الفصل السادس

التاية قالت ليهو .. يا شيخنا الراجل ده تاني ماصح اعيش معاهو موكدي؟ ..

الشيخ قال ليها كيفن مالو؟ .. قالت ليهو انا سمعت بقولو .. الراجل اكان

شك في مرتو .. بتحرم عليهو ..

قال ليها مافي كلام من ده في الدين .. الا يصل درجة اللعان .. والادلاء

بالشهادات قدام القاضي .. لكن الشك والظن العادي .. مابصل درجة التحريم

.. ده كلام قاطعنو الناس من راسهم ساكت ..

ود دار الزين قشقش دميعاتو. وقعد على حيلو .. قال ليها والله يا التاية ..

انا اصلا ماشفت عليك شر .. على الخصوص في حملك بي بتي النسيم

.. فشان من عرستك .. مافارقتك لامن شلتي جناك .. بس ياهو كلام الفقير ..

والحجل الملعون ده .. على قول عمي البشير.

الشيخ اب كف قال ليهو انت يا ودرا الزين .. ماحكيت لي الحجل ده جربوهو

في منو قبال كدي؟؟ وحصل شنو؟؟ وعمك البشير بقول ملعون ليه؟

قال ليهو والله ياشيخنا الشي ده سبب جنس مشاكل .. لا ليها اول ولا ليها

اخر .. اول شي على حسب ماحكو لينا ج .. دي كان معرس مرتين ..

حبوبتي ام ابوي بت عمو لزم .. ومراة تانية غريبة من الحسناب .. كانت عنها

بت وولد. واهلنا طلعو فيها اشاعة .. قالو ماها عديله .. (طعنو في

شرفها) .. قامت حبوبتي قالت انا جوني جماعة في النوم .. وقالو لي بنديك

حجل .. بكشف اولاد الحرام من اولاد الحلال ومشت الخلا جابت الحجل ده ..

وقالت لي جدي تشيل الحجل .. تجربو في اولاد المراة .. والبمرض منهم ده

ياهو مو ولدك .. وجدي شال الحجل .. وجربو وطلع ود الحرام الولد .. والبت

طلعت بتو .. قامو اعمامي غدرو بالشافع وكتلوهو .. والام جدي طلقها.

والبت الطلعت بتو جنت من المصيبة .. بعد مدة كدي ماتت .. وامها لحقتها

بعد شهر .. وبقى اي زول يشك في مرتو .. بجي لي حبوبتي ويشيل منها

الحجل .. وحصلت مشاكل .. وحريم اطلقن .. وشفع كتلوهم .. وبعد داك عمي

البشير حبوبتي ادت عمي البشير الحجل وقالت ليهو ادفنو في محل

وماتوريهو اي زول .. ونحن غايتو اتصلطنا لامن مرقناهو ..

الشيخ يسمع في القصة لامن بكى ..

قال ليهو ياود دار الزين .. حبوبتك ام ابوك ان شا الله ربنا يتولاها بي

رحمتو .. لكن رحلت الدار الاخرة بي سيئات متل الجبال .. انت هسع بتكون

فهمت .. انها القصة ماقصة ود حرام ود حلال .. للاسف .. الظلم وقع على

المراة الحسنابية .. وبتها وولدها .. ربنا يمرقكم يوم القيامة من حقهم .. دي

ياود دار الزين .مضاررة ضرات .. الحجل معمول فيهو عمل مخصوص عشان

يسبب المرض لي واحد في الوليدات ديل .. مو عشان ود حرام ولا ود حلال

على حسب الطبيعة. والولد كانت طبيعتو نارية متل طبيعة بتك النسيم ..

ومتل طبيعة الشفع الكتلوهم بالظلم كلهم .. نسأل الله السلامة ..

ود دار الزين قال ليهو عليك الله ياشيخنا .. طبيعة نارية وترابية كيف يعني

.؟ الكلام ده انا موواقع لي ..

قال ليهو يا ود دار الزين .. اصلا السحرة والمنجمين .. مقسمين البشر على

اربعة طبايع. هوائية ومائية وترابية ونارية .. ومقسمنها على حسب

الابراج الفلكية. مثلا يقول ليك ناس برج الميزان هوائية. وناس الحمل

ناريه .. وناس برج التور ترابية .. وناس الجوزاء مائيه .. وطبعا" الكلام ده كلو

تنجيم وكفر في الاسلام محرم ..

اها بقومو يسألو من اسم الزول .. واسم امو .. والشهر المولود فيهو ..

ويشوفوهو واقع في ياتو برج .. وطبيعتو ياتا في الاربعة؟ ونوع الطلسم

البنجح مع الطبيعة دي .. اها ان بقى الدجال مضر .. ببقى السحر يضر ناس

الطبيعة بلا حروف ولاتعيين .. كلهم .. لكن الطبائع التانية مابضرها.. وكلو

كفر في كفر والعياذ بالله ..

عارف مرات يكونو كاشحين عمل تراب قدام بيتك عشان يضرك انت باسمك

وطبيعتك .. يجي يطاهو زول غيرك يضرو .. يجي يطاهو زول تاني مايضرو

.. ده الفرق .. في الطبايع ..

اها ياخوي هسع على حسب حكايتك دي .. الظاهر والله اعلم انو حبوبتك

الله يسامحها .. عملت السحر لاولاد ضرتها .. ودمرت اسرة بالكامل. والشر

اتعدا لي ناس تاني .. كلو بي سبب كضبة الحجل البكشف .. وجهل الناس.

ثم انت بذات نفسك كان ماك جاهل تصدق الفقير البدعي الغيب .. وتصدق

الوهم ده ؟؟

ود دار الزين قال ليهو يا شيخنا معناها يعني انا عادي بنجب؟

قال ليهو ياود الزين ماتبقى راجل جاهل .. الذرية دي بيد الله .. نبي الله

زكريا ربنا وهب ليهو الذرية بعد اشتعل راسه شيبا .. ووهن عظمه .. ومراته

كانت عاقر .. خليك راجل متعلم وابعد من الفقراء والغشاشين ..

ود دار الزين قال والله دابي ضميري ارتاح .. الله يجزاك الخير ياشيخنا ..

وانا والله هسع ما مشتاق لي شي .. غير مشتاق امشي لي بتي النسيم ..

واسلم عليها بالمقالدة. (بالحضن) .. لانها يومها المارقة عروس .. كنت

متضايق منها .. ولاقدرت اعاين ليها في وشيها .. ولاوادعتها ..

وانا ياشيخنا ان شاء الله .. كل يوم سبت .. بجي بحضر معاك حلقة العلم ..

غايتو الحمد لله الجماعة قامو من عند الشيخ الصالح .. ربنا يثيبو الجنة ..

وقامو متراوحين على حلتهم ..

في الشارع بتونسو الاتنين .. ود دار الزين بي جملو العنافي .. والتاتية

راكبة البكرة ام شبرية .. السارت بيها النسيم لي بيتها .. واب خوسة سايق

حمارتو الحمامية المشهورة .. .. التقول بعاين لهم قدامي ..

طبعا التاية متبلمة تب بي دوب الدمور المغزول غزل .. وساكتة ساكت ..

وشكلها لاهسع عندها باقي زعل .. ومحرجة ل .. كن الاوضاع مطمئنة يعني

اها يازول بعد وصلو الحلة .. ناس ود دار الزين (بنزلو) .. وابخوسة لسع

بمشي شرق .. هو ساكن برة الحلة .. شوية في حتة خلوية كدا .. زي ربع

ساعة من ناس ود دار الزين ..

ود دار الزين قال ليهو يا اب خوسة .. انا باكر من الصباح بجيك اشرب معاك

القهوة .. وجاي اسلم على النسيم بتي .. قال ليهو حبابك ياسيد الكلمة ..

واب خوسة وصل بيتو .. لقى النسيم راجياهو في ظل القطية .. اول

ماوصل .. وقفت ليهو علي حيلا .. وجاتو شالت منو العصاية .. وطلعت

الطاقية من راسو. وختت ليهو الوسادة فوق العنقريب ..

وجابت الطش بتاع النحاس .. وكبت فيهو موية وملح .. وغسلت ليهو كرعيهو

.. ونشفتهن بي طرف فستانها حق العرس ..

فستان غالي شديد .. غازلينو في شندي .. وامو قاعدة هناك في ضل

راكوبة التبس حقتها .. تعاين .. قالت ليهو عاد يا عمر ولدي .. ابوك الولدك

مالقى مني الاحترام ده .. عان الجيهه والحال السمح تحمد ربك ياولدي ..

ربنا اداك حسب نيتك ..

والنسيم مدنقرة وتتبسم .. قال ليها الحمد لله يمة .. ربنا كريم على عبادو ..

ان شاء الله النسيم ربنا يخليها لي .. زي ماعرفنا من الوالدة العجوز دي ..

انو ابخوسة اسمو الحقيقي عمر ..

النسيم قالت ليهو يا فلان انا طالبه منك شي .. طبعا" زي ما ملاحظين ..

مابتقول ليهو بي اسمو نهائي .. المراة مابتجيب اسم راجلا لو كتلوها ..

ونسيبها ذاتو مابجيب اسمو .. لمن تجي تناديهو بتقول ليهو ياعمي ..

المهم قال ليها اها يا النسمة طالباني شنو؟

قالت ليهو زح جاي قرب اضانك النقول لك .. قرب عليها واداها اضانو ..

قالت ليهو دروين لاقدام كل زول يبيت "تو" !! .. ههه دي دايره ترجمة .. يعني

.. (لمدة اسبوعين كل واحد فينا ينوم في حتة براهو ..) .. قال ليها تحت

امرك ياسلطانة ..

قالت ليهو تسلم انت ياسيد الرجالة .. المهم فعلا كل زول بقى يبيت براهو

في حتة .. ناس البيت كلهم خمسة بي النسيم .. المراة الكبيرة وراجلا

راقدين في مكان .. والرسالة والنسيم راقين في مكان .. وعمرابخوسة

براهو في مكان بره هناك ببيت قدام مع دوداب الدرب .. (طريق مرور

المواشي) ..

باكر الصباح .. دغش الرحمن .. قام العريس ابخوسة .. وشال فاسو .. وحبالو

وركب حمارتو .. وكبس الخلا يجيب الحطب .. لا شهر العسل ولا لخمة .. ناس

دايرة تكسب زمنا ..

وكت الفطور جاء راجع .. وجاب حزم الحطب المي خمجانة .. الحمارة لامن

بتقنت ..

ونزل الحطب .. والنسيم اتلقتو بي نفس الاهتمام .. ودايرة تجهز الفطور قال

ليها اصبري .. انا راجي ابوك .. ظنيتو يجي يفطر معاي ..

قالت ليهو ابووووووي ياحليلو .. قالك جاي؟

قال ليها ايوة قال لي بجي اشرب معاي القهوة ..

قالت ليهو عاد النقولك .. ابوي جبنتو يامع الشرقة .. يا نصت نهار ..

افطر فطورك ساكت .. واترجاهو اليجي .. بجيك الشمش مع الصنقور ..

(يعني الشمش قصاد نص الراس) .. ههه غايتو النسيم عندها جنس كلام ..

عسل بس .. والحناكيش طبعا" بسطحو ..

المهم فطر .. وانتظر شوية .. عاين من هناك. نفرين راكبين جمال .. جايين

عليهو .. قال ليها يا النسيم؟؟ .. كدي تعالي عايني هناااااك .. ده ابوك. لكن

المعاهو ده منو؟؟ ماعرفتو ؟؟ .. قالت ليهو بري ماعرفتو ..

وفعلا هم شدة مابعاد .. والواطة سخنه.. والرهاب مالي الحتة ..

تعاين ليهم يرجفو .. زي الزول الواقف بي ورا النار .. وجاين ماشين ..

واب خوسة يسوي ياربي المعا ود دار الزين ده منو؟؟

وكت قربو عاين ليهم تاني .. لقاهو ليك ده " بامبي" ..

ابخوسة قال اب اب اب .. انا اخوك ات .. بامبي الليلة جاي من وين؟؟ ..

ازول الزول ده ماقال لي اول عرسك مايتم .. عندي طلب تنفذو لي .. وانا

وعدتو ..

ياربي الليلة جاي يطالب بي طلبو ولا شنو؟

اول ماوصلو .. اب خوسة وقف ليهم على حيلو .. وقالهم حبابكم حبابكم ..

سلامات ومراحب .. والنسيم جات سلمت عليهم .. ودخلت على التكل ..

(التُكُل: المطبخ) .. لكن طبعا بختلف عن المطبخ الان .. كان عبارة عن راكوبة

قش .. فيها صاج عواسة .. تحتوحجار اسمهن اللدايات .. وحلة عصيدة وحلة

ملاح .. وعدة الشاي وعدة الجبنة .. النسيم دخلت عليهو ..

والرسالة قامت نزلت الجمال .. وعقلتهن.. الرسالة عمرها 12 سنة لكن بت

ملحلحة وعودا فارع ومُرْ .. وجابرة وعالية تشوفا تقول بت ..17

ابخوسة قام دخل على البهائم .. عزل ليهو حمل بج (يعني لحمو هش) ..

وشخخخخ ضبحو ..

ود دار الزين .. قالهو.. يازول ده شنو؟ نحن قلنا ليك ناس قهوة وماشين ..

ماعندنا مهلة نرجاها .. قال ليهو يازول دي كرامة .. شكر لي الله الجابكم لي

اها في اتنين اتنين من ولاد الحلة .. مسكو البهيمة شغالني فيها .. سلخ

وتقطيع .. واب خوسة جا قعد مع الضيوف ..

ود دار الزين وبامبي .. طبعا ياجماعة بامبي مسمنو على (البامبي)

الخدار الواحد ده .. الاسمو البطاطس الحلوة .. لانو زول وشو شين ومخفج

كدا .. لكن اسمو الحقيقي عبدالباقي ودابرق .. من العمراب. وعمرو في

الخمسة وخمسين بالتقريب ..

المهم بامبي ده .. قال لي ابخوسة اها يا ابخوسة انا جيتك ياخوي على

مواعيدي .. ووعدك لي .. انا قت لك النسيم.. بمرقا ليك من ود مكتول

.. واسلمك ليها .. ويهدي ماشاء الله قاعدة في بيتك .. انا وفيت لك بوعدي ..

ودايرك توفي لي بوعدك ..

دحين اخوي انا والله بدور الرسالة اختك دي .. وانت وعدتني .. ان بقى

الموضوع من دمك بتمرقو لي موصح؟

قال ليهو والله صدقت .. وانا على الجزيمة احسن منك ماني داير ليها .. علا

عاد الشورة دي ماها عندي .. مادام ابوي حي .. انت بس اخد راحتك وحلل

الزاد .. وانا باخد لك الشورة من ابوي ..

الضبيحة لسع ماجهزت .. لكن النسيم جابت القهوة وجات .. ختتها قدام ابوها

وعمها بامبي .. متقنعة تب ..

واب خوسة دخل على ابوهو .. قال ليهو ابوي في ضيفان جو برة .. قوماكا

ارح عليهم .. وقبال ماتمشي .. عبدالباقي ودابرق من اهلنا العمراب ديل ..

كان بتعرفو .. قال ليهو بعرف ودابرق .. لكن عبدالباقي ده ماعندي معاهو

معرفة مالو؟؟

قال ليهو المهم ولدو يهوده .. وقال بدور ياخد الرسالة .. وهو كان ماخد

مني وعد قبال ..

داير تبر وعدي وتمرر الرسالة ليهو .. قال ليهو اصبر لي النمشي اقابلو ..

واجي اديك راي. لكن ياعمر ولدي .. هسع اختك دي لاهسع جاهلة وامها

كبرت .. كان ساقا مننا .. تاني بنقبل على وين؟

قال ليهو دي ماها مشكلة يابا .. النسيم خلاص بقت بتكم .. والحياة اصلا ماشة

كدي .. بت تمرق من البيت .. وبت تدخل البيت .. والبيت بلا بنوت .. اخير منو

التابوت ..

قام مرق معاهو على الضيوف والراجل الشايب سلم على ودرا الزين ..

وقعد يشكر في النسيم .. وحياها واحترامها لي زوجها ولي انا ولي ام

راجلا ..

ويحكي ويعاين بي طرف عينو .. طبعا الراجل كبير لامن ضهرو محني ..

لكن مرتو اصغر منو شوية .. اصلو الزول مابقول الرسالة بتهم ..

بعد شربو الجبنة .. والشية ريحتها ضربت .. وعطرابتها قاجة .. الشايب قال

لي ولدو ابخوسة تعال ياعمر دايرك ..

ابخوسه قام جاهو .. قال ليهو ياعمر ياولدي الراجل ده كبير تب على اختك ..

وانا خايفها تاباهو .. وبعدين زولا" شين مابتقابل .. وشيهو .. استغفر الله

العظيم ..

اب خوسة قال ليه يابا الكبر مو مشكلة .. انت عرست امي وانت كنت اكبر

منها بي عشرين حول .. والراجل مابعيبوهو بي شناتو ..

الراجل بعيبوهو بي جبانتو وبخلو وقلة ادبو .. وديل كلهن في بامبي مافي

قال ليهو اها كان اختك قالت ماها دايراهو .. بتقدر عليها تجبرها؟؟ الرسالة

قاهرة وقارحة .. قال ليهو والله انا بقدر اجبرها ..

لكن العالم قال .. البت كان جبروها على العرس .. بكون العقد باطل .. وبكون

حرام ذاتو ..

(بالله ياجماعة ابخوسة ده موجود في الزمن داك؟؟ .. يا سبحان الله ..

غايتو زي ماقال الرسول .. عليه الصلاة والسلام .. لاتخلو الارض من قائم

لله بحجة .. اما ظاهرا" جليا" واما باطنا" خفيا" .. كدي النشوف الرسالة

الشافعة القارحة دي بتقول شنو؟ ..

الى اللقاء