الجزء 2
.بعد مالعربية اتحركت كل الناس اتحركو علي بيوتهم
تلازمهم الدعوات جهرا وسرا لحاج الطاهر بالعودة
سليما ......
...... انا فارقت الشلة واتوجهت علي البيت وكان الوقت
مابين المغرب والعشاء،جدي وابوي ومعاهم جماعة قاعدين
في حوش الديوان وبتونسو والضحك والقرقراب واصل
الشارع،اديتم السلام نفر نفر داير امشي جدي مسكني ،وفي
أضاني قال لي خلي بالك الليلة إسعاد زعلانة مننا الاتنين
قلت ليهو مالا البزعلا شنو؟؟
-كيفن البزعلا شنو كلامنا القبيل داك زعلا اسع مابي النضم
تب ....
-طيب ما تصالحا يا جدو يابتاع الحنان .....
- حنان مين خلاص كان زمان كدي امشي غير هدومك دي
وامش عليها شوف الوضع كيف وتعال لي وريني 》 هههه
انا في اللحظة دي حسيت بإني جاسوس ونجاح المهمة
يرفع الواحد مقام عند جدو علي،يحب الزول الينفذ ليهو
اوامرو ويونسو ويضحكو،،لكن تقعد تتماطل معاهو
وتجرجرو تاني انت مازولو تب《
..... في الخرطوم كان حاج الطاهر واولادو يدخلو من
غرفة لغرفة من غرفة الاشعة للدكتور للصيدلية وهكذا لغاية
ما كل الفحوصات انتهت بعد الليل ما أليل خلاص والدنيا
قربت تبقي صباح ذاتو،،اتضح انها كانت مبادي جلطة لكن
الحمد لله عدت علي خير،لكن الدكتور قال ليهم حنحجزو
في المستشفي لمدة 24 ساعة وبعد كدة لو ماحصلت
تغيرات ممكن تسافرو عادي،،الخبر وصل ناس البلد انو
الوضع مطمئن وانو حيحصلو العيد معاهم،،الوضع في البلد
أتغير من حزن لفرح،،كيف مايفرحو والعيد ماشي عليهم
واكيد مساعداتو للناس الطيبين في مستلزمات العيد
ومناسبات العيد ما حتقيف ودي من أسباب البركة الحاصلة
عليهو في تجارتو وفي حياتو وفي أسرتو ......
☆☆☆☆☆
..... نحنا بعد صلينا العشاء وقاعدين في امانة الله نادتني
حبوبة إسعاد ،، جدي عاين لي كدي وقال لي اوعك تتكسر
ليها،،لو اتكسرت انا مابقيف معاك تاني،،ومشيت خليتو قلت
ياربي جدي دا كلامو دا جنسو شنو !!!ودايرني كيف ما
اتكسر ليها !!!يلا المفارقات البين حبوبة إسعاد وجدي علي
انو حبوبة إسعاد دي بتخاف من العين والحسد والجن
والكلام دا وعندها غرام مع الشيوخ والفقراء يعني
إعتقادات الحبوبات ديك تقول ليك وحات الشيخ اب
ساطور ووحات الشيخ اب قبة يعني إعتقادات كدي غايتو
الزول مايقدر تاني يغير وجهة نظرا دي مهما كان،،،أما جدي
علي فعايش حياتو زي الترتيب الصباح يقوم الصبح في
الجامع ويقرأ الورد حقو يجي البيت يلقي الشاي والجبنة
جاهزات يشوف ليهو جريدة يقراها ولا يشغل الرادي ويسمع
في البي بي سي او اذاعة لندن وبعد كدة يقوم يصلي
الضحي ويقعد يرتل في القرآن لغاية الفطور،،وبالنهار يمشي
الحواشة يشوف أخوالي والزراعة والعصر عندهم لمة في
الحوش لكبار السن ويقعدو يتذكرو في العهد القديم وايام
زمان ومقارنات بين الاجيال،،،،في المسافة دي انا وصلت
حاجة إسعاد قبل ما أفتح خشمي قالت لي أوعك تسمع
كلام جدك دا وتعال اتقص أقعد قدامي وأحكي لي الحاصل
شنو واوعك تحاول تغشني لأنو أمك حكت لي الحاصل
بالضبط بس دايرة أسمع منك انت
انا الساعة ديك ما عرفت اقول لحبوبة إسعاد شنو ولا أخلي
شنو،،وما عرفت أمي حكت ليها شنو بالضبط عشان أقوم
احكي ليها شي تاني،غايتو الله يعدي الزنقة دي علي
خير ......
...... انا في سرحتي سمعتها تكورك فوقي ،،مالك سكت
غلبك النضم ولا بتفكر تكضب علي؟؟
-أبدا والله ياحاجة هو في زول بقدر يكضب عليك انتي
الحنان وبعدين في زول بكضب علي حبوبتو محاولة مني
عشان ارقق قلبا ولكن لا حياة لمن تنادي ....
-بلا حنان بلا كلام معاك اها شن جنسن اللغاويس المباريهن
ديل؟؟
- ياحاجة ديل ما لغاويس ديل كتب بتاعة معرفة وبعدين
مش قالو من عرف قوما أمن شرهم؟؟
- انت البوديك تعافر شنو عشان تامن شرهم؟الشواطين ديل
خربو راسك !!!
- خراب شنو يا حاجة أبدا والله بالمناسبة الجماعة ديل
لطاف جدا بس نحنا ماخدين عنهم نظرة سالبة ....
-كيفن نظرة سالبة !!! أسع ان كفتك شيطان ما بيقعدك عزير
لا تدي لا تاخد تجي تقول لي نظرة سالبة !!!
-يلا يا حاجة مافي شيطان بكفت ساكت،الجماعة ديل زينا
نحنا البشر ويمكن ألطف واحن مننا ذاتو،،أسع انتي بتكفتي
ليك زول بلا سبب؟؟
-بري مالي بكفت لي زول بلا سبب جنيت انا !!!
-اها يلا كمان مافي شيطان ولا عفريت بكفت ليهو زول بلا
سبب،،بكفتك في حالة انك اتعديت علي حدودو او اذيتو
فالكفتة دي دفاع عن النفس ما أكتر من كدي،شفتي يلا أنا
بقرا اللغاويس دي زي ما بتقولي عشان اعرف حدودهم وين
عشان ما اتخطاها ويجي واحد يكفتني،وبعدين الجماعة
ديل فيهم المسلم وفيهم الكافر وعندهم قوانين ومحاكم
ومنظمين اكتر مننا لانهم ما بيبادرو بالغلط لأي سبب
كان ....
- يعني أسع دايرني اقتنع ليك بالكلام دا؟؟اها شفت ايام
العيد ديل ينتهن علي خير تمشي معاي للفكي اب سوار
وتاني ما تنضم معاي في الموضوع دا لانو خلاص ......
......بقي ماعندي اي طريقة اني أفتح خشمي تاني ،،لملمت
اطرافي ومشيت علي حوش الرجال بيغادي وشايل هم
الدنيا دا فوق راسي،يعني العيد بعد ما
كان فرحة اسع بالنسبة لي بقي غم ونكد بالشيخ اب سوار
دا،،لقيت جدي صاحي وقاعد في نص السرير بالعراقي
الدمور حقو من شافني بقي يتبسم وقال لي 》زنقتك
حبوبتك جاي صاري لي وشك كدي《 ،، قلت ليهو انت
ياجدي بدل تقيف معاي بقيت تضحك شمتان فوقي؟وبعدين
حبوبتي دي قدرت عرستها كيف ذاتو!!!! ،،فك ليهو ضحكة
من ضحكاتو البتجي من الأعماق ديك اقوي من ضحكة
السر قدور،وقال لي تعرف يا مهاب ياولدي حبوبتك دي
تشوفها تقول مرة من حديد وما عندها قلب لكن يمين الله
يا ولدي قلبا دي حنين خلاص واقل شي يأثر فيها،،لكن انا
ما شمتان فيك أنا واقف معاك لكن انت ما داير تفهم .......
كيف واقف معاي؟؟؟
- عشان أوريك واقف معاك كيف باكر ان ربنا حيانا وبقينا
من ناس باكر بديك حاجة توريك أنا معاك ولا شمتان
فيك ....
-دي شنو الحاجة دي ما تشحتف قلبنا دا ساكت ...
- انت ما تصبر لغاية باكر وبتفهم كل شئ،كل شي في وقتو
سمح تب .....
-بالمناسبة انت قلت لحبوبة انو انا بذكرك بزمنك
الشباب،،كيف الكلام دا؟
-دي قصة طويلة يا ولدي وداير ليها قعدة بمزاج .....
في النهاية جدي نام خلاني بدون مايحكي لي القصة
الطويلة القالا دي،،والله أعلم تاني يلقي ليهو مزاج ولا جو
زي دا عشان يحكيها لي لأنو باكر الوقفة والبيت بكون
جايط وكمان ايام العيد دي قمة الجوطة يعني أنا حأكون
مشحتف كدة تاني ستة يوم علي الأقل،،يعني بقيت بين
أمرين بعد نهاية العيد دا الاول الفكي اب سوار من جهة
حبوبة إسعاد،،والتاني القصة الطويلة الفيها شبهنا انا وجدي
،،يعني شحتفة مابعدها شحتفة،،غايتو جنس حال بس
الواحد يحمد الله،،لكن عيد بأي حال عدت ياعيد!!!!!
...... انا مشيت غيرت ملابسي وجيت رقدت في السرير
قدر ما حاولت أنوم ما عرفت حاجة بقيت افكر ياربي باكر
جدي حيهدي لي شنو؟؟؟ودي شنو الحاجة البيديني ليها
وتخليني متأكد انو جدي واقف معاي !!!! الزول يسوي شنو
ياربي ، وهو جدي ذاتو بلا كتب السيرة وحصن المسلم
والمصحف ماعندو شي،،وديل مافي تخصص الحاجة البحبها
انا،،ياربي حيهدي لي حصن المسلم !!! ويحصني من
الشياطين !!!!!بعد التفاكير دي غايتو نمت لكن بتين ماعارف
وكانت نومة عميقة جدا بعد التعب والارهاق الحاصل في
اليوم دا ......
...... مع النباه جدي صحانا والبيت دبت فيهو حركة او
الحلة كلها بقي فيها حركة بعد سكون الليل المهيب
داك،،قمنا اتوضينا واتوجهنا علي الجامع ،،بعد الصلاة الناس
اتحركت علي بيوتا لقينا شاي اللبن جاهز شربنا الشاي
وبعديهو القهوة وانا في انتظار جدي لمن يقول لي أرح
اوريك الحاجة العاوز اديك ليها وسارح بكل جوارحي مع
جدي ورهن اشارتو بس كيف يقول لي يلا يا مهاب يا
ولدي ......
.....وانا في سرحتي دي جدي قام من جنبنا ومشي جوة
علي الغرفة حقتو،،طبعا غرفة خاصة مافي زول بدخلا غير
بتو إخلاص وهي الأصغر من امي مباشرة،،وغيرا هي مافي
زول عارف الغرفة دي فيها شنو،،بلا أسمع ليك صوت جدي
من هناك ينادي فوقي،،قمت زي الملدوغ جريت
عليهو،،اللحظة المنتظرة من أمس بس ما كنت متخيل انو
في يوم من الأيام بدخل عرين الأسد واشوف فيهو
شنو ......
....... دخلت الغرفة قال لي أقفل الباب دا،،قفلت الباب
وجيت قعدت في العنقريب العتيق حقو مصنوع من خشب
الابنوس وفيهو زركشات كدة ما عارف ذاتو العنقريب دا
جايبو من وين حاجة تحفة كدة مفروض يكون في المتحف
مافي غرفة معزولة زي دي،،قبل ما إتمعن باقي الحاجات
جدي جا شايل ليهو صندوق صغير كدة في شكل مربع
وختاهو قدامي،،وقال لي دي الحاجة الداير أديك ليها،،قلت
ليهو صندوق أعمل بيهو شنو؟؟قال لي ما انت لو فتحت
الصندوق حتعرف تعمل بيهو شنو،لكن مرات تقول مخك دا
بربط ......
......يلا يا جماعة كدي قبل ما احكي ليكم عن محتوي
الصندوق النحكي ليكم عن غرفة جدي،او المخبأ السري
لجدي علي،،يلا ركزو معاي النحكي ليكم .....
..... غرفة جدي مبنية في طرف الحوش مافي جنبها أي
حاجة،،والعجب العجيب انو مافيها شباك نهائي،يلا اول ما
تدخل الغرفة دي بتحس بحاجات كدي ما معروفة شنو
ذاتو،،أحاسيس مخلوطة بين دهشة وخوف،،يتوسط الغرفة
العنقريب البلدي العتيق المصنوع من خشب الأبنوس،ومعلقة
في الحيطة فروة جلد نمر بستخدما جدي كمصلاية
صلاة،،وفي ركن الغرفة صندوق خشبي قديما كانو بسموهو
السحارة بحفزو فيهو الحاجات ،،اها الصندوق دا او
السحارة في زخارف بالدهب الصافي،،وفي طربيزة كبيرة
فيها غزال محنط وفهد محنط في وضعية الافتراس،،دا غير
الكتب الدينية والمجلات والجرائد القديمة من زمن
الانجليز،، يعني غرفة من الخيال فيها عالم روحاني
وسحري عجيب ،جدي لمن شاف سرحتي طولت قال لي انا
جبت للصندق القدامك دا ماعشان تتمنظر في الغرفة اها
حتفتح الصندوق ولا أرجعو؟؟؟
- ترجعو كيف ياجدي قول بسم الله ....
-قول بسم الله انت وافتح الصندوق دا وشوف
هديتك ......
......اها انا فتحت الصندوق المجهول ويا للروعة لقيت
في الصندوق أجمل كتب ممكن زول زيي يكون يفتش ليها
زمن طويل ويجي يلقاها قدامو كدة يعني فرحة ما بعدها
فرحة،،يلا الكتب دي هي 》 كتاب شمس المعارف الكبرى
يتبع ...