاجه.

رهف قربت منو وختت راسها علي صدرو وبقت تحكي عن حبها ليهو... ومره يتذكرو

زمان اول م مراد طلب منها الزواج وبقو يضحكو لحدي وش الصباح وبعدها راحو

الاتنين في سبات عميق

في منزل لطيفه

طارق مهموم وحزين والنوم مجافي عيونو

لطيفه : طارق مافي حل غير تبيع البيت وتحل ديونك .

طارق مدنقر راسو : كيف ابيع بيت رهف وآخر حاجه فاضله ليها من ورثه ابوها .

لطيفه : انا متأكده من بتي قلبها طيب وحتوافق خاصه لما تعرف انك ضامن ذول

وشرد والشرطه حتمسكك انت الي حين السداد .

سكتت لطيفه وبعدين واصلت : هي جايه الليله من الشرق واكيد حتجي تسلم علي

امها وطوالي بفتح ليها الموضوع .

منزل حازم

حازم لابس حلو وانيق وكمان متريح بي ريحه فواحه ..ايمن واقف يعاين ليهو في

دهشه الليله زيزي جايه ولا شنو ؟؟؟

لكن لا لا زيزي م بعملو ليها دا كلو .. كدي خليني اخمن...

وفجأة رن جرس الباب ومشي حازم في سرعه عشان يفتح الباب ولقي ٱريام وكانت

لابسه بنطلون وتي شيرت وفاكه شعرها وعامله مكياج ذاد من جمالها وعطرها فايح

مالي اركان الشقه ..

سلم عليها حازم في فرح وكمان ايمن وقعدت في الهول وخلفت رجلها ومشي ايمن

عشان يجيب ليها مشروب وسألت عن مراد لكن ايمن رد ليها في سرعه : صحبك دا م

عارف المشبكو في المره دي شنو

ٱريام حاولت تدردق ايمن في الكلام واستغلت انو شارب وعرفت مشكله مراد مع مازن

وجريمه القتل وطلبت من حازم يساعدها عشان تسترد حبيبها من رهف لكن رفض

وايمن كمان رفض وقررت تخوض الحرب وتكسب كمان وعرفت نقاط ضعف خصمها .

😳😳😳😳😳😳😳😳😳😳

سلمت رهف علي امها في حراره وجابت ليها هدايا وحاجات حلوه وبعدها حكت لطيفه

قصه طارق وبدون تردد وافقت علي الفور وبدا طارق بعمل اللازم .

ضربت رهف لي مراد عشان يجي يرجعها البيت ودي كانت رغبتو لكن جرس كم مره

ومافي رد واخيرا قررت تركب تاكس وتجي براها عشان الوقت اتأخر نزلت جنب البيت

وفتحت الباب بي نسخه المفتاح المعاها ولقت الانوار مولعه وبقت تنادي مراد .. حبيبي

وين انت وبعد شويه جا مراد طالع من الغرفه ولما شاف رهف لونو بقي اصفر