الجزء 1

أنا مهاب محمد أبنعوف مواليد 1990 اصلا ابوي من

الشمالية وامي من الجزيرة،لكن نحنا مستقرين في امدرمان

الصالحة،انا اكبر واحد في البيت عندي تاني اخو واحد

اصغر مني بأربعة سنه،انا قريت كل المراحل الدراسية حقتي

في امدرمان اما الجامعة فخشيت جامعة السودان،كلية

الفنون،يعني ممكن تقولو عن رغبة لحب الفن عامة

وخصوصا الكتب والروايات والقصص البتحكي عن العالم

التاني،كنت بفرح جدا لما زول يهدي لي كتاب اكتر من

يديني اي حاجة تانية ......

......لما دخلت الجامعة الحكاية اتطورت معاي وبقيت

مهتم بكتب الجن أكتر من كتب ومراجع الجامعة وبفتش

في المكتبات القديمة عن الكتب دي،،وامي دايما كانت

بتقول لي ‏( يا ولدي الله يهديك من الشي البتسوي فيهو

دا،انت مالك ومال الشواطين ياولدي ،الله قال استعيذو

منهم انت تمشي تفتش فيهم،ياولدي اقرا قرايتك خل

الحاجات البتسوي فيها دي ‏) وابوي كان برد يقول ليها

‏(يمكن ولدك داير يعرس ليهو جنيه يجيبا ليك في حوشك

دا وتسكن معاك ‏) وبتذكر رد امي ليهو ‏( برررري اتحسبنا الله

والرسول ياولدي الكلام دا صح ولا ابوك دا خرف ‏) هههههه

وانا كنت دايما يحاول اقنع امي انو الحاجة دي مافيها

ضرر بالنسبة لي ،الحاجة دي ممكن نعتبرا ياها هوايتي ،في

ناس هوايتهم انو يربو كلاب او خيول او يقرو روايات او

يلعبو كورة،وانا دي هوايتي انو أكون وسط العفاريت

ديل .....

بقينا علي المنوال دا لغاية ما السنة الاولي في الجامعة

انتهت وجات الاجازة ،مشينا الجزيرة لجدو امي قالت نعدي

معاهم الاجازة الصادفت عيد ضحية،مشينا ووصلنا هناك

واكرمونا غاية الكرم،العصر كدة انا خليت ابوي مع ناس

جدو واخوالي يتونسو وقمت طلعت قلت اشوف قدامي

الاصحاب واخد لي معاهم قعدة وحبة حنك كدة،وبهناك

امي في النسوان والونسة والضحك والقرقراب ......

..... مشيت لقيت الشباب متلمين في ميدان الحلة

والدافوري شغال قعدت اتفرجت في الدافوري دا لغاية ما

خلص وجو وقعدنا اتونسنا لغاية العشاء وبعد داك كل زول

فيهم مشي لسبيلو واتفقنا انو باكر نتلاقي الصباح ونعمل

لينا رحلة صغيرة كدة احتفالا بجية العبد لله وتكون مقدمة

لجية العيد الاصلا برامجو بتكون زحمة .......

....... لما وصلت البيت جدو قال لي كنت وين مرقت فجأة

وخليت تلفونك هنا ،،قلت ليهو مشيت علي الشباب في

النادي،قال لي امش امك منتظراك من قبيل ومقلقة عليك،،

في سري قلت أها بدينا ياحاجة،اتحركت مشيت علي

الحاجة بهناك وكانت معاها حبوبة إسعاد ودي طبعا هي ام

امي وحبوبة إسعاد دي القلب الحنون ،قلت ليها خير

ياحاجة جدو قال لي عاوزاني !!! قالت لي عاوزاك دايرة

اشوفك اكلت ولا لا لكن لقيتك حايم وقالت جملتها

المعهودة ‏(قلبي علي جنايا وقلب جنايا علي حجر ‏) ،،طوالي

نطت حبوبة إسعاد قالت ليها انتي يا بتي جناك دا مالو

ماشي مسلوب من لحم الدنيا انتي ماقعد تأكليهم ولا شنو؟؟

امي قالت ليها والله يا امي ما خليت شي ما عملتو ليهم

الاكل دا نختو في الصينية ياكلو ويفضلو لكن الولد مباري

ليهو لغاويس وكتب كدي مانا عارفين نسوي معاهو شنو

ذاتو غلبنا وفترنا،،حبوبة اسعاد قالت ليها ديل كتب شنو

ولغاويس شنو يابتي؟؟؟

اها ودا الخايف منو ذاتو انو امي تكلم حبوبة إسعاد

بالكتب والحاجات القاعد اقراها،لأنو حبوبة اسعاد زولة

قديمة طبعا وناس مشايخ وفقرا عادي ممكن تقول الولد دا

راكبو جن أحمر وكلام الحبوبات داك،،حاولت أطنش الكلام

قلت ليها ياحبوبة امي بتقصد ليك كتب الجامعة والكلام دا

يلا انا أخليكم وامشي علي جدو قبيل قال ما تتأخر دايرك

انا .......

..... ومشيت علي جدو وخليت امي مع حبوبة وعارف أمي

ما بتسكت، غايتو عدينا الليل دا في الونسة والضحك

وابوي وجدو يجرو في شريط الذكريات وكيف ابوي لما جا

عشان يخطب أمي ،غايتو حكاوي من الطراز القديم،نمنا في

امان الله بعد اتعشينا حوالي الساعة 11 والجو كان مغري

للنوم مش زي جو امدرمانات ملوث بالدخان والبعوض

وغبار الركشات دا كلو غير الازعاج غايتو نمنا نوم زول ليهو

سنين ما نام،أها في الليلة دي شفت لي منام ودا كان

مقدمة لحاجات كتيييييرة حصلت لي بعد كدة،اهت في

المنام دا شفت لي بت ما شاء الله يعني ممكن نقول اجمل

بت علي وجه الأرض،او زي ما بنقول نحنا كشباب

صارووووخ،جاتني لابسة ملابس من الذهب وخاته ليها تاج

في راسا،والمكان كان بشبه جزائر امدرمان لكن أجمل

خضرة وجمال ومياه،قاعدة ليها في كرسي أشبه بالعرش

قالت لي جمله واحدة حنتلاقي قريب إستعد انا طوالي

قمت من النوم مهجوم بس ماعارف الهجمني شنو وانا بتكلم

مع هذا الكم من الجمال ......

......بعد الخلعة دي بمسافة حتي ركزت انو دا كان

منام،لكن كل الحصل دا كأنو كان حقيقة وما مجرد حلم

ساكت !!!بقيت صاحي باقي الليل لغاية أذان الصبح وانا

افكر في الموضوع دا،لغاية ما الجماعة صحو من النوم

واتوضينا واتوجهنا علي الجامع .......

...... انا لاول مرة من فترة بعيدة أصلي الصبح حاضر،كان

في خشوع وسكينة وهيبة للمسجد دا،حتي الامام كان شيخ

وقور الحمد لله غ

ايتو حسيت براحة ما بعدها راحة في اليوم داك،وبعد

انتهاء الصلاة والناس بدت تطلع بديت افكر هل احكي

الحلم دا للشيخ دا يمكن عندو تفسير او ما احكي ليهو؟؟

ولو حكيت ليهو تبعات الكلام دا شنو خصوصا انو الزولة

الانا شفتها دي لايمكن بأي حال انها تكون بشر لانو مافي

بشر بالجمال دا،، ولايمكن انها تكون ملاك لانو انا ما زول

صالح يعني عشان يظهر لي ملاح في المنام،اذا ياهم

جماعتي ذاتم !!!! الله اعلم ......

......غايتو اتوكلت علي الله ومشيت اهلي قلت ياخ

الشيخ دا يشبكني اضغاث احلام وبتاع فشنو احسن اختصر

وامشي آخد لي نومة عشان امشي علي الشباب لموضوع

الرحلة،،الواحد ذاتو يشوف القرية وجمال القرية علي

طبيعتو ويشم العافية بعد صخب المدن ......

......يادوب الشمس بدت تظهر جابو لينا شاي بحليب

وقهوة،شربنا الشاي بالقرقوش وبعدو شربنا القهوة،مشيت

لبست ملابسي عشان أطلع علي شلة الشباب،بلا جات

حبوبة إسعاد وامي دخلات،حبوبة قالت لي ماشي وين؟؟

- ماشي لرحلة مع الشباب ....

-قبل تمشي عندي معاك كلام قدام أبوك وجدك ديل وبعدين

أمشي الرحلة ما طايرة .....

اها انا هنا عرفت الحاصل ،،طوالي ختيت انو أمي

الليل كلو بتكون بتحكي ليها عن كتب العفاريت،،اللييييلة ما

وقع راجل،حبوبة إسعاد وجدو علي مرة وااااحدة !!!!امانة

الليلة ما وقع راجل،،قلت ليها ياحبوبة لكن الشباب لو

إتأخرت عليهم بزعلو ....

-يزعلو ولا يطرشقو ياولد قلت ليك عندي كلام معاك قدام

جدك وابوك ديل وان مرقت قبل تسمع كلامي ما عافية

منك ....

- خير ياحبوبة واها قعدت واتوهطت ليك في السرير احكي

وسمعينا ياحبوبة .....

- انت يامحمد ولدك دا تطلقو ساكت!!!! دا شنو الدرب

الماشي فيهو دا؟؟؟

-والله ياحاجة الولد دا من صغير انتي عارفة انو مابشبه

الناس هههه طوالي بحب حركات الجن ديل ....

- نان يا ولدي الشياطين ديل بهظرو معاهم !!! ولا انتو

قنعانين من الولد؟؟؟

-والله ما قنعانين منو عاد في زول بقنع من جناهو؟؟

-وانت يا ولد انت ماك شايف جرسة امك وخوفا عليك

دي؟؟؟اسع انت نصيح ولا في جن راكبك .....

..... هنا جدي علي فك ليهو ضحكة انا ماقدرت اعرف

الحاصل لكن الحمد لله بعد الضحكة دي قال لحبوبة إسعاد

راكبو جن كيفن ياحاجة الجنا ما ياهو دا قدامك ساغ سليم

وانا الجنا دا اصلي ماني خايف عليهو لانو بذكرني

بشبابي .....

..... غايتو اليوم داك مرقت منهم بعد صعوبة واتوجهت

علي الشباب لقيتهم منتظرين ومكتملين العدد بس انا

الناقص لما جيت بقو يصفرو لما حسيت نفسي جون

سينا،،ركبنا عربية هايص حقت واحد من الشباب

واتحركنا،،غايتو فتنا لينا كم حلة كدي،بلا ظهرت زي غابة

كدة،نزلو الفرشات والحفاظات وعدة الاكل،ونزلو آلات

الطرب،وطبعا شباب الحلة ديل يحبو الطرب حب شديد

خلاص وعندنا فنان ناشئ في الجلسة دي،،بعد ظبطو لينا

الفطور قعدنا ليك للغناء بمزاج وايهاب مسك العود وبقي

يدندن في أغنية لمصطفي سيدأحمد بتقول .......

الأمانى الفى سفر

قبل الزمن .. كايسة الموانى

يوم تجيبنى عليك .. بصدّق

إنو مرة الحظ طرانى

وإحتوانى معاك شجن .. عذبنى قبلك

ولسـّة منك .. جايى تانى

تمشى وين الخطوة عنك

ما الزمن بى الحب بلاكا .. وإبتلانى

...... الغنية دي عندها مكانة خااااصة عندي،،اها كلنا بقينا

نغني معاهو وزول غناي غناي،عدينا اليوم في بهجة وفي

فرح وأجمل حاجة في الدنيا انو يكون عندك أصحاب،نهاية

اليوم اتحركنا راجعين علي الحلة،لما وصلنا هناك شفنا ليك

خلق ملمومة قصاد بيت ناس الطاهر ودحماد،وهنا الشباب

جاطو والهرج زاد وكلو واحد يقول يارب جيب العواقب

سليمة ......

الطاهر ودحماد دا من كبارات البلد ومن أغني الناس الفيها

النوع البقيف في اي مناسبة وبخدم بضراعو وبمالو يعني

زول قدامي تب وكتير حل مشاكل في البلد دي وماسك

ليهو بيوت أرامل ومساكين عشان كدة ناس البلد بريدوهو

ريدة جد ريدة لله ما ريدة مزيفة وما أجمل قلوب ناس

البلد وما أجمل حن البلد حن صاااافي ما فيهو أي زيف

....... اها وصلنا محل اللمة دي خير ياجماعة مالكم

الحاصل شنو؟؟ رد لينا واحد من الناس الموجودين قال لينا

والله الطاهر قاعد في أمانة الله في السوق ومعاهو جماعة

دايرين منو غرض اها فجأة كدي جاتو زي دوشة لكن جا

البيت ماشي ومتحرك أسع غايتو الدكتور قاعد معاهو جوة

دا منتظرين نعرف الحاصل،،بس دعواتكم معانا ياشباب ....

......بعد نص ساعة الدكتور جا طالع الناس اتلمت

فيهو،خير يادكتور،،الحاصل شنو،،،حاج الطاهر علو

سلامي!!!!

-وين أولاد حاج الطاهر؟؟ جاهو ولدو الكبير،خير يادكتور؟

- خير ان شاء الله بس لازم الليلة تتحركو بيهو علي

الخرطوم تعملو الفحوصات دي وتمشو للدكتور طارق وان

شاء الله كل حاجة حتكون سليمة .....

- الحاصل شنو للفحوصات دي كلها،،مالو الحاج دا نعل مافي

حاجة؟؟

- لا ان شاء الله مافي حاجة ،بس دي فحوصات للاطمئنان

ما أكتر،وان شاء الله قبل العيد حتجو راجعين بإذن

الله ......

..... قريب المغيب اتحركت عربية حاج الطاهر تتبعو

دعوات ناس الحلة شيب وشباب بالشفاء والعودة سالم

وغانم .....

يتبع ...